1е Коринфянам 14 - Новый Завет на эскимосском языке

Павелым Апыҳтӯткатаӷақаңи Аглыӷналӷӣм Таӷныӷам Тунусӣ

¹ Пиниқылъыңьюгатаӷаӷьяҳқа̄гуси пакихулъюку сямың тамаҳа̄ның. Иўырңа пиюкитыкилъю Аглыӷналӷӣм Таӷныӷам тунусӣ, ўата пиюксяҳқақаҳси уңипақилъық Кияӷныӷым уңипа̄мың.

² Ю̄к акузиныӷмини алъястун улюстун алыҳқуӷақа̄ Кияӷнық. Югыт алыҳқӣгатӣ қаюҳлъяк лӣгикна̄ӷита̄т. Акузӣқуқ аҳтуӷьяҳқа̄нӷилъҳакун Аглыӷналӷӣм Таӷныӷам югым налъюкыхка̄ның.

³ Иўырңа ю̄к тунусялык уңипақилъыӷмың Кияӷныӷым уңипа̄мың акузикаюгӯқ югнун. Акузитаңи каюсиӷикаюгӯт, кайымикаюгӯт, илютуҳсяӷикаюгӯт югнун.

⁴ Ю̄к акузикаюк алъястун улюстун каюсӣткаюгӯқ лъңаның катам, иўырңа ю̄к уңипақикаюк Кияӷныӷым уңипа̄мың каюсиӷикаюгӯқ ухпықаның.

⁵ Қамахлъюси пиюкақсяӷамси акузисқылъюси алъястун улюстун, иўырңа ўатақа̄ӷақтуқ тунусялгулӷӣси уңипақсяҳқа̄люки Кияӷныӷым уңипӣ. Тама̄кут уңипақикаюгыт а̄ңатаӷаҳтут акузикаюгның алъястун улюстун. Акузикаюгыт алъястун улюстун мумиҳқуҳтылгуяҳқа̄гут каюсӣтысқылъюки ухпықат.

⁶ Ухпықа̄лгутымни, лъпысинун пилюңа алыҳқуӷьяқумси алъястун улюстун лӣгиксяҳқақынӷилъкыхпысигун натынңам каюсӣнъаяӷамси? Иўырңа апыҳтуӷьяқумси Кияӷныӷым кылгутка̄ның хўаңамнун, налиӷмың уңипа̄сяқумси сямың лӣткамның, налиӷмың ӯкналиқуткысяқумкун Кияӷныӷым сялъыҳқа̄, налиӷмың апыҳтуӷьяқумси ипапиҳқылъыӷмың ынңа̄талъ каюсӣнъаяӷамси.

⁷ Свирелытлъю, гуслитлъю сыӷлытун қалӷиҳтыкуйык китум алңунак лӣгикна̄нӷита̄ сяңўа̄ иляга̄н атуӷақутаңа.

⁸ Пилъюўаҳтым труба қалӷиҳтыкагу сыӷлытун иляңита пилъюўаҳтыт налъюкылъықа̄т пилъюўалъыҳқаҳтың.

⁹ Таўатыҳпигақ акузикуфси алъястун улюстун, китум алңунак лӣгикна̄нӷитӣси сямың пӣқыстык. Акузинӷилңуӷыстун пияҳқа̄гуси.

¹⁰ Угляпихтуқ алъя̄ҳӣнақ акузилъық, атуқистыңита лӣгикақӣт.

¹¹ Иўырңа лӣгикынӷилъкумкун ю̄к акузилӷӣ алъякун акузилъыҳқун накумӣңӯқ хўаңамни, ынка̄м хўаңалъю накумӣңуңа лъңани.

¹² Ынка̄ңам лъпыси, тунусяңьюпихтыкуфси Аглыӷналӷӣм Таӷныӷам тунуся̄мың, туңсиҳтык каюткаҳқамың ухпықанун.

¹³ Тама̄кын апалъюқлъюку ю̄к акузикаюк алъястун улюстун, юӷаӷли мумиҳқуӷьяҳқа̄люку сямың пилъыни.

¹⁴ Юӷаӷьяқума алъястун улюстун, таӷныӷахка юӷаҳлъықук, иўырңа умьюгагма лӣгикна̄нӷита̄к.

¹⁵ Сянақсиңаңам? Юӷаҳлъықуңа таӷныӷамкун, юӷаҳлъықуңалъю умьюгамкун. Таўатыҳпигақ илягаҳлъықуңа таӷныӷамкун, илягаҳлъықуңалъю умьюгамкун.

¹⁶ Қаюҳлъяк таӷныӷахпыгун усюқыхкувгу Кияӷнық алъястун улюстун, натынңам лӣгикигалңӯм усюқилгусиҳлъықатын Кияӷныӷмун игамсиқаюлъыҳпының? Налъюка̄ сямың пӣқсин.

¹⁷ Юӷалъҳын пинӣпихсяӷңа̄н иляңа югым каюсилъыңна̄нӷитуқ.

¹⁸ Игамсиқаюгвикақақа Кияӷнық акузӣқылӷӣңа алъястун улюстун угляӷатаӷаӷлюку лъпысиның.

¹⁹ Иўырңа юӷаӷвигмынъымни апыҳтуӷиюгақуңа. Тама̄кын апалъюқлъюку апыҳтуӷӣқуңа қафсинкӯраҳа̄т акузитыт атуқлъюки лӣгиксяҳқаси, акузина̄нӷитуңа алъястун улюстун угля̄пихлъюку лӣгиксяҳқақынӷилъкыхпысиның.

²⁰ Ухпықа̄лгутымни, сюмыҳтаӷаҳпынаси таӷнуҳаҳаӷыстун. Сюмыҳтаӷаӷақитык аңликастун, иўырңа сыӷлыҳқысюлъыҳси таӷнуҳаҳаӷыстун аюқуқ.

²¹ Лӣлиҳтӯсяни игақңа̄қ: «Кияӷнық пӣқ: “Каяхлъықанка югыт алъяның нунаның алыҳқуӷьяҳтӣсқылъюси лъңита катам улюңистун. Алыҳқуҳлъықамси қа̄нӷитхун иўырңа паниның наганъа̄нӷитаҳпысиңа”».

²² Ынка̄м тунуся̄ акузилъҳым алъястун улюстун ипапиҳқусӣгуқ ухпықиңигалңуӷнун, нака̄н ухпықикаюгнун. Уңипақилъық ухпықилӷӣнун аюқуқ, нака̄н ухпықиңигалңуӷнун.

²³ Ынка̄ңам юӷаӷвихпысини ухпықат қамахлъютың акузисяқумың алъястун улюстун, иляңи югым налиӷмың ухпықа̄нӷилңӯт ӣтқумың налъюңуҳнилъықӣси.

²⁴ Иўырңа ухпықа̄нӷилңуқ налиӷмың лӣгикигалңуқ юӷаӷвихпысинун итыӷлюни нагаскумиси уңипалӷӣси Кияӷныӷым уңипа̄мың, нагалъюни нанқихтыңъўа̄ҳлъықуқ сыӷлыҳқыстыңунилюни.

²⁵ Қаманлъиқыхкӣ аксяқңалӷӣт қайвиҳқылъықут. Ынка̄м қуңуҳлъюни манигуҳлъықа̄ Кияӷнық. Хўатын пилъықуқ: «Ипапыста̄қ, Кияӷнық хўа̄нтуқ лъпысини».

Натын Атуқылъыҳқӣ Аглыӷналӷӣм Таӷныӷам Тунусӣ Юӷаӷвигми

²⁶ Ухпықа̄лгутымни, уната апыҳтӯсяқнақуткақыхкыхка. Қырңуӷунъыҳпысини манигӯнъалюси иляси илягаӷақна̄ҳтут, кина апыҳтуӷӣқылъықуқ, налиӷмың налиҳси уңипаҳлъықуқ Кияӷныӷым уңипақысқыхка̄ның, налиӷмың налиҳси акузилъықуқ алъястун улюстун, налиҳпыси мумиҳқуҳлъықӣ. Ухпықат ухпылъҳитнун икнақуӷусӣлит қамахлъютың.

²⁷ Юӷаӷвигми кина акузинақңукуми алъястун улюстун, ма̄лӷук налиӷмың пиңают пилӷа̄т, утақалюки илятың та̄қылъыҳқӣт. Китумлъю мумиҳқуӷнакаңи сямың пилъҳит.

²⁸ Иўырңа мумиҳқуҳтыңискан акузилӷӣмун алъястун улюстун, акузифқа̄ми пилӷа̄қ. Алъястун улюстун акузиюкуми кавьюгӯтыхпынани акузилӷа̄қ лъңанунлъю, Кияӷныӷмунлъю.

²⁹ Ӯкналиқистык ма̄лӷук налиӷмың пиңают уңипаңылӷӣт Кияӷныӷмың акузилит. Қамахлъютың нагалъит, лӣгиклъитху уңипақ Кияӷныӷмың пиңутаңа.

³⁰ Иўырңа кина уңипаңыхкан Кияӷныӷмың, акузилӷӣ ныпӣӷли, уңипаңылӷӣ акузисқылъюку.

³¹ Таўатын пикуфси қамахлъютың уңипақияҳқат Кияӷныӷым уңипа̄мың акузӣқылъықут. Ынка̄м қамахлъюни нагалъҳӣ, лӣлъи, та̄гавыңина̄лъыңлилъю.

³² Нықамиклъюки уңипақикаюгыт Кияӷныӷым уңипа̄мың, аҳтуӷьяҳқа̄нӷилъылитка̄гут акузисиҳқамың, та̄қусиҳқамыңлъю. Ӣўлың аҳтуӷьяҳқа̄нӷилъылгӯт акузисиҳқамың налиӷмың та̄қусиҳқамың.

³³ Кияӷныӷым алңунак писюгигатӣлъю. Қырңуӷутылъыпут ныкыхмытысюгақӣ. Кияӷныӷым юги қырңуӷунъыӷата,

³⁴ аӷнат акузистыңуяҳқа̄нӷитут юӷаӷвигни. Акузияҳқа̄нӷитутлъю, иглыӷутистыңуяҳқа̄нӷитутлъю қырңуӷутңалӷӣни, қаюҳлъяк Лӣлиҳтусянилъю игақңа̄қ таўатын.

³⁵ А̄пқуӷаӷьюкумың, угитың нымыхни а̄плъитки. Юӷаӷвигни аӷнат акузилъыҳқа̄т анахутңа̄қ.

³⁶ Лъпыси Коринфыӷмӣт ухпықат а̄ңа̄югныӷӯси. Сюмыҳпысинӣ Кияӷныӷым акузитаңи лъпысиның пиңўа̄т? Лъңинаҳаҳпысинун апыҳтӯтка̄ўа̄т?

³⁷ Кина алңунак сюмыӷмини ӯкналиқистыңунилюни пикуми, налиӷмың ухпыҳлъягуманилюни, лӣгиклъики письмотхун лъпысинун Атаныӷым қылӷусяқӣ.

³⁸ Тугуклъинӷилъкагу уна апыҳтӯсяқ, тугуклъиҳпына̄н лъңа.

³⁹ Ынка̄ңам ухпықа̄лгутымни, уңипаҳтыңуюгақитык Кияӷныӷым уңипа̄мың, иўырңа та̄қыстыхпынаки акузилӷӣт алъястун улюстун.

⁴⁰ Юӷаӷвигни сяңўа̄ қамахлъюку пинитуңўа̄қ, таўатыңўа̄қ пӣқитыху.