От Матфея 15 - Новый Завет на эскимосском языке

Сивулӣӷа̄т Апыҳтӯсӣт

¹ Та̄хкын иляңи Фарисеитлъю, апыҳтуӷикаюгытлъю Лӣлиҳтӯсяның Иерусалимымың тагилютың а̄птыка̄т Иисус:

² «Сяңамың малихся̄ҳтытын қа̄ткусигатат сивунымта апыҳтӯсӣтнун? Ныӷнақныӷмыхни ӯҳтӣгатут ылъқуӷулъютың апыҳтӯсӣтнун».

³ Иисусым а̄птыкӣ: «Сяңан лъпыси қа̄ткигатақыстики Кияӷныӷым қылӷусӣ малихналюки лъпыси катам апыҳтӯсяси?

⁴ Кияӷныӷым қылӷусяқа̄: “Қӯлваӷлюкык атанлъю, на̄нлъю”. Хўатынлъю пика̄гуқ: “Китум алңунак атани, налиӷмың на̄ни сыӷлыпыста̄тун акузиткыхкумигу, туқусяҳқа̄гуқ”.

^5-6 Иўырңа лъпыси апыҳтуӷӣқуси: “Югым қӯлванӷисяӷңа̄гу атани налиӷмың на̄ни хўатын пикагу”, Каюсӣсяҳқалгӯңа лъпынун, иўырңа тӯна̄нӷитақа қаюҳлъяк акықусяқыхкақақа тӯнылъықнилюку Кияӷныӷмун. Таўатын пилъыҳпысигун пакигақаси Кияӷныӷым Лӣлиҳтӯсӣ апалъюқлъюки лъпыси катам апыҳтӯсяси.

⁷ Укуҳси пинӣюгныӷни! Ылъқуҳлъюси хўатын Исаиям ӯкналиқуткыхкақӣси!

⁸ Кияӷнық пӣқ: “Укут югыт акузитмыхтыхун қӯлваӷақа̄тңа, нака̄н илюмыхның.

⁹ Тымңи манигуӷақа̄тңа қаюҳлъяк апыҳтӯсяқақӣт лӣлиҳтӯсяңлъяқатың, катам хўаңа Лӣлиҳтӯсяқыпихлъыҳӣстун”».

Югым Нукыхнаҳқусӣ

¹⁰ Та̄хкын Иисусым юлӷутыт тахсиӷлюки пикӣ: «Нагалъюңа лӣгикитык!

¹¹ Югым сяңўа̄ қаныӷминун канаҳтыка̄ нукыхнаҳқиңигатуқ, иўырңа югым қа̄нӷаның а̄ныхкақ нукыхнаҳқикаюгӯқ».

¹² Та̄хкын малихся̄ҳтыңита такулюку а̄птыка̄т: «Лӣсимакынӷисигӯ Фарисеит анахтыкит таўатын пилъыҳпыгун?»

¹³ Иисусым кӣмсиқӣ: «Нунивахсыӷақ қамахлъюку Атама қилягмылңӯм пӣтысиӷа̄маңилъкаңа нусюгьяҳқа̄гуқ.

¹⁴ Авылӷақӣнаӷлюки Фарисеит! Ая̄кастун маӷьяҳқуӷӣқут. Югым ая̄кам иляңа ая̄кақ таслъюқумигу, ля̄гўа̄ӷмун калыфкахта̄лъықук».

¹⁵ Петырым а̄птыка̄: «Уңипа̄таҳтикут, сямың писӣгўа уңипаӷа̄тын югыт нукыхнаҳқиганъикытын ныӷыхкамыхтыхун?»

¹⁶ Иисусым пикӣ: «Лъпысилъю сялин лӣгикинӷисык?

¹⁷ Лӣсимакынӷистыхӯ сяңўа̄ алңунак югым қаныӷминун канаҳтыка̄ ақсяқҳўанун пӣқуқ, та̄хкын а̄нақуқ югусӣның?

¹⁸ Иўырңа сяңўа̄ қамакын а̄ныхкақ қаныҳқун нукыхнаҳқикаюгӯқ югмың.

¹⁹ Қаюҳлъяк югым илюңаның сыӷлық сюмыҳтаӷалъық пика̄югӯт, юхтақ, гылгаӷнӣқ, алъянӣқ, тыглыгнӣқ, иқлъыңиқутки ынка̄м сыӷлықӯқ югның.

²⁰ Тама̄кут нукыхнаҳқикаюгыт югның, иўырңа ӯҳтуҳпынани ныӷылъҳым нукыхнаҳқынъа̄нӷита̄ ю̄к».

Аӷнам Ухпықилъҳа

²¹ Та̄хкын Иисус аӷуляқыхкақ тама̄кын нунамың туңыхкынун Тирылъю, Сидонылъю.

²² Та̄ўаңуқ Ханааныӷмӣ аӷнақ. Иисус такука̄ акилӷӯмаӷми: «Ка̄й Атанық, Иӷныӷа Давидым, наңлъыгьягутықыҳтиңа! Паника туӷныӷа̄м ӣтҳума̄, сыӷлыӷўа̄ӷӯқ».

²³ Иўырңа Иисусым авылӷақӣнақа̄. Малихся̄ҳтыңита такулюку каяхтаӷўа̄қа̄т: «Иқитысқигу! Малихся̄ӷума̄мта акилӷӯгуқ!»

²⁴ Та̄хкын Иисусым пикӣ: «Кияӷныӷым каяхтыкақа̄ңа Израилыӷмӣңинаҳаӷнун, пынъӣӷыстун ифлъякастун аюқылӷӣнун».

²⁵ Иўырңа аӷнақ тагилюни Иисусым сивуңакун қуңуҳтуткылъюку пикақ: «Атанық, каюсӣтаҳтиңа!»

²⁶ Иисусым пика̄: «Анахутңа̄қ таӷнуҳа̄т нықңит тугулюки қикминун милю̄скумың».

²⁷ Аӷнам пика̄: «А̄а, Атанық, талўа югым қикмӣ ифкаҳқылъҳаның ныӷақут».

²⁸ Та̄хкын Иисусым пика̄: «Аӷнақ лъпык, ухпықилъыҳтупихтутын! Апыӷӣӷли пиюкылъыҳпытун». Таўаниңинақ панига на̄лъҳуткақ.

Иисусым На̄лъҳускаңа Ю̄к Углялӷӣ

²⁹ Та̄хкын Иисус аӷуляқыхкақ тама̄кын нунамың, ысныңакун На̄йвам Галилеям. Қымимун маюӷлюни ақумыхкақ.

³⁰ Юлӷутыҳлъягыт такуляӷа̄тка̄т, тагисимӣта Иисусым сивуңанун пиюхпагниңилңӯт, ақниҳтыкат, ая̄кат, акузиңигалңӯт, иляңилъю қинуюлӷӣт. Ынка̄м на̄лъҳуқуқӣ.

³¹ Юлӷутыҳлъягыт сяӷӣӷаюкат ысҳапаглюки акузиңигалңӯт акузиягулъҳӣт, ақниҳтыкат на̄лъҳулъҳӣт, пиюхпагниңилңӯт пиюгьягулъҳӣт, ая̄катлъю ысҳа̄сягулъҳӣт. Ынка̄м усюқыхка̄т Кияӷныӷа Израилым.

Иисусым Ныӷыстилъҳа 4,000 Сӣпңалӷӣның Югның

³² Та̄хкын Иисусым малихся̄ҳтыни тахсиӷлюки пикӣ: «Ма̄кут наңлъыгьягутыпихтанка қаюҳлъяк хўаңамнитут пиңают аӷныӷыт, талўа ныӷьяҳқӣтут. Ныӷыстыхпынаки аӷуляқысюнӷитанка, лю̄рақ тумаңани кая̄линаюката».

³³ Малихся̄ҳтыңита а̄птыка̄т: «Ма̄ни килга̄ни накын нықыңнақыста на̄маяҳқамың юлӷутыҳлъягнун?»

³⁴ Иисусым а̄птыкӣ: «Натын угляҳқака̄н нықыкшаңлгуси?» Кӣмсиқа̄т: «Ма̄ӷраӷвинлыгӯт, қафсинатлъю иқалъюха̄т».

³⁵ Ынка̄м Иисусым юлӷутыҳлъягыт қылъқӣ ақумӯтысқылъюки нунакун.

³⁶ Та̄хкын тугулюки ма̄ӷраӷвинлык нықыкшагыт иқалъюгытлъю, Кияӷнық игамсиқаюгвикыхка̄. А̄вгуӷлюки тӯныхкӣ малихся̄ҳтыминун ынка̄м уйыхтыкӣт юлӷутыҳлъягнун.

³⁷ Қамахлъютың ныӷӯткат кыпсю̄лъютың. Та̄хкын малихся̄ҳтыт сӣпнық қырңуҳлъюку ма̄ӷраӷвинлык корзинат имӣқӣт ыслъықагаҳлъюки.

³⁸ Угляҳталяңит ныӷӯткат югыт 4,000ңуфтут, кысюткыхпынаки аӷнатлъю, таӷнуҳа̄тлъю.

³⁹ Та̄хкын Иисусым юлӷутыҳлъягыт агляҳтӯтыслъюки лъңитнун лъңа аңьямун ӯхлъюни увитаңанун Магдалам агляқақ.