К Евреям 2 - Новый Завет на эскимосском языке

Кияӷныӷым Югулиӷилъыҳлъяга

¹ Тама̄кын апалъюқлъюку сюмыҳтаӷа̄ткыңъўа̄ӷылътыки ипапилъҳыт нагақуқапут лю̄рақ ўа̄кнаниқыстаӷнаюкамтыки.

² Кияӷныӷым апыҳтӯсӣ ипаңӯт; а̄пқақӣ югнун яқулыхтыхун. Кина алңунак қа̄ткунъыӷилңуқ апыҳтӯсянун, Кияӷныӷым аӷью̄ҳлъықа̄ аӷью̄лъыҳқаҳтуталяңатун.

³ Ынка̄м иҳсякумакумтыху Кияӷныӷым югулиӷилъыҳлъяга анахпагниңитаҳпут аӷью̄ӷилъыҳқа̄. Атанӷым апыӷьюха̄қақа̄ та̄на югулилъық. Та̄хкын тама̄кут нагақӯткат лъңаның, ипапиҳқа̄т хўаңкунъун.

⁴ Кияӷныӷымлъю ипапиҳқыхкақа̄ хўаңкунъун. Таўатын пика̄гуқ атуқылъыӷмикун алъя̄ҳӣна̄т алъя̄ҳлъюхўаҳтилъҳыт, уйыхтылъыӷмикунлъю тунусӣ Аглыӷналӷӣм Таӷныӷам пиюкылъыӷмитун.

Иисус, Югулилъыңыстикақ Хўаңкунъың

⁵ Кияӷныӷым накмикылъҳитӣ яқулгыт иглыӷутисқылъюки сивумылңуӷмун нунакаҳқамун. (Та̄наңӯқ нуна акузиткыхкыфут.)

⁶ Налиӷныӷитни Акузитни Игақыхкани хўатын игақңа̄қ: «Кияӷнық, сяңа̄ўа ю̄к умьюгаӷмикақыхкын, налиӷмың иӷныӷа югым афлъыңакыхкан?

⁷ Улима̄қан укавақа̄нлъюку яқулыгның, қаҳпалиқақан ниӷуҳқылъыӷмыңлъю, қӯлвалъыӷмыңлъю,

⁸ иглыӷутистыңлъяқақанлъю сямун тамаҳа̄нун». Таўанилъю Акузитни Игақыхкани игақңа̄қ, Кияӷныӷым улима̄қа̄ ю̄к «иглыӷутистыңулюку сямун тамаҳа̄нун». Та̄на хўатын писӣгуқ сяңўа̄ қамахлъюни илятңа̄қ иглыӷутилъҳанун. Нақамлъю сялин ысҳӣгатаҳпут ю̄к иглыӷутилӷӣ сямун тамаҳа̄нун.

⁹ Иўырңа ысҳаӷаҳпут Иисус! Кияӷныӷым натыңӣҳақ укаваҳтыстыкақсяӷа̄ яқулыгның. Ма̄тын ысҳаӷаҳпут қаҳпалюни ниӷуҳқылъыӷмыңлъю, қӯлвалъыӷмыңлъю қаюҳлъяк икфиқлъюни туқука̄гуқ. Кияӷныӷым пиниқылъҳа апалъюқлъюку, Иисус туқука̄гуқ тамаҳа̄нун.

¹⁰ Кияӷныӷӯқ улимаӷикақ сямың тамаҳа̄ның лъңанун, нагныӷастыңъўӣлъю таўатылъюки. Итагнапихтыка̄гуқ Кияӷныӷым пиниҳсяӷўа̄қақа̄ Иисус икфиқылъыҳқун пӣнлиҳтыңулюку югулилъҳитнун. Ынка̄м Иисусым тагисяҳқа̄ҳтыкақӣ юлӷутыт ниӷуҳқылъыӷмун.

¹¹ Иисусым пылюңиҳсяқақӣ югыт сыӷлыҳқылъҳитның. Ынка̄м лъңалъю тама̄кутлъю пылюңиҳсяқӣ, қамахлъютың Атака̄т Кияӷнық. Тама̄кын апалъюқлъюку Иисусым кайңукигатӣ атиӷьяҳқа̄люки аңлыгутңулюки.

¹² Иисусым пикақа̄ Кияӷнық: «Апыҳлъықақа а̄тҳын аңлыгутымнун; усюқылъықамкын қырңуӷутката».

¹³ Хўатынлъю пика̄гуқ: «Ныӷьюкылъықақа Кияӷнық». Пика̄гуқлъю: «Хўаңалъю, таӷнуҳа̄тлъю Кияӷныӷым тагивақӣ хўаңамнун».

¹⁴ Та̄кут таӷнуҳа̄т югӯт кымыкшалгутлъю, а̄лгӯтлъю ынка̄м Иисус лъңистун лъӣқа̄гуқ. Таўатын пика̄гуқ туқуналюни на̄фқынъалюку Туӷныӷақ, аҳтуӷьяҳқа̄нӷилъылык туқумун.

¹⁵ Ынка̄м таўатын пилъыӷмикун итымуткақӣ тама̄кут қыпҳаҳтыля̄ӷыстун аюқылӷӣт уңувалъытың қамахлъюки қаюҳлъяк аликңукаңат туқулъық.

¹⁶ Хўатыҳлъюга̄ӷӯқ яқулгунӷитут Иисусым каюсиқӣ, иўырңа Авраамым киңунӷи каюсиӷақӣ.

¹⁷ Тама̄кын апалъюқлъюку Кияӷныӷым Иисус лъӣҳтыстыңъўа̄ӷьяҳқақа̄ хўаңкутыстун. Таўатын қыпҳа̄сяқлъыгўа̄ Кияӷнық Первосвященнигулюни, наңлъыхтаӷлюнилъю, ата̄сӣӷмылъюнилъю. Ынка̄м тӯнияқлъыгуҳтыка̄гуқ аҳтутмың Кияӷныӷмун сыӷывутысқылъюки югыт сыӷлыҳқылъҳит.

¹⁸ Иисус икфиқыхка̄тминыңлъю, нанӷӣқулъыңыхка̄тминыңлъю, каюсиӷьяқлъыгўӣ тама̄кут нанӷӣқулъыңылӷӣт.