रोम सहरतोरहाटीं पौलुसना सिट्टि 10 - पवित्र पोल्ले1 विस्वासुल्कुनिटा! नावा इस्राएल लोकुल्कुंक पेन मुक्ति हिय्यि इंचि नावा वेल्लेन मनसु मंता. अदुनहाटीं नना पेनदुक पारतना कीसेकेन मंचंतन. 2 पेनदा सेवा कियना इंचि ओर्क वेल्लेन जिद्दु मंता, इदुन नना कुद्दु हूळतन. गानि पेनदा सेवा कियना निजम हर्रि ओर्क तेळियो. 3 बारित्ते पेने लोकुल्कुन नीतिमंतुल्क कींता इत्ता संगति ओर्क तेळियका, सतता नियमताहेंदाल नीतिमंतुल्क आंतोम इंचि ओर इनकुत्तुर. इल्हा ओर पेन हुपिस्ता हर्दुन ओप्कुना हिल्लुर. 4 गानि येसुनपोर्रो विस्वासम कियानोर अंटोर नीतिमंतुल्क आयानाहाटीं किरिस्तु मूसाना नियमता आकिरि आंदुर. पेन अंटोर्कुन पिसागोटंता 5 दर्मसास्त्रमते मूसाल बतल रासतोर इत्ते, “बोर अय्ते दर्मसास्त्रमते मत्ताप ताकसि नीतिमंतुड आयालय हूळंतुर, ओर उंदि नियमगुडा तप्पाकोंटा ताका पींता, अस्केन ओर अवुनहेंदाल नीतिमंतुड आंतोर.” 6-8 मिमेट, “माकु पेनदा पोल्लें कराहलासि स्वर्गमते होंचि किरिस्तुन इदु बूमिपोर्रो बोर तर्रा परांतोर, हिलाकोंटे हातोरव्टेटाल किरिस्तुन जीवाते तेहचि तर्रालय बोर दांतोर?” इंचि इनकुनमट. गानि विस्वासम कीसि नीतिमंतुड आयनोरा बारेमते दर्मसास्त्रम बतल वेहंता इत्ते, “पेनदा पोल्ले निहागेन मंता, नीवा मनसुना लोप्पो आनि नीवा तोळदेन मंता.” मोमोट मीकु वेहता पोल्लें इवे आंदुं. 9 अद बल्हा इत्ते, नीवा पिस्वरते, येसुए नावा सामि इंचि निमे तोळ्दाल ओप्कुंचि, ‘ओन पेन हातोरव्टेटाल मर्रा जीवाते तेहता,’ इंचि निमे नीवा मनसुनाल विस्वासम कीते, पेन नीकु मुक्ति हींता. 10 बारित्ते मनम मनसुनाल विस्वासम कीतोम इंचि मनाकुन पेन नीतिमंतुल्क कींता. तोळ्दाल ओप्कुत्तोम इंचि मनाकु पेन मुक्ति हींता. 11 दर्मसास्त्रमतेगुडा इल्हा रासि मंता: “ओनपोर्रो विस्वासम कियानोर बोरे आयिर, पेनदा मुन्ने ओनद बस्केने सिन्नातनम आयो.” 12 पेनदापोर्रो विस्वासम इर्रनोर बोरे आयिर, ओर यहुदि आयिर, युनानिर आयिर अंटोर उंदे, अंटोर्कुंक ओर वरोरे सामि आंदुर. ओना पोरोल एतसि पारतना कियना अंटोर्कुंक ओर वेल्लेन आसिर्वाद हींतोर. 13 “सामिना पोरोल एतसि पारतना कियनोर ओर बोरन्ना आयिर पेन ओन पिसागोटंता,” इंचि दर्मसास्त्रमते रासतद मंता. 14 बोर अय्ते किरिस्तुनपोर्रो विस्वासम किया हिल्लुर, ओर ओना पोरोल बारि एतनुर? बोर अय्ते ओना बारेमते केंजा हिल्लुर ओर बल्हा विस्वासम कियानुर? बोर अय्ते ओर्क वेहानोर हिल्लुर, ओर बल्हा केंजानुर. 15 अल्हेने पेन बोर्कुने लोहाकोंटे ओरगा होंचि ओर बल्हा वेहा परांतोर? असले वेहा परोर. दीना बारेमते दर्मसास्त्रमते इल्हा रासतद मंता: “बेसता कबुरतुन पीसि वायना लोकुल्कुन हूळते बच्चोनो कुसि आंता!” इंचि रासि मंता. 16 गानि इस्राएल लोकुल्क अद बेसता कबुरतुन केंजसिगुडा अंटोर विस्वासम किया हिल्लुर. बारित्ते, “ए सामि! मोमोट वेहता कबुरतुन बोर नम्मुतुर?” इंचि दीना बारेमते दर्मसास्त्रमते यसायाहल रासतोर. 17 इल्हा किरिस्तुना बारेमता बेसता कबुरतुन बोरन्ना वेहतेने केंजांतुर, केंजतेने विस्वासम किया परांतुर. 18 अयना नना उंदि पोल्ले पूसकींतन, इस्राएलतोर इद कबुरतुन केंजा हिल्लुरा? तप्पाकोंटा केंजतुर. इदुना बारेमते इल्हा रासतद मंता: “ओरा लेंग दुनियंता केंजा होत्ता, ओरा पोल्ले दुनियाता मूला-मूलादाका एव्ता,” इंचि दर्मसास्त्रमते रासि मंता. 19 अयना इंकुंदि पोल्ले पूसकींतन, इस्राएल लोकुल्क कबुर केंजतस्के अद ओर्क तेळियतना तेळिया हिल्लेना? तप्पाकोंटा तेळियता. मूसाना नियमते मुन्नेन रासि मत्ताप, “विलवा हिलुवा यहुदि आयवोर्कुन नना पावरम कीसि, मीकु कळ्क पोत्तानाल कींतन. अल्हा कीसि नाकुन एरपाट कियवा यहुदि आयवोरहेंदाल, मीकु होंगु वायनाल कींतन,” इंचि पेन इस्राएल लोकुल्कुन इत्ता. 20 पजा “नाकुन पहकवोर नाकुन दोर्किच्कुत्तुर. नाकुन पूसकियवोर्कुंक ननाने कुद्दु दिसतन,” इल्हा पेन वेहता पोल्लेतुन दैरनेम कीसि यसायाहलगुडा रासतोर. 21 गानि इस्राएल लोकुल्कुना बारेमते पेन बतल इत्ता इत्ते, “ना पोल्ले केंजाकोंटा मर्लाबळता लोकुल्कुनाहाटीं, नना दिन्नम एदुर हूळसेक मत्तन,” इंचि पेन वेहता पोल्लेतुन यसायाहल रासतोर. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.