К Евреям 12 - Новый Завет на эскимосском языке

Кияӷнық Хўаңкута Атавут

¹ Қамахлъютың тама̄кут югыт лӣгикыстӣлъю ухпықилъыӷмыхның натын кияҳтылъыӷмыхтыхун. Ма̄тын увитаңиӷлюта ысҳапагақӣлъю. Ынка̄м килга̄қустыстун иқитылътыки қамахлъюки уқихкутат, сыӷлыҳқылъҳытлъю иглягулъҳӣт хўаңкунъун. Сягиқлъютаңам килга̄қулъта сивумнъилңуӷмун,

² ысҳа̄маклъюку Иисус, пӣнлиӷистыңалъю, апыӷӣӷистыңалъю ухпықилъымта. Кайңунаҳтуқ туқулъыҳқақ қақӯракун, иўырңа Иисусым пикаткумаңита̄ кайңусяӷа̄тылъық. Йыӷлыги накмӣқа̄гуқ икфиқналюни қақӯракун апалъюқлъюку қуялъық алъхыҳсяҳқани. Ынка̄м ма̄тын ақумга̄қ аӷынқигныӷани Кияӷныӷым.

³ Сюмыҳтаӷа̄ткаҳтыхуқун Иисус. Ӣлъқаюгумаңитуқ қайўа сыӷлыҳқыстыт угумикыра̄ҳлъяӷңа̄тни. Таўатын лъпысилъю илютулъҳӣнъа̄нӷитусилъю, ӣлъқаюгна̄нӷитусилъю.

⁴ Сыӷлыҳқынӷинъақуткылъыҳпыси сялин югнун туқутысигатӣси.

⁵ Пуйгустыкӣ илютуҳся̄сит акузитыт уңипа̄тилӷӣт Кияӷныӷмун иӷнықнилюси? Акузитни Игақыхкани игақңа̄қ: «Иӷнымни, авылӷақӣнаҳпына̄н Атанӷым налъҳусянӷатын, ӣлъқаюхпынаңлъю аӷью̄нӷатын.

⁶ Қаюҳлъяк қамахлъюки пиниқыхкани Атанӷым апыҳтуӷақӣ қа̄ткысқылъюни, аӷью̄ӷақӣлъю тугуклъиқани авақута̄люки».

⁷ Тугуклъиӷақитыху Кияӷныӷым аӷью̄ӷилъҳа қаюҳлъяк иӷнықылӷӣстун пӣқӣси. Қамахлъюки авақутатың атаңита аӷью̄ӷақӣт налъҳуҳқынъалюки.

⁸ Қамахлъютың авақутат аӷью̄лъыңақут. Аӷью̄лъыңынӷилъкувык та̄ўа атаңилңӯгутын ынка̄м авақутапикынӷита̄тын.

⁹ Та̄м ся̄ӷўакун, атамта нунамылңӯт аӷью̄ӷақӣлъю апыҳтуӷналюта қа̄ткысқылъютың, иўырңа паниның қӯлваӷақапут. Ынка̄м Атавут қилягмылңуқ қа̄ткатаӷаӷьяҳқақаҳпут уңуваналюта.

¹⁰ Атамта нунамылңӯт аӷью̄ӷақӣлъю натыңӣҳақ, сюмыӷмыхни ылъқуҳлъюку аӷью̄ӷиңунилютың. Иўырңа Кияӷныӷым аӷью̄ӷақӣлъю пиниҳқылъыҳқамнъун пылюңӣҳтысқылъюта лъмитун.

¹¹ Қуянӣтуқ аӷью̄лъыңнымта қаюҳлъяк ақниҳтақыхкаңилъю. Иўырңа тахталми, лӣтфикнымтыху, ныкыхмылъыңақукут қаюҳлъяк кияҳсягутақукут ылъқуӷулъюта.

Апыҳтуӷалъҳытлъю, Кылыңася̄лъҳытлъю

¹² Кывыхтыки ӣхыси қуӷаӷңалӷӣт, та̄хкын икнақуҳсяҳтыки кая̄лңӯт сыгысқуси!

¹³ Таклъяҳтики тӯмңи тутмалъыҳпык, та̄хкын кая̄лңуқ иӷун а̄нқаӷна̄нӷитуқ нафлъюминың, иўырңа на̄лъҳулъықуқ.

¹⁴ Кияҳнақитык ныкыхмытулъюси тамаҳа̄нун югнун, кияҳнақитыклъю сыӷлыҳқылъңунаси. Килъю алңунак пылюңинъыӷилңӯт ысҳаӷна̄нӷита̄т Атанық.

¹⁵ Ысҳа̄макулъюси килъю алңунак лю̄рақ алъхыҳныӷися̄ӷа̄т Кияӷныӷым наңлъыхталъҳа. Нагусяқуна̄нлъю сюңаӷнилңуқ акуқ сыӷлылӣҳқӣлюни на̄фқӣяҳқақ юлӷутмың.

¹⁶ Ысҳа̄макулъюси килъю алңунак блудникысаҳтут, налиӷмың килъю алңунак қӯлваӷинӷися̄ҳтут Кияӷныӷмың Исавытун. Акикыхкақыхкаңа пагитаҳқани ата̄сиҳаӷмун ныӷьяҳқамун.

¹⁷ Лӣсимакаҳси та̄м киңуңаның, алъхыҳсюгақңамигу атами қуястылъҳа, атаңан иҳсякыхкақа̄. Исавым алъяңуҳтыпагниңиткақа̄ апыӷӣқани, қайўа қунитӯмаӷми туңсиӷңа̄ӷмигу атами қуястилъҳа.

¹⁸ Сивуныҳпысистун аюқынӷитуси Синайым найӷаҳанун пикастун. Ысҳаӷьяҳқа̄т, ся̄фсяҳқа̄тлъю. Таўани мамлыхлъягукақ, на̄фтыҳлъягукақ, на̄йӷақлъю кумаӷуҳлъягулӷӣ.

¹⁹ Нагақуқа̄т қалӷиҳта̄н қалӷиҳлъыҳӣ, нагақуқа̄тлъю Кияӷныӷым мыңа. Иўырңа ныпӣқӣсқыхка̄т,

²⁰ қаюҳлъяк тугуклъиӷьюнӷилъкаңат қылӷилъҳа хўатылңуқ: «Та̄на на̄йӷақ, югым налиӷмың тыӷикусям ся̄фтыкумигу, туқусяҳқапыста̄ӷӯқ милюҳпага̄тамың».

²¹ Моисейем ысҳақа̄ какава̄таӷнапихлъыҳӣ рыпалъ хўатын пика̄лӷӣ: «Лъңа̄талъ уңылыхтуңа алиңрӯӷым».

²² Иўырңа катам лъпыси тагика̄гуси Сионым найӷаҳанун, қилягым Иерусалимыңанун, ныҳлъяганун уңувалӷӣм Кияӷныӷым. Тагика̄гуси кыстыка̄нӷилңуӷнун яқулыгнун қырңуӷутканун қуялъылиҳлъяглюси.

²³ Тагика̄гуси қырңуӷутылъҳитнун қамахтыңъўа̄ӷлютың ухпықат иӷнықсюхўа̄ӷыстун аюқылӷӣт. Қилягми а̄тҳит игақңа̄т игатхун. Тагика̄гуси Кияӷныӷмун нанқихтистыңитнун қамахтыңъўа̄ӷлютың югыт, таӷныӷӣтнунлъю ылъқуӷутңалӷӣт югыт ӣӷўиҳтыстыканун.

²⁴ Тагика̄гуси Иисусымун, лъңакун Кияӷнық акықусяӷраӷаңлъяқа̄гуқ. Тагика̄гусилъю сивилъяхта̄ткамун а̄ўанун Иисусым. Пиниӷатаӷаҳтуқ Авелым а̄ўаның, қаюҳлъяк Кияӷныӷым сыӷывутӣ сыӷлыҳқылъҳыт Иисусым а̄ўакун.

²⁵ Ынка̄м кылыңатык, нагасюнӷитыхпына̄н Кияӷнық акузилӷӣ. Сивунымта нагасюнӷиткақа̄т кылыңася̄ӷилъҳа нунами хўани, ынка̄м анагумаңита̄т аӷью̄ӷилъҳа. Хўаңкута аӷью̄ӷатаӷаҳлъықӣнкутлъю нагасюнӷилъкумтыху кылыңася̄лъҳа қилягмың.

²⁶ Кияӷнық акузӣқңами Синайым найӷаҳаның, мыңан уфсюгуткақа̄ нуна. Иўырңа ма̄тын акықима̄қ хўатын: «Ата̄сиҳаӷмың уфсюгунъықихлъықақа нуна, иўырңа қиляклъю уфсюгулъықақа».

²⁷ Таўатын акузилъҳан: «Ата̄сиҳаӷмың уфсюгунъықихлъықақа нуна», лӣгикыстыңъўа̄ӷӣлъю хўатын, сяңўа̄т қамахлъюки улима̄ни, Кияӷныӷым иқилъықӣ уфсюгусяҳқат. Тама̄куңинаҳа̄т уфсюгутыпагниңилңӯт тама̄нлъықут қӯнпырухлъяк.

²⁸ Тама̄кын апалъюқлъюку игамсиқаюгвикылътыху Кияӷнық қаюҳлъяк тӯныхкаңилъю атаныҳпагулъыӷмың уфсюгусяҳқа̄нӷилңуӷмың. Ынка̄ңам манигӯлътыху Кияӷнық ыфқуӷналъкыхка̄тун алиңылъылиӷлюталъю, қӯлваӷилъылиӷлюталъю,

²⁹ қаюҳлъяк Кияӷныҳпут на̄фқӣлӷӣңӯқ кынық.