К Евреям 8 - Новый Завет на эскимосском языке

Иисус, Первосвященникаҳпут

¹ А̄пқаҳпут лъпысинун, хўатын писӣгуқ: таўатылңуӷмың первосвященнилгӯкут ақумгалӷӣмын аӷынқигныӷани ся̄ӷўакун Аҳтуӷьяҳқа̄нӷитылъыҳпига̄м қилягми.

² Қыпҳа̄тиңӯқ первосвященнигуңулюни святилищами. Та̄на скинияпигӯқ Атанӷым ныкыфтыкақа̄, югым ныкыфтыкақынӷита̄.

³ Тамаҳаӷми первосвященнига накмикыхка̄гуқ тӯнисқылъюку тунусяның, тыӷикусяныңлъю аҳқыша̄ӷысқылъюку Кияӷныӷмун. Ынка̄м Первосвященнигывутлъю сямың тӯньяҳқалгуяҳқа̄гуқ Кияӷныӷмун.

⁴ Иисус нунамысяқуми священнигуңунаянӷитуқ, қаюҳлъяк священнигыт нунами тӯникаюгут тунусяның Кияӷныӷмун Лӣлиҳтӯсят писқылъҳистун.

⁵ Священнигыт қыпҳақа̄гут святилищами, қилягмылңуҳтун аюқысюгнилңуӷми. Сялин Моисейем скиния ныкыфтылъҳилъюку, Кияӷныӷым апақуткақа̄: «Ўатаҳлъяк сяңўа̄ қамахлъюку улиманакын таўатыңўа̄қ успықылъымтун кылгуткамтун лъпынун на̄йӷами».

⁶ Кияӷныӷым Иисус қыпҳақалиткақа̄ священнигаңулюку. Қыпҳақа̄ мыгнунаӷатаӷаҳтуқ Левитат священнигыт қыпҳалъҳитның. Таўатыҳпигақ акықусяӷраӷақ пиниӷатаӷалӷӣңӯқ акықусялюгмың қаюҳлъяк та̄хун Иисусым илялӣӷутыстыкақӣ Кияӷнықлъю, югытлъю. Пиниӷатаӷаҳтуқ қаюҳлъяк тунымӣтңа̄қ акықусятхун пиниӷатаӷалӷӣтхун.

⁷ Сивулиқ акықусяқ афкуйӣсяқан, та̄ўа тӯңлӣнъаяҳтуқ.

⁸ Иўырңа Кияӷныӷым афкуялгуникақӣ юни хўатын пӣқңами: «Аӷныӷыт ка̄лъықут, пӣқ Атанық, акықусяӷраӷақ пилъықақа Израилыӷмӣнунлъю, Иудаӷмӣнунлъю.

⁹ Акықусяӷраӷақа таўатынъа̄нӷитуқ акықусяқыхкамтун сивунӷитнун таслъюқлъюки аӷуляқутақңамки Египетмың. Қа̄ткусимаңитут акықусяма писқылъҳатун. Ынка̄м авылӷақӣнақақанка, пӣқ Атанық.

¹⁰ Аӷныӷыт та̄кут киңуңитның уна акықусяӷраӷақ пилъықақа Израилыӷмӣнун, пӣқ Атанық: Лӣлиҳтӯсянка умьюгӣтнун канаҳлъықанка, игақылъықанкалъю қамагун илюңитхун. Кияӷнықылъықа̄тңа, лъңит юкылъықанка.

¹¹ Налиҳӣнӣта̄ апыҳтуӷьяҳқақынӷита̄ нуналгутни, налиӷмың ныңлъюгутни лӣтысқылъюку Атанық, қаюҳлъяк қамахлъютың лӣсимакылъықа̄тңа, укалиҳпигаҳаӷның пиңўа̄ҳлъягнун.

¹² Сыӷывулъықанка анахутылъҳит, алъямыңлъю нықамикна̄нӷитанка сыӷлыҳқылъҳит».

¹³ Кияӷныӷым акузиткақңамигу акықусяӷраӷақ, сивулиқ акықусяқ атӯнаниҳтыстыкақа̄. Ынка̄м сяңўа̄ алңунак атӯнаниӷлюни аӷьюӷлюни мулюхпынани авӣӷулъықуқ.