К Евреям 7 - Новый Завет на эскимосском языке

Священнига Мелхиседек

¹ Та̄на Мелхиседек умӣлъкысяӷа̄ Салимым, священнигака̄лъю Қулиҳпига̄м Кияӷныӷым. Авраам утыӷнӣмалюку пилъюўамың кая̄лъқуӷлюки умӣлгыт, Мелхиседекым налъяӷлюку қуястыкақа̄.

² Та̄хкын Авраамым тӯныхка̄ қуляҳқылъҳаның сямың тамаҳа̄ның тугукаминың пилъюўами. Мелхиседекым а̄тҳа ма̄лӷугыгның сямың писилгӯқ, сивулиқ хўатын писӣгуқ: «Умӣлга Ылъқуӷутңалъҳым». Умӣлъкыхка̄таңаның Салимым, а̄тҳан а̄лъҳа хўатын писӣгуқ: «Умӣлга Ныкыхмылъҳым».

³ Игӣтуқ игақфикыхкамың Мелхиседекым атаңаныңлъю, на̄ңаныңлъю налиӷмың сивунӷаның, талўа алъхылъҳаныңлъю, туқулъҳаныңлъю. Кияӷныӷым Иӷныӷатун аӷулӣтуқ священнигуңулюни қӯнпырухлъяк.

⁴ Та̄ўа лӣгикаҳси Мелхиседекым а̄ңумалъыҳлъяга. Талўа сивунықсюхўа̄мта Авраамым тӯныхка̄ Мелхиседек қуляҳқылъҳаның тугуляқаминың пилъюўами.

⁵ Священникат киңунқӣ Левийем. Лӣлиҳтӯсяни, Кияӷныӷым қылъқақӣ священнигыт қырңуҳтисқылъюки юлгутаңитның қуляҳқылъыӷмың алъхыҳтыкӣтның. Священникат таўатын пӣқут, священнигатлъю, югытлъю Авраамым киңунқыӷңӣстың.

⁶ Мелхиседек киңунқынӷита̄ Левийем, иўырңа тугуклъиқақа̄ қуляҳқылъық Авраамым тӯньягу. Қуястыкақа̄лъю Авраам, алъхыӷутка̄лӷӣ Кияӷныӷым акықуся̄ның.

⁷ Налъюнықнӣтуқ та̄на қуястилӷӣ а̄ңатаӷаҳтуқ та̄хкын қуястыкамың.

⁸ Священнигыт югӯт туқукаюгыт нақамлъю алъхыӷутка̄гут қуляҳқылъыӷмың. Мелхиседеклъю алъхыӷутка̄гуқ қуляҳқылъыӷмың, иўырңа кияҳтыңъӯқ, Акузитыт Игақыхкат апылъҳистун.

⁹ Левий алъхыӷутка̄гуқ югның қуляҳқылъыӷмың. Пинаялӷӣкут талўа лъңалъю лъивикика̄гуқ қуляҳқылъыӷмың Мелхиседекымун, Авраамыкун.

¹⁰ Қайўа Левий алъхылъҳитыӷңа̄ӷми, сивуныӷми Авраамым югусӣнитка̄гуқ Мелхиседекым налъяӷақңагу Авраам.

Иисус Мелхиседекытун Аюқуқ

¹¹ Лӣлиҳтӯсяни игақңа̄қ священнигыт киңунқысяҳқақӣ Левийем. Лъңита Лӣлиҳтӯсят апыҳтӯткақӣт югнун, иўырңа қыпҳақа̄т Кияӷныӷмун нӯҳутка̄гуқ. Тама̄кын апалъюқлъюку югыт аклъюка̄гут священнигымың Мелхиседекытун аюқылӷӣмың, Ааронытун аюқынӷилңуқ.

¹² Левит священнигыт симиныӷмыхтыки алъяның священниганың, та̄ўа Лӣлиҳтӯсятлъю алъяңуҳсяҳқа̄гут.

¹³ Священникат қӯнпың Левийем рамкыңаның пиңӯт, иўырңа Атаныҳпут рамкыңаның пиңунӷитуқ. Кина алңунак Атанымта рамкыңаның пи қыпҳӣгатңўа̄ҳтуқ священнигаңулюни аҳқыфигыгни.

¹⁴ Тамаҳаӷми лӣсимака̄т Атаныҳпут алъхықа̄гуқ рамкыңанун Иудам. Моисейем пимаңитӣ киңунӷи Иудам священнигуңуяҳқа̄нилюки.

¹⁵ Ынка̄м тама̄кут лӣгикатаӷаӷапут хўатыҳлъюўа̄қ қаюҳлъяк иляңа священнигым Мелхиседекытун аюқылӷӣ тагима̄қ.

¹⁶ Лӣлиҳтӯсят қылӷуткақа̄т священник киңунқысяҳқақнилюку Левийемун. Атаныҳпут священнигуңуҳтыка̄нӷитуқ Лӣлиҳтӯсят писқылъҳитхун, иўырңа священнигаңуҳтыка̄гуқ аҳтуӷьяҳқа̄нӷилңуҳқун уңувалъыӷмикун кынлытҳӯсяҳқа̄нӷилңуҳқун.

¹⁷ Акузитыт Игақыхкат пика̄лӷӣт: «Священнигуңӯтын қӯнпырухлъяк, Мелхиседекым священнигуңулъҳатун».

¹⁸ Тама̄кын апалъюқлъюку Кияӷныӷым симиқақа̄ Лӣлиҳтӯсяқ священнигның аюқылӷӣ қаюҳлъяк кая̄лңуқлъю, атӯнӷилңуқлъю.

¹⁹ Лӣлиҳтӯсят кина алңунак пистысимаңита̄ Кияӷныӷым пиюкылъҳатун. Ынка̄м Кияӷныӷым тӯнумилъю пиниӷатаӷалӷӣмың сиӷималъыӷмың. Та̄хун сиӷималъыҳқун агляӷьяҳқа̄ҳтукут Кияӷныӷмун.

²⁰ Та̄м сиӷималъҳым ся̄ӷўакун Кияӷнық алъяңуҳна̄нӷилңуӷмың акықима̄қ.

²¹ Иўырңа таўатылңуӷмың акықилъҳитуқ Левийем киңунӷи священнигаңуҳтақңата. Иисусыңинаӷмун хўатын пика̄гуқ: «Атанық акықима̄қ, алъяңуҳна̄нӷита̄клъю умьюгагни; “Лъпык священнигуңӯтын қӯнпырухлъяк”».

²² Тама̄кын апалъюқлъюку Иисусыңӯқ ипапиҳқылъық Кияӷныӷым акықусяни пипыста̄ҳлъықа̄. Та̄на акықусяқ пиниӷатаӷаҳтуқ акықусяқыхкаминың Моисейкун.

²³ Сивунӷани священнигытуяҳтуқ. Туқунӷата иляңита священнигыт нагныӷутақа̄т қыпҳақа̄т.

²⁴ Иўырңа Иисус священнигуңӯқ қӯнпырухлъяк қаюҳлъяк уңувалъықуқ қӯнпың.

²⁵ Тама̄кын апалъюқлъюку Иисусым ӣўлың югулияқлъыгўӣ Кияӷныӷмун аглялӷӣт лъмикун, қаюҳлъяк қӯнпың уңуваңӯқ манигӯтунъалюки тама̄кут Кияӷныӷмун.

²⁶ Иисус Первосвященнигуңӯқ тӯникаюк сямың аклъюкыхкамнъың. Аглыӷнаҳтуқ, авутңитуқ, пылюңитуқ, а̄фтыңъа̄қ сыӷлыҳқыстының, Кияӷныӷым қӯлвақақа̄ қулиҳпигаӷмун қилягмун.

²⁷ Иисус иляңистун первосвященнигыстун аюқынӷитуқ. Аҳутаңа тамаҳа̄н первосвященнига аҳқыша̄ӷьяҳқа̄гуқ, сивуклъюни лъми сыӷлыҳқылъыӷминун, та̄хкын югыт сыӷлыҳқылъҳитнун. Иисус тӯнақңами лъми катам, аҳқуткыхка̄гуқ сыӷлыҳқылъҳитнун югыт, ата̄сиҳаӷмың.

²⁸ Лӣлиҳтӯсяни игақңа̄қ югыт накмӣӷьяҳқа̄нилюки первосвященнигакаҳқамың сыӷлыҳқыхкаюгуӷңа̄н алңунак югыстун. Киңуңаның Кияӷныӷым апылъҳан Лӣлиҳтӯсят Моисейемун, тахталми та̄кўани алъяңуҳсяҳқа̄нӷилңуӷмың акықика̄гуқ. Та̄хун акықилъыҳқун Кияӷныӷым Иӷныни Первосвященнигуңуҳтыстыкақа̄, афкуяңуна̄н, қӯнпырухлъяк.