От Матфея 14 - Новый Завет на эскимосском языке

Туқулъҳа Иоанным Крестителым

¹ Тама̄ни пилъыӷми Иродым, иглыӷутистыңан Галилеям, нагақуқа̄ Иисусым апыҳсыӷӯмалъҳа.

² Иродым қыпҳаҳтыни пикӣ: «Ипа уна Иоанныңӯқ Крестителым, уңува̄ма̄қ. Ысҳаҳуқун аҳтуӷьяҳқа̄нӷилъылык алъя̄ҳлъюхўаҳтилъыӷмун».

^3-5 Қавңанҳақ Иродым туқутыстыкақыхкаңа Иоанн Крестителым, қаюҳлъяк Иоанным уңипа̄ткақыхкаңа: «Қа̄ткунъыӷитутын Лӣлиҳтӯся̄мнъун тугулъыҳпыгун Иродиада, аңлыгутыхпык нулиҳа». (Иродиадам угиксяқаңа Филипп, Иродым уюӷа̄.) Иоанным уңипа̄тылъҳа апалъюқлъюку Иродым тугусқыхка̄ Иоанн, асиҳқылъюку анусимиңлъяӷвигмун канаҳтысқылъюку. Иродым туқутысюгуяқаңа Иоанн, нақам аликыхкӣ Иудеит сыӷлылӣҳқӣнаюката қаюҳлъяк ухпықықкаңат Иоанн ӯкналиқыстыңунилюку.

⁶ Та̄хкын Иродым алъхыӷвиган аӷныӷани, Иродиадам панига тукалыгақақ Иродымлъю ақылъқитлъю сивуңитни. Ынңа̄талъ Ирод ыфқуӷьюхлъякақ,

⁷ рыпалъ акықыхка̄: «Ипапыста̄қ сямың алңунак туңсиқувык тӯнылъықамкын».

⁸ На̄ми каяхтылъҳатун пика̄: «Хўа̄ ма̄тын тагиваҳу қаю̄таӷра̄хкун лъилюку на̄сқўа Иоанным Крестителым».

⁹ Умӣлык қивӷукақ иўырңа акықика̄тминың ақылъқами сивуңитни пиюкылъҳа каягутка̄.

¹⁰ Ынка̄м Иродым анусимиңлъяӷвигми Иоанным на̄сқўа кыпыстыка̄.

¹¹ На̄сқуқ қаю̄таӷра̄хкун лъилюку тӯныхка̄т аӷнаӷаӷмун, ынка̄м на̄минун агля̄тка̄.

¹² Иоанным малихся̄ҳтыңи тагилютың югусӣ лъивыӷьяҳтуқа̄т. Та̄хкын Иисус уңипа̄сяҳтуқа̄т.

Иисусым Ныӷыстилъҳа 5,000ның Сӣпңалӷӣның Югның

¹³ Иисусым нагақуӷьямигу уңипақ, аңьямун ӯхлъюни аӷуляқыхкақ па̄ҳқилъҳанун лъңинаҳа̄налюни. Иўырңа юлӷутыт нагақуӷьямыхтыху нымыхның малихтыка̄т пиюгмың.

¹⁴ Иисус қӯтмун ӯхлъюни ысҳаӷлюки юлӷутыҳлъягыт наңлъыгьягутыҳлъякӣ, ынка̄м на̄лъҳуқуқӣ қинуюлъҳит.

¹⁵ Хўаникуягу малихся̄ҳтыңита такулюку пика̄т: «Хўаникўа̄, ма̄на па̄ҳқитуқ; агляҳтӯтысқики нынун лъңитның нықыңысқылъюки».

¹⁶ Иисусым пикӣ: «Ма̄нлъит. Лъпыси ныӷьяҳқалитыки».

¹⁷ Пика̄т: «Хўа̄ лыган талъиматха̄гут нықыкшагыт, иқалъюха̄клъю».

¹⁸ Иисусым пикӣ: «Тагитыки хўавык».

¹⁹ Та̄хкын юлӷутыт ақумӯтысқыхкӣ выга̄ҳқун. Тугулюки талъимат нықыкшагыт, иқалъюха̄клъю, сивухлъюни қилягмун Кияӷнық игамсиқаюгвикыхка̄. Ӣхминың а̄вгуӷлюки нықыкшагыт, малихся̄ҳтыминун тӯныхкӣ уйыхтысқылъюки юлӷутнун.

²⁰ Қамахлъюни ныӷӯткақ кыпсю̄лъюни. Та̄хкын малихся̄ҳтыт тугукӣт қуля ма̄лӷук сӣпнықлъюку корзинат ыслъықңалӷӣт кагимлыӷитның нықыкшагыт сӣпныӷыт.

²¹ Ынтақун 5,000ңӯт югыт ныӷӯткат, аӷнатлъю, таӷнуҳа̄тлъю кысюткыхпынаки.

Иисус Пиюлӷӣ Мыҳқун

²² Та̄хкын Иисусым малихся̄ҳтыни каяхтыкӣ аңьякун аӷвиқыстӣсқылъюки на̄йвам иңлюңанун, лъңан агляҳтӯтысималюки юлӷутыҳлъягыт.

²³ Юлӷутыҳлъягыт агляҳтӯтысямики лъңинаӷми на̄йӷамун маюқақ юӷаӷналюни. Таўани иӷивгаӷми Иисус лъңина̄малюку,

²⁴ аңьят унга на̄йвами аўаваӷлютың, ынңа̄талъ имаҳлъӣқат қаюҳлъяк айгуӷнаӷускаңи.

²⁵ Акулыхкыни пиңают аӷвинлыккылъя̄к уна̄ңулюку Иисусым такукӣ малихся̄ҳтыни мыӷым қа̄йңакун пиюгмың.

²⁶ Малихся̄ҳтыт ысҳаӷлюку мыҳқун пиюлӷӣ какавнӣқат. Ынка̄м акилӷӯкат: «Таӷныӷа̄гуқ».

²⁷ Таўаниңинақ Иисусым пикӣ: «Алиңыхпынаси, Хўаңаңӯңа!»

²⁸ Та̄хкын Петырым пика̄: «Атанық, ипа лъпыңукувык тахсиӷңа лъпынун агляӷляңа мыӷым қа̄йңакун».

²⁹ Иисусым пика̄: «Таги». Ынка̄м Петр атыӷлюни аңьямың, мыӷым қа̄йңакун пиюгмың агляқақ Иисусымун.

³⁰ Иўырңа ануқа лъпыксямигу алиңыхкақ, калывуткылъюку акилӷӯкақ: «Атанық, югулиңа!»

³¹ Таўаниңинақ Иисусым акуқаӷлюку пика̄: «Ухпықилъыҳқыста̄пигӯтын! Сяңавык малӷуклъизин?»

³² Аңьямун ӯхтақуклъю ылъма̄рахтыкақ.

³³ Ынка̄м аңьямылңӯт манигуқа̄т Иисус. Пика̄т: «Ипапыста̄қ Кияӷныӷым Иӷнықа̄тын!»

Иисусым На̄лъҳускаңи Қинуюгыт Геннисаретыми

³⁴ Та̄хкын на̄йвақ аӷвиӷлюку тамлякат Геннисаретыкун.

³⁵ Тама̄кумӣт лӣсюқсямыхтыху Иисус, уңипа̄сяҳтӣсқыхкӣт нунаҳаӷмун қинуюхтӣӷит тагитысқылъюки Иисусымун.

³⁶ Манигӯтуткӣт қинуюлӷӣт ўаран ся̄фтысқылъюку кынӣкун ынка̄м қамахлъютың тама̄кут ся̄фтилӷӣт на̄лъҳутылъыңыхкат.