К Евреям 1 - Новый Завет на эскимосском языке

Кияӷныӷым Акузитаңи Иӷныӷмикун

¹ Сивунӷани агани угляӷлюкулъю, алъя̄ҳӣна̄люкулъю Кияӷныӷым алыҳқуқақӣ сивуныпут ӯкналиқистытхун.

² Иўырңа укуни киңулиӷни аӷныӷни алыҳқуқақӣлъю Иӷныӷмикун. Лъңакун Кияӷнық нунаңлъяқа̄гуқ, накмикыхкақӣлъю пилӣтысқылъюку сяңўа̄ тамаҳа̄н.

³ Иӷныӷым кӯкхутақа̄ Кияӷныӷым ниӷуҳқылъҳа, Кияӷныҳтуңўа̄қлъю аюқуқ. Сяңўа̄т қамахлъюки нагныӷастыңъўӣ таўатылъюки аҳтуӷьяҳқа̄нӷилңӯтхун акузитмикун. Иӷныӷым тӯныхкақа̄ лъми катам уңувалъыни укмаңиӷналюта тамаҳа̄ның сыӷлыҳқылъымнъың. Апыӷӣӷьямигу таўатын пилъыни, қилягми ақумыхка̄гуқ аӷынқигныӷакун Кияӷныӷым, аҳтуӷьяҳқа̄нӷитылъыҳпига̄м.

Иӷнық А̄ңатаӷаҳтуқ Яқулыгның

⁴ Кияӷныӷым қулӣҳтыкақа̄ Иӷнық яқулыгның, атылиткақа̄лъю иңья̄тңалӷӣмың а̄тҳитның.

⁵ Таўатын пикақа̄ қаюҳлъяк Кияӷныӷым пимаңитӣ налиҳӣнӣт яқулгыт хўатын: «Иӷнықамкын; аӷныӷми Аталӣтаҳпыңа». Кияӷныӷымлъю пимаңитӣ налиҳӣнӣт яқулгыт хўатын: «Атакылъықа̄ңа ынка̄м лъңа Иӷнықылъықақа».

⁶ Кияӷныӷым каяхсяҳқа̄ҳсямигу Иӷнықсюхўа̄ни нунамун, хўатынлъю пика̄гуқ: «Йықай қамахлъютың Кияӷныӷым яқулгита манигуӷлитху».

⁷ Хўатынлъю пика̄гуқ яқулыгның: «Кияӷныӷым яқулыни ануқыстун лъӣҳтыстыкақӣ. Қыпҳаҳтыңи кумаӷулӷӣстун кынӷыстун лъӣҳтыстыкақӣ».

⁸ Иўырңа Кияӷнық Иӷныӷминың хўатын пика̄гуқ: «Ка̄й Кияӷнық, ақумутахкын кынлыңисяҳқа̄гук қӯнпырухлъяк! Иглыӷулъықан атаныҳпагулъҳын ылъқуӷутңалъылиӷлюку.

⁹ Пиниқан ылъқуӷутңалъық, угумикан анахутңалъық. Тама̄кын апалъюқлъюку Кияӷнық, Кияӷныҳпык накмикума̄тынлъю, қӯлва̄ма̄тынлъю пакихулъюку иляхпының. Ынка̄ңам қуястиҳлъяхтуқ аңиҳақатынлъю мысӣӷмың».

¹⁰ Хўатынлъю пика̄гуқ: «Лъпык, Атанық, пӣнлиӷьюха̄ӷми нунаңлъяқа̄гутын, ӣхыхпыныңлъю қилягаңлъяқа̄гутын.

¹¹ Қамахлъютың авӣӷусяҳқа̄гут, иўырңа лъпык кияҳсяҳқа̄гутын. Аӷьюӷьяҳқа̄гут а̄ткастун.

¹² Имыхтыҳлъықатын қа̄слъистун, симиҳлъықатынлъю а̄ткастун. Иўырңа лъпык қӯнпың алмысиқылъықа̄тын, аӷьюӷьяҳқа̄нӷитутынлъю».

¹³ Кияӷныӷым пимаңитңўа̄ӷӣ налиҳӣнӣт яқулыни хўатын: «Ақуми хўагун аӷынқигнымкун, кынляңа аңуяхтын тунымалӣтыстылъымнун итыгаҳпык асиңанун».

¹⁴ Сяңа̄ўанңам яқулгыт? Қамахлъютың таӷныӷа̄гут қыпҳа̄тилӷӣт Кияӷныӷмың, каяхтақӣлъю каюсӣтысқылъюки тама̄кут югулилъыңьяҳқат.