2 कुरेंति 9 - पवित्र पोल्लेकुसिते दानम हियाना इंचि पौलुस वेहमळ 1 इंदके यहुदिया राज्येमता पेनदा लोकुल्कुनाहाटीं कियाना ई सेवाता बारेमते मीक रासाना अव्सरम हिल्ले. 2 बारित्ते सहाय्यम कियालय मिमेट बस्केळ्क तयार मनंतिर नाक एरपाटे मंता. नना मीवा बारेमते, अकाया एरियाता लोकुल्क उंदि वर्साताल चंदा हियालय तयार मंतुर इंचि मेसिडोनियाता लोकुल्कुंक पेद्दिरकेमते वेहुंदुन. इद केंजसि वेल्लेटुर लोकुल्क चंदा हियालय तयार आतुर. 3 नना मीवा बारेमते पेद्दिरकेम वेहता पोल्लें एर्तम आयामन्नि इंचि ई दादालोर्कुन लोहसेक मंतन, नना वेहतापे मिमेट चंदा तयार कीसि इर्रट. 4 मिमेट अल्हा तयार कीसि इर्राकोंटे, मेसिडोनियातोर बोरन्ना नावातोनि वासि तयार हिल्वद हूळते, मीवापोर्रो बरोसा कीताहाटीं मावा सिग्गु होनना वेला वायार. मीवदगुडा सिग्गु दांता इनमळ अव्सरम हिल्ले. 5 अदुनहाटीं मिमेट चंदा हींतोम इंचि मोदाले पोल्ले हीसि मत्तिर. अय्ते आ चंदा मिमेट तयार कीसि इर्राट इंचि बतिमलाडालय ई दादालोर्कुन मुन्नेने मिहगा लोहमळ नना अव्सरम इनकुत्तन. ओर वाता पजा जबरदस्तिते आयो गानि, मीवा मनसुनाल हियमळ गावाले. 6 इद पोल्ले मति इर्राट: इच्चुन वीततोर इच्चुने पंटा कोय्यंतोर, वेल्ले वीततोर वेल्लेने पंटा कोय्यंतोर. 7 अदुनहाटीं गुल्गामन्नि, जबरदस्ति कियामन्नि हरेक मनकल बल्हा हींतन इंचि विचारम कीतोरो, अल्हेने हिय्याना. अल्हा आनंदमते हियानोन पेन पावरम कींता. 8 मिमेट अन्नि बेसता कबाह्क कियालय, मीक अव्सरम मत्तव अन्नि मिहगा बस्केळ्क मंदालय, पेन दाना दयाते अव अन्निन हिया परांता. 9 इदुना बारेमते दर्मसास्त्रमते, “ओर गरिबोर्कुंक अन्समन्स कियाका हींतोर, ओना नीति बस्केळ्क निल्सि मनंता,” इंचि रासि मंता. 10 अदुनहाटीं वीतानोंकु पेन विज्जां हींता, तिनालय तिंडि हींता. अद मीक वेल्ले विज्जां हीतस्के मीवा नीतिता पलम बेरसंता. 11 मिमेट बस्केळ्क अन्समन्स कियाकोंटा हियालय पेन मीकुन अन्निटवुने गट्टिगा कींता. अल्हेने मिमेट मावा कय्दे चंदा लोहतिट इंचि वेल्लेटुर पेनदुक दन्यवाद कियानुर. 12 मिमेट कियाना सहायमता सेवाहेंदाल पेनदा लोकुल्कुना अव्सराल्क पूरा आंतां, अचोने आयाका ओराहेंदाल पेनदुक वेल्ले दन्यवाद आसेक मनंता. 13 बारित्ते मिमेट इद सेवा कीसि, किरिस्तुना बेसता कबुरतुन ओप्कुंचि अद मत्ताप ताकसेक मंतिर. अचोने आयाका पेनदा लोकुल्कुंक, वेरे अंटोर्कुंक मीवा मनसुनाल सहायम कीसेक मंतिट. इदुन हूळसि ओर पेनदा महिमा कींतुर. 14 मीवापोर्रो पेनदा कुर्पा वेल्लेने मंता, अदुनहाटीं ओर मीकुन हूळना इंचि तनलाळसेके ओर मीवाहाटीं वेल्लेने पावरमते पारतना कींतुर. 15 पेन हीता वेहा परवच्चो वरमताहाटीं दानकु दन्यवाद आयि. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.