К Евреям 13 - Новый Завет на эскимосском языке

Ухпықат Кияҳта̄лъыҳқа̄т

¹ Пиниқыкыстаҳтыки ухпықа̄лгутыси.

² Упуӷамаңинаҳтык ақӣягнун қаюҳлъяк иляңита упуӷатақӣт налъюклъюки яқулгутаңи.

³ Нықамиклъюки анусимиңлъяӷвигмылңӯт, никимқун лъпысилъю анусимиңлъяӷвигмылңуси. Нықамиклъюки икфиқңалӷӣт, никимқун лъпысилъю икфиқылӷӣси.

⁴ Тамаҳаҳпыси сӣвакитыху ныңуӷутылъық ынка̄м угитлъю, нулиҳытлъю ата̄сӣӷмытулъит. Кияӷныӷым нанқихсяҳқақӣ гылгаӷнӣлӷӣт, тама̄кутлъю иляңаның блудникылъӷит.

⁵ Кияҳтык пакигныӷухпынаси манимун, итагнаӷақитыклъю сятуталыхпысистун. Кияӷнық пика̄гуқ: «Унинъа̄нӷитңўа̄ӷамси; пыхна̄нӷитңўа̄ӷамси».

⁶ Ынка̄м тытулъңуна̄мта хўатын пилъта: «Атанық каюткақа! Алиңна̄нӷитуңа югыт сялъыҳқӣтның».

⁷ Нықамиклъюки иглыӷутистыси уңипақикат лъпысинун Кияӷныӷым акузитаңаның. Нықамиклъюки натын кияҳтыка̄таңи ынка̄м ухпылъылгунақитык лъңистун.

⁸ Иисус Христос алмысиқақа̄ иӷивгақ, аӷныӷми, қӯнпырухлъяклъю.

⁹ Иқитутыстыхпынаси ипапилъыӷмың алъя̄ҳӣнаӷнунлъю, алъяка̄ягнунлъю апыҳтӯсянун. Наңлъыхталъҳакун Кияӷныӷым айыпсюгиҳсяҳтыки илюси, нака̄н қа̄ткылъюки Лӣлиҳтӯсят нықның аюқылӷӣт. Та̄кут нықыт Лӣлиҳтӯсӣт қа̄ткыхкуфсики айыпсюгиҳсяӷна̄нӷитӣт илюси.

¹⁰ Священнигыт қыпҳалӷӣт скиниями иныҳтыка̄гут ныӷылъыҳқӣтның аҳтуткыхкамың аҳқыфимтыхун.

¹¹ Первосвященнигым тагитақӣ а̄ўит тыӷикусят Аглыӷналъыҳпигаӷмун аҳтуткынъалюки сыӷлыҳқылъыӷнун. Иўырңа кымыхкўа̄ӷит тыӷикусят ныҳлъягмың иқитулъюки паныҳтақӣт.

¹² Тама̄кын апалъюқлъюку Иисусылъю иқитутка̄гуқ ныҳлъягмың. Таўани туқука̄гуқ, пылюңиҳсяӷналюки югыт сыӷлыҳқылъҳитның лъми катам а̄ўминың.

¹³ Ынка̄ңам ныҳлъягмың хўаңкуталъю агля̄лъта Иисусымун, сыӷлытун акузиткысқылъюта катам лъңа сыӷлытун акузиткылъҳистун.

¹⁴ Нунами хўани қӯнпыкаҳқамың ныҳлъягитукут, иўырңа утақаңўа̄ҳпут ныҳлъяк тагияҳқақ.

¹⁵ Иисусыкун ӣўлың аҳтуткилъта Кияӷныӷмун. Аҳтутыпут усюқилъқапут апынымтыху Иисус Атанӷунилюку.

¹⁶ Пуйгухпына̄н пинитун пилъық, тӯнутақитыклъю қаюҳлъяк тама̄кут аҳқутңӯт ыфқуӷналӷӣт Кияӷныӷмун.

¹⁷ Қа̄ткитыки иглыӷутистыси атуқлъюки қылӷусӣт. Кылыңакиңӯт уңувасиҳпысиның лӣсимаклъюку Кияӷныӷмун нанқихсяҳқа̄си. Қуянӷитыстыхпынаки иглыӷутистыси, итупилъ қа̄ткылъыҳпысигун қыпҳақатың пилъықӣт қуякусиқлъюки. Қа̄ткынӷилъкуфсики каюсӣтыпагниңитӣси.

¹⁸ Юӷа̄ткитыкут. Лӣсимакапут умьюгамта анахутылъҳинъӣлъю, қаюҳлъяк ӣўлың пиюкылъқаҳпут ылъқуӷутңалӷӣ пияҳқа̄люку.

¹⁹ Та̄куңинаҳа̄гның каяхтамси юӷа̄ткысқылъюңа қантаӷақун лъпысинун утыӷниӷналюңа.

Та̄қнӣта Юӷақ

²⁰ Кияӷныӷым ныкыхмылъылитистым Атаныҳпут Иисус уңуваҳтыстыкақа̄ туқулъыӷмың. Ынка̄м а̄ўмикун Пынъӣӷнӣҳтыҳлъягуҳтыка̄гуқ пынъӣӷнун. А̄ўан атӯяҳқа̄ҳтыстыкақа̄ Кияӷныӷым қӯнпыкаҳқақ акықуся̄.

²¹ Юӷаҳтуңа Кияӷныӷмун тӯнысқылъюси сямың тамаҳа̄ның пинилӷӣмың лъпысинун пиюкылъҳа писқылъюку. Иисус Христосыкунлъю илюхпысинун Кияӷныӷым пилигу ыфқуӷналӷӣ лъңанун. Христос усюқылъыңли қӯнпырухлъяк кынлыңуна̄н. Аминь.

На̄ңнӣтыт

²² Ухпықа̄лгутымни, нагатңўа̄қаҳтыки посланиянка қаюҳлъяк кайымьюгақамси. Тама̄кын апалъюқлъюку такыста̄ҳа̄люку письмоӷамси.

²³ Лӣсимакысюгамси ухпықа̄лгутымнъың, Тимофейемың, а̄нысима̄қ анусимиңлъяӷвигмың. Ка̄тылӷаҳтуӷьяқан қырңа̄мтуң ысҳаӷьяҳтуҳлъықамси.

²⁴ Қуякаҳнакыси қамахлъюки иглыӷутистыси, қамахлъюкилъю Кияӷныӷым юги. Ухпықа̄лгутытлъю Италиямың пикат қуякаҳнакысиңуқ.

²⁵ Кияӷныӷым пиниқиңалӷӣ каюсилъҳа тамаҳаҳпысинилъи! Аминь.