इपीसि 4 - पवित्र पोल्लेयेसु सामिना लोप्पो अंटोर कलियसि मनना 1 मीकुन पेन दाना लोकुल्क आयानाहाटीं केयता, अय्ते दाना लोकुल्क बल्हा अय्ते पिसानो अल्हा मिमेट पिस्सट इंचि, सामिनाहाटीं जेलुंक होत्तोन नना मीकु विनंति कीसंतन. 2 दीना अर्तम बतल इत्ते, मिमेट सादा सिंपल मनना, बोर बतल इनिनागानि ओप्के पीसि मनना, वरोंक-वरोर ओर्सकुंचेके पावरमते पिस्सट. 3 पेनदा पवित्र आत्मा मीकुन सांतिते उंदि कीता. अय्ते आ सांतिता एकतातुन मिमेट बेस कापाळसि इर्राना कोसिसते मंटु. 4 अंटोर विस्वासुल्कुनद उंदे मेंदुल आंद. अव्टे मनना पवित्र आत्मागुडा उंदे आंद. अल्हे अंटोर विस्वासुल्कुनगुडा पेन उंदे आसेते पिस्सालय केयता. 5 मना अंटोरा सामि वरोरे, मनम अंटोरम उंदे विस्वासम कींतोम आनि बापतिस्मागुडा उंदे बापतिस्मा एततोम. 6 मनाकु अंटोर्क वरोरे पेनबाबाल मंतोर, ओरे मना अंटोरा पोर्रो मंतोर, ओर मना नड्डुम मंतोर, अंटोरा नड्डुम ओरे मंतोर. पेन हियाना वराल्क 7 गानि किरिस्तु, वेरे-वेरे कबाह्क कियानाहाटीं, मनाव्टेटाल वरो-वरोंक ओना पूरा मनसुनाल उंद-उंदि विसेस कुर्पाता वरम हीतोर. 8 अदुनहाटींगे ओना बारेमते दर्मसास्त्रमते इल्हा रासि मंता: “ओर पोर्रो एत्तु एक्किसि होत्तोर, जेलने मत्तोर्कुन दोहचि ओतोर, मनकालोर्कुंक वराल्क हीतोर.” इंचि रासि मंता. 9 ओर, “पोर्रो एक्किसि होत्तोर” इत्ता पोल्लेता अर्तम बतल? दीना अर्तम, ओर बूमिता हिळुदाकागुडा रेय्सि वातोर इत्तापे गदा! 10 बोर अय्ते हिळु रेय्सि वातोरो, ओरे बतले तक्को मनाकोंटा अन्निटतुन पुरागा कियानाहाटीं अन्नि मब्बुकुंकन्ना एत्तु जेगाते एक्किसि होत्तोर. 11-12 ओर, पेनदा सेवाहाटीं पवित्र लोकुल्कुन तयार कियालय आनि किरिस्तुना मेंदुललेसीं मनना कलिसियातोर्कुन बेस बक्तिते, बरोसाते बेर्सागोटनाहाटीं, इच्चुर्कुन प्रेरितुल्क, इच्चुर्कुन पेनदा कबुरतोर, इच्चुर्कुन बेसता कबुर वेहानोर आनि इंकिच्चुर्कुन बारे पास्टर आनि कराहनोर इंचि पेर्सि ओर्कु वराल्क हीतोर. 13 दीनहेंदाल मनम अंटोरम पेनदा मर्रिना पोर्रोटा विस्वासम आनि ओना बारेमता जानकारिते उंदासि मनंतोम. इंका बद्दे पोल्लेते आयि किरिस्तु बल्हा अय्ते बतले तक्को हिलाकोंटा मत्तोर, अल्हेने मनमगुडा मना पर्रंतोम. 14 इल्हा मत्ते बतल आंता इत्ते, बोर अय्ते आबद्दम, तप्पुड बोदां कराहचि मनाकुन विस्वासमता हरदाल तप्सालय हूळांतुरो, असंटोरा पोल्लेने अर्राकोंटा, वळिकु हीके-हेके आयाकोंटा मनंतोम. इल्हा मुन्ने मनम सिना पिलाल्कुनलेह्का आयोम. 15 इंका पावरमते निजम वळ्कसेक, मना तल्लालेसीं मनना किरिस्तुना बेसतनम मनालोप्पो बेर्सि, मनम हरेक पोल्लेते ओनालेसीं आयागोम. 16 मेंदुल्ते मनना कील्कु-नर्राल्कु मेंदुल्ता वेरे-वेरे बागाल्कुन बल्हा अय्ते उंदान्कु-उंदि अंटिच्चि इर्रांतंगों, अल्हे किरिस्तुना मेंदुल आसि मत्तोर्कुन ओरे अंटिच्चि इर्रंतोर. मेंदुल्ता हरेक बागम, मेंदुलतोनि कलियसि अवुना कबाह्क अव बरोबर कीतेने मेंदुल बेस बरोबर मनंता. अल्हेने कलिसियातोरगुडा वरोन-वरोर पावरमते हूळसेक, ओर्क पेन हीता कबाह्कुन बरोबर कीते, ओर पेनदापोर्रोटा बरोसाते बेस बेर्संतुर. पेन हियाना पूना गुनाल्कुने बेस एदगट 17 अदुनहाटीं सामिना पोरोलते नना मीकु विनंति कीसि वेहानद बतल इत्ते, यहुदि आयवोर बल्हा ओरा बत्तक ओज्जुवा विचाराल्कुन परकारम ताकंतुरो, अल्हा मिमेट इंदकेटाल मर्रा ताकमट. 18 ओरा विचाराल्क बत्ताके ओज्जाकोंटा आतां. ओर्कु तेल्वि तक्को मत्ताहाटीं ओरा मनसु बंडालेसीं गट्टिपळसोत्ता. अदुनहाटीं ओर पेनदुन तेल्पिचकुना हिल्लुर. इल्हा पेन हिय्याना पूना पिस्वरताल ओर्कुन लक्कु कियमळ जर्गता. 19 ओर्कु सिग्गु इत्तद बतले हिलुवाहेंका अन्नि तीरकुना कराब कबाह्क कियाना लालचतेन ओर कूस मनंतुर. 20 गानि मिमेट किरिस्तुना बारेमते करियतस्के इसोंटा पोल्लें करिया हिल्लिर. 21 मिमेट निजमे किरिस्तुना बारेमता पोल्लें केंजतिर. अचोने आयाका येसुना बारेमता सत्तेमतुन, बल्हा मत्तद अल्हे करियतिर. 22 अय्ते मीवा पडाना पिस्वरते मत्ता गुनाल्कुन इंदके तेंडसि पोहाट. अव गुनाल्क मीलोप्पो कराब कबाह्क कियाना आसे पुट्टिचि मीकुन पाडगीसि पोहंतां. 23 मिमेट बतल अय्ते करियतिरो अदुन पीसि, मीवा आत्माते पूना गुनाल्क वासि मिमेट बेस एदगट. 24 पूना गुनाल्कुन पेन दानालेह्का सत्तेमते तयार कीता, पवित्र कीता. अदुनहाटीं मीवा पडाना गुनाल्कुन होळसिसि पेन हियाना पूना गुनाल्कुने ताकट. पेनदा आत्माकु दुक्कम हियमट 25 मनम अंटोरम उंदे मेंदुल्ता वेरे-वेरे बागाल्क आताहाटीं, इंदकेटाल वरोनतोनि-वरोर आबद्दम वळ्कमळ होळसिसि, हरेक मनकल सत्तेमे वळ्कगोम. 26 होंग आम्टु गानि, पापम कियमट. पोळ्द अर्राका मुन्नेन मीवा होंग सल्लारगोम. 27 मीवा पिस्वरते देय्यमतुन होळिया हियमट. 28 बोर अय्ते मुन्ने दोंगातनाल्क कियुंदुर, ओर इंदके अदुन होळसियना. सतता कय्कुने कस्टम कीसि, बेस तरिकाते कमांचना. अस्केन, अव्सरम मत्तोर्क ओर सहायम किया पर्रंतोर. 29 मीवा तोळ्दाल बस्केन कराब पोल्ले पेय्सानायो. केंजानोर्कुंक कुर्पा दोर्किसि, ओरा बक्तिते पायदा वायाना बेसता पोल्लेंगे पेय्सगोम. ओरा अव्सरमतुन पीसि मिमेट वळ्काना. 30 मुक्तिता रोजुनदाका, “ईर ना लोकुल्क” इंचि पेन मीपोर्रो उंदि सिक्का तंचि इर्ता. अदुनहाटीं मिमेट दाना पवित्र आत्माकु दुक्कम वायाकोंटा पिस्सट. 31 मिहगा मनना हेळाह्ना गुनम, पगा, होंग, वरगेयना बुद्दि, अपमानम कियाना बुद्दि इसोंटा अन्नि कराब गुनाल्क-पोल्लेन मिहागटाल लक्कु कीम्टु. 32 वरोनपोर्रो वरोंक जीवा नोसि बेस दया हुपिच्चेक, पेन बल्हा किरिस्तुनाहेंदाल मीवा तप्पुकुन मापि कीता, अल्हेन मिमेटगुडा वरोना तप्पुक वरोर मापि कीम्टु. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.