2 कुरेंति 8 - पवित्र पोल्लेगरिब विस्वासुल्क एक्को दानम कियमळ 1 विस्वासुल्कुनिटा! मेसिडोनिया एरियाता कलिसियातोर्कुंक पेन कीता कुर्पाता बारेमते मीक वेहसेक मंतोम. 2 अद बल्हा इत्ते, ओरापोर्रो वेल्लेने तकलिपकुना परिक्सां वातां, ओर वेल्लेने कूस आनि गरिब आसि मत्तुर. अयना गानि लोकुल्कुंक हिय्याना सहायम वेल्लेन बेर्सता. 3 ओरा बारेमते ना गवाइ इदे गदा, ओर बच्चोर हिय्या पर्तुर अचोने आयो गानि, दानकन्ना एक्को कुसिते हीतुर. 4 पेनदा लोकुल्कुन सहायम कियाना सेवाते माकुनगुडा कलियालय दया कीम्टु इंचि ओर मावातोनि ऊके-ऊके वेल्ले विनंति कीतुर. 5 मोमोट आसे पळसि मत्ता दानकन्ना एक्को ओर कीतुर. ओरा पिस्वरंता पेनदाहाटीं हीतुर, आनि पेनदा इच्चा मत्ताप मावाहाटींगुडा हीतुर. 6 इल्हा सहायम कियमळ मुन्ने तीतुए मीलोप्पो सुरुव कीतोर, अय्ते अदुन महना कबळगुडा किय्यिर इंचि ओन विनंति कीतोम. 7 मिमेट विस्वासमते, पोल्लेने, तेल्विते, अन्नि तीरुकुने कोसिस कियमळते आनि मावा पोर्रो मिमेट कियाना पावरमते बेर्सेक मंतिट. अल्हेने दानम कियाना कबळतेगुडा बेर्सेक होंदना. 8 नना मीक आदेस हीसेक हिल्लेन, गानि कळमता विस्वासुल्क इद कबळते उसारते मंतुर, ओराच्चोन मिमेटगुडा निजम पावरम कीसेक मंतिरा इंचि परिक्सा कीसि हूळसेक मंतन. 9 मना सामि येसु किरिस्तुना कुर्पा बच्चोर पेद्दादि मीक एरपाटे मंता. ओनगा अन्नि मंचिगुडा मीवाहाटीं गरिब आतोर. ओना गरिबतनमताहेंदाल मिमेट दनवंतुल्क आयना इंचि ओर अल्हा आतोर. 10-11 इगे नना वेहाना पोल्ले इदे गदा, नीरेटाल कोत्तां जमा कीसि हियमळ मोदाला मिमेटे सुरुव कीतिर, अद कबाटुन महमळ मीक बेस मनंता. बारित्ते, कोत्तां जमा कियाना इंचि बल्हा अय्ते मीवा इच्चा मत्ता, अल्हा मिमेट हिय्या पर्तच्चो जमा कीसि अद कबाटुन पूरा कीम्टु. 12 कोत्तां हिय्याना इंचि मीवा इच्चा मत्ते, मिमेट बच्चोन हींतिट, अद पोल्ले आयो गानि, मिमेट पूरा मनसुनाल हीते पेन अदुन ओप्कुंता. 13 इंकावरोना बर्वुन अल्कगा कियानाहाटीं मिमेट बर्वु कांजना इंचि नना इंचेक हिल्लेन गानि इव्वुर समानम मंदना. 14 इंदकेटा वेलाते मिहगा अन्नि मंता, अय्ते हिल्वोरा अव्सराल्कुने कबळ्क वायमळ गावाले. पजा उंदि वेला मिहगा हिल्वस्के ओर मीवा अव्सराल्कुने कबळ्क वायमळ गावाले, इल्हा इव्वुरगुडा समानम आंतिर. 15 इदुना बारेमते दर्मसास्त्रमते, “वेल्ले जमा कीतोनगा, वेल्ले मिग्ला हिल्लें, तक्को जमा कीतोनगा, तक्को होन्ना हिल्लें,” इंचि रासि मंता. तीतु आनि ओना दंटातुर 16 मी बारेमते ना मनसुने मत्ता इच्चातुन, पेन तीतुना मनसुनेगुडा पुटिस्ता. अदुनहाटीं पेनदुक नना दन्यवाद कींतन. 17 मोमोट तीतुन मीहेके लोहालय विनंति कीतस्के ओर अद पोल्लेतुन ओप्कुंचि कुद कुसिते मिहगा वायालय तयार आतोर. 18 अल्हेने तीतुनतोनि अन्नि कलिसियाने बेसता कबुरतुन वेहालय पोरोल पेय्सतोर वरोर दादनगुडा लोहसेक मंतोम. 19 अचोने आयका, इद चंदातुन मोमोट येरुसलेम ओयानेंके ओन मातोनि लोहना इंचि कलिसियातोर पेरतुर. मोमोट सामिना महिमाताहाटीं आनि मावा सहायम कियाना जिद दिस्सनाहाटीं इद चंदा ओसेक मंतोम. 20 ई जमा कीता चंदाता जिम्मेदारि मावा पोर्रो मत्ताहाटीं, माकुन बोरे तप्पु इनामन्नि इंचि उसारते ताकसेक मंतोम. 21 सिराप पेनदा मुन्नेने तप्पु हिल्वाप आयो, गानि मनकालोरा मुन्नेगुडा तप्पु हिल्वाप मंतोम. 22 अल्हेने ओरतोनि मोमोट इंकावरोन मना दादन लोहासेक मंतोम. आ दादन मोमोट बच्चुंगो मल्कां परिक्सा कीसि हूळतोम, ओर वेल्लेने पोल्लेने बेस मंतोर. ओर मीवापोर्रो वेल्लेने बरोसा कीताहाटीं, मीक इंका वेल्लेने सहाय्यम कियाना ओना इच्चा मंता. 23 ओक्कला बोरन्ना तीतु बोर आंदुर? इंचि पूसकीते, ओर नावा दंटातोर, नावातोनि कलियसि मीवा सेवा कियानोर आंदुर, इंचि वेहट. इंका विस्वासि दादालोरा बारेमते पूसकीते, ओर कलिसियातोर लोहचीतोर आनि किरिस्तुना कदरगल्लोर आंदुर, इंचि वेहट. 24 अदुनहाटीं मिमेट ओर्कुन बच्चोन पावरम कींतिट इंचि कलिसियाता मुन्ने हुप्सट, अल्हेने मीवा बारेमते मोमोट पेद्दिरकेम वेहकुत्तद निजम कीसि ओर्कु हुप्सट. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.