Hebrews 1 - Iñupiatun (NW Alaska)

Agaayyutim Uqałha Uqaqtigiplugu Iġñiñi

¹ Iŋiḷġaanimma Agaayyun uqaqtuq sivulliaptiknun sivuniksriqiritigun akulaiqł̣ugu atlakaaġiikł̣ugich.

² Aglaanpakma makunani aqulliġñi uvluni Agaayyutim uqautigaatigut Iġñiġmigun, nalunaiqsaġmigun paitchaktaaquplugu supayaanik, aasriiñ ilaagun iñiġnikkani nuna.

³ Agaayyutim kamanautaa qiñiġnaitchuq. Aglaanpakma kamanaun qausaiñaqtuq Iġñiġuruakun Agaayyutillapiatun itluni. Iġñiġuruam tigummiugaġaa supayaaq uqałiġmigun saŋŋiqaqtuatigun. Piiŋanikamigich iñuich killuqsautaat, aquvinniqsuq taliqpianun kamanaġniqsram pakmani.

Iġñiq Kamanatluktuq Isaġuliŋmiñ

⁴ Taatnaqhuni kamanatluksipḷuni israġuliŋniñ Agaayyutim atchiġñiġaa kamanatluktuamik atiġmik iliŋisa atiŋitñiñ.

⁵ Atakkii Agaayyutim nalliatunniiñ israġulgich nipliutisrimaitchaa, itna, “Ilvich Iġñiġigikpiñ. Uvlupak nalupqinaiġikpiñ iġñiġiplutin takkuatni iñupayaat.” Psalms 2:7 Naagasuli itnaqsimaitchuq israġuliŋmun, “Aapaugisiruŋa ilaanun aasrii uvaŋa Iġñiġilugu.” 2 Samuel 7:14; 1 Chronicles 17:13

⁶ Aasriipsuuq, tuyuġiyasripmagu Iġñiġuruaq aŋalatiqatini iñuŋnun marrumani nunami nipliġñiqsuq, itna, “Iluqatiŋ Agaayyutim israġulgiñ purvigilitruŋ.” Deuteronomy 32:43

⁷ Suli uqautigigai israġulgich, itna, “Israġulgich anuġiġuqtinniġai, savaktiniasriiñ ikualaruaġuqtitlugich.” Psalms 104:4

⁸ Aglaan Iġñiġuruamun uqaqtuq, “Agaayyuun, aŋalatchiraugisirutin taimuŋa. Aŋalatkisigiñ aŋaayuqautiiñ nalaunŋałikun.

⁹ Quviagigiñ nalaunŋaruałiq aasrii uumigiplugu nalaunŋaitchuałiq. Taatnaqhuni Atanġum, Agaayyutvich, piksraqtaaġigaatin qaitchipḷutin pitḷuktuamik kamakkutmiglu quvianamiglu tamatkunakŋapayaaq piqatipniñ.” Psalms 45:6,7

¹⁰ Itnasuli uqaqtuq ilaagun, “Ataniiq, aullaġniisaqqaaġatałiġmi iñiġiñ nunalu qiḷaglu argapnik.

¹¹ Tamatkua piunġiġñiaqtut, aglaan ilvich itchaġataqtutin. Iluqatiŋ tamatkua utuqqaġuġniaqtut aasriiñ atnuġaaluktun suunġiġutiŋ.

¹² Uligaatun imuniaġitin aasrii simmiġutiŋ atnuġaaluktun. Aglaan ilvich atlaŋŋuġumiñaitchutin suli ukiutin isrukłitchumiñaitchut.” Psalms 102:25-27

¹³ Aasrii nalliatnun israġulgich uqautriḷḷaksimaitchuq itna, “Aquvittin taliqpiŋma tuŋaani aŋalatchiqasiutilutinaasrii uvamnik akiiḷiḷḷapiaġniałhatnunaglaan iluqaitñik uumigirivich.” Psalms 110:1

¹⁴ Israġulgich savaktaułhiñaqtut irrusriuplutiŋ. Tiliraurut ikayuquplugich tamatkua annautrauniaqtuanik.