К Филимону 1 - Новый Завет на эскимосском языке

¹ Укут посланият Павелымың пиңӯт, анусимиңлъяӷақ Христос Иисус апалъюқлъюку, ухпықа̄лгутымнъыңлъю Тимофейемың. Пиниқыхкамтыгнун қыпҳалгутымтыгнун Филимонымун,

² ухпықанунлъю қырңуӷуткаюгнун мыңтыӷаҳпыни, Апфиямунлъю наямнъун Христосыкун, Архиппымунлъю пилъюўалӷутымтыгнун.

³ Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Филимоным Пиниқилъҳалъю, Ухпықилъҳалъю

⁴ Филимоными, қӯнпың игамсиқаюгвикақақа Кияӷнықа юӷа̄ткынъымкын,

⁵ қаюҳлъяк нагақуӷақақа пиниқылъҳын тамаҳӣтнун Кияӷныӷым югитнун, ухпықилъҳынлъю Атаныҳқун Иисусыкун.

⁶ Юӷа̄ткақамкын уңипа̄тысқылъюки илятың ухпықилъымнъың Христосыкун. Таўатын пикувык лӣгикатаӷаҳлъықатын қамахлъюки қуястылъҳыт алъхыҳтыкапут Христосыкун.

⁷ Ухпықа̄лгутымни, пиниқилъыҳпык Кияӷныӷым юганун қуястыҳлъяга̄ңалъю, кайыма̄ңалъю! Пиниқылъыҳпык қуястӣ Кияӷныӷым юги.

Павелым А̄пускаңа Онисим

⁸ Тытугна̄нӷитуңа қылыӷналютын Христосыкун атуқысқылъюку ылъқуӷутңалӷӣ, иўырңа таўатын пина̄нӷитуңа.

⁹ Пиниқутылъыҳпуң апалъюқлъюку а̄пфикамкын атуқысқылъюку ылъқуӷутңалӷӣ. Хўаңа, Павел, нанывга̄гуңа, анусимиңлъяӷа̄гуңалъю апалъюқлъюку Христос Иисус.

¹⁰ Хўаңаңӯқ а̄путилӷӣ иӷнымнун, Онисимымун. Анусимиңлъяӷвигми аталӣткақа̄ңа Христосыкун.

¹¹ Сивунӷани сясӣнӷисяҳтуқ лъпынун, иўырңа хўа̄ каютңуҳтыпихсима̄қ хўаңкутыгнун.

¹² Онисим лъпынун агляҳтыснақақа, лыганқун илюка малигунъақуқ лъңакун.

¹³ Хўаңамнитысюгуяӷақа каюсӣтысқылъюңа анусимиңлъяӷвигми, катам лъпык каюсӣнъаяқывңа ма̄нсяқувык. Лӣсимакыхкынқун анусимиңлъяӷа̄лӷӣңа Пинилӷӣт Уңипат апалъюқлъюки.

¹⁴ Иўырңа хўаңамнитысна̄нӷитақа ўыткуқун сивуклъютын а̄птаҳлъютын. Итагнақумакувгу хўаңамнитысқылъюку та̄ўа лъпык пиюкылъқылъықан, қаюҳлъяк қылӷунӷитамкын таўатын писқылъютын.

¹⁵ Ынтақун Онисим иқитаҳтыка̄гуқ лъпынисяҳқа̄люни қӯнпырухлъяк.

¹⁶ Лъңа паниның қыпҳаҳтыля̄ӷӯқ. Иўырңа қыпҳаҳтыля̄ӷумалъыӷминың аңлӣӷатаӷа̄ма̄қ қаюҳлъяк пиниқыхка̄ҳсима̄қ ухпықа̄лгута. Пиниқыпихтақа, иўырңа лъпык пиниқатаӷаҳлъықан қыпҳаҳтыля̄ӷулюку, ухпықа̄лгутңулюкулъю Атаныҳқун.

¹⁷ Ынка̄ңам тугуклъӣмакувңа қыпҳалгутңулюңа, тугуклъиӷнакын Онисим хўаңаңуслъюку.

¹⁸ Сямың сыӷлытун пимакаңатын налиӷмың асыңымакаңатын, асыңыңа хўаңа лъивикылъықақа.

¹⁹ Хўа̄, хўаңа катам ӣхымның игаҳтуңа хўатын: хўаңа, Павел, лъивикылъықамкын. Иўырңа пуйгухпына̄н уңувалъҳын асыңылюку аюқан хўаңамнун.

²⁰ А̄а, ухпықа̄лгутымни, а̄пфикамкын Атаныҳқун тугуклъӣсқылъюку Онисим. Таўатын пикувык қуяслъықаҳпыңа Христосыкун!

²¹ Письмогамкын лӣсимакңўа̄ӷлюку қа̄ткысяҳқақан қылӷуткақа лъпынун, рыпалъ қа̄йӷулъюку пилъықутын.

²² Атхўай, ныкаҳқаңлъя̄таҳнакывңа қаюҳлъяк сиӷимаңӯңа Кияӷныӷым кӣмсиҳлъықӣ юӷалъыси, ынка̄м лъпысинун пилъықуңа.

Павелым Та̄қнӣтаңи

²³ Епафрасымңуқ пиниқӣси; анусимиңлъяӷалгуткақа апалъюқлъюку Христос Иисус.

²⁴ Қыпҳалгутмалъю Маркымлъю, Аристархымлъю, Димасымлъю, Лукамлъю лъңиталъюңуқ пиниқӣси.

²⁵ Пиниқылъҳа Атанӷым Иисус Христосым тамаҳаҳпысинилъи.