रोम सहरतोरहाटीं पौलुसना सिट्टि 9 - पवित्र पोल्लेयहुदिल्कुनपोर्रो पौलुस होंग आंतोर 1-3 नावा यहुदि लोकुल्क पेनदाल बल्हा लक्कु आसि मंतुर मरि? ओर अल्हा आताहाटीं मनसुने नाकु वेल्लेन दुक्कम, बादा अनपिच्चंता. नना किरिस्तुना मनकन इंचि इदु पोल्ले निजम वेहचंतन, आबद्दम आयो. नावा लोप्पो मनना पवित्र आत्मागुडा इद निजम इंचि गवाइ हीसंता. पेन नाकु सापनेम हीसि, नाकुन किरिस्तुनाल लक्कु किय्यिना बेसे! नावा मनसु मात्रम नावा इस्राएल लोकुल्क पिसगोम इंचि मंता. 4 पेनदा मर्क-मियाह्क आयाना हक्क इस्राएलना वंसंमते पुटतोरदे आंद. पजा बय्लि बूमिते मत्तस्के पेनदा महिमा पेद्दा वेल्गासि इस्राएलना वंसंमतोर्के दिसता. करार्क ओरतोने कीता, मूसाना नियम्कुगुडा ओर्के हीता, मोळ्काना बेस रिवाजकु हीता, अचोने आयका ओर्क पोल्लेगुडा हीता. 5 एनकटा पेद्दाल्क अब्राहाम, इसाक आनि याकोब ईरगुडा ईरोरे आंदुर. अचोने आयका येसु किरिस्तुगुडा मनकन रूपमते ईरा वंसंमतेन पुटतोर. अन्निन ताकसना अदिकारम मत्ता पेने ई येसु किरिस्तु आंदुर. अव अन्नि बस्केळ्क ओने तल्सकुन्निं. आमीन. 6 पेन इस्राएलना वंसंमतोर्क हीता पोल्ले तपता इंचि नना इंचेक हिल्लेन, गानि इस्राएल देसेमते पुटतोर अंटोर इस्राएलना वंसंमतोर आयुर इंचि नना वेहचंतन. 7 अचोने आयका अब्राहामुना वंसंमतोर अंटोरगुडा ओना निजम पिलाल्क इंचि मनम इनानायो. बारित्ते इदुना बारेमते दर्मसास्त्रमते, “सिराप इसाकुना वंसंमतोरे नीवा वंसंमतोर इंचि लेक्का कियमळ जर्गंता,” इल्हा रासि मंता. 8 दीना अर्तम बतल इत्ते अब्राहामुना वंसंमते पुटतोर अंटोर पेनदा मर्क-मियाह्क आया परुर. गानि पेन हीता पोल्ले परकारम बोर अय्ते पुटतुर ओरे अब्राहामुना निजम मर्क-मियाह्कुना लेक्काते वांतुर. 9 अब्राहामुंक पेन हीता पोल्ले इल्हा मत्ता, “इत्ता वेलाक नना मर्रा मल्सि वांतन, साराल वरोर मर्रिन कनंता.” 10 आ मर्रि इत्ते मना एनकटा पेद्दा मनकल इसाक आंदुर. ओर रेबेका इनानदानतोनि मरमिं आतोर अस्के अद नेला तप्सि एमडाल्कुन कंता. 11-12 गानि आ पिलाल्क पुट्टका मुन्नेन, ओर बद्दे मंचि-सेड्डा किय्यका मुन्नेन पेन रेबेकांकु, “मुन्ने पुट्टना पेडल पज्जो पुट्टनोना सेवा कियानुर,” इंचि वेहचि मत्ता. पेन मनकालोर्कुन ओर कीता कबाह्कुन पोर्रोटाल केयो, गानि दाना इच्चा मत्ताप ओर्कुन केयंता, इंचि मनाकु दीनहेंदाल तेळियता. 13 दीना बारेमते दर्मसास्त्रमते, “नना याकोबुन कीतच्चोन पावरम, एसावुन किया हिल्लेन,” इंचि रासि मंता. 14 इदुन केंजसि मनम बतल इंदकोम मर्रि? पेन अन्यायम कीता इंदकोमा? असले आयो. 15 बारित्ते, “नना बोनपोर्रो दया हुपिच्कन, बोनपोर्रो दया कीकन, बोनपोर्रो दया हुपिच्कन, बोनपोर्रो दया कीकन, अद नावा इस्टम मत्ताप नना कींतन,” इंचि पेन मूसांक वेहचि मत्ता. 16 इल्हा बोनपोर्रो दया किय्यना इंचि पेने निरनायम कींता. इद मनकना कय्दे हिल्ले. दान दोर्किच्कुननाहाटीं मनम बच्चोन कस्टम किय्यिना एर्तमे. 17 पेन पिरोन राजानतोनि इत्ता पोल्ले दर्मसास्त्रमते इल्हा रासि मंता: “नावा ताकततुन नीवाहेंदाल हुप्संतन अस्के नावा पोरोल पूरा दुनियामेळ तेळियसि होन्नार. इदुनहाटींगे नना नीकुन राजाल इंचि निलाहतन.” 18 दीनहेंदाल मनाकु बतल तेळियंता इत्ते, पेन अद इनकुत्तोन पोर्रो दया कींता, अल्हेने अद इनकुत्तोन कटकेलमरि कींता. 19 इसोंटस्के, “पेन अय्ते अद इनकुत्तापे ई दुनियाते किया गोट्टंता. अयना मावा पोर्रेन बारि दोसेम दोसंता?” इंचि मिमेट नाकुन इनकिर. 20 गानि मनका, पेनदुन मल्सि पूसकियानोन निमे बोन आंदिन? “निमे नाकुन इल्हा बारि तयार कीतिन?” इंचि अळका बस्केनना कुम्मन पूस कींतना? 21 उंदे तोळि मुद्दाताल सगोम बेस सिंगारम अळकां, इंका सगोमताल सादा अळकां तयार कियना अदिकारम वरोर कुम्मांकु हिल्लेना? तप्पाकोंटा मंता. 22 अल्हेने पेनदुकगुडा अद इनकुत्ताप कियना अदिकारम मंता. गानि नासडेम आसि होनानोर्कुन नासडेम कीसि पोहका ओप्के पीसि मत्ता. 23 पेन अल्हा ओप्के पीसि बारि मत्ता इत्ते, पेन दाना महिमा आनि दया बच्चोन बेसतद इंचि बोर लोकुल्कुंक अय्ते हुप्सना मत्ता, अद ओर्कुन मुन्नेन पेरता. 24 मनम अंटोरम पेन पेरता लोकुल्के. गानि पेन सिराप मना यहुदिल्कुनाले पेर्रा हिल्ले, यहुदि आयवोर लोप्पोटालगुडा पेरता. 25 यहुदि आयवोरा बारेमते पेन होसे पोरोलता पेनदा कबुरतोना पुस्तकमते इल्हा वेहता: “मुन्ने नना बोर लोकुल्कुन अय्ते नावा लोकुल्क इंचि इना हिल्लेन, इंदके ओर्कुन नना नावा लोकुल्क इंचि केयकन. इंका दीनकन्ना मुन्ने बोर्कुन अय्ते नना पावरम किया हिल्लेन, ओर्कुन नना पावरम कीकन.” इल्हा पेनबाबाल रासा वेहतोर. अचोने आयका, 26 “मिमेट नावा लोकुल्क आयिर इंचि नना बगा अय्ते इत्तनो, अग्गेन मिमेट जीवाते मनना पेनदा मर्क-मियाह्क आतिट इंचि इनानुर,” इल्हा रासि मंता. 27 इंका यसायाह इनना पेनदा कबुरतोरगुडा इस्राएल लोकुल्कुना बारेमते बतल इत्तोर इत्ते, “इस्राएल लोकुल्क समुद्रमते मनना उस्केलेसीं लेक्का परवच्चुर मंतुर. अयना पेन हियना सिक्साताल इच्चुरे पिस्संतुर. 28 बारित्ते ई दुनियाते मनना अंटोर लोकुल्कुन पेन बिरानेन सिक्सा कियानद मंता, अद पुरागा कींता,” इंचि वेहतोर. 29 अचोने आयका, “अन्निटकन्ना ताकतवार पेन ओक्कला मनाहाटीं, मना वंसमतोरव्टेटाल इच्चुर्कुन होळसाकोंटा मंचि मत्ते, मनम सदोम, गमोरा नह्कुना लोकुल्कुनालेसीं नासडेम आसि मन्नेरम,” इल्हागुडा यसायाहल मुन्नेन वेहचि मत्तोर. बेसता कबुर आनि यहुदिल्क 30 अय्ते मनम इंदके बतल इनकोम? यहुदि आयवोर पेनदा मुन्ने नीतिमंतुल्क आयालय हूळा हिल्लुर गानि येसु ओराहाटीं कीतदुन ओर विस्वासम कीतुर इंचि पेन ओर्कुन नीतिमंतुल्क कीता. 31 इस्राएल लोकुल्क बारे मूसाना नियमते वेहताप ताकसि नीतिमंतुल्क आंतोम इंचि इनकुत्तुर. गानि ओर अल्हा नीतिमंतुल्क आया हिल्लुर. 32 बारित्ते ओर किरिस्तुन विस्वासम किय्यका बेसता कबाह्क कीसि नीतिमंतुल्क आयालय हूळतुर. इंचि येसु किरिस्तु इस्राएल लोकुल्कुनाहाटीं ओरा हरदे, दल्गिसि हिळु अरहना बंडालेसीं मंतोर. 33 इदुना बारेमते दर्मसास्त्रमतेगुडा इल्हा रासि मंता: “हुळाट, सियोनते नना उंदि बंडातुन इरसंतन, अद बंडा इच्चुर्क दल्गंता, इंकिच्चुर बारे दान्क दल्गिसि हिळु अर्रंतुर. बोर अय्ते दानपोर्रो विस्वासम इर्रंतुरो, ओरद बस्केने सिन्नातनम आयो.” इंचि रासि मंता. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.