पेन हुपिस्ता पोल्लें 16 - पवित्र पोल्लेएडुं गंडाल्कु 1 अस्के गुळिताल उंदि पेद्दा आवाज आ एडुं दूतनतोनि, “होन्टु! पेनदा होंगुना अव एडुं वाटिन बूमिपोर्रो वळियटु” इत्तद नाकु केंजावाता. 2 अदुनहाटीं पेनदा मोदाटा दूता होंचि, दाना वाटितुन बूमिपोर्रो वळियसीता, अस्के अद जिवरासिता निसानि मत्तोर्कु आनि बोर अय्ते दाना बोम्मातुन मोळ्कुंदुर ओर्कु इरगा नोयाना लसा-लसा पुनकु आतां. 3 पेनदा रोंडो दूता दाना वाटितुन समुद्रमते वळियसीता, अस्के अद समुद्रम हाता मनकना नेत्तुरलेसीं आसोत्ता, पजा समुद्रमते मनानव अन्नि जिवरासि हासोत्तां. 4 पेनदा मूडोव दूता दाना वाटितुन बेरेह्कुने आनि एता ऊटान पोर्रो वळियसीता, अस्के अव्टे मत्ता पूरा एर नेत्तुरलेसीं आसोत्ता. 5 एतापोर्रो अदिकारम मत्ता पेनदा दूता इल्हा इनानद नना केंजतन, “ए पवित्र पेनदुना, निमे इंदके मंतिन, मोदालागुडा मत्तिन. निमे न्यायम कियाना पेनदुन, निमेने इवुना इल्हा न्यायम कीतिन. 6 बारित्ते ओर नीवा पवित्र लोकुल्कुन, नीवा कबुरतोर्कुन हव्किसि ओरा नेत्तुर पोंगागोटतुर. अदुनहाटीं निमे ओर्कु उनालय नेत्तुर हीतिन, ओर इदुना लायके मंतुर,” इंचि इत्ता. 7 अच्चोटेन मोक्कु हिय्याना गद्देताल, “ए पेनबाबा, सामि, निमेने अन्निटकन्ना सक्तिमंतुन आता पेनदुन आंदिन. निमे कियाना न्यायमते निजम आनि सत्तेम मंता,” इंचि नाकु केंजावाता. 8 नालुंगो दूता दाना वाटितुन पोडदुन पोर्रो वळियसीता, अस्के लोकुल्कुन दाना दगळाते कर्वगोटाना अदिकारम पोळ्दुंक हियमळ जर्गता. 9 कडक दगडाहेंदाल लोकुल्क कर्विसोत्तुर, अस्के आ गंडाल्कुन पोर्रो अदिकारम मत्ता पेनदुन अपमानम कीतुर गानि ओर दाना महिमा कियानाहाटीं सतता पापाल्कुनाल मनसु मार्सकुन्ना हिल्लुर. 10 पेनदा हेय्युंगो दूता दाना वाटितुन आ जिवरासिता राजगद्देपोर्रो वळियसीता. अस्के दाना राज्येमते पुरागा हीकट आता. पजा तिप्पल्कुंक आगा पर्राका लोकुल्क ओरा नाल्कें ओरे कोर्ककुनालय दल्गतुर. 11 ओर्क वाता तिप्पल्क, ओर्क आता पुनकुन हेंदाल स्वर्गमते मनना पेनदा अपमानम कीतुर. गानि ओर कीता पापाल्कुनाल मनसु मार्सकुना हिल्लुर. 12 पेनदा हारुंगो दूता दाना वाटितुन परात इनना पेद्दा बेरेटे वळियसीता. अस्के अद बेरेटा एर बोत्तिगा इनकिसि होत्ता, पोळ्द पेय्सना दिक्कुने मनना राजालोर्कुंक हर्रि आयगोम इंचि आ दूता अल्हा कीता. 13 पजा नना अद मासुल तरासता तोळ्दाल, आ जिवरासिता तोळ्दाल, पेनदा आबद्दम कबुरतोना तोळ्दाल पन्नेतसोंटा मूड दुस्टात्मां पलाते पेय्सानद हूळतन. 14 इव चिन्हां हुप्सना देय्याल्कुना आत्मां आंदु. आत्मा अन्निटकन्ना एक्को सक्तिमंतुड आता पेनबाबानतोनि आकिरता रोजकुने लडाइ कियानाहाटीं, दुनियाता अंटोर राजालोर्कुन उंदि कियालय ओरगा होंचेके मंतां. 15-16 अव आत्मां आ राजालोर्कुन इब्रानि बासाते अरमिगदोन इनना जेगातगा कल्पतां. अदुनहाटीं येसु, “हुळाट नना मिहगा दोंगानलेसीं वांतन, बोर अय्ते तेल्विते मंचि, केर्राना कपडिन कापाळकुंतोर ओरे आसिर्वाद दोर्कतोर आंद. बोरे आयिर अल्हा मनाकोंटे मेंदुल कुळकें दिस्सि लोकुल्कुना मुन्ने ओनद ओरे सिग्गु पोगोटकुत्तोर आंतोर” इंचि वेहतोर. 17 पेनदा एडुंगो दूता दाना वाटितुन वळि पोर्रो वळियसीता, अस्के स्वर्गमते मनना गुळिता राजगद्देताल पेद्दा आवाजते, “बोत्तिगा आता” इत्तद केंजावाता. 18 अस्के मब्बु मेर्सालय, गळ-गळा इंचि उरमालय दल्गता, पजा इद बूमिपोर्रो लोकुल्क पुटतस्केटाल अय्ते, बस्केने आयाहिल्ले असोंटा पेद्दा बुकंप आता. 19 अस्के आ पेद्दा सहरता मूड तुकळां आतां. वेरे-वेरे देसेल्कुना सहरकंता कूल्सि अरतां. पेन दाना तलातला आयाना होंगुना अंगुर कल्दुन पेद्दा बेबिलोन सहरकु उहानाहाटीं अद मति मर्गाहिल्ले. 20 दीबें अवुना जागाताल मायसोत्तां, गुट्टां बग्गेन दिसाकोंटा आतां. 21 मब्बुनाल एबै किलो वजन मत्ता बर्प बंडां लोकुल्कुनपोर्रो अरताहाटीं लोकुल्कुंक इरगा तकलिप आसि, ओर पेनदा अपमानम कीतुर. अद तकलिप वेल्लेने कतरनाक मत्ता. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.