К Евреям 5 - Новый Завет на эскимосском языке

¹ Тамаҳа̄н первосвященнига Кияӷныӷым накмикыхкақа̄ юлгутаңаның. Кияӷныӷмун агляӷақуқ югыт апалъюқлъюки тӯналюки тунусӣт аҳқыша̄ӷунъалюкилъю сыӷлыҳқылъҳитнун.

² Первосвященнига кая̄лъиқыхкаюгутминың наңлъыхтаӷьяҳқа̄гуқ тама̄кунун налъюкылӷӣнунлъю, ухпықинанилӷӣнунлъю ипапилъыӷмун.

³ Қаюҳлъяк кая̄лъиқыхкаюгутминың, первосвященнига аҳқыша̄ӷьяҳқа̄гуқ лъми катам сыӷлыҳқылъыӷминун, сыӷлыҳқылъҳитнунлъю югыт.

⁴ Кина алңунак накмикигатуқ лъңаның первосвященнигуҳналюни қӯлваӷьяҳқа̄люни. Иўырңа ю̄к первосвященнигуҳтақуқ Кияӷныӷым накмикынӷатни, катам таўатын накмикылъҳатун Аарон.

⁵ Таўатынлъю Христос қӯлвалъҳитуқ лъминың накмиклъюни первосвященнигуҳтылъыӷмун, иўырңа Кияӷныӷым накмикыхкақа̄. Пикақа̄: «Иӷнықамкын; аӷныӷми хўани Аталӣтаҳпыңа».

⁶ Налиӷныӷитни Акузитни Игақыхкани Кияӷныӷым пикақа̄: «Священнигуъықутын қӯнпырухлъяк, Мелхиседекым священнигаңулъҳатун».

⁷ Кияӷнық аҳтуӷьяҳқа̄нӷилъылгӯқ югулияҳқа̄люку Иисус туқулъыӷмың. Ынка̄м Иисус нунамытңулюни, игляхтулюни қунитӯмаӷми юӷақа̄лӷӣлъю, туңсиқа̄лӷӣлъю Кияӷныӷмун югулисқылъюни туқулъыӷмың. Кияӷныӷым нагаткақӣ юӷалъҳи, қаюҳлъяк қусывыхлъюни қа̄ткыхка̄ Кияӷныӷым пиюкылъҳа.

⁸ Қайўа Иисус Кияӷныӷым Иӷнықыӷңа̄тни, паниның лӣтка̄гуқ қа̄ткусималъыӷмың икфиқылъыӷмикун.

⁹ Апыӷӣӷьягу қамахлъюку Кияӷныӷым писқылъҳа, Иисусыңуҳтуқ кынлыңилңуӷмың югулилъыңыстияҳқақ тамаҳа̄нун қа̄ткулъҳӣнун лъңанун.

¹⁰ Ынка̄м Кияӷныӷым накмикыхкақа̄ первосвященнигаңулюку, Мелхиседекым первосвященнигаңулъҳатун.

Таӷнуҳаҳа̄тлъю, Аңтанӣткатлъю Ухпықат

¹¹ Апыӷьяҳқаҳлъягӯкут тама̄куның. Иўырңа апыҳтуныҳлъюпихтуси тама̄куның қаюҳлъяк лӣгикаӷаҳсигалңӯси.

¹² Ныӷипихлъюси ухпықа̄лӷӣси ынка̄м апыҳтуӷияҳқа̄ҳтыка̄гуси иляхпысинун. Йыӷлыги паниның аклъя̄қуси китумун апыҳтунқихтысқылъюси ухпынҳат лӣсюхўа̄ӷьяҳқӣтның Кияӷныӷым акузитаңаның. Катам таӷнуҳаҳаӷыстун мамаҳтуӷьюгақуси, нықыпигьюхпынаси.

¹³ Кина алңунак мамаҳтуқаюк паниның таӷнуҳаҳа̄гуқ. Сялин налъюка̄ ылъқуӷутңалъықлъю, анахутңалъықлъю.

¹⁴ Иўырңа нықыпик аңтанӣтканун пиңӯқ. Пыҳқихсяқа̄гут лӣгиксяҳқа̄люкык пинилӷӣлъю, сыӷлылӷилъю.