याकोब 3 - पवित्र पोल्लेनाल्के तळमितसोंटद आंद 1 नावा विस्वासुल्कुनिटा! मिहागटाल वेल्लेटुर कराहनोर आयमटु, बारित्ते मनम कराहनोर्कुंक वेल्ले गट्टिगा न्यायम जर्गंता इंचि मीक एरपाटे मंता. 2 मनम अंटोरम बच्चुंगो तप्पुक कींतोम, गानि बोर अय्ते वळ्कानेंके उंदिगुडा तप्पु किय्योर, ओर अन्नि गुनाल्कुने पूरा मत्ता मनकल आंदुर आनि ओर ओना मेंदुलतुनगुडा पग्गमते दोहताप ईरा परांतोर. 3 गुर्रम मना कय्दे ताकागोम इंचि दाना तोड्डिते कल्लेम दोसंतोम, अस्केने दाना पूरा मेंदुल्तुन तिरहा परांतोम. 4 अल्हेने डोंगन हुळाट, अव वेल्लेन पेद्दगा मनंतां, वेल्ले वळिते ताकंतां, अय्नागानि अवुन ताकसानोर सिन्ना पतवार हेंदाल बेके इत्ते हेके तिरहा परांतोर. 5 अल्हेने मना मेंदुल्ते सिन्ना नाल्के मंता, अद पेद्दा-पेद्दा पोल्लें पोंगंता. हुळाट, सिन्ना मिन्गुरते पेद्दा केडा वेसि दांता. 6 मना नाल्केगुडा तळमितालेसीं मंता. दानगा अन्नि कराब पोल्लें निंडसि मंतां. अद मना मेंदुल्ते मंचि पूरा मेंदुल्तुन बदनाम कीसि मना पिस्वरते तडमि दोसंता. अद तडमि नरकमताल वांता. 7 बारित्ते अन्नि तीरकुना केडा जिवरासीं, पिट्टें, पुळकु आनि समुद्रमते मंदना जिवरासिन मनकल ओना कय्दे कीकुन्ना परांतोर, कीकुत्तोरगुडा. 8 गानि नाल्केतुन आपमळ बोनतोने आयापर्रो. अद आग्वद, कराबतद आंद. दानगा हामुरता विसम निंडसि मंता. 9 इदुनतोने मनम मना सामि पेनबाबाना स्तुति कींतोम, आनि इदुनतोने मनम पेन दाना रूपमते पुटिस्ता मनकालोर्कुन सापनेम हींतोम. 10 उंदे तोळ्दाल आसिर्वाद, सापनेम रोंडु पेय्संतां, नावा विस्वासुल्कुनिटा, इल्हा आयामन्नि. 11 बतल, उंदे ऊटाताल उनाना एर, होव्वोर एर रोंडु पेय्संतंगां? 12 नावा विस्वासुल्कुनिटा, अंजिर मराकु जय्तुन पंडिं हादांतंगा हिलाकोंटे अंगुर वेलिक अंजिर पंडिं हादांतंगा? हादों. अल्हेने होव्वोर एता ऊटाताल, उनाना एर पेय्सा पर्रो. देय्याल्कुना तेल्वि आनि पेनदा तेल्वि 13 मीलोप्पो तेल्वितोर, तेळियतोर बोर मंतोर? ओर ओना बेसता पिस्वर हेंदाल, तेल्विते सीदा-सादा मंचि ओर कियाना कबाह्कुन हुप्सना. 14 गानि मीवा मनसुने वेल्लेने कूटा-कूटा, लालचता इच्चां निंडिस मत्ते, नीवा तेल्विता बारेमते पेद्दिरकेम कीसि, सत्तेमता विरोदमते पापम कियामन्नि. 15 ई तेल्वि पोर्रोटाल रेय्सि वातद आयो, गानि दुनियातागटाल, मनकनगटाल आनि देय्यमतगटाल आंद. 16 बल्हा इत्ते, बगा अय्ते कूटा-कूटा आनि लालचता इच्चां मनंतंगो, अगा आपत्तिं आनि अन्नि तीरकुना कराब कबाह्क मनंतां. 17 गानि पोर्रोटाल वायाना तेल्वि अद मोदाला अय्ते पवित्र मनंता, आयंका सांति हियानद, सीदा-सादा गुनमतद, इंकावरोना पोल्ले केंजालय तयारते मनानद, दया आनि बेसता कबाह्क कियानद, अद बेदबाव कियवद, इमानदारते मनानद आंद. 18 सांतितुन वरोंक-वरोर कल्पानोर्क, सांतिता विज्जाता हेंदाल नीतिता पंटा दोर्कंता. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.