इब्रि 1 - पवित्र पोल्लेयेसु किरिस्तु पेनदा मर्रि आंदुर 1 वेल्लेन मुन्नेटा कालमते पेन बच्चुंगो मल्कां बच्चुंगो तीरकुने पेनदा कबुरतोराहेंदाल मना तादो-बाबुरतोनि वळ्कता. 2 गानि ई आकिरता रोजकुने बारे, पेन दाना मर्रिनाहेंदाल मनातोनि वळ्कता. दाना मर्रिनाहेंदाले इद पूरा दुनियातुन तयार कीसि, ओन ई दुनियाता वारसदार इंचि निलाहता. 3 आ मर्रि पेनदा महिमाता वेलगु आंदुर. इंका पेनदा गुनम आनि मर्रिना गुनम उंदेतीर मंता. मर्रि ओना बलमगल्ला पोल्लेने ई दुनियातुन ताकिच्चेके मंतोर. ओर मना पापाल्कुनंता नोर्सि मनाकुन पवित्र कीतोर. पजा एत्तुने स्वर्गमते मंदना अन्निटकन्ना पेद्दा पेनदा तिना बाजुंक होंचि उदतोर. येसु पेनदा दूतांकन्ना पेद्दोड 4 इल्हा ओर पेनदा दूतांकन्ना वेल्ले बेस पोरोल आनि कदर दक्किचकुत्तोर. 5 बारित्ते, पेन दाना मर्रिना बारेमते, “निमे नावा मर्रिन आंदिन, इय्याला ननाने नीकुन पुटिस्तन. इंका नना ओना बाबोन आंदुन, ओर ना मर्रि आंदुर.” इंचि येसुन तप्पा बस्केने बदे दूतातुन पेन इना हिल्ले. 6 इदे आयवा, बस्के अय्ते पेन दाना तोल्सूर मर्रिन बूमितगा तत्ता, अस्के, “पेनदा अन्नि दूतां ओन मोळ्किं,” इंचि इत्ता. 7 पजा पेन दाना दूताना बारेमते वेहतस्के, “अद दाना दूतन वळिलेह्का आनि दाना सेवकुल्कुन पोत्तना तळमिलेह्का कींता,” इंचि वेहता. 8 गानि दाना मर्रिना बारेमते, “पेनदुना, नीवा राजगद्दे बस्केळ्क निल्सि मनंता, निमे नीतिते राज्येम कियानदुन आंदिन. 9 सत्तेमतुन निमे पावरम कीतिन, सत्तेम हिलुवादान निमे हय्सिन. अदुनहाटींगे नना, नीवा पेनबाबन, नीवा दंटातोरा लोप्पोटाल नीकुन पेरसि, वेल्ले आनंदमता निय होक्सि नीवा अबिसेकम कीतन,” इंचि पेन इत्ता. 10 इच्चोने आयका, पेन दाना मर्रिना बारेमते, “सामि! मोट्टा मोदाला बूमिक पुनादि दोहतोन निमेने आंदिन. मब्बुकुन नीवा कय्दे तयार कीतिन. 11 अव अन्नि नासडेम आसि होनानुं, गानि निमे बस्केळ्क मनांतिन, कपडिं पडन आसि हर्सोत्ताप, अव अन्नि पडानव आसि होनानुं. 12 निमे सेद्दरतुन आटमूट कीताप, अवुन आटमूट कीकिन. अव कपडिनालेसीं बदलांचनूं, गानि निमे मात्रम बस्केळ्क उंदेतीर मनानोन आंदिन, नीवा कालाल्क बस्केने मारों,” इंचि इत्ता. 13 मर्रा, “बदवेरदाका अय्ते नीवा पगातोर्कुन नीवा काल्कुना हिळु तर्रोन अदवेरदाका, निमे नावा तिना बाजुंक उद्दिसि मन्नु, इंचि बद्दे दूतातुन बस्केने पेन इना हिल्ले.” 14 पेनदा अन्नि दूतां दाना सेवा कियाना आत्मांगें आयोंगां! बोर्क अय्ते पापाल्क मापि आसि मुक्ति दोर्कतनो ओर्कु सहायम कियानाहाटीं पेन इवुन लोहांता. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.