От Матфея 26 - Новый Завет на эскимосском языке

Туқусюкаңат Иисус

¹ Иисусым та̄қсямики апыҳтӯсяқныӷмың тама̄кут, малихся̄ҳтыни пикӣ:

² «Лӣсимакаҳси ма̄лӷук аӷныӷык атуӷлюкык Нықынӷаҳқылъыҳқа̄ Пасхам пинақңӯқ. Ынка̄м Иӷныӷа Югым тӯнылъықа̄т қақӯрӣсқылъюку».

³ Таўани аӷныӷми, первосвященнигытлъю, сӣванлъыӷытлъю қырңуӷуткат дворңани Первосвященнигым, Каиафам.

⁴ Агӷиткыхка̄т Иисус аксяқлъюклъю тугулюку, туқунъалюку.

⁵ Иўырңа пикат: «Нықынӷаҳқымъи пина̄нӷитаҳпут, лю̄рақ югыт сыӷлылӣҳқӣҳлъягнаюката».

Вифаниями Аӷнам Иисус Тыпыңлъяҳқыхкаңа

⁶ Иисус Вифаниямытақңами Симонынкуниткақ проказалгуялӷӣми.

⁷ Аӷнам такука̄ Иисус, тугумӣқлъюкык алавастрык ақимлыӷутак ималгык акитупихлъыҳӣмың тыпыңлъя̄симың. Ныӷумалюку на̄сқўакун кӯвыхкакык тыпыңлъя̄сик.

⁸ Иўырңа малихся̄ҳтыт ысҳаӷлюку таўатын пилӷӣ, угумиягутка̄т хўатын пимаӷмың: «Сяңан сякусӣқакык?

⁹ Акикыхкақсяқумикык тыпыңлъя̄сик маниңуткыҳлъяглюкык аклъюмалӷӣнун тунқуӷнаяӷа̄!»

¹⁰ Иисусым лӣсимаклъюки сямың пикатаңи пикӣ: «Сяңан сыӷлықӯӷыстыху аӷнақ? Пинӣпихтуқ хўаңамнун таўатын пилъҳа.

¹¹ Аклъюмалӷӣт қӯнпың тама̄нсяҳқа̄гут, иўырңа хўаңа қӯнпың лъпысининъа̄нӷитуңа.

¹² Тыпыңлъяҳқылъыӷмикун югусиқа ята̄ҳқыңъўа̄ лъивылъыҳқамнун.

¹³ Ипа уңипа̄тамси, нунатаҳа̄ни тамаҳа̄ни нани алңунак уна Пинилӷӣ Уңипақ уңипақныӷмыхтыху, аӷнам таўатын пилъҳа а̄пҳақылъықа̄т югнун нықамикысқылъюку».

Иудам Увыҳпагусюкаңа Иисус

¹⁴ Та̄хкын Иуда Искариот иляңат қуля ма̄лӷук сӣпнықлъюку малихся̄ҳтыт, первосвященнигнун пилюни,

¹⁵ а̄птыкӣ: «Сямың тӯнылъықыстыңъа Иисус лъпысинун тӯныхкумкун?» Ынка̄м кыстулъюку ю̄к қуля сӣпнықлъюку серебромың манимың лъивикыхка̄т.

¹⁶ Та̄хкын кынлыклъюку Иуда пилъыҳқаңнақыхкақ увыҳпагунъалюку Иисус.

Ята̄ҳқылъық Пасхам Нықынӷаҳқылъҳанун

¹⁷ Сивулиӷми аӷныӷани Нықынӷаҳқылъҳан Закваскалилъҳилъңӯм Нықыкшаңлъям, малихся̄ҳтыт Иисус такулюку а̄птыка̄т: «Нани ята̄ҳқутысюхсин хўаңкунъун Пасхам Нықынӷаҳқылъҳаның ныӷысқылъютын?»

¹⁸ Иисусым кӣмсиқӣ: «Иерусалимымун пикатык. Ю̄к тама̄нтуқ; уңипа̄нъакыси: “Апыҳтуӷиста пӣқ, Пилъыҳқақа ка̄нъақуқ. Малихся̄ҳтыкулъҳӣни ныӷнақаҳпут Пасхам Нықынӷаҳқылъҳа лъпысини”».

¹⁹ Малихся̄ҳтыт Иисусым писқылъҳатун пикат, Пасхам Нықынӷаҳқылъҳа ята̄ҳқыхка̄т.

²⁰ Иӷивгаӷьягу Иисусылъю қуля ма̄лӷук сӣпнықлъюку малихся̄ҳтыкулъҳӣт қаюӷвигитңи ақумӯткат ныӷналютың.

²¹ Ныӷӯсималюки, Иисусым пикӣ: «Ипа пӣмси, налиҳпыси увыҳпагунъақңўа̄ңа».

²² Малихся̄ҳтыт қивӷуҳлъягумаӷмың тӯңлиқутаӷлютың а̄пта̄тақа̄т: «Атанық, хўаңаңўа̄?»

²³ Иисусым кӣмсиқӣ: «Увыҳпагутияҳқақ та̄наңӯқ нықни ныптыкаңа сягныӷмун хўаңамнун малигулъюни.

²⁴ Ипапыста̄қ Иӷныӷа Югым туқуяҳқа̄гуқ Акузитыт Игақыхкат пинақнилъҳистун. Иўырңа сыӷлыӷўа̄ӷунақңӯқ та̄на ю̄к увыҳпагутилӷӣ Иӷныӷаның Югым! Итагнаӷнаяҳтуқ алъхыӷумаңисяқуми!»

²⁵ Увыҳпагутистым Иудам а̄птыка̄: «Апыҳтуӷиста, хўаңаңўа̄?» Иисусым пика̄: «Та̄ўа лъпынун апыҳтутын».

Атанӷым Ныӷыстилъҳа

²⁶ Ныӷӯтңулютың Иисусым тугулюку нықыкшаңлъяқ игамсиқаюгвиклъюку Кияӷнық, а̄вгуӷлюку тунқуқӣ малихся̄ҳтыни. Пикӣ: «Тугулюку ныӷитыху, уна югусиқақа».

²⁷ Та̄хкын тугулюку қаю̄сиқ виномың ималык игамсиқаюгвиклъюку Кияӷнық тӯныхка̄ лъңитнун. Пикӣ: «Мыӷвика̄таҳтыху қамахлъюси.

²⁸ Та̄на а̄кўақа, та̄хун Кияӷныӷым акықуся̄ апыӷӣӷьяҳқа̄гуқ. Туқукума а̄кўа кӯвылъықуқ угляпихлъыҳӣнун югнун сыӷывутусӣлюни сыӷлыҳқылъҳитнун.

²⁹ Уңипа̄тамси, виномың алъя мыӷна̄нӷитуңа кынляңа аӷныӷми таўани, виноӷраӷаӷмың мыӷылгусиҳлъықамси Атама Атаныҳпагулъҳани».

³⁰ Та̄хкын илягаӷлютың а̄нлютың Елеоным найӷаҳанун пикат.

Иисусым А̄пқаңа Петырымун Налъюнқылъықнилюни

³¹ Та̄хкын Иисусым пикӣ: «Унугми хўани, хўаңа апалъюқлъюңа униқаӷа̄лъықаҳпысиңа, қаюҳлъяк Акузитни Игақыхкани Кияӷнық пика̄гуқ: “Туқулъықақа пынъӣӷнӣҳта ынка̄м пынъӣӷыт миңиқылъықут”.

³² Иўырңа уңуваҳтыстыкаңаңа туқулъыӷмың сивухпысини агляҳлъықуңа Галилеямун».

³³ Петырым пика̄ Иисус: «Апалъюқлъютын лъпык қайўа иляма униқаӷа̄тыӷңа̄тын, хўаңа унинъа̄нӷитңўа̄ӷамкын!»

³⁴ Иисусым пика̄: «Ипа уңипа̄тамкын, унукун петух қалӷиҳтыстыхпына̄н, пиңаюның кытўылъ налъюнқылъықаҳпыңа».

³⁵ Петырым пика̄: «Қайўа туқумалгусиӷьяӷңа̄мкын, налъюнқынъа̄нӷитамкын». Малихся̄ҳтытлъю қамахлъютың уңипа̄тка̄т таўатын.

Иисус Юӷалӷӣ Гефсиманиями

³⁶ Та̄хкын Иисусылъю малихся̄ҳтыкулъҳӣт ка̄ткат таўавык атилъқылӷӣмың Гефсиманиямың. Пикӣ: «Ақумӯтык та̄хун, иңавык юӷаӷьяҳтӯмалюңа».

³⁷ Тазиңавык кылъқыхкӣ, Петр, Зеведейемлъю иӷныӷык. Та̄хкын қивӷуҳлъягымлъю, сыӷлылӣӷымлъю ка̄тыкыстақа̄,

³⁸ ынка̄м пикӣ: «Қа̄мнака қивӷуҳлъягӯқ, рыпалъ туқуяҳқа̄ҳлъюңа. Таўанлъюси кылыңалгусиҳтыңъа».

³⁹ Тазиңапиҳқа̄ӷлюни нунамун сикмӯлъюни юӷақақ: «Атамни, пияҳқа̄кан, мыӷынӷилъяңа хўакын қаю̄симың; иўырңа нака̄н пиюкылъымтун, лъпык пиюкылъыҳпытун пигу».

⁴⁰ Та̄хкын Иисусым такуяқминики пиңают малихся̄ҳтыни қава̄фтут. Ынка̄м Петр пика̄: «Кылыңалгусиҳпагниңитыстыңъа̄ ата̄сиқ афлъю?

⁴¹ Кылыңатык, юӷаҳтык нанӷӣқулъыңынӷитысқылъюси. Ипапыста̄қ таӷныӷак пияҳқа̄ӷңа̄ӷмык, иўырңақун югусиқ кая̄туқ».

⁴² Алъямың Иисус тазиңавык агляӷлюни юӷақақ: «Атамни, мыӷьяҳқақңукумкун уна қаю̄сиқ лъпык пиюкылъыҳпытун апыӷӣӷли».

⁴³ Такунқихсяқминики малихся̄ҳтыни, та̄ўа қава̄тңуфтут, қаюҳлъяк қавам сякниқыстыкаңи.

⁴⁴ Иисусым унилъя̄таӷлюки, тазиңани пиңайиқӣ юӷалъыни та̄кут ата̄сит юӷат атуқлъюки.

⁴⁵ Та̄хкын малихся̄ҳтыни такулюки пикӣ: «Та̄ўа қава̄тақыстык, мыӷна̄лӣқыстык? Та̄ўа афлъю ка̄туқ, Иӷныӷа Югым увыҳпагусяҳқа̄ҳтуқ сыӷлыҳқыстынун.

⁴⁶ Ныкывитык, иглыҳтылъта. Ӣи, ука увыҳпагутистыка».

Тугукаңат Иисус

⁴⁷ Иисус паниның акузималюку, Иуда ка̄ткақ, қуля ма̄лӷук сӣпнықлъюку малихся̄ҳтыт иляңат. Юлӷутыт малихтыка̄т, иляңи сявихпалиӷлютың, иляңи анагуталиӷлютың. Первосвященнигытлъю, сӣванлъыӷытлъю каяхтыкӣт малихтысқылъюку Иуда.

⁴⁸ Увыҳпагутистым Иудам ка̄тфагилгамың иляни сялъыҳқаминың уңипа̄ткақыхкаңи: «Ю̄к на̄ӷьяҳқақа лъңаңӯқ пиюкыхкаҳси. Тугунакыси».

⁴⁹ Иудам такўа̄ӷаҳлъюку Иисус пика̄: «Сыӷлыҳалык, Апыҳтуӷиста!» Та̄хкын на̄қа̄.

⁵⁰ Иисусым пика̄: «Илякумта̄мни, ага ся̄қсин пилъыҳқан пигу!» Та̄хкын такулюку Иисус акуқаӷлюку нуқныҳтықа̄т.

⁵¹ Таўани налӣта югыт Иисусымылңӯм сявихпани нусюглюку кыпқаҳтыка̄ сигутңа Первосвященнигым қыпҳаҳтыля̄ӷан.

⁵² Та̄хкын Иисусым пика̄: «Сявихпагын канаҳтигу қантанун, қаюҳлъяк қамахлъютың сявихпагмың атуқилӷӣт сявихпахкун туқусяҳқа̄гут.

⁵³ Сюмыҳпынӣи Атака̄ каютыңлъяӷна̄нӷинъилюку пизигӯ? А̄птыкумкун таўаниңинақ 72,000ының углялӷӣт яқулылӷутыҳлъягыт пилъюўаҳтыт каяхнаяӷӣ.

⁵⁴ Иўырңа таўатын пина̄нӷитуңа қаюҳлъяк Акузитыт Игақыхкат апыӷӣӷьяҳқа̄лӷӣт игақылъыӷмыгыстун».

⁵⁵ Та̄хкын Иисусым юлӷутыт пикӣ: «Тугуяҳтуӷыстыңъа̄ сявихпахтӯмаҳпыси, анагутаҳтӯмаҳпыси, никимқун ўаяӷнӣҳтыстун аюқлъюңа? Аҳутаңа тамаҳа̄н ақумлюңа апыҳтуӷӣқуңа Храмыми тугуңигатаҳпысиңа.

⁵⁶ Иўырңа қамахлъютың тама̄кут таўатын пиңӯт, апыӷӣӷналюки ӯкналиқистыт игақыхкӣт Акузитни Игақыхкани». Та̄хкын қамахлъютың малихся̄ҳтыт унилъюку қимагӯткат.

Иисус Агӷистынун Агля̄скаңат

⁵⁷ Та̄хкын Иисусым тугустыңита агля̄тка̄т Первосвященнигым, Каиафам, мыңтыӷа̄нун. Таўани апыҳтуӷикаюгыт Лӣлиҳтӯсяның, сӣванлъыӷытлъю қырңуӷуткат.

⁵⁸ Уявақа̄нлъюни Петырым малихтыка̄ дворыңанун Первосвященнигым мыңтыӷа̄н. Итыӷлюни ақумылгусиқӣ кылыңакистыт ысҳапагналюку Иисус сяяҳқа̄таңат.

⁵⁹ Первосвященнигытлъю, қамахлъютыңлъю агӷистыт иқлъыңиқуткыстыңнақуткыхкат Иисус туқутыстыпигыснаӷналюку.

⁶⁰ Иўырңа на̄лъкунъыӷмың аҳтуқа̄т. Қайўа углялӷӣм ыснываӷақлъютың а̄пҳа̄таӷьяӷңа̄ӷмыхтыху а̄пқӣт алъякуткат. Қынўатлъю югык ыснываӷлютык

⁶¹ пикак: «Уна ю̄к хўатын пика̄гуқ: “Храм на̄фқысяқлъыгўа̄қа ынка̄м ныкыфлъықақа пиңая̄ни аӷныӷым”».

⁶² Та̄хкын Первосвященнигым ныкывлюни а̄птыка̄ Иисус: «Сямың пияҳқӣсӣн югык апылъҳыхкынун?»

⁶³ Иўырңа Иисус қа̄лъка̄маңилңуқ. Ынка̄м Первосвященнигым а̄плъя̄тақа̄: «А̄тҳакун Уңувалӷӣм Кияӷныӷым қылӷамкын уңипа̄тикут Христосыңузӣн? Иӷнықа̄тын Кияӷныӷым?»

⁶⁴ Иисусым кӣмсиқа̄: «Лъпык пилъыҳпытун аюқуқ. Иўырңа уңипа̄тамси, ӯм киңуңаның ысҳаҳлъықаҳси Иӷныӷа Югым ақумлюни аӷынқигныӷакун Аҳтуӷьяҳқа̄нӷилңӯм, ысҳаҳлъықаҳсилъю тагилӷӣ қиляўа̄ӷитхун қилягам».

⁶⁵ Та̄хкын таўатын пиятни Первосвященнигым а̄ткани пӣгӯмӣта пикақ: «Уна ю̄к Кияӷныӷунилюни пилӷӣ! Алъя лӣсимакистыңисяӷңа̄мта пилъта. Лыган хўа̄ нагатаҳси Кияӷныӷунилӷӣ!

⁶⁶ Натын лъпыси нанқихтыстыху?» Кӣмсиқа̄т: «Туқусяҳқа̄ҳсима̄қ».

⁶⁷ Та̄хкын хина̄кун қысиқука̄т, тыңлюхпага̄тақа̄тлъю, ынка̄м қасяҳтыстыңита

⁶⁸ пика̄т: «Лъпык Христос ӯкналиқутикут! Китум тыңлюхтатын?»

Петырым Налъюнқыхкаңа Иисус

⁶⁹ Таўатын та̄кут пималюки дворыми Петр ақумгакақ. Қыпҳаҳтым аӷнаӷа̄м такулюку пика̄: «Лъпыклъю Иисусымытка̄гутын, Галилеяӷмӣми».

⁷⁰ Иўырңа Петр мысиӷақақ сивуңитни тама̄кут пика̄: «Налъюкақа̄ сямың пӣқсин».

⁷¹ А̄ньян дворым итыӷвиганун иляңан қыпҳаҳтым аӷнаӷа̄м ысҳаӷлюку Петр, таўанлыңӯт пикӣ: «Уна ю̄к Иисусымытка̄гуқ Назаретыӷмӣми».

⁷² Петр мысиӷаӷля̄тақақ: «Ипапыста̄қ пӣмси, Кияӷныӷым а̄тҳакун налъюкңўа̄ӷақа ю̄к».

⁷³ Мулюнӷитуқ, югыт ныкывӷата̄ӷулъҳӣт тагилютың, Петр пика̄т: «Ипа иляка̄тын Иисусым малиҳся̄ҳтыңита қаюҳлъяк акузилъҳын Галилеяӷмӣстун аюқуқ!»

⁷⁴ Та̄хкын Петырым пикӣ: «Ипапыста̄қ Кияӷныӷым а̄тҳакун уңипа̄тамси налъюкңўа̄ӷақа ю̄к! Иқлъыңиқңукума Кияӷныӷым аӷью̄ӷлиңа!» Таўаниңинақ петух қалӷиқақ.

⁷⁵ Та̄хкын Петырым нықа̄тка̄ Иисусым пилъҳа: «Петух қалӷиҳтыстыхпына̄н пиңаюның налъюнқылъықаҳпыңа». Ынка̄м а̄нлюни қия̄ӷўаҳлъякақ.