От Матфея 7 - Новый Завет на эскимосском языке

Нанқихтиснанилъық

¹ Иисусым апыҳтӯсяни нагныӷуткӣ: «Нанқихтихпынаси иляхпысиның ынка̄м Кияӷныӷым нанқихныӷилъиси,

² қаюҳлъяк Кияӷныӷым нанқихлъықӣси таўатыңўа̄қ нанқихтилъыҳпысистун иляхпысиның. Атуқылъықӣлъю лъпысинун ата̄сит тама̄кут пикаси иляхпысинун.

³ Сяңан ысҳаҳсигу юлгутыхпык ӣсқуӷутңа, лъпык катам ӣсқуӷутын унаҳсиҳлъяк авылӷаӷлюку?

⁴ Сялӷӣмың юлгутын пизигу: “Ынта̄а ӣсқуӷутңиқаӷлякын”, лъпык паниның ӣсқуӷутылгулютын унаҳсиҳлъягмың?

⁵ Уюқ пинӣюгнық! Сивуклъюку унаҳсиҳлъяк ийыхпының нусюглюку ынңа̄талъ хўатыҳлъюўа̄қ ысҳаӷлюку юлгутын ӣсқуӷутңиӷнакын».

Лыгасӣӷўаҳтынун Апыҳтӯсяқыхпынаки Кияӷныӷым Акузитаңи

⁶ Та̄хкын Иисусым пикӣ: «Лыгасӣӷўаҳтынун апыҳтӯсяқыхпынаки Кияӷныӷым Акузитаңи, қаюҳлъяк қикмистунлъю, куругаӷыстунлъю аюқут. Сяңўа̄т аглыӷналӷӣт тӯныхпынаки қикминун лю̄рақ сюӷугнаюкаңиси. Акитуқат сюңа̄т милю̄тыхпынаки куругаӷнун, лю̄рақ тутма̄сҳақнаюкатки».

А̄птылъық, Иваӷилъық, Тыңлюхтулъық

⁷ «А̄птык, алъхыӷулъықуси; иваӷитык, на̄лъкулъықуси; тыңлюхтуҳтык амихкун, қылъпыӷулъықӣси.

⁸ Қаюҳлъяк кина алңунак а̄плъыҳӣ, алъхыӷусяҳқа̄гуқ; кина алңунак иваӷилӷӣ, на̄лъкусяҳқа̄гуқ, кина алңунак тыңлюхтулӷӣ амихкун, қылъпыӷулъықа̄.

⁹ Китум югым иӷныни туңсиқан нықыкшаңлъямың, тӯнылъықагӯ уйӷагмың?

¹⁰ Налиӷмың туңсиқан иқалъюгмың, тӯнылъықагӯ нымыӷьямың?

¹¹ Сыӷлыӷуӷңа̄ҳпыси, авақутаси тӯньяҳқақаси пинилӷӣмың тунусямың. Атази қилягмылңуқ тӯниюгатаӷаӷлюни аюқуқ пинилӷӣмың тунусямың тама̄кунун а̄плъыҳинун лъңанун.

¹² Ынка̄м юлгутыхпысинун пинитун пистысюкуфси, лъпысилъю пинитун пӣқитыки. Таўатын апыҳтуӷиңӯт Моисейем Лӣлиҳтӯсӣлъю, ӯкналиқистытлъю игақыхкӣт».

Кахпыста̄ҳақ Амик

¹³ Та̄хкын Иисусым пикӣ: «Итыҳтык кахпыста̄ҳаҳқун амихкун. Амик геенамун аюқылӷӣ нуқутӯқ, тӯмкыхтуқлъю ынка̄м угляқ та̄кўагун иглыҳтақуқ.

¹⁴ Иўырңа амик уңувалъыӷмун аюқылӷӣ кахпыста̄ҳа̄гуқ, тӯмлъюгмытуқлъю ынка̄м қафсинкӯраҳа̄м на̄лъкақӣ тумыт уңувалъыӷмун аюқылӷӣт».

Натын Лӣгикылъыҳқӣ Ӯкналиқистысиӷўа̄ӷыт

¹⁵ «Кылыңалюси ӯкналиқистысиӷўа̄ӷның. Такулъықӣси пынъӣҳсюгниҳқылъютың, та̄ўаңинақ угиҳсялӷӣстун ама̄стун аюқут.

¹⁶ Лӣгикылъықаси наңаӷныӷитхун лӣгикылъыҳпысистун уқфигыт сямың пӣтыстилъҳитхун. Сикуҳлъюгыт пӣтыстиңигатут виноградымың налиӷмың смоквамың, таўатыҳпигақ сыӷлыӷыт югыт пинитун пиңигатут.

¹⁷ Уқфик пинилӷӣ пӣтыстияҳқа̄гуқ пинилӷӣмың, та̄ўаңинақ уқфик сыӷлық пӣтыстияҳқа̄гуқ сыӷлыӷмың.

¹⁸ Уқфик пинилӷӣ пӣтыстина̄нӷитуқ сыӷлыӷмың, уқфик сыӷлық пӣтыстина̄нӷитуқ пинилӷӣмың.

¹⁹ Ынка̄м алңунак уқфик пӣтыстинӷилңуқ пинилӷӣмың кыплъюни кумаҳсяҳқа̄гуқ.

²⁰ Ынка̄ңам таўатытылъҳитхун лӣгикылъықаси ӯкналиқистысиӷўа̄ӷутаңи».

Итыӷьяҳқат Атаныҳпагулъҳанун Қилягым

²¹ Иисусым апыҳтӯсяни нагныӷуткӣ: «Иляңи югым хўаңамнун малихся̄ҳтыкнӣқут ынка̄м пӣқа̄тңа: “Атанқамкын” иўырңа итыӷна̄нӷитут Атаныҳпагулъҳанун Қилягым. Тама̄куңина̄т атуқилӷӣт пиюкылъҳаның Атама қилягмылңӯм итыӷьяҳқа̄гут Атаныҳпагулъҳанун Қилягым.

²² Нанқихтилъҳым Аӷныӷани, углям пияҳқақа̄ңа хўатын: “Атанық, Атанық! Атыҳпыгун Кияӷныӷым уңипа̄ а̄пқақаҳпут. Атыҳпыгун а̄нысқуқақапут туӷныӷа̄т углялӷӣның югның. Атыҳпыгун алъя̄ҳлъюхўаҳтӣӷа̄тақа̄гукут угляӷңа̄н!”

²³ Иўырңа хўатын пилъықанка: “Налъюкңўа̄ӷамси, иқитык хўаңамның, сыӷлытун пистыни”».

Аюгилңуқ Тунымақ

²⁴ «Кина алңунак нагалъҳӣ апыҳтуӷилъымнун, қа̄ткыхкумики пыҳқинылӷӣтун юхтун аюқуқ мыңтыӷаңлъяқақ уйӷагым қа̄йңакун.

²⁵ Ыслъялъюгуҳтыҳлъягьялӷӣми, кӣўыт улывумаӷмың, ануқлъиҳлъягьялӷӣмилъю, таўалъӣма мыңтыӷақ ӯлъҳумаңилңуқ қаюҳлъяк уйӷахкун ныкыфтыка̄лӷӣ.

²⁶ Иўырңа кина алңунак нагатыӷңа̄ӷми апыҳтуӷилъымнун, қа̄ткынӷилъкумики, налъюқатун юхтун аюқуқ мыңтыӷаңлъяқақ қына̄ҳлъюхкун.

²⁷ Ыслъялъюгуҳтыҳлъягьялӷӣми, кӣўыт улывумаӷмың, ануқлъиҳлъягьялӷӣмилъю, ага мыңтыӷақ ӯлъқақ на̄вңўа̄ӷлюни».

Иисус Апыҳтуӷилӷӣ Аҳтуӷьяҳқа̄нӷилъылиӷлюни

²⁸ Иисус тама̄кын апыҳтуӷиныӷмың та̄қсян, юлӷутыҳлъягыт сяӷӣӷаюкат,

²⁹ қаюҳлъяк апыҳтуӷикақ аҳтуӷьяҳқа̄нӷилъылиӷлюни, апыҳтуӷикаюгыстун Лӣлиҳтӯсямың пихпынани.