От Матфея 22 - Новый Завет на эскимосском языке

Иисусым Уңипаӷа̄ткыхкаңа Ныңуҳнақылӷӣм Нықынӷаҳқылъҳа

¹ Та̄хкын Иисусым апыҳтуӷля̄тақӣ та̄кут югыт уңипаӷа̄тытхун. Пикақ:

² «Атаныҳпагулъҳа Қилягым хўатытуқ, умӣлгым иӷныни ныңуҳнақылӷӣ ята̄ҳқутка̄ нықынӷаҳқунъалюку.

³ Қыпҳаҳтыни каяхтыкӣ уңипа̄сяҳтӣсқылъюки тахсиқлъиқат ныңуӷутым нықынӷаҳқылъҳанун тагиляӷа̄тысқылъюки, иўырңа тагиюнӷиткат.

⁴ Та̄хкын умӣлгым пикӣ иляңи қыпҳаҳтыни: “Уңипа̄сяҳтуҳтыки тахсиқлъиқанка нықынӷаҳқылъымнун, ныӷьяҳқанңуқ апыӷӣҳтут. Туқутӣҳтысима̄нка юхта̄ныӷның тыӷикусяның, қуўинталӷӣныңлъю нуӷаӷның. Ынка̄м сяңўа̄ қамахлъюни апыӷӣҳтуқ. Тагилинңуқ ныңуӷутым нықынӷаҳқылъҳанун!”

⁵ Иўырңа ақылъқаҳқат тахсиқлъиқӣт ўа̄кумаңилңӯт. Йыӷлыги навык сяяҳтӯткат, ата̄сиқ пӣтысиӷаӷвигминун пикақ, иляңа акилъпыгаӷвигмун,

⁶ умӣлгым қыпҳаҳтыңи иляңита акуқаӷлюки сякусӣқлъюки туқуқуқӣт.

⁷ Умӣлык сякшитыҳлъякақ ынка̄м пилъюўаҳтыни каяхтыкӣ. Туқуқуқӣт юхтақат, кумаҳтыка̄тлъю ныңат.

⁸ Та̄хкын қыпҳаҳтыни пикӣ: “Ныңуҳнақым нықынӷаҳқусиҳқӣ апыӷӣҳтут. Ақылъқаңлъяқақсяқынка сыӷлытун пика̄тмыхның тагипагниңитут.

⁹ Ынка̄ңам а̄нлюси тумынун налъяқаси қамахлъюки югыт нықынӷаҳқысяҳтӣсқитыки”.

¹⁰ Қыпҳаҳтыт а̄нлютың тумыни қамахлъюки налъяқатың сыӷлыӷуяӷңа̄та, пиниӷьяӷңа̄та ныӷьяҳтӣсқыхкӣт, ынка̄м ныңуӷутфик ыслъықаӷаҳтыкақ.

¹¹ Умӣлгым ысҳаӷьяҳтуӷьяқминики ақылъқат, ысҳақа̄ ю̄к а̄симаңилңуқ ныңуҳнақылӷӣм а̄тка̄мың.

¹² Ынка̄м а̄птыка̄: “Илякумта̄мни, натын итыҳсин ныңуҳнақылӷӣм а̄тка̄мың а̄тыхпынаң?” Югым кӣмсиҳпагниңитка̄.

¹³ Та̄хкын умӣлгым қыпҳаҳтыт пикӣ: “Ӣхилъю, итыгӣлъю асиҳлъюки қагавык мамлыгмун милю̄тыху, таўани югыт қиялъықут хутытыңлъю тышқита̄хтаҳлъықӣт”».

¹⁴ Иисусым та̄қниқӣ акузилъыни хўатын: «Угляпыста̄қ тахсиқлъиқа̄ӷңа̄н, иўырңа паляҳа̄гут накмикыхка̄т».

А̄пқуӷўа̄лъық Налогмың

¹⁵ Та̄хкын Фарисеит унилъюку Иисус агӷиткат натын анагнӣлъқавигиӷналюку Иисус акузилъҳакун.

¹⁶ Ынка̄м каяхтыкӣт иляңи малихся̄ҳтытын, иляңилъю Иродианыт Иисусымун. Хўатын пика̄т: «Апыҳтуӷиста, лӣсимакамкын акузӣқутын ипаңулюку. Апыҳтӯсянлъю натын Кияӷныӷым кияҳтысқысюлъҳа ипаңӯқ. А̄ңўа̄ӷуяӷңа̄та, укавансяӷңа̄та паниның апыҳтуӷақатын таўатыҳпигақ.

¹⁷ Ынка̄м уңипа̄таҳтикут натын сюмыҳтаӷалъыҳпының. Кияӷныӷым Лӣлиҳтӯся̄ни ылъқуӷутңа̄ лъивикилъыҳқаҳпут налогмың Кесарымун? Лъивикилъта̄а налиӷмың пинӷитылъта?»

¹⁸ Иисусым лӣсимакыхкӣ сыӷлытун пиюгукаңат, ынка̄м пикӣ: «Пинӣюгныӷни лъпыси! Сяңама анагнӣлъқавигиӷнақуткыстыңъа?

¹⁹ Кылгувикитыңъа манимың налогмун лъивикисиҳқамың». Ынка̄м тагитка̄т манимың.

²⁰ Та̄хкын а̄птыкӣ: «Китум хинақагу уна? Китум а̄тқагу уна?»

²¹ Кӣмсиқа̄т: «Кесарым». Ынка̄ңам Иисусым пикӣ: «Тӯнитыки Кесарымун тама̄кут Кесарым пиңи, тӯнитыки Кияӷныӷмун тама̄кут Кияӷныӷым пиңи».

²² Нагасямыхтыху сяӷӣӷаюкат та̄хкын унилъюку аӷуляқыхкат.

Саддукеит Анагнӣлъқавигиӷнақуткыхкаңат Иисус

²³ Таўани аӷныӷми Саддукеит а̄псяҳтуқа̄т Иисус. Тама̄куңӯт ухпықиңигалңӯт туқукат уңуваҳтыкаюгутаңи.

²⁴ Пика̄т: «Апыҳтуӷиста, Моисейем Лӣлиҳтӯсӣ пика̄гут: “Ю̄к нулиҳтуӷлюни туқукан авақутихпынани, аңлыгутаңан тугуяҳқақа̄ угиңиӷақ авақутинъалюку аңлыгутни туқукақ”.

²⁵ Ма̄нсяҳтут ма̄ӷраӷвинлык югыт аңлыгуткулъҳӣт. Нуйыклъиқ нулиҳтуӷлюни авақутихпынани туқука̄гуқ. Ынка̄м нулиҳа аңлыгутаңан тугука̄.

²⁶ Тӯңлиҳа̄лъю аңлыгутаңа туқӯқ авақутихпынани. Ынка̄м пиңая̄н аңлыгутаңан туга̄ та̄на аӷнақ. Қамахлъютың туга̄қлъюку туқуляӷа̄тут авақутихпынатың.

²⁷ Киңулӣлюни аӷнақ туқука̄гуқ.

²⁸ Уңипа̄таҳтикут, уңуваҳтӯтылъҳым аӷныӷани китум аӷнақ нулиҳқылъықагу, қамахлъютыңқун тугукақыхкаңат?»

²⁹ Иисусым кӣмсиқӣ: «Анахутңа̄си қаюҳлъяк лӣгикигатаси Акузитыт Игақыхкат, талўа аҳтуӷьяҳқа̄нӷилъҳа Кияӷныӷым.

³⁰ Туқукат уңуваҳтӯскумың ныңуӷусяҳқа̄нӷитут, яқулгыстун қилягмылңуӷыстун.

³¹ Атиҳтӣгастыхӯ Кияӷныӷым апылъҳа лъпысинун туқукат уңуваҳтӯтылъыҳқӣтның? Хўатын пика̄гуқ:

³² “Кияӷнықа̄ңа Авраамым, Кияӷнықа̄ңа Исаакым, Кияӷнықа̄ңалъю Иаковым”. Кияӷнық Кияӷнықа̄т уңувалӷӣт, нака̄н туқукат».

³³ Иисусым апыҳтуӷилъҳа юлӷутыҳлъягыт нагалъюку, сяӷӣӷаягутыҳлъяка̄т.

Аңылъыҳпигақ Лӣлиҳтӯсяқ

³⁴ Фарисеит нагақуӷьямыхтыки Саддукеит Иисусымун ныпӣҳқўа̄нилюки қырңуӷуткат.

³⁵ Ата̄сим Фарисеим апыҳтуӷистыңан Лӣлиҳтӯсят а̄пқуӷа̄қа̄ Иисус анагнӣлъқавигиӷналюку.

³⁶ Хўатын а̄птыка̄: «Апыҳтуӷиста, натуңа̄ўа аңылъыҳпигақ Лӣлиҳтӯсяни?»

³⁷ Иисусым кӣмсиқа̄: «“Атаным Кияӷныӷа пиниқсяҳқақан қамахлъюку илюхпыгун, қамахлъюку уңувасиҳпыгун, қамахлъюку умьюгаҳпыгун”.

³⁸ Та̄на аңылъыҳпига̄гуқлъю, мыгнуналъыҳпига̄гуқлъю Лӣлиҳтӯсяқ.

³⁹ Тӯңлиҳа̄ аңылъыҳпигақ Лӣлиҳтӯсяқ сивулиҳтун аюқуқ: “Пиниқсяҳқақатын юлгутытын пиниқылъыҳпытун лъпынун катам”.

⁴⁰ Та̄кук Лӣлиҳтӯсяк туныма̄гук тамаҳӣтнун Лӣлиҳтӯсянунлъю, апыҳтӯсӣтнунлъю ӯкналиқистыт».

А̄пқуӷўа̄лъық Христосымың

⁴¹ Та̄хкын Иисусым а̄птыкӣ Фарисеит қырңуӷутңамалюки:

⁴² «Натын сюмыҳтаӷа̄ткақыстыху Христос? Китум иӷнықагу?» Кӣмсиқа̄т: «Иӷнықа̄ Давидым».

⁴³ Иисусым а̄птыкӣ: «Сяңанңам Давидым акузӣқңами Аглыӷналӷӣгныкун Таӷныӷагныкун атиҳтагу: “Атаныӷмың”? Хўатын пика̄лӷӣ:

⁴⁴ “Атанӷым пӣ Атанқа, Ақуми аӷынқигнымкун, кынляңа аңуяхтын итыгаҳпык асиңанун лъӣҳтылъымнун”.

⁴⁵ Давидым атӣмакагу: “Атаныӷмың” натын иӷнықагу?»

⁴⁶ Налиҳӣнӣта̄ Фарисеит кӣмсиҳпагниңитка̄т Иисус. Та̄хкын кынлыклъюку китум алңунак тытугьягутка̄т а̄пныӷмың.