Jon, echî 1 - Ejagham New Testament

Jisos Krayis a ri eyum Obhasi

¹ Kən ngun a bhá roghe, nne nnyo a ri eyum Obhasi a jóe. Á kumá na Obhasi. Yê fə́ne a ri Obhasi.

² Ta ka eróghá-ndə́p, nne nnyó a ri na Obhasi.

³ É chíŋi mbâ eye kən Obhasi a yîm ngun na chénchén iyîm ka ngun. Kpe ejûm jə́t cháŋ nji á yími nji é ká chiŋ mbâ eye.

⁴ Nne nnyó a ri njû ekpin. Ekpin njí nâ é bháe na ebhát mbâ ane.

⁵ Ebhát njí é kí ya ka eji ejírim, kən ejírim é ká nok ńjə́ne obhuí.

⁶ Obhasi a túmi nkara-otîp owe yót, a kamá se Jon.

⁷ Nkara-otîp nnyó a bháe noŋ ntî-isê, a bhá səre ane nchot ebhát njí. Se ane chénchén á yúk, á kí ḿbə́ŋé na ebhát njí.

⁸ Yê asík a ri ebhát í nchane, kən a bháe a bhá səre ane nchot ebhát njí.

⁹ Ńjə́ne nâ é rî mfoné-mfoné ebhát nji é bhâk nná ka ngûn. A ri ebhát í nchane nâ é tʉ̂k ane chénchén mbá.

¹⁰ É fap mân sê nne nnyó a ri ka ngun. É chíŋi mbâ eye kən Obhasi a yîm ngun, kən ngun á ká məŋé sê yê a ri na ábho.

¹¹ A bhák mbâ ane abhê kən á ká ko yê na ogyebhá-ḿbə́ŋé.

¹² Kən ane mba á kóe yê, á kî ḿbə́ŋé na yê, a káre ábho ikom se á chə́bhe abhon Obhasi.

¹³ Á ká chəbhé abhon Obhasi sê á dʉ̂ agyʉ́ŋ mát. Á ká chəbhé sê á ji nne ojí, na sê á dʉ̂ ndə́p-i-njû.

¹⁴ Nne nnyo a ri nná eyum, a chə́bhe mân nne noŋ êt, a bhâ kúmi na êt. E yên ekpatə́m eyúp ejê nji é súi na onobhá-eji, áfúbhí ka etím cháŋ. Eyúp njí a ri eyúp nji Mmon yót nnyo Obhasi Ńsé a fonê.

¹⁵ Noŋ ntî-isê nne nnyó, Jon a kí kuk a chíŋá se, “Ńgyê ên nne nchane. Ń səre ên bəre nne a kə́ bha mbá-njəm amé. Yê a fâŋ a chíŋi ə̂m. Echî aŋ? Kən á jí ə̂m, yê a ri. Nne nchane a ri yê.”

¹⁶ Ka onobhá-eji obhê mbi ó sui ó fuk, a káre êt ofa ka mkpak ka mkpak.

¹⁷ Ejûm nji Obhasi a túmi na Mosis a ri ebhín. Nji a túmi na Jisos Krayis a ri onobhá-eji na mfoné nchot eye.

¹⁸ Kpe nne nnyo a nok oyén Obhasi cháŋ. Kən Mmon owe yót-ayorâ nnyo a ri Obhasi Mmon nâ a yimî se ane á mə́ŋe Obhasi. Mmon nnyó nâ a ri obhô-orûm obhê.

Otîp í Jon nnyo mfúgha-ane-ayép

¹⁹ Ńgyê nchot nnyi a fábhe Jon ka nnyo noŋ ntî-isê. Atúi-ofâm ane Jus ka eték í Jerusarem á tûm akará-agore Obhasi na ane ndə́p-i-njû Libhayi sê á jí bhə́p yê a sə́ré ábho ekpak í nne nnyo yê a ri.

²⁰ Jon á ka taŋé ebhə̂p ábho etámám, kən a táme ábho jaát, se, “Mme asík nâ n di Krayis, nne nnyo Obhasi a túmi se a bhá yim ngun á sém.”

²¹ Ane mbá á bhə̂p yê sê, “We mân nâ énê? We a ri Erayija nchane a?” Jon se, “Mme asík.” Á kpô bhə́p yê sê, “We a ri nkara-otîp Obhasi nchane a?” Jon se, “Ée.”

²² Kən sê, “We a ri énê mân? Sə́re êt, ka e ri é jî na esə́re mbâ ane mba á túmi êt. O kí səre êt jen ó kpê na biji ibhâ?”

²³ Jon se, “Mme a ri nne nnyo a ri nná ka etə́m, a bhíná a sə́rá ane se á yîm mbá ntûfâm a joé tə́níní yê a bhá chiŋ.” Nchot nnyi Jon a sə́re ábho a ri Asaya nâ a séŋe.

²⁴ Etʉ̂ ane Jus mba á rî ka echəme Farasi ka ekam njí,

²⁵ á bhə̂p Jon sê, “Ájoé we asík nâ o ri Krayis, nne nnyo Obhasi a túmi se a bhá yim êt é sém, we Erayija asík, we nkara-otîp Obhasi nchane asík, jen kən o kí fuk ane ayép?”

²⁶ Kən Jon se, “Nchot amé tîk? Mme n kí fuk ane a ri ayép, kən nne owəné etat a ri nnyo ó ka məŋé ên.

²⁷ Nne nnyó a kə́ bha ə̂m mbá-njəm, kən ń ka bhik nnyo n kí kpat kpe arík iyîm-akát ibhê.”

²⁸ Achot mmá chénchén á fábhe ka aya Jodan ka eték í Betani njəm aya nnyi Jon a gyím a fúghá ane ayép.

Jisos a ri mmon-i-njo-mbúi Obhasi

²⁹ Ofú ábhi ó kpó chiŋ ntem-ofú, Jon a yên Jisos a kí jen a bhák yê mbâ biji. A chôt se, “Ńgyê mmon-i-njo-mbúi Obhasi á bhak. Yê nâ á yighá obhí ane ka ngun.

³⁰ Yê nâ ń səra nná bəre nne nnyo a kə́ bha ə̂m mbá-njəm a fâŋ a chíŋi ə̂m. Echî aŋ? Kən á jí ə̂m, yê a ri.

³¹ Kpe mme ḿfoné ń ka raŋ mbá kpá m mə́ŋe yê. Kən m báe, m fúghá ane ayép bəre ń yîm ane Isrel á mə́ŋe yê.”

³² Ḿfa a ri eyum í nchot i Jon noŋ ntî-isê, “N yên Obhasi Ebhare Ntʉgantʉ a bhərá a bhák nnyi ósô noŋ ibhʉ́í, a bhâ jóe na yê.

³³ Kə́n ń ka məŋé yê təm nji Obhasi nnyo a túmi ə̂m se ḿ bá fúk ane ayép a sə́re ə̂m se, ‘Nne nnyo ó yen Ebhare Ntʉgantʉ omé a bhâ jóe na yê, a ri yê áno. Yê nâ a kí su ane ḿbə́ŋé na ńtʉgântʉ amé.’

³⁴ Na amə̂t amámé, mme Jon, ń yen. Nâ ńjə́ne mân n kí səre ên bəre nne nnyó a ri Mmon Obhasi.”

Jisos a sâŋ araŋá-mbá ágbán abhê

³⁵ Ofú ábhi ó kpó chiŋ ntem-ofú, Jon a bhâ kpô gyímí ka eji njí. Ane mba á tóbha yê ábháe á rî áfo na yê.

³⁶ A kpo to a yén Jisos a kí chiŋ, a chôt se, “Ńgyê nne nnyo a ri mmon-i-njo-mbúi Obhasi.”

³⁷ Atóbhá Jon mbá á kpó yuk nji ńsé ábho a chorê nná, á mághe yê á kí top Jisos.

³⁸ Jisos a kpíghi echî a yên noŋ á tóbha yê. A bhə̂p ábho se, “Ó woma ên jen?” Á táme sê, “Rabayi, we ó kumá fan?” (Rabayi nâ se ńsé nnyo á kpik ane achot.)

³⁹ A sə́re ábho se, “Bhák ó jí yén ên.” Ka ebhú njí, ńkánínká a sî kpe ófó. Ane mbá á jak fə́ne á jî yên eji nji yê á kumá, á kə̂t na yê ta atʉ́ á nyâk.

⁴⁰ Ka ane mbá ábháe, yót á kamá se Andru, nnyo mmon-i-nnyen i Simun Pita. Nji a yúghi nchot i Jon, a jî kə̂t na Jisos. Nji a kə́re, a mághe

⁴¹ a jak a jî yên mmon-i-nnyen owe a sə́re yê se, “É yen nne nnyo Obhasi a túmi se a bhá yim êt é sém. Nne nnyo á bhíŋa áno sê Krayis.”

⁴² A kô fə́ne yê a jak mbâ Jisos. Jisos a kêp Simun nyamḿ a sə́re yê se, “We ó kamá se Simun, mmon i Jon. Mbiŋ eya tîk a kamá se Sefas.” Sefas na Pita á rî ekpak í mbiŋ jə́t. Echî obhiŋ mbí a ri eránám.

Nataniye a kâm se Jisos a ri Mmon Obhasi

^43-44 Ofú ábhi ó kpó chiŋ ntem-ofú, Jisos a yə̂p a kí ji nnyi Gariri. A yên nne-ndûm etat a kamá se Firip. Nne-ndûm nnyó a dʉ eték í Besayida, noŋ Andru na Pita. Jisos a sə́re yê se, “Bhák é jî.”

⁴⁵ Nji a sə́re yê áno, Firip a jî yên ntem etat a kamá se Nataniye. A sə́re ntem nnyó se, “É yen nne ányo nnyo ebhín í Mosis na akará-otîp Obhasi á séŋe nná á kpê. Nne ányo a ri Jisos, mmon i Jusep, nnyo nne Nasaret.”

⁴⁶ Kən Nataniye a bhə̂p Firip se, “Ka Nasaret a? Kə́n ejûm eno é fâp ka eték áji a?” Firip se, “Bhák é jí yén.”

⁴⁷ Nji Jisos a yéne Nataniye a kə́ bha, a chôt a bháŋe na yê se, “Nne nnyó a ri mfoné-mfoné nne Isrel nnyo kpe mkpât áfúbhí cháŋ bhúghí-bhúghí!”

⁴⁸ Nataniye a bhə̂p yê se, “O yimî nan o mə́ŋe ə̂m?” Jisos se, “N yên wâ ka ebhú o ri ka ndə́p étí fîk, kən Firip a bhiŋ wâ.”

⁴⁹ Nataniye a chôt mân se, “Ntóŋá, we a ri Mmon Obhasi ka etʉri. We a ri ntûfâm ane Isrel.”

⁵⁰ Jisos se, “Ó kam ka n sə́re wâ bəre n yéne wâ ka ndə́p i fîk, kən tîk o yên iyîm mbi í fáŋe í chíŋi mbí mfá.”

⁵¹ A sə́re mân chénchén ábho áfo se, “Deê ń sə́ré ên ka etʉri bəre tîk o yên ên ósô ó rə́bhe, baénjel á gyʉra á bhəra á bhak mbâ Mmon-i-ntem-nne.”