1 कुरेंति 4 - पवित्र पोल्लेपेनदा मर्ममता देकरेक कियानोर 1 अदुनहाटीं मोमोट किरिस्तुना सेवाकुल्कुम आनि पेनदा मर्ममता देकरेक कियानोरम आंदुम इंचि मीक तेळियमळ गावाले. 2 अल्हेने पेनदा मर्ममता देकरेक कियानोर विस्वासम कियानालायक मनमळ गावाले. 3 गानि नाकुन मीवाहेंदाल आयि हिलाकोंटे लोकुल्कुना पंचायतता हेंदाल आयि, विस्वासमते मंतोरा हिल्लोरा इंचि परिक्सा कीसि हूळमळ गावाले इद नावाहाटीं सिन्ना पोल्ले आंद. नावद ननाने न्यायमगुडा किय्योन. 4 नहगा बतले दोसेम दिस्सेक हिल्ले, गानि नना दोसेम हिल्वोन आयोन. पेने नाकुन परिक्सा कीसि हूळंता. 5 अदुनहाटीं न्यायम कियाना वेला वायाका मुन्ने बोने न्यायम कियमट, सामि वायानाल एदुर हुळाट. ओर हीकटते मक्किस मत्ता पोल्लेन वेल्गुने तरंतोर, मनसुने मत्तवुन पलाते अरहंतोर. अस्के पेन अंटोर्कुन मिमेट बेस कीतिट इंचि मेच्चुकुंता. 6 विस्वासुल्कुनिटा! नना मीवाहाटीं अप्पुलोसना आनि नावा उदाहरन हीसि वेहतन. बारित्ते “दर्मसास्त्रमते रासता पोल्लेंक हब्बेर होनमट” इंचि मंता. इदुन पोर्रोटाल मिमेट वरोन बेसतनमते, इंकावरोन विरोदमते पेद्दिरकेम कियमट. 7 बारित्ते नीकुन आनि इंकावरोन बोर अलग हूळंतुर? निहगा मत्तव अन्नि पेन हीतवे गदा, अय्ते इवन्नि नावांगे बोरे हिया हिल्लुर इत्ताप बारि पेद्दिरकेम कींतिन? 8 ओहो! मीक गावाले मत्तव अन्नि पूरा आतां, मिमेट अय्ते सिरमंत आसि होत्तिर, मोमोट हिलाकुना मिमेट राजुल्कु आतिट. गानि मिमेट निजमे राजुल्कु आसि मत्ते मोमोटगुडा मीवातोनि राज्येम किय्येम. 9 गानि बोर्क अय्ते हामुर सिक्साता आदेस हियमळ जर्गता, असंटोरालेसीं, प्रेरितुल्क आता मनाकुन पेन अंटोर्कुंकन्ना आकिरते इरता, इंचि नाकु अनपिच्चंता. बारित्ते, मनम पेनदा दूतानाहाटीं, दुनियाताहाटीं, मनकालोराहाटीं सिराप तमासा हुप्सानोर आसि मंतोम. 10 मोमोट किरिस्तुनाहाटीं मुर्कालोरम आंदुम, गानि मिमेट किरिस्तुना लोप्पो तेल्वितोर आंदिर. मोमोट बलम हिल्वोरम आंदुम, गानि मिमेट बलम मत्तोर आंदिर. मिमेट कदर मत्तोर आंदिर, गानि मोमोट कदर हिल्वोरम आंदुम. 11 इदवेरादाका मोमोट कर्वुने-दूपाते मंतोम, केर्रालय कपळिं हिल्लें, देब्बां तिंचेके मंतोम, लोन-दारा हिलाका मंतोम. 12 मावद मोमोटे कबळ कीसेक मंतोम. माकुन तेराहनोर्कुन, आसिर्वाद हींतोम. ओर माकुन तकलिप कींतुर, गानि मोमोट सहन कींतोम. 13 ओर मावा अपमानम कींतुर, मोमोट दयाते वळ्कंतोम. इदवेरदाकागुडा दुनियाता नदरते मोमोट कचरालेसीं, मैलालेसीं मंतोम. 14 नना मीक सिग्गु वायागोम इंचि इव पोल्लें रासेक हिल्लेन, गानि नावा पावरमगल्ला पिलाल्कुनसंटोर इंचि तेळियागोट्सि वेहासेक मंतन. 15 मिहगा किरिस्तुना बारेमते कराहनोर पदि वेय्कुना गुरुल्क मंदानुर, गानि मिहगा वेल्लेटुर बाबुर हिल्लुर. बारित्ते मुन्ने ननाने किरिस्तु येसुना बेसता कबुर तत्तन, अदुन मिमेट विस्वासम कीतिर इंचि ननाने मीवा बाबोनसंटोन आंदुन. 16 अदुनहाटीं मिमेट नावालेसीं ताकट इंचि विनंति कीसेक मंतन. 17 इदे पोल्ले वेहनाहाटीं नना पावरम कियानोर आनि सामिना लोप्पो नावा विस्वासमगल्ला मर्रिनसंटोर तिमोतिन मिहगा लोहतन. नना किरिस्तु येसुना बक्तिते बल्हा ताकसेक मंतानो, अल्हेने अन्नि जेगाना कलिसियाने नना कराहना बोदाता बारेमते ओर मीक मति कीसि हींतोर. 18 नना मिहगा वासेक हिल्लेन इंचि इच्चुर लोकुल्क पेद्दिरकेम कीसेक मंतुर. 19 गानि सामिना मनसु मनानय्ते नना बिराने मिहगा वांतन, अस्के पेद्दिरकेम कियानोरा पोल्लेन आयो गानि ओर्क बच्चोर ताकत मंतनो हूळंतन. 20 बारित्ते पेनदा राज्येम पोल्लेने आयो गानि दाना ताकतते मनंता. 21 मीक बतल गावाले? नना मिहगा कट्टे पीसि वाकाना, हिलाकोंटे पावरमते, मेत्ताटा आत्माते वाकाना? |
© 2022, Wycliffe Bible Translators, Inc. All rights reserved.
Wycliffe Bible Translators, Inc.