От Матфея 16 - Новый Завет на эскимосском языке

Алъя̄ҳлъюхўаҳтисқылъық

¹ Та̄хкын иляңи Фарисеитлъю, Саддукеитлъю тагикат Иисусымун анагнӣлъқавигиӷналюку. Ынка̄м алъя̄ҳлъюхўаҳтисқыхка̄т ысҳа̄сиҳқа̄люку аҳтуӷьяҳқа̄нӷилъҳа Кияӷныӷмың пиңутаңа.

² Иўырңа Иисусым кӣмсиқӣ: «Сиқинық тывиӷьяҳтуңыстанӷани ыслъя кавиӷругунӷани пӣқуси: “Уна̄ми пиниӷнақуқ”.

³ Сиқинық пӣтыкыстанӷани қиляга кавиӷругунӷанилъю, қилягӣнӷанилъю пӣқуси: “Аӷныӷми ыслъя сыӷлыӷунақуқ”. Ысҳапаглюку қиляга лӣсимакақаҳси ыслъя натынъақутаңа. Иўырңа ысҳапаныҳпысики сялъҳыт аӷныӷни ма̄ни лӣгикыпагниңитаси сямың писӣтаңи.

⁴ Аӷныӷым ӯм юги сыӷлыҳқумаңӯт, ата̄сӣӷныӷилңӯт Кияӷныӷмун, нақам алъя̄ҳлъюхўаҳтитысқут хўаңамнун. Йыӷлыгилъю! Та̄наңинаҳақ алъя̄ҳлъюхўаҳтилъық ысҳаҳлъықаҳси Кияӷныӷым алъя̄ҳлъюхўа̄ҳтилъҳа Ионамун». Та̄хкын Иисусым унилъюки аӷуляқыхкат.

Иисусым Кылыңася̄қаңи Малихся̄ҳтыни

⁵ Малихся̄ҳтыкулъҳӣт иңлюңанун на̄йвам ка̄лъютың, малихся̄ҳтыт пиялӷӣмың пуйгумалӷӣт нықыкшагмың кылъқыхпынатың.

⁶ Иисусым пикӣ: «Кылыңалюси Фарисеитлъю, Саддукеитлъю закваскаңитның».

⁷ Лъмыхның акузимҳуткыхка̄т: «Таўатын пӣқ қаюҳлъяк кылъқынӷилңӯкут нықыкшагмың».

⁸ Иисусым лӣсимакыхкаңи сямың пикатаңи ынка̄м пикӣ: «Лъпыси югни, ухпықилъыҳқыста̄пигӯси! Сяңафси нықыкшаңлъӣгаси?

⁹ Та̄ўа лӣгикигатсӣ? Нықамикынӷистыкӣ талъимат нықыкшагыт а̄вгуқанка 5,000 югнун, қафсингутаңилъю корзинат сӣпныӷмың имиқаси ыслъықаӷаҳлъюки?

¹⁰ Та̄кутлъю нықамикынӷистыкӣ ма̄ӷраӷвинлык нықыкшагыт 4,000 югнун ныӷыстыканка, қафсингутаңитлъю корзинат сӣпныӷмың имиқаси ыслъықаӷаҳлъюки?

¹¹ Натын сяңан лӣгикынӷитыстыху нықыкшаңлъя̄нӷилңуқ акузиткыхкыхка? Кылыңалюси Фарисеитлъю, Саддукеитлъю закваскаңитның!»

¹² Та̄хкын малихся̄ҳтыт лӣгикыхка̄т сямың пӣқутаңа. Закваскаңунӷитыфтуқ нықыкшаңлъямылңуқ кылыңася̄ӷуткыхка̄, иўырңа кылыңасқақыфтӣ апыҳтӯсӣтның Фарисеитлъю, Саддукеитлъю.

Петырым Иисус, Христосыңуникаңа

¹³ Та̄хкын Иисус ка̄сями туңаңанун Кесария Филипповам, а̄птыкӣ малихся̄ҳтыни: «Югыт кинаңунӣқатху Иӷныӷа Югым?»

¹⁴ Кӣмсиқа̄т: «Иляңи пӣқут Иоанныңунилюку Крестителым, иляңита Илия, паниның иляңита Иеремияңунӣқа̄т налиӷмың налӣт ӯкналиқистыт».

¹⁵ А̄птыкӣ: «Лъпысими кинаңунӣқыстыңъа?»

¹⁶ Симон Петырым кӣмсиқа̄: «Христосыңӯтын, Иӷныӷа уңувалӷӣм Кияӷныӷым».

¹⁷ Иисусым пика̄: «Қуястылъылгӯтын, Симон, иӷныӷа Ионам! Қаюҳлъяк югмың лӣсимаңитан, Атама қилягмылңӯм лъпынун лӣтыстыкақа̄.

¹⁸ Ынка̄м пӣмкын, Петырыңӯтын, Уйӷак. Хўагун уйӷахкун ныкыфлъықақа юӷаӷвика, туқулъҳым аҳтуӷьяҳқа̄нӷилъҳан кая̄лъқысяҳқақынӷитңхўа̄ӷа̄.

¹⁹ Лъпынун тӯнылъықанка қипыти Атаныҳпагулъҳан Қилягым. Сяңўа̄ алңунак асиҳтыкувгу нунами хўани, асиҳсяҳқа̄гуқ қилягмилъю. Сяңўа̄ алңунак итымускувгу нунами хўани, итымусяҳқа̄гуқ қилягмилъю».

²⁰ Та̄хкын Иисус малихся̄ҳтыминун апыҳтыснаниӷўа̄қақ китумун алңунак Христосыңунилюни.

Иисусым А̄пқаңа Икфиқлъюни Туқулъыҳқани

²¹ Та̄хкын кынляңа Иисусым лӣгикыснақыхкӣ малихся̄ҳтыни, Иерусалимтыпыста̄ӷьяҳқа̄нилюни, таўани алъя̄ҳӣнакун икфиқыслъықнилюни Старейшинынун, первосвященнигнун, апыҳтуӷикаюгнунлъю Лӣлиҳтӯсямың. Уңипа̄ткӣ туқусяҳқа̄нилюни та̄хкын пиңая̄ни аӷныӷым Кияӷныӷмун уңуваҳсяҳқа̄нилюни.

²² Петырым иқитулъюку аӷью̄нӣқа̄: «Атанық, Кияӷныӷым писна̄нӷита̄тын! Таўатын пина̄нӷитутын!»

²³ Иисусым қӣвлюку Петр пика̄: «Туӷныӷақ, иқитын хўаңамның! Амигиӷаҳпыңа, қаюҳлъяк сюмыҳтаӷалъҳын югым сюмыҳтаӷалъқа̄, Кияӷныӷым сюмыҳтаӷалъқынӷита̄!»

²⁴ Та̄хкын Иисусым малихся̄ҳтыни пикӣ: «Китум алңунак малихсюкумиңа, лъми катам пиюкылъыни пыхлъюку, қақӯрани уямиглюку малихлъиңа.

²⁵ Қаюҳлъяк китум алңунак уңувалъыни лъңанун катам пикникумигу ифлъяяҳқақа̄. Китум алңунак пыхтыкумигу уңувалъыни хўаңа апалъюқлъюңа алъхыҳлъықа̄.

²⁶ Сяңўа̄ңам югым пиниҳқусиқылъықагу пилӣлъюку нунаҳлъяк, ифлъякумигу уңувасигни? Та̄ўа аваңитуқ выҳтусиҳқамың уңувасигминун.

²⁷ А̄пҳанка тама̄кут лъпысинун қаюҳлъяк Иӷныӷа Югым тагияҳқа̄гуқ Атаминың аҳтуӷьяҳқа̄нӷилъылиӷлюни яқулыхтӯмаӷми. Та̄хкын тамаҳа̄ ю̄к налъяңиҳтуҳлъықа̄ апыӷӣӷутылъҳатун.

²⁸ Ипа уңипа̄тамси, хўа̄нлыңӯт иляхпыси уңувалъыӷмыхни ысҳаӷьяҳқақа̄т Иӷныӷа Югым тагилӷӣ Умӣлгулюни».