योहान 20 - पवित्र पोल्लेयेसु जीवाते तेदांतोर ( मत्तयाल 28:1-8 ; मरकुस 16:1-8 ; लूकाल 24:1-12 ) 1 वारमता मोदाटा रोजु, इत्ते अयतारमनाडु, मुसामुसा हीकट मननेंकेन, मगदलेनि नाटेना मरियम बोंदातगा होत्ता. अगा अद, बोंदा हर्दुक अड्डम इरसि मत्ता बंडा तेंडसि मत्ताप हूळता. 2 अदुनहाटीं अद मरियम, सिमोन पत्रुनगा आनि येसु बोन अय्ते पावरम कियुंदुरो आ सिस्युनगा विच्चि होंचि, “सामिना पीनगुन बोंदाताल बोरो तेंडसि ओतुर, अदुन बगा इरतुरो, माकु तेळियो,” इंचि वेहता. 3 अद वेहतद केंजसि, पत्रु आनि आ इंकावरोर सिस्युड बोंदातेके होनालय पेय्स्तुर. 4 ओर इव्वुर वितसेके होनंनेके, आ इंकावरोर सिस्युड पत्रुंकन्ना मुन्ने विच्चि, बोंदातगा एवतोर. 5 अगा एवसि, ओर पलाताले माळकिस हूळतोर, अय्ते ओन्क सिराप येसुंक हुटसि मत्ता कपडिं दिसतां. गानि ओर लोप्पो नेंगा हिल्लोर. 6-7 पजा सिमोन पत्रुगुडा अगा एव्तोर. लोप्पो होळियसि, येसुंक हुटसि मत्ता कपडिन हूळतोर. गानि येसुना तल्लक हुटसि मत्ता कप्पिड मडता कीसि, वेरे जेगाते मत्तद ओन्क दिसता. 8 पजा, बोंदातगा मुन्ने एव्ता सिस्युडगुडा लोप्पो होळियसि, हूळसि विस्वासम कीतोर. 9 अदवेरदाकागुडा, “येसु हासि तप्पाकोंटा मर्रा जीवाते तेदंतोर,” इंचि दर्मसास्त्रमते रासि मत्ता पोल्ले ओर्क तेळिया हिल्ले. 10 पजा ओर सिस्युल्क ओरा लोह्कुने मल्सि होत्तुर. मगदलेनि मरियमुंक येसु दिसंतोर ( मरकुस 16:9-11 ) 11 मगदलेनि नाटेना मरियम मात्रम बोंदाता पलाते निलसि अळसेके मत्ता. अळसेके-अळसेकेन अद लोप्पो माळकिस हूळता. 12 अस्के, तेल्लटा कपडिं केरता रोंड पेनदा दूतां दान्क दिसतां. अव येसुना सेत्तातुन इरतागा उंदि बारे तल्लाताहेके, इंकुंदि बारे काल्कुनहेके उद्दिस मत्तां. 13 आ दूतां, “बाई, निमे बारि अळसंतिन?” इंचि पूसकीतस्के, “नावा सामिना मेंदुलतुन बोंदाताल बोरो बेकेनो ओसि इरतुर, नाकु एरपाट हिल्ले,” इंचि मरियम इत्ता. 14 अल्हा इंचि अद पजोळ्क तिरियता. अस्के अगा येसु निलसि मत्तद दान्क दिसता. गानि ओरे येसु इंचि, अद एरपाट किया हिल्ले. 15 अस्के येसु, “बाई, निमे बारि अळसंतिन? बोर्कुन पहकसंतिन?” इंचि मरियमुन पूसकीतोर. अस्के मरियम ओन, ओर तोटाक कावेल मनानोर बारे इन्कुंचि, “महाराज, निमे गिंटा सामिना पीनगुन इगेटाल ओयानय्ते, अदुन बगा इरतिन नाकु वेहा नना होंचि तरकुंतन,” इंचि इत्ता. 16 अय्ते येसु, “मरियम,” इंचि दान केयतोर. अस्के मरियम ओनहेके तिरियसि हूळसि, दाना इब्रानि बासाते, “रबोनि” इंचि इत्ता. 17 अस्के येसु, “इदवेरदाका नना बाबानगा होना हिल्लेन. निमे नाकुन इट्टुमा, गानि नावा तम्मुह्कुनगा होंचि इल्हा वेहा: नना नावा बाबाल आनि मीवा बाबाल, इंका नावा पेन आनि मीवा पेनदागा पोर्रो होंचंतन, इंचि ओर्क वेहा,” इंचि दानकु वेहतोर. 18 अस्के मगदलेनि नाटेना मरियम सिस्युल्कुनगा होंचि, “नना सामिन हूळतन, ओर मीकु इव पोल्लें वेहा इत्तोर,” इंचि ओर्क येसु वेहता पोल्लें वेहता. 19 अदे रोजु इत्ते वारमता मोदाटा रोजु, पोळ्द अर्रना वेलाक, सिस्युल्क अंटोर, यहुदि पेद्दाल्कुना वेर्रेक, तल्पुंक तालम वाटसि, उंदि अर्राते जमा आसि मत्तुर. अचानक, येसु ओरा नड्डुम वासि निल्सि, “मीकु सांति दोर्कि,” इंचि इत्तोर. 20 अल्हा वळ्किसि, येसु ओर्क ओना कय्कुंक आनि पक्काक मत्ता देब्बां हुपिस्तोर. सामिन हूळसि ओर वेल्लेन कुसिते निंडिस होत्तुर. 21 येसु मर्रा उंदि मल्का ओर्कुन, “मीकु सांति दोर्कि. बाबाल नाकुन ई दुनियाते लोहताप, ननागुडा मीकुन ई दुनियाते लोहंतन,” इंचि इत्तोर. 22 अल्हा वेहचि, “पवित्र आत्मा येतट,” इंचि ओरपोर्रो उह्कुतोर. 23 उह्किसि, “मिमेट बोना पापाल्क मापि कींतिरो, ओरा पापाल्क मापि आंतां, मिमेट बोरा पापाल्क अय्ते मापि किय्यिरो, ओरा पापाल्क मापि आयों,” इंचि ओर्क वेहतोर. तोमांकु येसु दिसंतोर ( मरकुस 16:14-18 ; लूकाल 24:36-49 ) 24 येसु वासि मत्तोर अस्के, ओना पन्नेंड सिस्युल्कुनाल वरोर, तोमल ईर एमडाल्कुनाल वरोर आंदुर, ई सिस्युड मनाहिल्लोर. 25 अदुनहाटीं सिस्युल्क, “मोमोट सामिन हूळतोम,” इंचि ओन्क वेहतुर. गानि तोमल, “नना कुद्दु ओना कय्कुंक कोह्कता पुनकुन हूळसि, आ पुनकुने नना वेलु इर्रुवा, इंका गोर्काते कोह्कता बर्रातगा कय इर्रुवा, नना विस्वासम किय्योन,” इंचि इत्तोर. 26 ओर अल्हा इंचि एनिमिदि रोजुक आता पजा, सिस्युल्क मर्रा अदे लोते तल्पुंक तालम वाटसि जमा आसि मत्तुर. ई मल्का ओरतोनि तोमालगुडा मत्तोर. तल्पुंक तालम वाटसि मननेंकेगुडा येसु ओरा नड्डुम वासि निल्तोर. निलसि, “मीकु सांति दोर्कि,” इंचि इत्तोर. 27 पजा येसु तोमान, “तोमा, नावा कय्दा पुनकुने नीवा वेलु इर्सि हूळा. नीवा कय हाह्चि, नावा पक्काक मनना गोर्का बर्राते नीवा कय इर्रा. निमे अनमानमते मन्मा, विस्वासम कीम,” इंचि वेहतोर. 28 अस्के तोमल, “ना सामि, ना पेनदुना,” इंचि तोमल येसुंक जवाब हीतोर. 29 पजा येसु ओन, “निमे नाकुन हूळसि विस्वासम कीतिन. गानि बोर नाकुन हूळाकोन्ना विस्वासम कींतोर, ओर आसिर्वाद दोर्कतोर आंद,” इत्तोर. इद पुस्तकम रासता उद्देसम 30 सिराप इवे आयका, सिस्युल्कुना मुन्ने येसु वेरे इंका वेल्लेन अद्बूतामाता चिन्हे कीसि हुपिस्तोर. इवन्नि ई पुस्तकमते रासमळ जर्गाहिल्ले. 31 गानि येसे किरिस्तु, ओरे पेनदा मर्रि, इंचि मिमेट विस्वासम कीसि ओना पोरोल्ते पिस्वर दोर्किच्कुननाहाटीं, इवन्नि रासमळ जर्गता. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.