इब्रि 10 - पवित्र पोल्ले1 मूसाना नियम अय्ते, मुन्ने बव बेस पोल्लें जर्गानव मंतांगो, अवुना सिराप नीडे आंद, निजम रूपम आयो. अदुनहाटीं एटा-एटा पेर्मालोर, आगाकोंटा हिय्यना उंदे तीरकुना मोक्कुल्क, पेनदा दग्गेर्क होनानोर्कुन पापमताल पुरागा पवित्र किया पर्रों. 2 ओक्कला अल्हा आसि मत्ते, बक्तुल्कुना मनसुल्कुने, “मोमोट पापिर्क” इत्ता विचारम वायाकोनवळ आनि ओर सुद्द आसि मत्ताहाटीं मोक्कुल्क हियमळ आपिसि मन्नेर. 3-4 गानि एटिना नेत्तुर आयि, कोंदाना नेत्तुर आयि, पापाल्कुन बस्केने लक्कु किया पर्रो. बारित्ते एटा-एटा ओर हिय्यना मोक्कुल्क, ओर्क ओरा पापाल्कुन मति कीसि हीसेकेन मंतां. किरिस्तु मनाकुन पवित्र किया पर्रंतोर 5 अदुनहाटींगे, किरिस्तु इद दुनियाते वातस्के पेनतोनि इल्हा इत्तोर: “निमे मोक्कुल्क आयि, दानाल्क आयिं कोराहिल्लिन, गानि नाहाटीं उंदि मेंदुल तयार कीतिन. 6 कमुरबोलिं आयिं, पापम मापि आयानाहाटीं हीता मोक्कुल्क आयिं, नीकुन कूस किय्यों.” 7 अस्के किरिस्तु, “पेनदुना! दर्मसास्त्रमते नावा बारेमते रासि मत्ता परकारम, नीवा इच्चातुन पुरागा कियालय नना वातन.” इंचि इत्तोर. 8 पोर्रो वेहताप, “मोक्कुल्क, दानाल्क, कमुरबोलिं आनि पापम मापि आयानाहाटीं हिय्यना मोक्कुल्क इवन्निगुडा निमे कोराहिल्लिन इव नीकुन कूस किय्यों,” इंचि पेनतोनि वेहतोर. 9-10 अल्हा वेहचि, “पेनदुना हूळा! नीवा इच्चातुन पुरागा कियालय नना वातन,” इंचि इत्तोर. पेनदा इच्चातुन पुरागा कियानाहाटीं येसु किरिस्तु ओना सतता मेंदुल्तुन उंदे मल्का मोक्कु हीतोर. हीसि रोंडो करारतुन सुरुव कियानाहाटीं, मोदाटा करारतुन बंद कीतोर. इल्हा पेन मनाकुन पवित्र कीता. 11 मोदाटा करार परकारम, हरेक पेर्मल सेवाताहाटीं ओन्क रोजु गद्दे मुन्ने निल्ले पींता आनि हीता मोक्कुल्के ऊके-ऊके हियापींता. गानि अव मोक्कुल्क मात्रम बस्केने पापाल्कुन लक्कु किया पर्रों 12 गानि किरिस्तु अय्ते मना पापाल्कुन लक्कु कियालय, हमेसाताहाटीं उंदे मल्का ओना मेंदुल्तुन मोक्कु हीतोर. हीसि पेनदा तिना बाजुंक होंचि उद्दिसि मंतोर. 13 इल्हा अस्केटाल, किरिस्तु ओना पगातोर्कुन पेन ओना काल्क इर्राना कुत्तुललेसीं बस्के कींता इंचेके एदुर हूळसेक मंतोर. 14 बारित्ते, पवित्र आयानाहाटीं पेन वेरे कीता मनासंटोर्कुन, ओर सिराप उंदे मल्का मोक्कु आसि, हमेसाताहाटीं अन्नि तीरकुने पुरागा कीतोर. 15-16 इदुना बारेमते इल्हा रासतद मंता: “अव रोजकु दाटसि होत्ता पजा, नना इस्राएल लोकुल्कुनतोनि कियाना पूना करार इल्हा मनंता. अद बतल इत्ते, नना नावा नियमकुन ओरा गुंडेने रासि, अवुन ओरा मनसुल्कुने वाटंतन,” इंचि पेन वेहता. इल्हा पवित्र आत्मागुडा मनाकु दर्मसास्त्रमते गवाइ वेहता. 17 अचोने आयाका, “ओरा पापाल्कुन आनि ओर कीता तप्पु कबाह्कुन मर्रा बस्केने मति किय्योन,” इल्हागुडा पवित्र आत्मा वेहता. 18 पेन मावा अन्नि पापाल्कुन मापि कीता अय्ते, इंका मर्रा अवुनाहाटीं मोक्कुल्क हिय्यना अव्सरमे हिल्ले. दैरनेमते पेनदा दग्गेर्क दाकोम 19 अय्ते विस्वासुल्कुनिटा, येसु मनाहाटीं ओना नेत्तुरतुन पोंगागोटतोर. अदुनहाटीं मनाकु इंदके आ पूनद, जीवाते मनना हर्रि पीसि पवित्र जेगाते होनना दैरनेम वाता. 20 येसु ओना मेंदुलताहेंदाल परदातुन पक्काक कीताहाटीं, मनम पेनदागा विस्वासमते होना पर्रंतोम. 21 अचोने आयका, येसे मना पेद्दा पेर्मल आंदुर, ओर पेनदा लोकुल्कुनपोर्रो अदिकारि आंदुर. 22 अदुनहाटीं मनम सत्तेम मनसुने, पुरागा विस्वासमते, इंका मना विवेकमतुन दोसेम हिलाकोंटा कियानाहाटीं मना मनसुनपोर्रो किरिस्तुना नेत्तुर सल्सि, इंका मेंदुल्तुन बेस साप एते नोर्सि पेनदा दग्गेर्क दाकोम. 23 मनाकु बद पेन अय्ते पोल्ले हीतानो अद विस्वासमगल्लद आंद. अदुनहाटीं मनम वेरेतोरा मुन्ने ओप्कुत्ता आसेताल पजोळ्क आयाकोंटा, गट्टि दैरनेमते मंदकोम. 24 मनम वरोंक वरोर पावरम कियालय, बेसता कबाह्क कियालय आनि बतल-बल्हा कीते बेस इंचि वरोंक-वरोर दैरनेम हियालय विचारम कीकोम. 25 आरादनाहाटीं उंदगा जमा आयाना जेगाते वायाकोंटा मनमळ इच्चुर्कु अलवट आसि मंता. गानि मनम ओरलेह्का मनामन्नि. मुक्केमाता पोल्ले बतल इत्ते, येसु सामि मरुंदि मल्का वायाना रोजु दग्गेर्क वासंता, अदुनहाटीं मनम अंटोरम उंदासि, वरोंक-वरोर दैरनेम हीसेक मुन्ने अरकोम इंचि इंकिच्चो जिद्दिते वेहासेक मंदना. 26 इव पोल्लें नना बारि रासेक इत्ते, सत्तेम इत्ते बतल मनाकु तेळियता. इल्हा सत्तेम तेळियसिगुडा तेळियवाप पापम कीसेके होत्ते, इव पापाल्कुनाहाटीं मात्रम इंका बद्दे मोक्कु हिल्ले. 27 गानि दाना बदुलते, बोर अय्ते पेनदा विरोदमते ताकतुरो ओराहाटीं पेन सिक्साता आदेस हीसि, ओर्कुन बरा-बरा पोत्तना तळमिते वाट्सि बूळ्दि किय्यार इत्ता, वेरियानसोंटा पोल्लें मात्रम मिगिल्सि मंतां. 28 मूसाना नियमतुन विरोद कियाना मनकाना बारेमते, इव्वुर हिलाकोंटे मुव्वुर गवाइदार्कुना पोल्लें केंजसि ओनापोर्रो दया कियाकोंटेन ओन्क हामुर सिक्सा हींतुर. 29 अय्ते, इंदके पेनदा मर्रिन पास्काना मनकंक, बद नेत्तुरहेंदाल अय्ते पवित्र कियमळ जर्गता आ पूना करारता नेत्तुरतुन, पवित्र आयो इंचि इनना मनकंक, कुर्पा हुप्साना पेनदा आत्मातुन पास्कानोंक, बच्चोन पेद्दा सिक्सा दोर्कारो, मिमेटे विचारम कीसि हुळट. 30 बारित्ते पेन इत्ता गदा, “बद्ला येताना कबळ नावद आंद, ननाने बद्ला येतंतन,” आनि मर्रा, “सामि ओना लोकुल्कुना न्यायम कींतोर,” इंचि इत्ता. इद पोल्ले मनाकु एरपाटे मंता. 31 जीवाते मंदना पेनदा कय्दे दोर्कना सिक्सा इत्ते, इरगेन वेरियानाल मनंता. 32 मिमेट बेसता कबुर केंजसि पेनदा वेलगुन दोर्किच्कुत्ता आ एनकटा रोजकुन मति कीम्टु, अव रोजकुने बच्चुंगो तकलिपकु वातां, अयना मिमेट ओर्सकुत्तिट. 33 बस्के-बस्के अय्ते अंटोरा मुन्ने मीकुन रोता-रोता पोल्लें इंचि बदनाम कियमळ जर्गता. इंका बस्के-बस्केनो अय्ते, इसोंटा तिप्पल्क बोगांचनोरा तोळने मिमेट निल्तिर. 34 अचोने आयका बेसता कबुर वेहताहाटीं जेलने अर्सि दुक्कमते मत्तोरा दुक्कमते मिमेट कलियतिर. मीवा संपत्तितुन दोसकुंचि ओयिना गानि मिमेट कुसिते मत्तिट. बारित्ते दोसकुंचि ओतादानकन्ना बेसतद, बस्केळ्क मनानद संपत्ति पेन मीहाटीं इरता इंचि मिमेट तेल्पिचकुत्तिर. 35 पेनदापोर्रोटा मीवा विस्वासमतुन पीसि, मीकु वेल्लेन पेद्दा इनाम मंता. अदुनहाटीं बतल आयिनागानि मिमेट विस्वासमताल पजोळ्क होनमट. 36 मिमेट दैरनेमते सहन कियमळ अव्सरमे मंता, अल्हा मत्तेन मिमेट पेनदा इच्चातुन पुरागा किया परकिट आनि पेन मीकु बतल अय्ते हींतन इंचि पोल्ले हीतानो अद मीकु दोर्कार. 37-38 बारित्ते, “बोर सामि वायानोर मंतोर, ओर बिरानेन वांतोर, ओर आल्सेम किय्योर. ओर वायनादाका, नावापोर्रो विस्वासम कीता नीतिमंतुल्क विस्वासमतेन पिस्संतुर. गानि ओराव्टेटाल बोरन्ना ना पोर्रोटा विस्वासमताल पजोळ्क आते, ओन नना मेच्चुकुन्नोन,” इंचि दर्मसास्त्रमते पेनदा पोल्ले रासतद मंता. 39 गानि मनम अय्ते, विस्वासमताल पजोळ्क आसि, नासडेम आयानोर लेसींटोरम आयोम. विस्वासम कीताहाटीं मनम पेनदाहेंदाल पिसांतोम. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.