प्रेरितुल्कुना कबाह्क 13 - पवित्र पोल्लेपौलुस मोदाटा पय्नेम पेय्संतोर ( 13:1–14:28 ) बरनाबासुन आनि पौलुसुन बेस कबळताहाटीं पेरमळ 1 अंताकिया सहरता कलिसियातोरव्टे इच्चुर पेनदा कबुरतोर आनि कराहनोर मत्तुर. ओर बोर इत्ते, बरनाबास, सिमोन ईन निगर (इत्ते कर्रेटोर) गुडा इनुंदुर, कुरेनि सहरता लुकियुस, साऊल, गालिल एरियाता राजाल हेरोद अंतिपासुनतोनि बेर्सता मनाहेम ईर आंदुर. 2 उंदि रोज ओर ओक्कापोद्दु मंचि सामिंक आरादना कीसेके मननेंके पवित्र आत्मा ओर्कुन, “नना बद कबळताहाटीं बरनाबासुन आनि साऊलुन पेरकुत्तनो, अदुन कियानाहाटीं ओर्कुन अलग कीम्टु,” इंचि इत्ता. 3 अस्के ओर ओक्कापोद्दु मंचि पारतना कीसि ओरापोर्रो कय इरसि ओर्कुन लोहचीतुर. पौलुस आनि बरनाबास साइप्रस दीबेते दांतुर 4 पवित्र आत्माहेंदाल ओर्कुन लोहतारित्ते ओर सिलुकिया सहरते होत्तुर, अगटाल उंदि डोंगाते उद्दिस साइप्रस दीबेहेके पेय्स्तुर. 5 पजा अदे दीबेते मनना सलमीस इनना सहरते एवतारित्ते, यहुदिल्कुना दर्मसास्त्रम कराहना लोहकुने होंचि पेनदा पोल्लें वेहालय दल्गतुर. योहान (ईन मरकुसगुडा इनुंदुर) ओर्कु सहायम कियालय ओरतोनि मत्तोर. 6 पजा ओर पूरा दीबेतुन तिरियसेक पापूस इनना नाटे एवतुर. अगा ओर्कु वरोर यहुदि जातिता मंत्रगाड आनि पेनदा आबद्दम कबुरतोर कलियतोर. ओन पोरोल बार-येसु. 7 अगा वरोर सिरगु पौलुस इनना तेल्विता अदिकारि मत्तोर, ओनतोने बार-येसु मत्तोर. आ अदिकारि पेनदा पोल्लें केंजंतन इंचि बरनाबासुन आनि साऊलुन ओनगा केयतोर. 8 गानि एलिमल इनना मंत्राल्कुनोर (युनानि बासाते बार-येसुना पोरोल एलिमल मत्ता), बरनाबास आनि साऊलुंक अड्डम आसि आ अदिकारि विस्वासम कियामन्नि इंचि आपालय हूळतोर. 9 अस्के साऊल (ईन पौलुस इंका इनुंदुर) पवित्र आत्माते निंडिसि, एलिमलनाहेके उंदेतीर हूळसेक, 10 “अरे! दोका हियानोना, अन्नि तीरकुना नडेह कियाना बुद्दिं निंडिस मत्ता देय्यमता मर्रिना! अन्नि नीति पोल्लेंक अड्डम तिरियना पगातोन आंदिन. सामिना निजम पोल्लेतुन बदवेरदाका आबद्दम वळ्कसेक मनांतिन? 11 इंदके हूळा! सामि नीवा पोर्रो कय तेहातोर, निमे गुड्डिन आंतिन. कोन्नि रोजकुनदाका पोळ्दुनगुडा हूळाकोंटा आंतिन,” इंचि इत्तोर. इत्तस्केने एलिमलना कळकु मागुर-मागुर आतां. हिर्र हीकट आसि दिसाकोंटा आतां, अस्के, नाकुन बोरन्ना कय पीसि ओयगोम, इंचि ओर हीके-हेके पहकालय दल्गुतोर. 12 एलिमलुंक अल्हा आतदुन हूळसि, सामिना बारेमते वेहता पोल्लें केंजसि इचंत्रम आसि, आ अदिकारि सामिन विस्वासम कीतोर. पिसिदिया एरियाता अंताकियाते पेनदा कबुर वेहमळ 13 आयंका पौलुस ओना दंटातोरतोनि पापूस सहरताल डोंगाते उदसि, पंपुलिया एरियाते मनना पिरगा सहरते होत्तुर. अगा होत्तारित्ते योहान ओर्कुन होळसिसि येरुसलेम मल्सि होत्तोर. 14 हेके पौलुस आनि बरनाबास पिरगा सहरताल तिरियसेके पिसिदिया एरियाते मनना अंताकिया सहरते एवतुर. नोमकेम रोजुने यहुदिल्कुना दर्मसास्त्रम कराहना लोते होंचि उदतुर. 15 अगा मूसाना नियम आनि पेनदा कबुरतोर रासतव पुस्तकाल्कुन हदुवतुर. हदवुतस्के दर्मसास्त्रम कराहना लोता अदिकारिल्क पौलुसुन आनि बरनाबासुन, “दादालोरिटा! लोकुल्कुंक कराहनाहाटीं मिहगा बदाना प्रोत्साहन कियाना पोल्ले मत्ते करहट,” इंचि पूसकियालय लोहतुर. पौलुसना बासन 16 अस्के पौलुस नित्तिसि, लोकुल्कुन सपुडदाका कियालय कय तेहाचि वळ्कालय दल्गुतोर, इस्राएलता लोकुरिटा आनि पेनदुक वेरियना वेरे जातितोरिटा, केंजट. 17 ई इस्राएल लोकुल्कुना पेन, मना एनकटा पेद्दाल्कुन पेर्कुत्ता. ओर इजिप्त देसेमतोरा कय्दा हिळु बस्के अय्ते मत्तुरो, अस्के ओर्कुन पेद्दा कीसि, दाना पेद्दा बलमतोने आ देसेमताल पलाते तत्ता. 18 मना पेद्दाल्क पेनदा पोल्लें केंजाकोंदुर, अय्नागानि दग्गेर-दग्गेरा नल्पै वर्सनदाका पेन ओर्कुन बय्लि जेगाते ओर्सकुत्ता. 19-20 कनान देसेमता एडुं जातिन नासडेम कीसि, अद बूमि इस्राएल लोकुल्कुंक, इद मीवा बूमि, इंचि हीता. इव अन्नि आयालय नालुं नुह्कुना एबै वर्सां दल्गतां. पजा सामवेल पोरोलता पेनदा कबुरतोर वायानादाका पेन ओर्कु बच्चुरो न्यायम कियानोर्कुन हीता. 21 आयंका वरोर राजाल गावाले इत्ताहाटीं, पेन ओर्कु बेंजामिनना वंसमतोर कीस इननोना मर्रि साऊलुन हीता, ओर नल्पै वर्सां राज्येम कीतोर. 22 मर्रा साऊलुनगटाल राज्येम तेंडसि दाविदुंक हीता. दाविदुना बारेमते पेन इल्हा गवाइ वेहता, “यिस्सल पोरोलतोना मर्रि दाविद, नना इनकुत्ताप नाकु दोर्कतोर, नना वेहतव अन्नि ओर पूरा कींतोर,” इंचि वेहता. 23 “पेन हीता पोल्ले परकारम ईना वंसमताले इस्राएल लोकुल्कुंक मुक्ति हियानोर इंचि येसुन, पेन लोहता. 24 येसु वायाका मुन्ने, बापतिस्मा हियना योहान इस्राएलता अंटोर लोकुल्कुन, मनसु मार्सकुंचि बापतिस्मा एतट,” इंचि वेहतोर. 25 योहान ओना कबाटुन पूरा महना वेलाते, “नना बोन इंचि मिमेट इनकुंचंतिर? मिमेट बोनय्ते एदुर हूळसंतिर, ओन नना आयोन. ओर नावा पज्जो वायानुर, नना ओना काल्कुना हेर्पुह्क तेंडना लायक इंका हिल्लेन,” इंचि इत्तोर. 26 मावा दादालोरिटा, अब्राहामुना वंसमतोरिटा आनि पेनदुक वेरियना वेरे जातितोरिटा! मुक्ति हियना बेसता कबुरतुन पेन मनागा लोहचीता. 27 येरुसलेमते मनानुर आनि ओरा अदिकारिल्क येसुन एरपाट किया हिल्लुर. वारा-वारम नोमकेम रोजुने पेनदा कबुरतोरा पोल्लें हदवुंदुर, गानि अदुन एरपाट कियवा, येसुन हव्किसि आ पेनदा कबुरतोरा पोल्लेन पूरा कीतुर. 28 हामुर सिक्सा हियनलायक बतले तप्पु येसुनलोप्पो दोर्काकोन्नागानि ओन हव्कगोम इंचि पिलातुस राज्यपालुंक विनंति कीतुर. 29 येसुन बतल-बतल कियानुर इंचि रासि मत्तानो, अव अन्नि पूरा आतस्के ओन क्रुसुनपोर्रोटाल हिळु रेहचि बोंदा दोस्तुर. 30 गानि पेन ओन हामुरताल मर्रा तेहता. 31 तेहतारित्ते, गालिल एरियाताल येरुसलेमदाका ओनतोनि होत्तोर्कुंक वेल्लेने रोजकुनदाका ओर दिस्सेक मत्तोर. इंदके लोकुल्कुना मुन्ने येसुना गवाइ इंचि ओरे मंतुर. 32 पेन मना पेद्दाल्कुंक मुन्नेने पोल्ले हीसि मत्ता. अदे पोल्लेता कबुरतुन मोमोट मीक वेहासेक मंतोम. 33 इल्हा पेन येसुन हामुरताल मर्रा तेहाचि, मना पेद्दाल्कुंक मुन्नेने हीता पोल्ले, इंदके मनाहाटीं निजम आता. इदु, बजन संहितता रोंडो बजनते इल्हा रासि मंता: “निमे नावा मर्रिन आंदिन, इय्यला नना नीकु बाबोन आतन.” 34 पेन ओन हातोरा लोप्पोटाल तेहता, ओर मर्रा बस्केने कळियसि होन्नोर. “नना दाविदुंक तप्पाकोंटा हींतन इत्ता पवित्रमाता आसिर्वाद नीकु हींतन,” इंचि इत्ता. 35 अल्हेने इंकुंदि बजनते, “नीवा पवित्र मनकन कळियसि होना हिय्यिन.” इंचि इत्तोर. 36 “दाविद पेनदा इच्चा मत्तापे ओन्क हीता सेवा-कबाटुन ओना कालमते महाचि हातोर. हातस्के ओना पेद्दाल्कुन बगा बोंदा दोस्तुरो, अग्गेन ओन इंका बोंदा दोस्तुर ओर कळियसिगुडा होत्तोर. 37 गानि पेन तेहातोर मात्रम कळियसि होना हिल्लोर.” 38 अदुनहाटीं मावा दादालोरिटा! मिमेट दीन तेळियागोटकुंटु. येसुनाहेंदाले मीवा पापाल्कुन पेन मापि कींता इंचि मोमोट वेहासेक मंतोम. 39 मूसाना नियम हेंदाल मीकु पापाल्कुनाल मापि दोर्को, गानि येसुना पोर्रो विस्वास इर्रानुर अंटोर्क ओरा पापाल्कुनाल मापि दोर्कंता. 40 अदुनहाटीं पेनदा कबुरतोर रासता पोल्लें मीपोर्रो वायाकोंटा उसारते मंटु, इंचि पेन इल्हा इत्ता: 41 “नावा पोल्लेतुन पास्कानोरिटा हुळाट, इचंत्रम आसि, हासि दांतिट. बारित्ते, मीवा रोजकुने नना इसोंटा कबळ कींतन गदा, अदुना बारेमते बोर वेहिनागानि मिमेट विस्वासम किय्यिर,” इंचि पेन वेहता. 42 पौलुस, बरनाबास दर्मसास्त्रम कराहना लोताल पलाते पेय्सतस्के, “इव पोल्लें वायाना नोमकेम रोजुने इंका एक्को माकु वेहाटु,” इंचि लोकुल्क ओरतोनि विनंति कीतुर. 43 वेल्लेटुर यहुदिल्कु अल्हेने यहुदि जातिते वाता वेरे जातितोर, पौलुस, बरनाबासुना पज्जो होत्तुर. ओर, लोकुल्कुनतोनि वळकसेके, “बस्केळ्क पेनदा कुर्पाते मंटु,” इंचि ओर्कु वेहतुर. 44 इंकुंदि नोमकेम रोजुने सामिना पोल्लें केंजालय, पूरा नाटेनोर इत्ताप जमा आतुर. 45 अच्चो वेल्ले मंदितुन हूळसि यहुदिल्कुना जीवा मसुल्ता, अदुनहाटीं ओर पौलुसना पोल्लेंक विरोद कीसि ओन बदनाम कियालय दल्गतुर. 46 गानि पौलुस आनि बरनाबास वेरियाकोंटा, मीकु पेनदा पोल्ले मुन्नेने वेहना अव्सरम मत्ता, गानि मिमेट दान हय्सका, बस्केळ्क पिस्सना पिस्वरकु लक्कु आताप हुपिस्तिर. अदुनहाटीं इंदके मोमोट यहुदि आयवोरहेके दांतोम. 47 बारित्ते पेन माकु इल्हा आदेस हीता: “सामि लोकुल्कुन बल्हा पिसागोटंतोर इदु पोल्ले निमे दुनियंता वेहगोम इंचि, नना नीकुन वेरे जातितोरहाटीं वेडसि हुप्सानोन कीतन,” इंचि इत्तोर. 48 ई पोल्ले केंजसि वेरे जातितोर वेल्ले कूस आसि, सामिना पोल्लेता कदर कियालय दल्गुतुर. बचटूर्कुन अय्ते बस्केळ्क पिस्सना पिस्वरताहाटीं पेन पेरकुत्तनो, अचटुर येसुनपोर्रो विस्वासम कीतुर. 49 इल्हा सामिना पोल्लें पूरा एरियाता लोकुल्कुंक तेळियता. 50 गानि यहुदि लोकुल्क मात्रम निजमाता पेनदुन आरादना किय्यानव सहरता कदरगल्ला वेरे जातिता मुर्ताह्कुन, पेद्दाल्कुन एक्किस्तुर. अस्के ओर पौलुस, बरनाबासुन पक्का तकलिप कीसि ओर्कुन आ एरियाताल पलाते पेचाहतुर. 51 ओर इव्वुर ओरा काल्कुना दुब्बा अग्गेन दुल्पिसि ओरापोर्रो विरोद हुप्पिचि इकोनिया सहरते पेय्सि होत्तुर. 52 गानि अंताकियाता विस्वासुल्क पवित्र आत्माते पूरा निंडिस आनंदमते मत्तुर. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.