तीतु 3 - पवित्र पोल्लेपिसालय मंचि हर्रि 1 राज्येम कियानोरद आनि अदिकारिल्कुना पोल्ले केंजसि ओर वेहताप ताकना, इंचि लोकुल्कुंक मति कीसि हीम. इंका कदरलायक मंदना हरेक बेस कबळ कियालय बस्केळ्क तयार मंदना. 2 बोर्कुने बदनाम कियानायो, बोरतोने जगडाल्क कियानायो, मेत्तटा गुनम मंदना आनि अंटोरतोनि सादा-सिंपलते कलियसि मंदना इंचि ओर्क वेहा. 3 मुन्ने मनमगुडा तेल्वि तक्कोतोरम, बोरदे पोल्ले केंजवोरम, वेरेतोरा पोल्लेने मुळ्गुतोरम, वेरे-वेरे इच्चां आनि सुकाल्कुना गुलामगिरि कीसेके मत्तोम. इंका होंगु-पगाते निंडिस मत्ता पिस्वर पिसुंदुम, कळकु पोत्तुमळ, वेरेतोर मनाकुन हय्साकोंदुर, मनमगुडा वरोंक-वरोर हय्साकोंदुम. 4 गानि मनाकुन पिसागोटना पेनबाबाल ओना बेसतनम आनि पावरमते निंडिस मत्ता दयातुन मनापोर्रो हुपिच्चि, 5 मनाकुन कापाळतोर. मनम कीता नीति कबाह्कुनाहेंका ओर मनाकुन कापाळा हिल्लोर गानि ओना सतता दयाहेंदाले मनाकुन कापाळतोर. पूना रीतुने पुट्टना एर तुंगमळहेंदाल आनि पवित्र आत्मा मनाकुन पूनगा कियमळहेंदाल इल्हा आता. 6 ई पवित्र आत्मातुन, मनाकुन पिसागोटना येसु किरिस्तुनाहेंदाल ओर मनापोर्रो इरगा वळियतोर. 7 ओर इल्हा बारि कीतोर इत्ते, मनम ओना कुर्पाहेंदाल नीतिमंतुल्क आयगोम आनि बस्केळ्क पिस्सना पिस्वरता आसेते मनम ओना वारसदार्क आयाना इंचि. 8 इद पोल्ले निजम आंद. आनि निमे इव पोल्लें दटांचि वेहाना इंचि नावा इच्चा मंता. निमे दटांचि वेहतेने, बोर अय्ते पेनदुन विस्वासम कीतुर, ओर जेर्गताते मंचेके बेसता कबाह्क कीसेके मनांतुर. बारित्ते इव अन्नि मनकालोरहाटीं बच्चोनो बेस आनि पायदता पोल्लें आंदुं. 9 गानि अर्तम हिल्वा लोल्लिनाल, वंसाल्कुना बारेमता पोल्लेनाल, जगडाल्कुनाल इंका मूसाना नियमकुना बारेमता लोल्लिनाल निमे लक्कु मन. अव बतक ओज्जानव आयों, अवुनाहेंदाल बतल पायदा इंका वायो. 10-11 अल्हा चुगली कीसि वेरे-वेरे कियालय हूळानोंक, उंदि-रोंड मल्कां दटांचा. केंजाकोंटे, ओर मनकल हर्रि तप्सि पापम कीसंतोर, ओनद-ओरे दोस्सि इंचि हुपिच्कुंचंतोर इंचि एरपाट कीसि ओना दंटा होळसीम. मतिते इर्रानालायक कोन्नि पोल्लें 12 बस्के अय्ते नना, अरतिमास इनानोन हिलाकोंटे तुकिकुस इनानोन निहगा लोहकन, अस्के बल्हा कीसि अयना निमे, निकोपोलिस सहरते नाकु वासि कलियना कोसिस कीम. बारित्ते पीनि कालमते नना अग्गेन मनंतन इंचि निरनायम येततन. 13 जेनास वकील आनि अप्पुलोसुंक ओरा पय्नेमते ओर्क बतले तक्को होनाकोंटा हूळकुंचि, ओर्कुन सार्ला कीम. 14 अवसराल्कुन दोर्किच्कुननाहाटीं मना लोकुल्कगुडा बेस कबाह्क कीसेके मनमळ करियगोम, अल्हा कीते ओर पलम हियानोरलेह्का मनांतुर. 15 नावातोनि मनानोर अंटोर नीकु जोहर वेह्चंतुर, इंका विस्वासमहेंदाल मनाकुन पावरम कियानोर्कुगुडा जोहर. पेनदा कुर्पा मी अंटोरतोनि मन्निकांटी. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.