К Римлянам 13 - Новый Завет на эскимосском языке

Қа̄ткылъюки А̄ңўа̄ӷыт Иглыӷутилӷӣт

¹ Тамаҳаӷми қа̄ткусяҳқа̄гуқ а̄ңўа̄ӷуҳтыканун иглыӷутистынун. Кина алңунак иглыӷутистыңуна̄нӷитуқ ўыткуқун Кияӷныӷым иглыӷутистыңуҳтыстыкумигу. Иглыӷутистыңӯт қаюҳлъяк Кияӷныӷым ныкыхтыкақӣ иглыӷутисқылъюки.

² Китум алңунак қа̄ткынӷилъкумики иглыӷутистыт, қа̄ткигатӣ Кияӷныӷым накмикыхкӣ. Ынка̄м аӷью̄ҳтыслъықуқ.

³ Пинитун пикаюгыт аликигатӣт иглыӷутистыт, иўырңа сыӷлытун пикаюгыт аликсяҳқақӣт. Аликсюнӷилъкуфсики иглыӷутистыт, пинитун пикатык, ынка̄м усюқылъықӣси.

⁴ Иглыӷутистыт Кияӷныӷым қыпҳаҳтыкӣ аныӷныҳқылъыҳқаҳпысинун. Иўырңа сыӷлытун пикуфси, аликнакыси, қаюҳлъяк Кияӷныӷым қылӷумӣ аӷью̄ӷысқылъюки сыӷлытун пикат. Кияӷныӷым қыпҳаҳтыкӣ, аӷью̄ӷистыкӣлъю сыӷлытун пилӷӣнун.

⁵ Тама̄кын апалъюқлъюку қа̄ткитыки иглыӷутистыт. Қа̄ткитыки қаюҳлъяк Кияӷныӷмун аӷью̄ҳтысюнӷилңӯси. Иўырңа та̄наңинақ апалъю̄нӷитуқ. Қа̄ткитыки қаюҳлъяк лӣсимакаҳси қа̄ткутылъық ылъқуӷутңа̄қ.

⁶ Та̄куклъю апалъюқлъюкык лъивикақаси налогыси, қаюҳлъяк иглыӷутистыт қыпҳа̄гут Кияӷныӷмун қыпҳақатын пиныӷмыхтыки.

⁷ Ынка̄ңам налогыт асыңыси қамахлъюки лъивикитыки иглыӷутыстыхпысинун. Сӣвакитыкилъю, қӯлваҳтыкилъю қамахлъюки.

Пиниқлъюки Иляси

⁸ Асыңыхпына̄ң китумың алңунак, иўырңақун пиниқылъыҳси асыңыкңинаҳтыху иляхпысинун. Китум алңунак пиниқыхкумики юлгутни қа̄ткыңъўӣ ӣңунӣта Лӣлиҳтӯсят.

⁹ Игақңа̄т Лӣлиҳтӯсяни хўатын: «Гылгаӷнӣҳпынаң, Юхтаҳпынаң, Тыглыхпынаң, Қилӣқытиқыхпынаң». Қа̄ткылъықатын та̄кут қылӷусят, алңунаклъю қылӷусят, қа̄ткыхкувгу уна қылӷусяқ: «Пиниқлъюку юлгутын пиниқылъыҳпытун лъпынун».

¹⁰ Кина алңунак пиниқикуми юлгутминың, сыӷлытун пина̄нӷитӣ. Пиниқилъыӷмикун қа̄ткутңӯқ ӣңунӣтнун Лӣлиҳтӯсят.

¹¹ Тама̄кут пикатыки қаюҳлъяк лӣсимакаҳси пилъыҳқақ ка̄сима̄қ. Қавалӷӣстун аюқуси иўырңа ма̄тын таҳтуӷьяҳқа̄ҳтуси. Югулилъыҳпут туӷа̄ҳтуқ ухпыӷьюха̄лъымнъың.

¹² Унук алъпагьяҳтуҳтуқ, хўа̄ аҳсяҳтуңыстаӷа̄. Та̄қылътыкиңам атуқныӷмың сыӷлыӷыт югыт пӣқыхкаңит мамлыгми. Ынка̄м тугулътыки пилъюўа̄сиҳқат ниӷугми.

¹³ Пинитун кияҳтылъта катам югыстун кияҳлъыҳӣт ниӷугани аӷныӷым. Сыӷлытун тыӷигниқыфқа̄мта, сю̄мыфқа̄мта, алңунак алңунасыӷафқамта, пилъюўатыфқа̄мта, ақинатыфқа̄мта.

¹⁴ Итупилъ акулӷа̄ӷыстун а̄тыху Атанық Иисус Христос, сюмыҳтаӷа̄ткыфқӣталъю атуқналюки югусиҳпыси пиюкылъҳит.