К Римлянам 4 - Новый Завет на эскимосском языке

Успута̄лъҳа Авраамым

¹ Сямыңʼңам пилъықыста Авраамымың, сивунымнъың хўаңкута Иудеяни? Сямың лӣтка̄ўа?

² Кияӷныӷым налъҳусяқақңукагу ылъқуӷутңалъыӷминун сялъҳакун, сямың қука̄югусиҳқалгунаяҳтуқ. Иўырңа Кияӷныӷмун қука̄югуткыпагниңитӣ сялъыни.

³ Акузитни Игақыхкани игақңа̄қ хўатын: «Авраамым ухпықыхкақа̄ Кияӷнық ынка̄м ухпықилъҳа апалъюқлъюку Кияӷныӷым тугуклъиқақа̄ ылъқуӷутңалӷӣңулюку».

⁴ Ю̄к қыпҳалъыӷминың акилыҳтӯсяңыхкаюгӯқ. Акилыҳтӯся̄ тунуся̄нӷитуқ қаюҳлъяк лъңан алъхыҳтыкақа̄ қыпҳа̄лъюку.

⁵ Кияӷныӷым налъҳусяӷна̄нӷита̄ ю̄к ылъқуӷутңалъыӷминун қыпҳа̄тилъҳакун лъңанун. Итупилъ югым ныӷьюксяҳқақа̄ Кияӷнық налъҳусяӷикаюк сыӷлыҳқыстының ылъқуӷутңалъыӷминун ухпықилъҳитхун.

⁶ Умӣлгым Давидым игақыхкақа̄ та̄на ата̄сиқ. Пика̄гуқ югыт қуястыпика̄нилюки Кияӷныӷым налъҳусяӷақңаки ылъқуӷутңалъыӷминун авылӷаӷлюки қыпҳа̄тилъҳит Кияӷныӷмун.

⁷ «Қуястыка̄гут тама̄кут сыӷлыҳқылъҳит Кияӷныӷым сыӷывуткӣ, анахутылъҳит ся̄пыхкӣ!

⁸ Қуястыка̄гуқ ю̄к сыӷлыҳқылъҳи Атанӷым сюмыӷмикнаниқаңи».

⁹ Та̄на қуястылъық Давидым акузиткыхка̄, обрезаниякаҳӣнаӷнун пиңўа̄? Нака̄! Обрезаниялъҳилңуӷнунлъю пиңӯқ. Акузитни Игақыхкани игақңа̄қ: «Авраамым ухпықыхкақа̄ Кияӷнық, ынка̄м ухпықилъҳа апалъюқлъюку Кияӷныӷым тугуклъиқақа̄ ылъқуӷутңалюку».

¹⁰ Қавңақ Кияӷныӷым тугуклъиқақагу? Сивуңани обрезаниялъҳа̄н налиӷмың киңуңаның? Сивуңани обрезаниялъҳан, нака̄н киңуңаның.

¹¹ Тахталми та̄кўани Авраам обрезанияка̄гуқ. Обрезаниялъҳа налъюнӣлъкута̄гуқ ипапиҳқусӣлюни Кияӷныӷым налъҳусяқақыхкаңа ылъқуӷутңалъыӷминун ухпықилъҳакун. Сялин обрезаниялъҳилъюку Кияӷныӷым тугуклъиқақа̄ ылъқуӷутңалюку. Тама̄кын апалъюқлъюку Авраам атаңӯқ тамаҳа̄нун ухпықилӷӣнун обрезаниялъҳитыӷңа̄та, ынка̄м Кияӷныӷым тугуклъӣмӣ ылъқуӷутңалюки.

¹² Авраамылъю атака̄т обрезаниякат. Та̄на ипаңӯқ та̄ўаңинаҳақ ухпықилъылгукуйың Аврааматун, сялин обрезаниялъҳилъюку.

Кияӷныӷым Акықуся̄ Тамаҳа̄нун Аюқуқ Ухпықилъылыгнун

¹³ Кияӷныӷым акықыхкақӣ Авраамылъю киңунқулъҳӣт ӣңунаҳа̄н нуна лъңитнун пагилъықнилюку. Акықусяқылъҳита̄ та̄на Авраамымун қаюҳлъяк қа̄ткыхкаңи Лӣлиҳтӯсят. Итупилъ Кияӷныӷым акықыхкақа̄ қаюҳлъяк ухпықыхкаңа ынка̄м Кияӷныӷым тугуклъиқақа̄ ылъқуӷутңалюку.

¹⁴ Кияӷныӷым акықуся̄ тӯньяҳқа̄яқан қа̄ткулъҳӣнун Лӣлиҳтӯсянун, та̄ўа ухпықилъық сятңунӷитуқ. Кияӷныӷымлъю акықуся̄ сятңунӷитуқ.

¹⁵ Кияӷнық сякшитақуқ югыт қа̄ткунъыӷинъыӷата Лӣлиҳтӯсянун тӯныхка̄нун Моисейемун. Иўырңа Лӣлиҳтӯсӣсяқан та̄ўа югыт қа̄ткунъыӷитусӣнъаяҳтут.

¹⁶ Тама̄кын апалъюқлъюку ухпықилъыӷмыхтыхун югыт алъхыҳта̄т Кияӷныӷым акықуся̄ акиңилңӯлюку тунусяқ. Ынка̄м қамахлъютың Авраамым киңунӷита алъхыҳтыпыста̄ҳлъықа̄т Кияӷныӷым акықуся̄. Та̄на акықусяқ Иудеяңинаҳаӷнун аюқынӷитуқ Лӣлиҳтӯсялыгнун. Иўырңа ухпықилӷӣнунлъю аюқуқ Авраамым ухпықилъҳатун. Ынка̄м Авраам қамахлъюта атакаҳпут ухпықилӷӣни.

¹⁷ Акузитни Игақыхкани игақңа̄қ: «Атаңуҳтыстамкын угляпихлъыҳӣнун нунат югитнун». Кияӷныӷым таўатын акықыхкақа̄ Авраам қаюҳлъяк ухпықыхкаңа Кияӷнық. Кияӷныӷӯқ туқуканың уңуваҳтикаюк, қылӷилъыӷмикунлъю улиматкаюк сямың сяңилңуӷмың.

¹⁸ Авраамым авақутилъыҳқа̄ сиӷиманӣтка̄гуқ. Иўырңа ухпықыхкақа̄ Кияӷнық, сиӷимакумаңинақақа̄лъю. Ынка̄м атаңуҳтыка̄гуқ угля̄пихлъыҳӣнун нунат югитнун. Хўатын Кияӷныӷым пикақа̄: «Киңуныҳтын кыстыпагниңисяҳқа̄гут».

¹⁹ Авраамым нулиҳа, Сарра, қумиңыпагниңитка̄лӷӣ. Лъңа Авраам ю̄к талъимат аюмиқулъыҳтуткалиӷьяҳтуӷлюни, туқумун туӷа̄ӷулӷӣ. Иўырңа тама̄кут сю̄мқыӷңа̄ӷмики, ухпықилъҳа Кияӷныӷмун укава̄маңилңуқ.

²⁰ Ухпықинанӣмаңитуқ талўа айгуӷикумаңита̄ Кияӷныӷым акықуся̄. Иўырңа ухпықӣӷатаӷақақ, усюқыхка̄лъю Кияӷнық.

²¹ Авраамым ипапиҳқуткыңъўа̄қақа̄ Кияӷныӷмун пияҳқақнилюку акықусяқыхкани.

²² Акузитни Игақыхкани игақңа̄қ: «Кияӷныӷым тугуклъиқақа̄ ылъқуӷутңалюку», апалъюқлъюку ухпықилъҳа.

²³ Та̄кут акузитыт: «Кияӷныӷым тугуклъиқақа̄ ылъқуӷутңалюку», игақыхка̄гут нака̄н Авраамыңинаӷмун,

²⁴ иўырңа игақыхка̄гут хўаңкунъунлъю. Кияӷныӷым тугуклъиҳлъықӣлъю ылъқуӷутңалюта қаюҳлъяк ухпықыхкыфут лъңа. Лъңаңӯқ Иисусымың Атанымнъың уңуваҳтыстикақ.

²⁵ Кияӷныӷым тӯныхкақа̄ Иисус туқуматкысқылъюки сыӷлыҳқылъыпут, уңуваҳтыкақа̄лъю налъҳусяӷналюта ылъқуӷутңалъыӷминун.