От Матфея 21 - Новый Завет на эскимосском языке

Иисусым Ка̄тылъҳа Иерусалимымун

¹ Иисусылъю малихся̄ҳтыкулъҳӣт туӷа̄ӷьялӷӣмың Иерусалимымун, ка̄тка̄т Виффагиямун Елеоным найӷаҳанун. Таўани каяхтыкакык ма̄лӷук малихся̄ҳтыгни иглыҳтыкыстӣсқылъюкык.

² Хўатын пики: «Иңавык нынун агляӷлютык таўаниңинақ ысҳаҳлъықаҳтык пытугңалӷӣ осёл нуӷалык. Итымлъюкык тагинъакыхси хўаңамнун.

³ Китум алңунак сямың пикаңистык, хўатын пинакыси: “Атанӷым аклъюка̄к”. Таўаниңинақ тагитыслъықа̄к хўаңамнун».

⁴ Хўатын пика̄фтуқ апыӷӣӷналюку ӯкналиқистым пилъҳа:

⁵ «Уңипа̄сяҳтуҳқи, Сионыӷмӣт: “Ысҳақаҳтыхуқун, умӣлыхпыси такўа̄қӣси. Қусывыгңа̄қ осёлыкун иглыҳтақуқ, осёлым нуӷа̄кун”».

⁶ Ынка̄м малихся̄ҳтык иглыҳтыкыстаӷлютык сивуңитни, Иисусым писқылъҳатун пикак.

⁷ Осёл нуӷаҳтӯма̄н тагитка̄к Иисусымун. Қа̄слъӣт а̄ткатың матаҳлъюки тыӷикусяк қа̄йңитхун лъикӣт. Та̄хкын Иисус ақумыхкақ.

⁸ Юлӷутыҳлъягым тумытхун а̄ткатың ся̄хтыкӣт, ынка̄м иляңи уқфигым авая̄ның икутақлъютың тумыт лъиляҳтуӷвикыхкӣт.

⁹ Юлӷутыӷлягыт Иисусым сивуңанилңӯтлъю, киңуңанилңӯтлъю акилӷӯткат: «Усюқнаҳалык Иӷныӷа Давидым! Кияӷныӷым қуяслъигу тагилӷӣ а̄тҳакун Атанӷым! Усюқилъық қилягмылңуӷмун!»

¹⁰ Иисус итыӷьян Иерусалимымун, қамахлъютың Иерусалимыӷмӣт кагайгунъықыхся̄ткат хўатын пимаӷмың: «Кинаңа̄ўа уна ю̄к?»

¹¹ Иисусым малихтыстыңита юлӷутыҳлъягыт кӣмсиқӣт: «Иисусыңӯқ, ӯкналиқиста, Назаретымың Галилеямылңуӷмың пиңӯқ».

Иисус Храмымун Пилӷӣ

¹² Иисус Храмымун итыӷлюни а̄нысқуқӣ қамахлъюки тукфиҳтулӷӣтлъю, акикулӷӣтлъю. Та̄хкын манимың навыҳқуҳтытлъю қаюӷвигит улъыҳқуқӣ, ақумутӣтлъю қаўа̄гмың акилъпыгаҳтыт.

¹³ Ынка̄м пикӣ: «Игақңа̄қ Акузитни Игақыхкани: “Мыңтыӷама атилъқысяҳқақа̄, Юӷаӷвик”. Иўырңа лъпыси ӣӷаӷвигуҳтаҳси тыглыгнӣҳтынун!»

¹⁴ Та̄хкын ая̄катлъю, иӷулъюгмылңӯтлъю такука̄т Иисус Храмымун, ынка̄м на̄лъҳуқуқӣ.

¹⁵ Первосвященнигытлъю, апыҳтуӷикаюгытлъю Лӣлиҳтӯсяның ысҳапаглюки алъя̄ҳлъюхўаҳтилъҳи Иисусым, нагалъюкилъю таӷнуҳа̄т Храмыми акилӷӯлӷӣт хўатын: «Усюқилъық Иӷныӷанун Давидым!» ынңа̄талъ угумиюкат.

¹⁶ Ынка̄м Иисус а̄птыка̄т: «Наганъыӷисикӣ таӷнуҳа̄т сямың пикатаңи?» Иисусым кӣмсиқӣ: «А̄а, нагатанка. Атиҳтӣгастыхӯ Акузитыт Игақыхкат пилъҳит: “Қа̄нӷитхун таӷнуҳа̄тлъю, алъхынҳаҳа̄тлъю ята̄ҳқыхкақан усюқилъық лъпынун катам?”»

¹⁷ Та̄хкын Иисусым унилъюки, Иерусалимымың Вифанияткақ қаваӷналюни тама̄ни.

Иисусым Палиҳтыстыкаңа Уқфик

¹⁸ Иисус уна̄ңулюку утыӷнӣткылъюку Иерусалимымун игатақақ.

¹⁹ Тумыт ся̄ӷўитни ысҳақа̄ смоквам уқфига. Такулюку пияқминигу қуқуңара̄ӷина̄фтуқ смокваңунани. Ынка̄м уқфик таўавык пика̄: «Алъямыңлъю пӣтыстина̄нӷитутын». Таўаниңинақ уқфик палиқақ.

²⁰ Малихся̄ҳтыт таўатын пилӷӣ ысҳапаглюку, сяӷӣӷаюгуткылъюку а̄птыка̄т: «Натын уқфик сюкатыпихлъюни палиҳта?»

²¹ Иисусым кӣмсиқӣ: «Ипа пӣмси, малӷуклъилъңуна̄н ухпықилъылгукуфси, хўаңамтун пилъықуси, ысҳапалъыҳпысистун смоквам уқфига. Таўатыңинақ пина̄нӷитуси талўа уна на̄йӷақ каяхтыкуфсигу: “Ӣклъютын лъпынун мыӷмун милю̄тын”, лыган пилъықуқ.

²² Сямың алңунак а̄птыкуфси юӷакун ухпықилъылгукуфси алъхыӷусяҳқа̄гуси».

Иглыӷутистыт А̄пқуӷа̄қаңат Иисус

²³ Иисус ка̄лъюни Иерусалимымун Храмымун ӣтқақ. Апыҳтуӷималюку, первосвященнигытлъю, сӣванлъыӷытлъю такулюку а̄птыка̄т: «Уңипа̄тикут китум қылыҳтатын таўатын писқылъютын, налиӷмың китум қылылъҳакун таўатын пиңузин?»

²⁴ Иисусым кӣмсиқӣ: «Хўаңалъю а̄пнақамси. Кӣмсиқуфсиңа хўаңалъю уңипа̄лъықамси китумун қылӷуматка.

²⁵ Китум қылыҳтагу Иоанн крестиӷаӷисқылъюку? Кияӷныҳта̄ўа̄ налиӷмың югмың пиңўа̄?» Та̄хкын лъңитның акузимҳуткат: «Сямың пинақыстыху? Кӣмсиқумтыху Кияӷныӷмың пиңунилюку, хўатын пилъықӣлъю: “Сяңанңам ухпықынӷистыху Иоанн?”

²⁶ Иўырңа: “Югмың пиңуникумтыху”, қымалъ юлӷутыт сялъықӣлъю, қаюҳлъяк қамахлъютың ухпықыхка̄т Иоанн ӯкналиқистыңунилюку».

²⁷ Ынка̄м кӣмсиқа̄т Иисус: «Налъюкаҳпут». Иисусым пикӣ: «Хўаңалъю уңипа̄нъа̄нӷитамси китумун қылылъыңыхка̄тка таўатын пилъымнун».

Иисусым Уңипаӷа̄ткыхкык Югым Иӷныӷык

²⁸ Та̄хкын Иисусым а̄птыкӣ: «Натын уна сюмыҳтаӷа̄ткылъықыстыху? Югңуқ та̄ўа ма̄лӷугыгның иӷнылык. Сивулиӷмун пилюни пика̄: “Иӷнымни, аӷныӷми хўани виноградымың пӣтысиӷаӷвимнун қыпҳаӷьяҳа̄тын!”

²⁹ Иӷныӷан пика̄: “Ўӣн пиюнӷитуңа”. Иўырңа аӷныӷми та̄кўани авутыҳқылъюни қыпҳаӷьяқақ.

³⁰ Та̄хкын тӯңлиҳа̄нун иӷныӷми пилюни, таўатыҳпигақ пика̄. Иӷныӷан пика̄: “А̄а, пилъықуңа”, иўырңа пимаңилңуқ».

³¹ Иисусым а̄птыкӣ: «Налӣм иӷныӷан қа̄ткыхкақагу атани?» Кӣмсиқа̄т: «Сивулӣм». Ынка̄м Иисусым пикӣ: «Уңипа̄тамси налогмың қырңуҳтыстытлъю, аӷнатлъю акикикаюгыт югусимыхның сивухпысини итыӷа̄тңӯт Атаныҳпагулъҳанун Кияӷныӷым.

³² Иоанным Крестителым уңипа̄сяҳтуқақӣси натын кияҳтылъыҳқамың Кияӷныӷым пиюкылъҳатун, иўырңа ухпықумаңитаҳси. Нақам налогмың қырңуҳтистытлъю, аӷнатлъю акикикаюгыт югусимыхның ухпықыхкақа̄т. Талўа киңуңаның ысҳапакақыӷңа̄ҳпысики ухпықыхкаңат Иоанн, паниның лъпыси авутыҳқылъюсилъю сыӷлыҳқынъанилъҳитуси, ухпықумаңитаҳсилъю».

Иисусым Уңипаӷа̄ткыхкаңи Сыӷлыӷыт Пӣтысиӷаҳтыт

³³ Иисусым пикӣ: «Иляңа уңипаӷа̄н нагатыху. Та̄ўаңуқ ю̄к пӣтысиӷақақ виноградымың нунамикун. Миңлъюлюку, ля̄гуткакык виноградымун қагыҳқӯсик, ныкыфтыка̄лъю ӯсқалӷӣ кылыңакивихкақ. Та̄хкын навӷитка̄ виноградымың пӣтысиӷаӷвини пӣтысиӷаҳтынун афлъыңакысқылъюку. Та̄хкын лъңа иляңанун нунам агляқақ.

³⁴ Сяӷнаяҳқа̄ҳсята виноградыт, пӣтысиӷаӷвилгым қыпҳаҳтыни каяхтыкӣ ныңини ақфасқылъюки.

³⁵ Иўырңа пӣтысиӷаҳтыт акуқаӷлюки қыпҳаҳтыт, ата̄сиқ анагулыҳта̄ка̄т, иляңа туқутка̄т, пиңая̄т милюҳпага̄таҳӣнақ туқутка̄т.

³⁶ Қыпҳаҳтыми иляңи каяхлъя̄тақӣ, сивулиӷның угляӷатаӷаӷлюки, лъңитлъю таўатыңўа̄қ пиля̄тақӣт.

³⁷ Қынўат иӷныни каяхтыка̄ лъңитнун, хўатын пимаӷми: “Ипапыста̄қ сӣвакылъықа̄т иӷнықа”.

³⁸ Иўырңа пӣтысиӷаҳтыт ысҳаӷлюку пӣтысиӷаӷвилгым иӷныӷа хўатын пикат: “Ӯм иӷныӷан пилӣлъықа̄ уна нуна атани туқукан. Туқускумтыху хўаңкута пилӣлъықаҳпут уна виноградымың пӣтысиӷаӷвик”.

³⁹ Ынка̄ңам акуқаӷлюку, пӣтысиӷаӷвигмың милю̄лъюку туқутка̄т».

⁴⁰ Иисусым а̄птыкӣ: «Пӣтысиӷаӷвилгым тагикуми сялъықаки пӣтысиӷаҳтыт?»

⁴¹ Первосвященнигытлъю, сӣванлъыӷытлъю кӣмсиқа̄т: «Сыӷлыпыста̄тун туқулъықӣ та̄кут сыӷлыӷыт югыт. Та̄хкын навӷилъықа̄ пӣтысиӷаӷвини алъянун пӣтысиӷаҳтынун. Сяӷналъыҳқақ ка̄скан ныңӣлъықа̄т».

⁴² Иисусым пикӣ: «Атиҳтӣгастыкӣ Акузитыт Игақыхкат хўатын пилъҳит? “Уйӷак та̄на мыңтыӷаңлъяҳтыт иҳсякыхка̄т мыгнуналъыҳпига̄ҳтыка̄гуқ уйӷак. Та̄на Атанӷым пилъқа̄, ураң пинилъыҳпига̄гуқ хўаңкунъун!”

⁴³ Ынка̄ңам уңипа̄тамси, Атаныҳпагулъҳа Кияӷныӷым лъпысиның аўисяҳқа̄гуқ, ынка̄м тӯньяҳқа̄гуқ югнун пӣтыстияҳқанун плодыңаның Атаныҳпагулъҳым».

⁴⁴ «Кина алңунак та̄хун уйӷахкун иқукуми, пылимьяҳқа̄гуқ. Кина алңунак та̄м уйӷагым ифкаӷвикыхкумигу сифта̄ҳқылъықа̄».

⁴⁵ Первосвященнигытлъю, Фарисеитлъю нагалъюки Иисусым уңипаӷа̄таңи лӣгикыхка̄т Иисусымңуқ лъңит акузиткақыфтӣ.

⁴⁶ Ынка̄м тугуюкақсяқаңат, иўырңа алиңыхкат юлӷутыҳлъягның қаюҳлъяк ухпықыхкаңат Иисус ӯкналиқистыңунилюку.