1е Коринфянам 15 - Новый Завет на эскимосском языке

Христосым Уңуваҳтылъҳа

¹ Ухпықа̄лгутымни, нықамиксюгамси Пинилӷӣның Уңипаның уңипақыхкамның лъпысинун. Тугуклъиқақаси ынка̄м ухпылъыси та̄хун ныкыгңа̄т аюгўилъютың.

² Югулилъыңыхка̄гуси ухпықақңафсики Пинилӷӣт Уңипат, ынка̄м ухпықумаңинаҳтыки а̄пқанка. Иўырңа ухпықнаниқуфсики, ухпылъыси сясӣна̄нӷитут.

³ Апыҳтуқақамси апыҳтӯсяқыхкамың хўаңамнун. Та̄кут ухпықсяҳқақаси: Христосым туқуткыхкақӣ сыӷлыҳқылъыпут, катам Акузитыт Игақыхкат пинақнилъҳистун.

⁴ Та̄хкын лъӣфқақа̄т, ынка̄м пиңая̄ни аӷныӷым уңувақа̄гуқ Акузитни Игақыхкани пинақнилъҳистун.

⁵ Петырым ысҳақақа̄, та̄хкын киңуңаның қамахлъютың қуля ма̄лӷук сӣпнықлъюку апостолыт ысҳақақа̄т.

⁶ Киңуңитның ю̄к ма̄лӷук қуля сӣпнықлъюкуның углялӷӣм малихся̄ҳтыңита қырңаҳлъягмың ысҳақақа̄т. Кияң та̄кут уңува̄т, иляңи туқука̄ӷңа̄ӷмың.

⁷ Та̄хкын Иаковым ысҳақақа̄, ынка̄м киңувақун қамахлъютың апостолыт ысҳақақа̄т.

⁸ Киңулӣлюңа ысҳақақақа, ухпыӷьяҳқаҳпагниңитка̄ӷңа̄ӷма китуми алңунак.

⁹ Укалиҳпига̄гуңа апостолыни, талўа атиӷьяҳқа̄нӷисяҳтуңа апостолымың, қаюҳлъяк амьюқыта̄тқыхкақанка Кияӷныӷым юги.

¹⁰ Иўырңа Кияӷныӷым наңлъыхталъҳакун апостолыңӯңа. Наңлъыхталъҳа хўаңамнун аваңинъыӷитуқ. Қыпҳаӷатаӷаҳтуңа тамаҳӣтның апостолыт, иўырңа хўаңамның пиңунӷитақа, Кияӷныӷым наңлъыхталъҳакун пӣқуңа.

¹¹ Қыпҳаӷатаӷалъыҳпут илямнъың мыгнунӣтуқ. Мыгнуналӷӣта та̄на қамахлъюта уңипақыхкақапут лъпысинун та̄кут ата̄сит Пинилӷӣт Уңипат, ынка̄м ухпықыхкақаси.

Хўаңкута Уңувалъыҳқаҳпут

¹² Ухпықңукыси Уңипақ уңипақыхкаҳпут: Христосым уңуваҳтылъҳа туқулъыӷмың. Сяңамыңам иляси пӣқат: «Туқукат уңуваӷна̄нӷитут?»

¹³ Кина алңунак уңуваҳтысимаңилъкан, Христос паниның туқуңанаяҳтуқ.

¹⁴ Паниның туқуңакан уңипаҳқӣтукут, ынка̄м ухпықсяҳқӣтуси.

¹⁵ Туқукат уңуваҳтысимаңилъката туқулъыӷмың, Кияӷныӷым уңуваҳтысимаңита̄ Христос. Ынка̄ңам хўаңкута апостолыни қамахлъюта иқлъыңиқыстыңӯкут қаюҳлъяк пика̄гукут: «Кияӷныӷым Христос уңуваҳтыстыкақа̄ туқулъыӷмың».

¹⁶ Туқукат уңуваҳтысимаңилъката, Христосылъю уңуваҳтысимаңитуқ.

¹⁷ Христос паниның туқуңакан ухпылъыси сясӣнӷитут ынка̄м аӷьюлъыңылъықуси сыӷлыҳқылъыҳпысинун.

¹⁸ Ухпықистыт Христосыкун туқуляӷа̄ткат қамахлъютың ифлъянаяҳтут.

¹⁹ Ныӷьюкилъыҳпут Христосыкун хўаниңинаҳақ кияҳта̄лъымнъи атӯкан, наңлъыгналъыҳпига̄яҳқа̄гукут югни китумың алңунак.

²⁰ Ипаңӯқ Христос уңувақа̄гуқ туқулъыӷмың, тама̄кын апалъюқлъюку лӣсимакңўа̄ӷаҳпут хўаңкуталъю уңуваҳтысяҳқа̄гукут иляңани аӷныӷым.

²¹ Туқулъық алъхықа̄гуқ ата̄сикун юхкун, Адамыкун. Таўатыҳпигақ уңуваҳтыстылъық туқулъыӷмың алъхықа̄гуқ иляңакун юхкун, Христосыкун.

²² Адамыкун қамахлъюни туқуяҳқа̄гуқ, иўырңа қамахлъютың Христосымылңӯт уңуваҳтысяҳқа̄гут туқулъыӷмың.

²³ Қамахлъютың туқуляӷа̄ткат пилъыҳқатың ка̄нъыӷата уңуваӷақна̄ҳтут: Христос сивулиҳпига̄люни уңувақа̄гуқ. Та̄хкын тагинқихтыкан тама̄кут лъңан пиңи уңуваӷьяҳқа̄гут.

^24-28 Христос умӣлгуяҳқа̄гуқ кынляңа кая̄лъқылъыӷминун қамахтыңъўа̄ӷлюки аҳтуӷьяҳқа̄нӷилъҳыт қа̄ткусюгигалңӯт Кияӷныӷмун, туӷныӷа̄тлъю иглыӷутистыт, югытлъю иглыӷутистыт илялъюки. Христос умӣлгуяҳқа̄гуқ кынляңа Кияӷныӷым кая̄лъқылъҳанун қамахтыңъўа̄ӷлюки Христосым аңуяги. Киңулиҳпигақ аңуяк туқулъҳӯқ Кияӷныӷым кая̄лъқысяҳқа̄. Христосым тӯныхкагу Атаныҳпагулъық Кияӷныӷмун Атамун та̄хкын кынля ка̄лъықуқ. Игақңа̄қ Акузитни Игақыхкани: «Кияӷныӷым сяңўа̄ тамаҳа̄н итыга̄н асиңанун лъӣҳтысяҳқақа̄». Хўатын писӣгуқ, Кияӷныӷым сямун тамаҳа̄нун қа̄ткыстысяҳқақа̄ Христос. Иўырңа Кияӷныӷым қа̄ткусяҳқа̄ҳтыстыкумигу сяңўа̄ тамаҳа̄н Христосымун, қа̄ткусяҳқа̄ҳсяҳқа̄нӷитуқ, лъңаның катам. Таўатын пикан, та̄хкын Иӷнық лъңаның катам асилӣҳсяҳқа̄гуқ Кияӷныӷмың. Ынңа̄талъ Кияӷныӷым сяңўа̄ тамаҳа̄н иглыӷулъықа̄.

²⁹ Иляңи югыт крестиӷистақут туқукат апалъюқлъюки. Туқукат уңуваҳсяҳқа̄нӷилъката туқулъыӷмың, сяңамыңам иляңи крестиӷистақат туқукат апалъюқлъюки?

³⁰ Лӣсимакапут туқукат уңувақа̄гут туқулъыӷмың. Ынка̄ңам уңипақиңӯкут Пинилӷӣның Уңипаның туқунъақсяӷңӣлъю аҳутаңа тамаҳа̄н.

³¹ Ипаңӯқ туқусяқлъыхӣнақ аюқа̄тңа аҳутаңа тамаҳа̄н. Катам лӣсимакылъыҳпысистун қуякылъқа ухпылъыҳси аңлилӷӣ Христос Иисусыкун Атанымтыхун. Таўатыҳпигақ ипапиҳқуткысяҳқақаҳси туқусяқлъыхӣнақ аюқыхкаңатңа аҳутаңа тамаҳа̄н.

³² Югыт Ефесымылңӯт пилъюўақанка тыӷикусястун аюқут. Алъхыӷунъалюңа хўани кияҳтылъымни пилъюўақумки, сямың алъхыӷунъа̄нӷитуңа. Туқулъымта киңуңаның уңуваӷьяҳқа̄нӷилъкумта: «Ныӷылъта, мыӷылъта, қаюҳлъяк уна̄ми туқулъықукут».

³³ Китумун алңунак пӯҳтыстыхпынаси илякумта̄ңумакуфси сыӷлытун пикаюгмың, атуқсягулъықаҳси сяңўа̄ пӣқыхкаңат.

³⁴ Сюмыҳтаӷаӷақлъюси пинитун, сыӷлыҳқынъаниҳтык, иляси акулыхпысинилңӯт апыҳтӯмаңилңӯгут Кияӷныӷмың. Қаюҳлъяк лъпыси ухпықани кайңуюгьяҳқа̄гуси.

Югусиҳқат Уңуваҳтыстылъҳым Киңуңаның

³⁵ Кина алңунак хўатын пикан: «Натын туқукат уңуваҳтыстақат туқулъыӷмың? Натылңуӷмың югусилгуяҳқа̄ўат?»

³⁶ Уюқ налъю̄қақ! Пӣтута нунакун пыӷукувгу туқуяҳқа̄гуқ сивуңани пӣтылъыҳқами.

³⁷ Пӣтутмың алъяңулюни аңлӣқуқ. Пӣтысиӷаныҳпыни, пӣтутысқувыгаҳақ пыӷўа̄қан нунакун, пшеницакаҳқақ налиӷмың сяңуяҳқақ.

³⁸ Пӣтутысқувыгаҳақ та̄на Кияӷныӷым накмикыхкаминың югусилитақа̄. Алъякулъҳӣт пӣтутыт алъякулъҳӣмың югусиҳқалгӯт.

³⁹ Таўатылъкутңўа̄ӷунӷитут югусӣт. Югыт, тыӷикусят, қаўа̄гыт, иқалъюгыт алъякутут югусӣт.

⁴⁰ Қиляк югусиҳтӯқ, нуна югусиҳтӯқ. Югусӣт қилягмылңӯт лъмыгыстун пиниӷнаҳтут. Югуситлъю нунамылңӯт лъмыгыстун пиниӷнаҳтут.

⁴¹ Сиқинық, танқиқ, иӷалықыта̄ӷытлъю алъякутут пиниӷналъҳит. Талўа иӷалықыта̄ӷыт алъякақаҳтаӷмың алъякутут пиниӷналъҳит.

⁴² Таўатысяҳқа̄гут туқукат уңуваҳтыстыката туқулъыӷмың: нунами югусипут туқа̄қут, аӷўа̄қут, иўырңа югусиӷраӷапут туқуна̄нӷитңўа̄ҳтут.

⁴³ Лъӣфқумың нунамылңӯт югусипут сыӷлыӷуҳсяҳқат кая̄лияҳқат, иўырңа югусиқ уңуваҳтыстыкуми пиниӷнаӷьяҳқақлъю, икнақсяҳқақлъю.

⁴⁴ Лъивыныӷмини югусиқ югым пика̄. Иўырңа югусиқ уңуваҳтыстыкуми таӷныӷамнъун югусӣяҳқа̄гуқ. Югусилгуката югыт югусиҳқалгӯтлъю таӷныӷапут.

⁴⁵ Ынка̄м Акузитни Игақыхкани игақыхка̄гуқ: «Юксюхўа̄қ Адам уңувалӷӣңуҳтыка̄гуқ». Иўырңа киңулиқ Адам уңувалъылитикаюгӯқ таӷныӷақ, Христосыңӯқ.

⁴⁶ Сивуклъюта югым югусӣның югусиңақукут, та̄хкын та̄кўаниңани Кияӷныӷым югусилитақӣ таӷныӷапут.

⁴⁷ Юксюхўа̄қ нунамың пиңӯқ, пагуляңаның нунам улима̄ӷӯқ, иўырңа тӯңлиҳа̄ ю̄к Христос, қилягмың пиңӯқ.

⁴⁸ Югыт кияҳтыкумың нунами хўани, югусилгӯт Адамым югусӣтун аюқылӷӣмың. Иўырңа тама̄кут қилягми кияҳсяҳқат Христосытун югусилгуяҳқа̄гут.

⁴⁹ Адамытун югусилгулъымтыстун, иляңани аӷныӷым Христосытун югусилгуяҳқа̄гукут.

⁵⁰ Ухпықа̄лгутымни, лӣтысюгамси югусипут укут кымыкшагмың, а̄ўмың улима̄ӷыт, итыӷна̄нӷитут Атаныҳпагулъҳанун Кияӷныӷым. Иляңани аӷныӷым укут югусипут туқуяҳқа̄гут. Уңувана̄нӷитут қӯнпырухлъяк.

⁵¹ Уңипа̄таҳлъямси қайвиҳсимаңилңуӷмың: қамахлъюта туқуна̄нӷитукут, иўырңа қамахлъюта алъяңуҳсяҳқа̄гукут,

⁵² сюкатыпихлъюта қунқалъылъҳыстун киңулиҳпигақ қалӷиҳтақ нагақуқумтыху. Таўани қалӷиҳталъыӷми ухпықат қамахлъютың туқуляӷа̄ткат уңуваҳтӯсяҳқа̄гут нутаӷамың югусилиӷлютың туқуяҳқа̄нӷилңуӷмың. Та̄хкын хўаңкуталъю паниның уңувалӷӣни нутаӷамың югусиңаӷаҳта̄лъықукут.

⁵³ Югусипут пагулямың улима̄ӷыт алъяңуҳсяҳқапыста̄ӷӯт на̄фқысяҳқа̄нӷилңуӷмың. Укут югусипут туқукаюгыт симиӷьяҳқа̄гут югусимың туқуяҳқа̄нӷилңуӷмың.

⁵⁴ Ынка̄м Акузитни Игақыхкани игақыхкақ апыӷӣҳлъықуқ: «Туқулъық на̄фқуқ; кая̄лъқӣлъық ӣӷўиҳтуқ!»

⁵⁵ «Туқу, кая̄лъқӣлъҳын на̄гу? Туқу, аҳтуӷьяҳқа̄нӷилъҳын ақниҳқӯсин хўаңкунъун на̄гу?»

⁵⁶ Туқулъҳым аҳтуӷьяҳқа̄нӷилъыни алъхыҳтақа̄ сыӷлыҳқылъыӷмың ақниҳналюта, ынка̄м сыӷлыҳқылъҳым Лӣлиҳтӯсят аҳтуӷьяҳқа̄нӷилъқӣ.

⁵⁷ Ынка̄ңам игамсиқаюгвикақаҳпут Кияӷнық қаюҳлъяк кая̄лъқӣстыкақӣлъю Атанымтыхун Иисус Христосыкун.

⁵⁸ Ынка̄ңам, пиниқыхкамни ухпықа̄лгутымни, кая̄лъқӣлъыҳқаҳпут ипапыстаӷутаңаның, ухпылъыси аӷулӣтыслъюки, нӯхаҳтафқа̄фси, қӯнпың қыпҳаҳтыху Атанӷым қыпҳақа̄. Лӣсимакаҳси Атаныҳқун қыпҳалъыҳси аваңинъыӷитуқ.