मत्तयाल 26 - पवित्र पोल्लेयहुदि पेद्दाल्क येसुन हव्काना उपायाल्क कींतुर ( मरकुस 14:1-2 ; लूकाल 22:1-2 ; योहान 11:45-53 ) 1-2 इव अन्नि पोल्लें वेहमळ आतारित्ते येसु सिस्युल्कुन इल्हा इत्तोर. “नाडि आयो मन्ने दाटसि होनना पंडुगु मंता इंचि मीकु एरपाटे. मनकना रूपमते पुटतोन नाकुन क्रुसुनपोर्रो वेलाड वाटालय, पगातोरा कय्दे पीसि हियमळ जर्गंता,” इत्तोर. 3 अस्के कयपा इनना पेद्दा पेर्माना मिद्देते, पेद्दा पेर्मालोर आनि यहुदिरा पेद्दाल्क जमा आतुर. 4 येसुन सप्पुडदाका दोर्कापीसि हव्ककोम, इंचि ओर मीटिंगते उपायम कीतुर. 5 गानि “पंडुगु रोजकुना लोप्पो हव्का मन्नि, अल्हा कीते लोकुल्क गडबड किया परांतुर,” इंचि इन्कुत्तुर. उंदि मुरतळ येसुनपोर्रो अत्तर निय वळियता ( मरकुस 14:3-11 ; योहान 12:1-8 ) 6 पजा येसु बेतानिया इनना नाटे होंचि, कुस्टरोगम आसि मत्ता सिमोनिना लोन आगतोर. 7 अस्के उंदि मुरतळ वेल्ले दराता अत्तर निय उंदि गुर्गिते पीसि येसुनगा वाता. ओर गाटो तिनालय उद्दिसि मत्तस्के अद मुरतळ आ नियदुन ओना तल्ला पोर्रोटाल वळियता. 8 अदुन हूळसि अगा मत्ता सिस्युल्कुंक होंग वासि, “ई अत्तर नियदुन वट्टिदे बारि पोचीतिन? 9 इद अत्तर निय वेल्ले दराते अम्मिसि अव कोत्तां गरिबोर्कुंक हिया वायवड गदा!” इंचि इत्तुर. 10 येसु ओर वळकानदुन एरपाट कीसि इल्हा इत्तोर. “दान बारिंक तकलिप कीसंतिर? अद नावाहाटीं बेसता कबळे कीता. 11 गरिबोर्क अय्ते बस्केळक मिहगा मनांतुर, गानि नना बस्केळक मिहगा मनानोन आयोन. 12 नावा हामुर एव्ता इंचि नावा मेंदुल्क अत्तर निय होकताप, अद इल्हा कीता. 13 नना मीक निजम वेहांतन, पूरा दुनियाते, बगा-बगा पेनदा बेसता कबुर वेहमळ जर्गंता, अगा ई मुरतटुन, आनि इद कीता कबळतुन मति कियानुर,” इत्तोर. 14 पजा, पन्नेंड सिस्युल्कुनाल वरोर इस्कारियोत यहुदल मत्तोर. ओर पेद्दा पेर्मालोरगा होत्तोर. 15 होंचि, “नना मीक येसुन पीसि हीते, मिमेट नाकु बतल हींतिर?” इंचि इत्तोर. अस्के ओर ओन्क मुप्पै एंडि रूपें हीतुर. 16 अस्केटाल ओर येसुन पीसि हियालय मोका हूळसेक मत्तोर. येसुना आकिरता बोजनम ( मरकुस 14:12-26 ; लूकाल 22:7-23 ; योहान 13:21-30 ) 17 पुल्लगा आयवा पिंडिता हारिना पंडुगुना मोदाटा रोजु, सिस्युल्क येसुनगा वासि, “गुरु, दाटसि होनना पंडुगुना गाटो तिनना तयारिं बगा कीकोम इंचि नीवा मनसु मंता?” इंचि इत्तुर. 18 अस्के येसु ओर्कुन इल्हा इत्तोर. “सहरते पलाना मनकानगा होंचि, नावा आकिर वेला दग्गेरा एव्ता. नीवा लोन नना नावा सिस्युल्कुनतोनि दाटसि होनना पंडुगु कियालय वांतन इंचि मावा गुरु वेहतोर इल्हा ओन्क वेहट.” इत्तोर. 19 अस्के येसु वेहतापे सिस्युल्क होंचि, दाटसि होनना पंडुगुना गाटो तयार कीतुर. 20 पोळ्द होत्तारिते, येसु ओना पन्नेंडु सिस्युल्कुनतोनि गाटो तिनालय उदतोर. 21 तिननेंके येसु ओर्कुन, “हीके केंजट नना निजम वेहचंतन, मिहगटाल वरोर नाकुन पगातोरा कय्दे पीसि हींतोर.” इंचि इत्तोर. 22 इदुन केंजसि ओर्कु वेल्लेन दुक्कम आता. अदुनहाटीं, “ओन नना अय्ते आयोन गदा सामि?” इंचि वरोन पज्जो वरोर येसुन पूसकीतुर. 23 अस्के, “नावातोनि गिन्नेते कलियसि तिनानोरे नाकुन पीसि हियनुर. 24 दर्मसास्त्रमते रासि मत्ताप, मनकना रूपमते पुटतोन नना अय्ते दांतने. गानि बोनाहेंदाल अय्ते नाकुन पीसि हियमळ जर्गंता, आ मनकल पुट्टाकोंटेन बेस आसि मनवळ,” इत्तोर. 25 अस्के येसुन पीसि हियना यहुदल, “ओन नना अय्ते आयोन गदा गुरु?” इंचि पूसकीतस्के, “निमे इत्तिन अल्हेने!” इंचि येसु इत्तोर. 26 गडसेम आतारित्ते ओर तिननेंके, येसु हारितुन पीसि पेनदुक दन्यवाद कीतोर. पजा हारितुन तुकडां कीसि ओना सिस्युल्कुंक हीसेक. “तिंटु, इद नावा मेंदुल आंद,” इंचि इत्तोर. 27 इंका ओर अंगुर पंडिना पानकमता गिलास कय्दे पीसि, पेनदुक दन्यवाद कीतोर. पजा ओर्कु हीसि, “मिमेट अंटोर दीन उंटु. 28 बारित्ते इद पूना करारता नेत्तुर आंदु. वेल्लेटुर लोकुल्कुना पापाल्क मापि कियालय पोंगसेक मंता. 29 नना मीक वेहांतन, नावा बाबाना राज्येमते पूना तरिकाते ई अंगुर पानकम उनाना रोजुनदाका, मर्रा बस्केने अंगुर पानकम उन्नोन,” इंचि येसु इत्तोर. 30 पजा ओर, पेनदा स्तुति कियाना उंदि पाटा पारसि, जय्तुन मराकुना गुट्टापोर्रो होत्तुर. पत्रु तप्पिच्कुनना बारेमते येसु मुन्नेने वेहतोर ( मरकुस 14:27-31 ; लूकाल 22:31-34 ; योहान 13:36-38 ) 31 अस्के येसु ओर्कुन इल्हा इत्तोर. “इय्याला नर्कळ्क मिमेट अंटोर नाकुन होळसि वित्तंतिर, बारित्ते, गोर्रें कोहानोन नना हव्कंतन, मंदता गोर्रें बेंदव-हेके पायसि वित्तंतां. इंचि दर्मसास्त्रमते रासि मंता. 32 गानि नना हासि, मर्रा जीवाते तेदतंका, मीकन्ना मुन्ने गालिल एरियाते दांतन,” इत्तोर. 33 अस्के पत्रु, “अंटोर नीकुन होळसि होनिनागानि, नना नीकुन बस्केने होळसि होन्नोन गुरु,” इंचि येसुन इत्तोर. 34 “नना नीकु निजम वेहचंतन, इय्याला नर्कडकु गोगोड कूसाका मुन्ने निमे मूड मल्कां नाकुन एरपाट किय्योन इंतिन,” इंचि येसु पत्रुन इत्तोर. 35 गानि, “ओक्कला नाकु नीतोनि हामुर वायिना बेसे, नीकुन नना एरपाट किय्योन इंचि बस्केने इन्नोन,” इंचि पत्रु इत्तोर. अंटोर सिस्युल्कगुडा अल्हे इत्तुर. गेतसेमनि जेगातगा येसु पारतना कीतोर ( मरकुस 14:32-42 ; लूकाल 22:39-46 ) 36 येसु, ओना सिस्युल्कुनतोनि गेतसेमनि इनना जेगातगा एवतस्के, “नना इच्चुर मुन्ने होंचि पारतना कीसि वायनदाका मिमेट इग्गेने उद्दिसि मंटु,” इंचि इत्तोर. 37 पजा पत्रुन आनि जब्दिना इव्वुर मर्कुन पीसि ओनतोनि ओतोर. अगा ओर वेल्ले दुक्कमते सिम्मरा आतोर. 38 अस्के ओर्कुन, “नावा जीवा दांता बारे इत्ताप नाक वेल्ले दुक्कम आसेक मंता. मिमेट नातोनि इग्गेने आगसि तेल्विते मंटु,” इंचि इत्तोर. 39 इच्चुर मुन्ने होंचि बोकबोर्लें अर्सि ओर इल्हा पारतना कियालय दल्गुतोर, “ए बाबा, ओक्कला कुदुरते, नावा इद गोसा तप्पिसि होन्नि, गानि इद नावा विचारम मत्ताप आयो, नीवा विचारम मत्तापे आयि.” 40 पजा सिस्युल्कुनगा वासि हूळते ओर निद्रा होंचि मत्तुर. अस्के येसु पत्रुन इल्हा इत्तोर. “मिमेट उंदि गंटामेडगुडा नातोनि तेल्विते मंदा पर्रिरा? 41 मिमेट पट्टुने अर्राकोंटा मननाहाटीं तेल्विते मंचि, पारतना कीसेके मंटु. नना वेहताप कियालय मीवा आत्मा तयार मंता, गानि मीवा मेंदुल कमजोर मंता,” इत्तोर. 42 येसु मरुंदि मल्का होंचि, “नावा बाबा, नना इदुन उन्ने पींता इनानय्ते, नीवा विचारमे पूरा आयि,” इंचि पारतना कीतोर. 43 येसु मर्रा वासि हूळतस्के, ओर मंचि निद्रते मत्तुर. 44 ओर्कुन अग्गेन होळसि येसु मर्रा पारतना कियालय होत्तोर. अस्केगुडा मुन्ने कीतापे पारतना कीतोर. 45 पजा सिस्युल्कुनगा वासि ओर्कुन इल्हा इत्तोर. “मिमेट इंदकेगुडा मींडसेक, आराम कीसेके मंतिरा? हुळाट, मनकना रूपमते पुटतोन नाकुन पापिर्कुना कय्दे पीसि हियना वेला एव्ता. 46 तेदाट, मनम दाकोम. नाकुन पीसि हियानोर दग्गेरेन एव्तोर,” इत्तोर. येसुन पीतुर ( मरकुस 14:43-50 ; लूकाल 22:47-53 ; योहान 18:3-12 ) 47 येसु इव पोल्लें इंचेकेने मत्तोर, अच्चोटेन पन्नेंडु सिस्युल्कुना लोप्पोटोर वरोर यहुदल इनानोर अगा वातोर. ओनातोनि पेद्दा पेर्मालोर आनि यहुदि पेद्दाल्क लोहता, गुळि कावेल कियानोरा गेंग कसेह्क, गुत्पां, पीसि वातुर. 48 येसुन पीसि हियानोर, “नना बोन अय्ते बुर्रांतनो, ओरे येसु आंदुर, ओन दोर्का पींटु,” इंचि मुन्नेन ओर्क उंदि चिन्ह वेह्चि मत्तोर. 49 पजा यहुदल बिराना येसुनगा होंचि, “जोहार गुरु” इंचि ओन बुरतोर. 50 अस्के येसु, “ना दंटातोना, निमे बद कबळ्क वातिन अद कीम,” इंचि इत्तस्के, अगा मत्ता मत्तोर मुन्नेळक वासि येसुनपोर्रो कय वाट्सि ओन दोर्का पीतुर. 51 अच्चोटेन येसुनतोनि मत्तोरव्टे वरोनगा कसेर मत्ता, ओर दान तेंडसि पेद्दा पेर्माना वरोर दासुन हव्कालय कसेरते हीतोर गानि, अद कसेर सिराप ओना केवदुन नेमाहकुंचि होत्ता. 52 अस्के येसु ओन, “नीवा कसेर नीवा नडिके मन्नि, बारित्ते कसेर पियानोर कसेरतेन हांतोर. 53 नना नावा बाबान तल्किस मत्ते, उंदि गेंगुने वेय्कुना दूतां मनना पन्नेंडु गेंगुल्कुंकन्ना बच्चुंगो वेय्कुना पेनदा दूतन नाकुन पिसागोटालय लोहचि मन्नेर, इद नीकु तेळियोना? 54 इल्हा आते दर्मसास्त्रमते नावा बारेमते रासता पोल्लें बल्हा निजम आयनुं? अव्टे इल्हा आयमळ गावाले, इंचि रासतद मंता,” इंचि येसु इत्तोर. 55 अस्के येसु मंदितुन इल्हा इत्तोर. “वरोन दोंगन पिय्यालय वाताप मिमेट कसेह्क, गुत्पां पीसि नाकुन पिय्यालय वातिरा? नना अय्ते रोजे गुळिते कराहसेक मीतोनि मनुंदुन, अस्के नाकुन पिया हिल्लिर. 56 गानि दर्मसास्त्रमते नावा बारेमते पेनदा कबुरतोर रासता पोल्लें पूरा आयाना इंचि इल्हा जर्गता,” इत्तोर. पजा ओना सिस्युल्क अंटोर ओन होळसि तेगा विततुर. पेद्दाल्कुना मुन्ने येसुना जवाब ( मरकुस 14:53-65 ; लूकाल 22:54-55 ; 22:63-71 ; योहान 18:13-14 ; 18:19-24 ) 57 लोकुल्क येसुन पीसि कयपा इनना पेद्दा पेर्मानगा ओतुर. अगा दर्मसास्त्रम कराहना गुरुल्क आनि यहुदि पेद्दाल्क जमा आसि मत्तुर. 58 गानि पत्रु लक्कुटाले येसुना पज्जो-पज्जो पेद्दा पेर्माना दारादाका होत्तोर. अगा बतल आयार इंचि हूळालय, दाराते होंचि कावेल कियानोरतोनि उदतोर. 59 पेद्दा पेर्मालोर आनि पंचादितोर अंटोर येसुंक हामुरता सिक्सा हियानाहाटीं ओना विरोदमते तप्पुड गवाइ पह्कतुर. 60-61 गानि बच्चुटुरो वासि ओना विरोदमते आबद्दम गवाइ हिय्यिना, ओर्कु उंदिगुडा तप्पु दोर्काहिल्ले. आकिरते इव्वुर वासि, “पेनदा गुळितुन कूलाह्चि दान मूड रोजकुने मर्रा दोहा परांतन इंचि ओर इत्तोर,” इसोंटा गवाइ हीतुर. 62 अस्के पेद्दा पेर्मल तेदसि, “ईर नीकु विरोदमते बल्हा गवाइ हीसंतुर हूळा, निमे बतले जवाब हिय्यिना?” इंचि येसुन इत्तोर. 63 गानि येसु चुपचाप मत्तोर. अस्के पेद्दा पेर्मल येसुन इल्हा इत्तोर. “जीवाते मनना पेनदा ओट्टु तिंचि नीकुन पूसकीसंतन, ओक्कला निमे पेनदा मर्रि, किरिस्तुन आते माक वेहा,” इत्तोर. 64 अस्के येसु ओन इल्हा इत्तोर. “निमे इत्तिन अद निजमे! गानि नना मीकु वेहांतन, इंका मुन्ने मिमेट मनकना रूपमते पुटतोन नाकुन ताकतवर पेनदा तिना बाजुंक उद्दिसि मत्तद आनि मब्बु तेर्पेनपोर्रो उद्दिसि वायानेंके हूळकिर,” इत्तोर. 65 अस्के, पेद्दा पेर्मल होंगुने ओना कपडिं हराह्कुंचि, “ईर पेनदा अपमानम कीतोर. मनाकु इंका बतल गवाइ गावाले? ओना पोल्लें मिमेट केंजतिरे गदा! 66 अय्ते मिमेट बतल इंतिर?” अस्के यहुदिल्क, “ओर हामुर सिक्सालायक मंतोर,” इंचि इत्तुर. 67 अस्के इच्चुर लोकुल्क येसुना तोड्डि पोर्रो उस्किसि, ओन तंचि-गुद्दिसि, 68 “ए किरिस्तु, नीकुन बोर तंतुर, माकु बविस्यवानि वेहा,” इंचि इत्तुर. पत्रु येसुन एरपाट किय्योन इत्तोर ( मरकुस 14:66-72 ; लूकाल 22:56-62 ; योहान 18:15-18 ; 18:25-27 ) 69 हीके पत्रु पेद्दा पेर्माना दारातेने उदिस मत्तोर, अस्के उंदि दासि ओनगा वासि, “गालिल एरियाता येसुनतोनि निमे इंका मत्तिन गदा?” इंचि इत्ता. 70 अस्के पत्रु “निमे बतल इंचांतिनो नाकु तेळिया हिल्ले!” इंचि ओर अगा मत्तोरा अंटोर मुन्नेन इत्तोर. 71 आयंका ओर दाराताल पेय्सि गलमातगाह्कु होत्तोर. अस्के इंकुंदि दासि ओन हूळसि, “ईर इंका नासरेत नाटेना येसुनतोनि मत्तोर,” इंचि अगा मत्तोर्कुंक वेहता. 72 अस्के पत्रु मर्रा उंदि मल्का, ओट्टु तिंचि, “नना ओन बिल्कुल एरपाट किय्योन,” इंचि इत्तोर. 73 गडसेम मत्तारित्ते, अगा नित्तिसि मत्तोर इच्चुर लोकुल्क पत्रुनगा वासि, “निमे निजम ओना दंटातोने! नीवा वळकुड केंजसि निमे गालिल एरियातोन इंचि तेळियंता,” इंचि इत्तुर. 74 अस्के पत्रु, “नना ओट्टु तिंचि वेहचंतन, नना आबद्दम वळ्कानय्ते पेन नाकुन तिन्नि, आ मनकन नना बिल्कुल एरपाट किय्योन,” इंचि इत्ता इनुडे गोगोड कूसता. 75 “इय्याला नर्कळ्क गोगोड कूसाका मुन्ने, निमे नाकुन मूड मल्कां, एरपाट किय्योन इंतिन” इंचि येसु पत्रुंक मुन्ने वेह्चि मत्ता, पोल्ले मति वासि, ओर पलाते होंचि वेल्ले दुक्कमते इरगा अळतोर. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.