К Евреям 9 - Новый Завет на эскимосском языке

Манигӯтылъық Нунамылңуӷми Скиниями

¹ Акықусяқсюхўа̄ӷмини Кияӷныӷым игақыхкақӣ қылӷусят натын манигӯтылъыҳқамың лъңанун, натынлъю ныкыфтылъыҳқа̄ святилище нунами.

² Та̄на святилище югыт улимака̄т палаткаңуфтуқ ма̄лӷугыгның нылык. Сивулӣм ным а̄тқыфта̄ Аглыӷналӷӣ На. Илюңанитыфтут кынылӷуталӷутак, қаюӷвикык нықыкшаңлъялгык тӯныхкамың Кияӷныӷмун.

³ Аўалиӷныӷани тӯңлиҳа̄н сяфка̄ӷутым иляңа ным атилъқылӷӣ Аглыӷналъыҳпигақ На.

⁴ Илюңани та̄ўа золото аҳқыфигык паныӷрыӷа̄сик фимиамымун. Та̄ўалъю сялңагык қаспыӷиқак золотамың, атҳык ковчегык, нықаңӯсиҳқак Кияӷныӷым акықуся̄нун. Ковчегым имақыфтӣ золото ақимлыӷутак маннамың ималгык, Аароным аявӣӷа пӣтқуӷвикыхкақ, ма̄лӷуклъю лъӣвнықыхтак уйӷагык игақуӷвикңалӷӣк Кияӷныӷым қылӷуся̄ның.

⁵ Қӯлңани ковчегым та̄ўа золото херувимык, яқҳўик таӷныӷаңулъҳӣк искупленият ныкаҳқақит. Иўырңа ӯми пилъыӷми акузиткыпагниңитапут тама̄кут.

⁶ Сяңўа̄ тамаҳа̄н палатканилңуқ апыӷӣӷлюку, та̄хкын аҳутаңа тамаҳа̄н священнигыт ӣтҳақут сивулиӷмун нымун қыпҳаӷналютың.

⁷ Иўырңа первосвященнигаңинаҳақ итыӷьяҳқа̄гуқ тӯңлиҳа̄нун ныңанун палаткам. Таўатын пӣқуқ ата̄сиҳаӷмың аюмиқулъыӷми. Итыныӷмини таўавык нымун ӣўлың кылъқысяҳқа̄гуқ а̄ўаның аҳқуткыхкам тыӷикусям. Тӯнӣқуқ а̄ўмың Кияӷныӷмун лъми сыӷлыҳқылъыӷминун, югытлъю сыӷлыҳқылъҳитнун. Та̄на а̄ўк сыӷлыҳқылъҳитнун пиңӯқ налъюклъютың пикӣтнун.

⁸ Тама̄кутхун Аглыӷналӷӣм Таӷныӷам лӣгикыстӣлъю итыӷвик Аглыӷналъыҳпигаӷмун Нымун сялин қылъпыҳсигалңуқ скиния атуқңулюку.

⁹ Та̄кут успута̄гут ма̄тымун. Лӣгикыстӣлъю тунусятлъю, аҳтуткыхкатлъю тыӷикусят налъҳусяҳпагниңита̄т манигӯтистым сюмыӷныӷа.

¹⁰ Тама̄кут тунусятлъю, аҳтутытлъю атуқыхка̄гут қа̄ткысяҳқа̄люки қылӷусят нықныңлъю, мыӷьяҳқаныңлъю, пылюңиҳсялъыҳқаныңлъю югусӣтның аюқылӷӣт. Тама̄кут қылӷусят югусиҳӣнаӷмун аюқут. Қа̄ткысяҳқа̄гут кынляңа Кияӷныӷым акықусяӷраӷа̄ атӯҳтылъҳанун.

¹¹ Христос тагӣқңами Первосвященнигуңулюни, тагиткақӣ қамахлъюки пинилӷӣт қуястилъҳыт хўа̄ ма̄тын хўа̄нлыңӯт. Ӣтқақа̄ скиния қилягмылңуқ, мыгнунаӷатаӷалӷӣлъю пиниӷатаӷалӷӣлъю нунамылңуӷмың скиниямың. Қилягмылңуқ скиния югыт улима̄қынӷита̄т ынка̄м нунам пикынӷита̄.

¹² Та̄хкын Христос ӣтқа̄гуқ ата̄симың қӯнпырухлъяк Аглыӷналъыҳпигаӷмун Нымун сыӷлыҳқылъымнъың итымунъалюта кынлыңуна̄н. Таўатын пика̄гуқ тӯнылъыӷмикун лъми катам а̄ўни, атуҳпынаки а̄ўит козёлытлъю, каумӷа̄тлъю.

¹³ Лӣҳтӯсят қылъқақӣт священнигнун сивилъяхтӣсқылъюки югыт а̄ўитның козёлыт, каўым юхтанӷит, панылъҳаныңлъю каумӷа̄м. Таўатын пӣқут пылюңиҳсяӷналюки югыт югусӣт тугуклъиӷьюгнаҳтысқылъюки Кияӷныӷмун.

¹⁴ Тама̄кут пылюңиӷияқлъыгуката югыт югусӣтның, та̄ўа Христосым а̄ўан ўата пилъықӣ. Пылюңиҳлъықӣ умьюгаси сятңунӷилңуӷның ухпықилъыӷның лъпысинун қыпҳа̄тысқылъюку уңувалӷӣ Кияӷнық. Кынлыңилңӯгныкун Таӷныӷагныкун, Христос сыӷлыҳқылъҳилңуқ, тӯныхка̄гуқ лъңаның катам Кияӷныӷмун аҳқутңулюни.

¹⁵ Ынка̄м Христосым тагиткақа̄ Кияӷныӷым акықусяӷраӷа̄ югнун туқлъюқа̄нун. Христос таўатын пика̄гуқ лъңитнун алъхыҳтысқылъюку кынлыңилңуқ пагитақ Кияӷныӷым акықусяқыхка̄ лъңитнун. Алъхыҳлъықӣт пагитат қаюҳлъяк Христосым туқуматкыхкақыхкаңи. Ынка̄м югыт кияҳтыкат акықусяқсюхўа̄ӷми, итымума̄т сыӷлыҳқылъыӷмыхның.

¹⁶ Игакун югым игақуҳлъықӣ сяӷьяни китумун пагисяҳқа̄нилюки туқукуми. Пагитияҳқам алъхыҳна̄нӷитӣ пагисяҳқани ўытку китум ипапиҳқыхкагу ю̄к туқуматаңа.

¹⁷ Та̄м югым игақуқӣ пикатңуна̄нӷитут сялин кияҳтыңъулюку. Игақуқӣ пикатңуҳлъықут киңуңаның туқукан.

¹⁸ Тама̄кын апалъюқлъюку талўа акықусяқсюхўа̄қ пикатңумаңитуқ а̄ўңунани.

¹⁹ Моисейем а̄пқақӣ югнун қамахлъюки қылӷусят Лӣҳтӯсянилңӯт. Та̄хкын каумӷа̄тлъю, козёлытлъю а̄ўитның тугулъюни мыӷмың акумыхка̄. Тугулъюни кавилңуӷмың шерстымың, авая̄ныңлъю иссопым ныптыкӣ а̄ўмун. Та̄хкын сивилъяхтақӣ игат Лӣлиҳтӯсялӷутат, қамахлъюкилъю югыт.

²⁰ Пикӣ: «Унаңӯқ а̄ўк апыӷӣӷилӷӣ Кияӷныӷым акықуся̄ның қылӷускаңа лъпысинун қа̄ткысқылъюку».

²¹ Таўатыҳпигақ Моисейем сивилъяхтақақӣ а̄ўмың скиния, қамахлъюкилъю сяӷьят атуқыхкат манигӯтылъыӷмун.

²² Ипапыста̄қ Лӣлиҳтӯсят пилъҳитни, қамахтывзиглюни сяңўа̄ тамаҳаӷми пылюңиқа̄гуқ а̄ўкун. Кияӷныӷым сыӷывунъа̄нӷитӣ югыт сыӷлыҳқылъҳит ўыткуқун а̄ўк ма̄қыхкан.

Христосым Аҳтуткылъҳан Сыӷлыҳқылъҳыт Иқиткақӣ

²³ Нунамылңуқ скиния, илюңанилңӯтлъю сяӷьят қилягмылңуӷыстун аюқут. Тама̄кут нунамылңӯт сяӷьят пылюңиӷьяҳқа̄гут а̄ўитхун тыӷикусят. Иўырңа қилягмылңӯт сяӷьяпигыт пылюңиӷьяҳқа̄гут аҳтутытхун пиниӷатаӷалӷӣт нунами аҳқуткыхканың.

²⁴ Христос ӣтҳумаңитуқ Аглыӷналъыҳпигаӷмун Нымун югыт улима̄ӷитнун. Та̄на ипапихтун қилягмылңуҳтун аюқуқ. Йыӷлыги қилягмун ӣтқа̄гуқ ынка̄м ма̄тын Кияӷныӷмытуқ Первосвященнигаңулюни хўаңкунъун.

²⁵ Христос нунам первосвященнигыстун аюқынӷитуқ. Ата̄сиҳаӷмың аюмиқунӷани первосвященник ӣтҳақуқ Аглыӷналъыҳпигаӷмун Нымун кылъқылъюни а̄ўмың лъми пикынӷилъкыминың. Иўырңа Христос аҳқуткумаңитуқ лъңаның утыҳпахтӣнақ,

²⁶ қаюҳлъяк икфиқнаяҳтуқ углӣнаӷлюку има улималъҳаның нунам. Иўырңа укуни киңулиӷни аӷныӷни тагика̄гуқ ата̄симың қӯнпырухлъяк иқинъалюки сыӷлыҳқылъҳыт аҳтуткылъыӷмикун лъминың.

²⁷ Тамаҳаӷми туқуяҳқа̄лӷӣ ата̄сиҳаӷмың, ынка̄м та̄м киңуңаның Кияӷныӷым нанқихлъықӣ.

²⁸ Таўатыҳпигақ ата̄сиҳаӷмың Христос аҳтуткыхка̄гуқ лъмитның иқинъалюки сыӷлыҳқылъҳит юлӷутыт. Иўырңа алъя тагикуми, аҳтуткысяҳтӯнӷитуқ лъминың сыӷлыҳқылъыӷмун. Йыӷлыги югулияҳтуҳлъықӣ қылянқилӷӣт лъңаның.