गलातिया 6 - पवित्र पोल्लेवरोंक वरोर सहायम कीम्टु 1 गानि विस्वासुल्कुनिटा! मीलोप्पो बोरन्ना पापम कीते, पेनदा आत्माते ताकानोर मिमेट होंगुंक वायाकोंटा ओनगा होंचि ओन बेस समजांचि, सत्तेम हर्दे तटु. अल्हेने मिमेटगुडा असोंटा परिक्साते अर्रामन्नि इंचि, उसारते मंटु. 2 मिमेट तकलिपते वरोंक-वरोर सहायम कीम्टु, अल्हा कीतेने किरिस्तु हीता नियमतुन पूरा किया परांतिर. 3 बारित्ते, बोरे आयिर पेद्दातनम हिलाकुना गानि पेद्दातनम हुप्संतुर, असंटोर ओरद-ओरे पसांचकुंचेके मंतुर. 4 हरेक मनकल ओना सतता कबाह्कुन कुद्दु परिक्सा कीसि हूळना, वेरेतोना कबाह्क बल्हा मंता इंचि हूळना आयो. अस्के ओना कबाह्क बेस मत्ते ओर सतता कबाह्कुन हूळसि कूस आयावच्चु. 5 बारित्ते बोरे आयिर, ओना जिम्मेदारि ओरे एतमळ गावाले. 6 बोर अय्ते पेनदा पोल्ले करियतुर, ओर अन्नि बेसता वस्तुक ओन्क कराहतोंक पंचि हियमळ गावाले. 7 पेनदुक बतल तेळियो इंचि नाळेम कीसि पसांचमटु, मिमेट बवय्ते वीतकिर, अवने कोयकिर. 8 बोर अय्ते ओना पापि गुनम वेहताप वीतंतोर, ओर नासडेमता पंटा कोय्यंतोर. गानि बोर अय्ते आत्मा वेहताप वीतंतोर, ओर आत्माताहेंदाल बस्केळ्क पिस्सना पिस्वरता पंटा कोय्यंतोर. 9 मनम उंदेतीर बेसता कबळ कीते, पेन निरनायम कीता वेला एवतस्के मनाकु दाना पाय्दा दोर्कंता. अदुनहाटीं मनम नेरबळाकोंटा बेस कबळ कियाना. 10 अय्ते मरि, मनाकु बल्हा मोका दोर्कते अल्हा अंटोराहाटीं, एक्कोते-एक्को मना विस्वासुल्कुनाहाटीं बेस सहायम कीकोम. सिट्टिता आकिर पोल्लें 11 हुळाट, इद सिट्टि पेद्दा-पेद्दा अक्सराल्कुने नावा कय्दे मीकु रास्संतन. 12 नालुरा मुन्ने नना बेसतोन इंचि हुप्सानोर, ओरे मीकुन कतना कियागोम इंचि बल्मि कींतुर. इल्हा बारि कींतुर इत्ते, किरिस्तुना क्रुसताहेंका वायाना तकलिपताल तपिच्कुननाहाटीं ओर इल्हा कींतुर. 13 बोर अय्ते कतना कीसि मंतुर, ओरगुडा मूसाना नियमते ताकुर. गानि ओर वेहताप मिमेट कतना कीते ओर्क पेद्दातनम दोर्कंता इंचि, ओर मीकु इल्हा वेहांतुर. 14 गानि नना अय्ते, मना सामि येसु किरिस्तु क्रुसुनपोर्रो हातोर इंचि विस्वासम कींतन, दीन पोर्रेने नाकु पूरा विस्वासम मंता. आ क्रुसुनहाटींगे दुनियाता पोल्लें नाक कलियों, नावा पोल्लें ओर्क कलियों. 15 बारित्ते कतना किय्यिना, कतना कियाकोन्ना बतल पाय्दा हिल्ले. पेन मनालोप्पो पूना पिस्वर हीता अदे पाय्दातद आंदु. 16 अदुनहाटीं, बचुटुर अय्ते ई नियमते ताकंतुर अचटूर्कुंक आनि पेनदुन विस्वासम कीता अंटोर इस्राएल लोकुल्कुंक सांति, दया दोर्किकांटी. 17 इंदकेटाल आबद्दम कराहना पोल्लें केंजसि मिमेट नाक मर्रा तकलिप हियमटु. येसु सामिना पोल्लें वेहताहाटींगे नना नावा मेंदुलपोर्रो देब्बाना बर्रां पीसि तिरियसेक मंतन. 18 विस्वासुल्कुनिटा! मना सामि येसु किरिस्तुना कुर्पा मी अंटोरतोनि मन्निकांटी. आमीन. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.