लूकाल 12 - पवित्र पोल्लेपरिसिल्कुनलेसीं आयमटु 1 अच्चोटेन अगा वेय्कुना मंदि जमा आसि, इरगा गर्दि आताहेंका वरोंक वरोर जारसेके मत्तुर. अस्के येसु मोट्टा मोदाला ओना सिस्युल्कुनतोनि इल्हा वळकालय दल्गतोर. “परिसिल्क डोंगिर्क आंदुर, ओरा पुल्लटा पिंडिता बारेमते जेगर्ता मंटु. 2 मुच्चिसि मत्तव अन्नि पोल्लें बय्यर आंता, तेळियाकोंटा मत्तव अन्नि वस्तुक पलातुक वांतां. 3 अदुनहाटीं मिमेट हीकटते वळ्कता पोल्लें वेलगुने केंजमळ जर्गंता. आनि लोता लोप्पोटा अर्राते होंचि गुसागूसा वळ्कता पोल्लें येनागर्रापोर्रो एक्किसि वेहमळ जर्गंता.” सिराप पेनदुके वेरियटु! ( मत्तयाल 10:28-31 ) 4 “इंचि नावा दंटातोरिटा, नना मीकु वेहानद बतल इत्ते, बोर अय्ते मीवा मेंदुल्तुन हव्का परांतुर ओर्क मिमेट वेरियमट. ओर दानकन्ना एक्को बतल किया परुर. 5 मिमेट बोर्कु वेरियगोमो नना वेहांतन. मीकुन हव्कुतंका नरकमते वाटना अदिकारम बोन्क अय्ते मंतानो, मिमेट ओन्के वेरियट. नना वेहनद इदे.” 6 “हेय्युं कोळ्का पिट्टें रोंडु कोत्तांकु अम्मुड दांतां गदा! अय्नागानि अव्टेटाल उंदि पिट्टेतुनगुडा पेन मति मर्गो. 7 मीवा तल्लाता उंदि-उंदि केल्लु लेक्किस मंता. अदुनहाटीं वेरियमट! पेनदा मुन्ने मिमेट वेल्लेन कोळ्का पिट्टेंकन्ना बच्चोरो विल्वा मत्तोर आंदिर.” येसुना पोरोल एतालय सिग्गु अरमट ( मत्तयाल 10:32-33 ; 12:32 ; 10:19-20 ) 8 “नना मीकु वेहांतन, बोर अय्ते लोकुल्कुना मुन्ने नाकुन एरपाट कींतन इंचि ओप्कुंतोरो, मनकना रूपमते पुटतोन ननागुडा ओन पेनदा दूताना मुन्ने, ‘एरपाट कींतन’ इंचि ओप्कुंतन. 9 गानि बोर अय्ते लोकुल्कुना मुन्ने नाकुन ‘एरपाट किय्योन’ इंतोरो, ननागुडा ओन पेनदा दूताना मुन्ने ‘एरपाट किय्योन’ इंचि इंतन. 10 मनकना रूपमते पुटतोन नाकु विरोदमते बोर वळ्किना, पेन ओना तप्पुकुन मापि किय्यार. गानि पवित्र आत्माता अपमानम कियानोना तप्पुकुंक मात्रम मापि हिल्ले.” 11-12 “मीकुन दर्मसास्त्रम कराहना लोह्कुने, राज्येम कियानोरा मुन्ने इंका अदिकारिल्कुनगा पूसकियालय ओतास्के, अगा मिमेट बतल वळकुगोमो अद, पवित्र आत्मा मीकु अस्केन कराहंता. अदुनहाटीं बतल वळ्कना, बतल वळ्कानायो इंचि रंदि कियमट.” तेल्वि तक्को सिरमंत मनकल 13 आ मंदिताल बोरो वरोर मनकल येसुन, “गुरु, नावा दादल नावा बाबाना अस्तिताल नाकु बतले हीसेक हिल्लोर, नावा पालुंक वायना आस्ति नाकु पंचि हीम इंचि निमे ओन्क वेहा,” इंचि इत्तोर. 14 अस्के येसु ओन, “अरे दादा! मीवा आस्तिं पंचि हियालय नाकुन बोरन्ना ‘पेद्दा मनकल हिलाकोंटे न्यायम कियानोर’ इंचि इरतोरा?” इंचि पूसकीतोर. 15 पजा येसु ओरतोनि, “बेस जेगर्ता मंचि, अन्नि लालचकुनाल मीवद मिमेटे लक्कु मंटु! बारित्ते मनकना पिस्वर वेल्लेन आस्ति मत्तेन बेस मनंता इंचि इनकुन्मट,” इंचि इत्तोर. 16 पजा येसु ओर्कु उंदि वेसुड वेहतोर: “वरोर वेल्लेन सिरमंत मनकल मत्तोर. उंदि मल्का बतल आता इत्ते, ओना नेदे इरगा पंटा पेय्स्ता. 17 अस्के मनसुने ओनद ओरे, ‘पंटा अय्ते वेल्लेन पेय्स्ता. गानि दीन इर्रालय मात्रम जेगा हिल्ले, बतल कीकन?’ इन्कुत्तोर. 18 मर्रा विचारम कीसि, ‘सरे! नना नावा पडना जेगातुन कुल्हाचि पेद्दागा कींतन. कीसि पूरा पंटातुन, सामानतुन अव्टे वाटसि इर्रांतन. 19 पजा नना नावा जीवक, नीकु वेल्लेन वर्सांनदाका हालानाल रुसि आता गाटो दोसतन, तिन्नु, उन्नु आनंदमते मन्नु, रंदि कियमा, इंचि वेहांतन,’ इंचि इत्तोर. 20 गानि पेन ओन, ‘अरे तेलिवि तक्को मनका, इय्याला नर्कळके नीवा जीवा होनानय्ते निमे संपादिस्तादंता बोन्क आयार?’ इंचि इत्ता. 21 बच्चोर पेद्दा सिरमंत मनकल अयना ओर पेनदा मुन्ने सिरमंतुड आयोर, बारित्ते ओर ओनाहाटींगें आस्ति जमा कींतोर इंचि. ई वेसुडिते ई मनकना गति गुडा अल्हेन आता.” रंदि कियामन्नि ( मत्तयाल 6:25-34 ) 22 पजा येसु ओना सिस्युल्कुंक इल्हा वेहालय दल्गतोर: “नना मीकु वेहनद बतल इत्ते, जीवा तिंडिकन्ना मुक्केम, मेंदुल कपडींकन्ना मुक्केम आंदु. इंचि पिस्सनाहाटीं तिनकोम बतल, उनकोम बतल, इंका मेंदुल्ताहेंका केर्कोम बतल इंचेके रंदि कियमट. 23 बारित्ते तिंडिकन्ना पिस्वर मुक्येम, कपडींकन्ना मेंदुल मुक्येम. 24 आ काकाह्कुन हुळाट! अव वीतों आनि कोय्यों. अचोने आयका अवुनगा गुम्मिं इंका हिल्लें. अयना पेन अवुन पोस कीसंता. अदुनहाटीं मिमेट अय्ते आ पिट्टेंकन्ना बच्चोनो विलवा मत्तोर आंदिर. 25 रंदि कीसि ओना आवसुन उंदि गंटा एक्को बेरसागोटतोर मीवा नड्डुम बोरन्ना मंतोरा? हिल्लोर. 26 इसंटा सिन्ना-सिन्ना कबाह्के मिमेट किया परिर. अय्ते इंका मिगुल्ता कबाह्कुना बारेमते मिमेट रंदि बारि कींतिर?” 27 “आ पूतनहेके हुळट अव बल्हा बेर्ससंतांगो! अव कबळ किय्यों, कपडिं इंका कुट्टों. नना वेहानद बतल इत्ते, सुलेमान राजाल वेल्लेन सिरमंत मंचिगुडा ओना कपडिं आ पूतानाल उंदि पूतातच्चोगुडा सोकु मनाहिल्लें. 28 अय्ते जाडि इय्याला मंता, नाडि तडमिते वेसि दांता. अयना आ जाडिके पेनबाबाल इच्चोन बेसता कपडिं हींतोर. अय्ते अवुंकन्ना बेसता कपडिं मीकु हिय्या पर्रोरा रो, विस्वासम तक्को लोकुरिटा? 29 अदुनहाटीं बतल तिंदकोम, बतल उंडकोम इंचेके मिमेट रंदि कियमट. अल्हेने अवुन दोर्किच्कुनाहाटीं गाबरगुडा आयमट. 30 दुनियातोर अंटोर लोकुल्क इवुनाहाटींगें तनलाळसेक मनांतुर. गानि मीकु इव अन्नि गावाले इंचि मीवा पेनबाबांक एर्के मंता. 31 अदुनहाटीं मिमेट मुन्ने स्वर्ग राज्येमतुन आनि पेनदा नीतितुन पह्कट. अस्के इव मीकु दोर्कनुं.” आस्ति-पास्तिनपोर्रो विस्वासम इरमट ( मत्तयाल 6:19-21 ) 32 “अरे नावा सिस्युल्कुनिटा, ‘मीवा पेनबाबाल ओना राज्येमतुन मीकु हियालय वेल्लेन कुसिते तयार मंतोर. अदुनहाटीं मोमोट वेल्ले मंदि हिल्लोम’ इंचि वेरियमट. 33 अय्ते मिमेट मिहगा मत्ता आस्तिनअंता अम्मिसि, गरिबोर्कुंक दान-दर्मम कीसि, बस्केने पडन आयाकोंटा मनना कोत्ताना संचितुन दोर्किच्कुंट. इंका मिमेट मीवाहाटीं स्वर्गमते दनम जमा कीम्ट. अगा बोर दोंगलगुडा वायोर, दानकु सेदेलगुडा पिय्यो. 34 बारित्ते मीवा दनम बगा मत्ते अग्गेन मीवा मनसु मनंता.” बस्केळकु तयार मंटु ( मत्तयाल 24:42-51 ) 35-36 “मरमिना कुळपुने होंचि वायना मालकुन एदुर हूळसेक मनना सेवाकुल्कुनलेसीं कबळ कियालय बस्केळक नडिकट्टु दोहचि तयार मंटु. अल्हे मीवा वेडसिन इंका बस्केळक एल्गिच्चे इर्राट. अल्हा मत्ते बतल आंता इत्ते, मालक वासि तल्पुन तंता तन्मडे तल्पु तेंडालय अल्कगा मनंता. 37 मालक वातस्के एदुर हूळसेक तेल्विते मत्ता सेवाकुल्कु वेल्लेन आसिर्वाद दोर्कुतोर आंदुर. नना मीकु निजम वेहासेक मंतन, मालक वासि अंटोर सेवाकुल्कुन बेस उद्दा वेहांतोर. पजा नडिकट्टु दोहकुंचि ओरे सेवाकुल्कुना सेवा कियालय तयार आंतोर. 38 मालक बस्के वायिना, इत्ते नडजाम नर्का आयि हिलाकोंटे नडजाम नर्का दाटसि होतंका आयि वातस्के, बोर सेवाकुल्क अय्ते तेल्विते मनांतुरो आ सेवाकुल्कु वेल्लेन आसिर्वाद दोर्कुतोर आंदुर. 39 गानि मिमेट उंदि पोल्ले बेस तेळियागोट्कुंटु. अद बतल इत्ते, दोंगल बद वेलाक वांतोर इंचि ओक्कला लोता मालकुंक मुन्नेन तेळियसि मत्ते ओर तेल्वितेन मनांतोर आनि आ दोंगन लोते होळिया हिय्योर. 40 अल्हेने मिमेट इनकुनवा वेलाके मनकना रूपमते पुटतोन नना वांतन. अदुनहाटीं मिमेटगुडा बेस तयारते मंटु.” दोका हिय्युवा सेवाकुनलेह्का मंटु ( मत्तयाल 24:45-51 ) 41 अस्के पत्रु, “सामि, निमे ई वेसुडिं सिराप मावाहाटींगे वेहचंतिना, हिलाकोंटे अंटोर हाटींगा?” इंचि पूसकीतोर. 42 अस्के सामि इल्हा इत्तोर: “मालक हिल्वस्के ओनगा कबळ कियानोर्कुंक वेलापोर्रो गाटो-जावा दोस्सालय, वरोर बेस तेल्विगल्लोड, विस्वासमलायक दिवांजि मालाकुंक गावाले. अय्ते असोंटा सेवक बोर मंतोर? 43 बोर सेवक अय्ते, मालक मल्सि वातस्के वेहता कबळ बरोबर कीसेक मनांतोर, ओरे सेवक बेस आसिर्वाद दोर्कुतोर आंद. 44 नना मीक निजम वेहांतन. मालक आ सेवाकुन ओना पूरा आस्ति-पास्तिनपोर्रो अदिकारि इंचि इर्रंतोर. 45 गानि ओक्कला आ सेवकुडु, ‘नावा मालक वायालय अय्ते आल्सेमे मंता,’ इनकुंचि कळमता दासि मुरतळ, मांड्सा सेवाकुल्कुन तन्नुड-गुद्दुड कियमळ, इरगा तिंचि-उंचि बदमासिं कियमळ सुरुव कीतोर इनकुन! 46 अस्के आ सेवक विचारमगुडा किय्योर असोंटा रोजुने, गळियाते ओना मालक वायानुर. वासि, आ सेवाकुंक पेद्दा सिक्सा हीसि, ओन अविस्वासुल्क मनना जेगाते वाटसीयनुर.” 47 “बा सेवक अय्ते, ओना मालाकुंक बतल गावालेनो तेळियसिगुडा, मालक वेहताप केंजाकोंटा, कियाकोंटा मनांतोर, आ सेवक मात्रम वेल्लेन देब्बा तिंतोर. 48 गानि तेळियका बदो कबळ कीसि देब्बाना पाल आता सेवाकुंक मात्रम तक्को देब्बां आंतां. पेन बोर्कु अय्ते बेसता कबळ कियनाहाटीं वेल्लेन गुनम हीता ओराहेकटाल वेल्लेन लेक्का तल्कंता. अल्हेने बोन्क अय्ते एक्को अप्पजेपता, ओनहेकटाल अप्पजेपता दानकन्ना एक्कोने तल्कंता.” येसुना पोल्ले पीसि ताकानोर्क तकलिप वांता ( मत्तयाल 10:34-36 ) 49 “नना ई बूमिते लोकुल्कुनपोर्रो तळमितसोंटा न्यायम कियालय वातन. अद इंदकेन अंटुकुंचि मत्ते बच्चोनो बेस आयवड इंचि इनकुत्तन. 50 गानि नाकु उंदि कस्टाल्कुना बापतिस्मा एतानद मंता, अद एतनदाका नाकु तिप्पल्क तप्पों. 51 नना इद बूमिपोर्रो सांति हियालय वातन इंचि मिमेट इन्कुंचंतिरा? हिल्ले. नना अदुनहाटीं वाया हिल्लेन. गानि मीकुन वेरे-वेरे कियालय वातन इंचि नना मीकु वेहासेक मंतन. 52 इंदकेटाल बदन्ना उंदि लोते हेय्युर मत्ते, ओरद ओर्के अर्राका इव्वुर उंदि पक्काक, मुव्वुर इंकुंदि पक्काक आसि वेरे आंतुर. 53 अल्हेने मर्रिनद बाबोनतोनि-बाबोनद मर्रिनतोनि, मिय्याटद तल्लुनतोनि-तल्लुनद मिय्यळतोनि, कोळियाटद पोरळतोनि-पोराटद कोळियळतोनि अर्राकोंटा आंता.” वेलातुन एरपाट कियमळ ( मत्तयाल 16:2-3 ) 54 पजा ओर मंदिक इल्हा वेहतोर. “मब्बु तेर्पेन पोळ्द अर्रनहेके हूळसि मिमेट, ‘अद हुळट, पिर्रु वासेक मंता,’ इंचि वेह्कुंतिर. अल्हेन आंतागुडा. 55 इंका होव्वोर वळि वायनद हूळसि, ‘इंदके गर्मी अर्रंता’ इंचि इंतिर. अल्हे आंतागुडा. 56 अरे डोंगिरिटा, मीकु बूमि, मब्बुना रूपाल्कु एरपाट किया वांता. गानि इद वेलाते बतल जर्गसंता इदुन मिमेट बारि एरपाट कीसेक हिल्लिर?” पगातोनतोनि बेस कलियसि मनना ( मत्तयाल 5:25-26 ) 57 “असल बेस न्यायम बद आंद, अद मीवद मिमेटे बारि निरनायम किया परसाहिल्लिर? 58 निमे नीवा पगातोनतोनि कलियसि कोरटते मजिस्टरनगा होननेंके हरदेन ओनतोनि बेस संबंदम कल्पुकुन. अल्हा कियाकोंटे नीकुन नीवा पगातोर कोरटते मजिस्टरुंक अप्पजेपनुर. मजिस्टर नीकुन पोलिसुल्कुंक अप्पजेपनुर, पोलिसुल्क ओसि नीकुन जेलने वाटानुर. 59 नना नीकु निजम वेहांतन, कोत्तक-कोत्ता दोहनदाका निमे अगटाल पेय्सा पर्रिन,” इंचि वेहतोर. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.