К Евреям 10 - Новый Завет на эскимосском языке

¹ Лӣлиҳтӯсят таӷныӷаңулъҳӣстун аюқут пинилӷӣнун ка̄сяҳқанун, иўырңа Лӣлиҳтӯсят та̄куҳпига̄нӷитут. Лӣлиҳтӯсят қылылъҳистун Иудеит аҳқыша̄ӷумаңинаӷақут аюмӣтаңа тамаҳа̄н. Иўырңа тама̄кут аҳқыша̄лъҳыт укмаңиӷўа̄ҳпагниңитӣт сыӷлыҳқылъҳитның манигуӷьяҳтуныӷмыхтыху Кияӷнық.

² Югыт манигӯтыстыңи Кияӷныӷым укмаңипӣгумакумың сыӷлыҳқылъыӷмыхның, сыӷлыҳқинаниӷнаяҳтут. Ынка̄м аҳтуткинаниӷнаяҳтут.

³ Иўырңа аюмӣтаңа тамаҳа̄н, тама̄кут аҳқыша̄лъҳыт нықаңуҳтыстақӣт югыт сыӷлыҳқылъҳитның,

⁴ қаюҳлъяк а̄ўита каўым юхтанӷитлъю, козёлытлъю сыӷлыҳқылъҳиҳпагниңитӣт.

⁵ Тама̄кут апалъюқлъюки Христос тагӣқңами нунамун пикақа̄ Кияӷнық: «Аҳтутыюгумаңитутынлъю, тунусяӷьюгумаңитутынлъю, иўырңа ята̄ҳқыхкақан югусиқ хўаңамнун.

⁶ Ыфқуқумаңитатын тыӷикусят ӣңунӣта паныҳтыкат аҳқыфигыгни налиӷмың аҳтутыт сыӷлыҳқылъыӷнун.

⁷ Та̄хкын хўаңа пӣқа: “Ӣи Кияӷнық, тагӣңа пиюкылъыҳпытун пиналюңа, катам таўатын игақуқақыхкаңатңа Акузитни Игақыхкани”».

⁸ Христос пика̄лӷӣ: «Аҳтуӷъюгумаңитутынлъю, тунусяӷьюгумаңитутынлъю. Аҳтуӷъюгумаңитутын тыӷикусяның ӣңунаӷмың паныҳтыканың аҳқыфигыгни налиӷмың аҳтутның сыӷлыҳқылъыӷнун. Тама̄кут ыфқуҳсимаңита̄тын». Христос таўатын пика̄гуқ Лӣлиҳтӯсят қылӷуткақыӷңа̄тки тама̄кут аҳтутыт писқылъюки.

⁹ Та̄хкын пика̄гуқ: «Ӣи, тагӣңа пиюкылъыҳпытун пиналюңа». Ынка̄м Кияӷныӷым қамахлъюки иқиқуӷлюки аҳтутылъюгыт ныңитхун ныкыхтыкақа̄ Христос аҳқутңулюку.

¹⁰ Иисус Христосым қа̄ткысяқминигу Кияӷныӷым пиюкылъҳа, пылюңиқақӣлъю сыӷлыҳқылъымнъың тӯнылъыӷмикун югусини ата̄сиҳаӷмың қӯнпырухлъяк.

¹¹ Аҳутаңа тамаҳа̄н, тамаҳаӷмың священнигыт ныкывӷаӷмың қыпҳақатың пӣқӣт. Утыҳпахтӣнақ тӯнӣқут таўатылъкулъҳӣның аҳтутның. Таўалъӣма тама̄кут аҳтутыт сыӷлыҳқылъҳиӷияҳқаҳа̄нӷитут.

¹² Иўырңа Христосым тӯныхкақа̄ ата̄сиқ аҳқун сыӷлыҳқылъыӷнун қӯнпырухлъягмун. Та̄хкын ақумыхкақ аӷынқигныӷакун Кияӷныӷым.

¹³ Таўани Христос утақӣгақуқ кынляңа Кияӷныӷым ныкыхтылъыҳқа̄нун аңуяги итыга̄н асиңанун.

¹⁴ Та̄хун ата̄сикун аҳтуткылъыҳқун, Христосым қӯнпырухлъяк на̄михтыстыкақӣ пылюңиҳсяқат сыӷлыҳқылъыӷмыхның.

¹⁵ Аглыӷналӷӣмлъю Таӷныӷам уңипа̄тӣлъю тама̄куның. Сивуклъюни хўатын пика̄гуқ:

¹⁶ «Унаңӯқ акықусяқа юмнун, киңуңитның тама̄кут аӷныӷыт, пӣқ Атанық, Лӣлиҳтӯсянка канаҳлъықанка илюңитнун, игақылъықанкалъю умьюўӣтхун».

¹⁷ Та̄хкын пӣқ: «Алъямыңлъю нықамикна̄нӷитанка сыӷлыҳқылъҳит, сыӷлытунлъю пилъҳит».

¹⁸ Ынка̄м Кияӷныӷым сыӷывускаки сыӷлыҳқылъҳит, аҳтутыт атуқсяҳқа̄наниҳлъықут сыӷлыҳқылъыӷнун.

Туӷа̄ӷылъта Кияӷныӷмун

¹⁹ Тама̄кын апалъюқлъюку, ухпықа̄лгутымни, алиңылъңуна̄мта итылъыҳқаңукут Аглыӷналъыҳпигаӷмун а̄ўакун Иисусым.

²⁰ Қылъпыӷусимисилъю тумыӷраӷаӷмың уңувалъыӷмун сяфка̄ӷуткун; та̄на сяфка̄ӷун югусиқа̄.

²¹ Священнигалыхлъя̄гӯкутлъю иглыӷутилӷӣмың Кияӷныӷым мыңтыӷа̄ның.

²² Тама̄кут апалъюқлъюки тугӯлътыху Кияӷнық ипапиҳқылъюта, ныӷьюкңўа̄ӷлюку. Таўатын пилъыҳқаңукут қаюҳлъяк умьюгалъюпут сивилъяхтақа̄гут Христосым а̄ўаның укмаңӣҳтысқылъюки, югусипутлъю уӷвуҳқыхка̄гут пылюңилңуҳқун мыҳқун.

²³ Йықай ата̄сӣӷмылъюта сиӷималъыӷмытыкыста̄лъта хўаңкунъун пикникамнъун, қаюҳлъяк ухпықаҳпут Кияӷнық ата̄сӣӷмытуқ ынка̄м пияҳқақӣ акықусяни.

²⁴ Йықай сюмыҳтаӷа̄лъта натын қӣлңумиӷусяҳқа̄люта пиниқсяҳқа̄люки илят, пинитунлъю пияҳқа̄люта.

²⁵ Йықай та̄қыфқа̄мта қырңуӷунъыӷмың пилъта манигуӷналюку Кияӷнық, иляңита пӣқылъҳистун. Йыӷлыги қырңуӷусимаңина̄лъта кайымутунъалюта. Ўата кайымусимаңина̄лъта қаюҳлъяк Атанӷым Аӷныӷа туӷа̄лӷӣ.

²⁶ Сыӷлыҳқысюга̄тақумта киңуңаның лӣлъюку ипапилъық, та̄ўа аҳтуткаҳқӣтуқ иқитусиҳқамың тама̄вык сыӷлыҳқылъыӷнун.

²⁷ Тама̄кут таўатын пилӷӣт алиңрӯӷмың утақӣлъықут Кияӷныӷым нанқихтилъҳаның. Атуқылъықа̄к угуқнаҳлъягык кынӷык на̄фқынъалюки тама̄кут кипулъхина̄лӷӣт лъңаның.

²⁸ Ма̄лӷук налиӷмың пиңают лӣсимакистыт а̄пқатху ю̄к қа̄ткусимаңинъилюку Моисейем Лӣлиҳтӯся̄мнъун, нанқихтистым наңлъыкыхпына̄н туқутыслъықа̄.

²⁹ Сюмыҳтаӷа̄ткаҳтыху натынми аңкаслъюган Кияӷныӷым аӷью̄ҳлъықагу ю̄к тутма̄сҳақӣқылӷӣ Иӷныӷаның Кияӷныӷым, пӣқылӷӣ сятңунӷинъилюку а̄ўк апыӷӣӷуткақ акықусяӷраӷаӷмың (қайўа Кияӷныӷым укмаңӣсиқыхкақыӷңа̄гу сыӷлыҳқылъҳанун), сыӷлықӯӷӣқылӷӣлъю наңлъыхталӷӣгнун Таӷныӷагнун.

³⁰ Лӣсимакаҳпут Кияӷнық; лъңаңулӷӣ хўатын пикақ: «Хўаңаңӯқ аӷью̄ӷияҳқақ, акисяҳқақанка сыӷлытун пилъҳит». Хўатынлъю пика̄гуқ: «Атанӷым нанқихсяҳқақӣ лъми юни».

³¹ Татама̄таӷнапихтуқ кина алңунак ӣханисяҳқақ уңувалӷӣм Кияӷныӷым Нанқихтилъҳым Аӷныӷани!

³² Нықамикыхкыси тама̄кут аӷныӷыт сивунӷани лӣсюхўа̄ӷақңафсигу ипапилъық Христосымың аюқылӷӣ. Аӷулӣтка̄гуси ата̄сӣӷмылъюси қайўа икфиқыҳлъяӷңа̄ҳпыси.

³³ Иляңакун юхтуқами югыт сыӷлытун акузиткақӣсилъю, амьюқыта̄ткақӣсилъю. Иляңани ныкывӷалгусиӷақаси тама̄кут амьюқыта̄ткысилӷӣт.

³⁴ Наңлъыкақаси анусимиңлъяӷвигмылңӯт. Талўа қуяңа̄қуси югыт тугулянӷатки сяӷьяси қаюҳлъяк лӣсимакаҳси паниның сялгӯси пиниӷатаӷалӷӣмың қӯнпыкаҳқамың.

³⁵ Ынка̄ңам ӣлъқаюхпынаси қаюҳлъяк илютумаңинақуфси алъхыӷулъықуси акилыҳтӯсяҳлъягмың.

³⁶ Аклъюкңўа̄ҳси нуқынъыҳтулъық атуқсяҳқа̄люку Кияӷныӷым пиюкылъҳа. Та̄хкын алъхыҳлъықаси акықусяқыхкӣ.

³⁷ Катам игақңалӷӣ Акузитни Игақыхкани хўатын: «Қантаӷақун та̄на тагияҳқақ ка̄лъықуқ; кима̄ўина̄нӷитуқ.

³⁸ Ылъқуӷутңалӷӣт югынка кияҳлъықут ухпықилъыҳқун. Иўырңа китум алңунак пыхтыкумигу ухпықилъыни, уңувасигма ыфқуқна̄нӷита».

³⁹ Иўырңа хўаңкута пыхтикастун ухпықилъыӷмыхның аюқынӷитукут, на̄фқылъыңьяҳқастун. Иўырңа ухпықилъылгӯкут ынка̄м уңувасипут югулика̄гут.