Tito 1 - Ese Ejja New Testament

Pablohua ebionei esohui Tito queabihui pojji acapoa

¹ Eya Pablo Eyacuiñajjijo chacochacopoquianitii Jesosa Quitoja huoojea ojjaña joya oja babaca poanicuana queaja'a sohuihuohuiquiya. Eyacuiñajjija babacacuana oja esohui e'ejojoneijo jjashahuabameesahuaquijji epojji eya nequimeecapoa ohuaya. Ma esohui e'ejojoneiya oja babacacuana queapamenee ba'emeesahuacapoquije cua Eyacuiñajjiya o jama pomeesa-acaniya.

² Eseya queabihui jjaishoaquipoquianitii Eyahuasijje eba'etiitii'yojjijo onijje oja esohui e'ejojoneijo jjashahuabaquipoquianijjejojoya. Eyacuiñajji caca oe siajje po-ajjanei. Yahuajonei meshi oja panajjimahuajo ohuaya huohuicapoa jamaya eseya ba'etiitiimeecaje'yo onijje Eyahuasijje.

³ Jjeya Eyacuiñajjiya ejo jama sapomajje queaja'anee bameecanaje oja esohui ecuea queahuisocuana huohuiquijji. Oya esohuiya Jesosajo huohuiquijjiya Eyacuiñajjiya eya nequimeecapoa ma chacojji yajjiya. Oya Eyacuiñajjiya eseya nahuecaje'yo.

⁴ Jiquio esohui eyaya tehueaña Tito, mique. Miya ecue bacuaejjanei jayojja poani oya esohui Jesosajoya ese jjashahuabaqui'yonajejojoya. Eseja Chii-ai Eyacuiñajjiya, Jesosa Quito ese nahue'yojji poaniya pea-ai miya queapamenee ca-acapoquiahuatii ojayanei ejjashahuabaquijjijo, miya queaquijijjijajinee capomeecahua pea-ai ohuaya.

Ae chacocajji Titoja Pablohua tehuecapoa

⁵ Eyaya miya Creta meshi nasijo ani jiñanaje ma esejaya chacojeyojjima poanaje miquea echacojeyo'yojji ma eya mi jama anajeya. Jamajjeya miyaya dejjacuana etii epojji bajjanije Jesosaja epeejjicuana ma meshicuanajo ejjachichaquipoquijaahuanapoquiajji epojji.

⁶ Jesosaja epeejjicuanajaahuanapoquiajji etii epojji queapamenee ba'ecapoquijji peaa esohui oya queamimishi poani eaca poanijje. Oya oja huanase oeneijotii ba'ecapoquijji, pea eponajo jjashahuabaquica-ajja. Oja bacuacuana Jesosaja epeejji popea-aicajji. Oja bacuacuana shajjama' jayojja poca-ajja oja chiija oja naeja esohuijo, queamimishi ba'eca-ajja pea-ai.

⁷ Jesosaja epeejjicuanajaahuanapoquiajji poani dejja etiiya jaahuanacani ma Eyacuiñajjiya queanahuenee bacani. Jamajjeya oya queapamenee ba'ecapoquijji ojjañacuananijje. Ojayanei ejjashahuabaquijji ojaya amajamajasa-aca-ajja. Oya quenequenecuajica-ajja. Oya huooca-ajja. Oya peanijje jjacuiaquica-ajja. Oya queabejjohuisotii epojjijo jjashahuabaquica-ajja pea-ai.

⁸ Ojaya peacuana queahuesha ba'e poeyajo queabihuiya jjequinobiacajjequijji oja equiyasijje. Oya ojjañacuananijje queapame pocapoquijji. Oya oja eyamijo jjajaahuanaquicapoquijji queamimishi epo poanijje. Oya queapame mimishiama nequicapoquijji peacuananijje. Oya ba'ecapoquijji Eyacuiñajjijo jjaquiaqui ojjaña pojjajo. Oya jjabaneiquicapoquijji ache ojaya queapame acajji, ache ojaya aca-ajja.

⁹ Ma eseyaya o huohuipoquianaje Eyacuiñajjija esohui ojaya maya queanahuetii bacapoquijji, esohui pea ojaya aca'yoajja. Majoya ohuaya oya esohuiya peacuana sohuihuohuipea-aicaje o queaca'a ba'epoquijji. Joya esohui shajja-ajjasapo-ajja poanicuana ohuaya queaja'a saja-acaje o queaquehua poani jjabaquijji.

¹⁰ Bacue, enequi queahuisocuana Eyacuiñajjija esohuijo jjashajja-ajjaquisapo-ajjanei poani. Macuanaya ca jamatii mimijeapoquiani, oja esohui ehuohui peajja, asahuasahua-ajja. Jamajjeya ma dejjacuaa queahuisocuana esohui huohuitaicani o dasiajji. Ojjaña judío etiiquianaja esohuicuana acapoquijjitii coma esohuihuohuijji poanicuaa huohuitaicani.

¹¹ Jamajjeya oe coma dejjacuanajo a'a oja ebatai esohuijo jjasohuihuohuimeetaiquijji. Jesosaja epeejjicuana oya equijo ba'e Eyacuiñajjija esohui cajaa ameesa-acani coma dejjacuaaya oja esohui ehuohuitaijo. Ma esohuijoya oya queabejjohuiso posapoani o shajja-ajjajji poajecuanaja bejjojo. Bejjo yajjijonei ca chacochacoca-ajja.

¹² Bacue, oe dejja queasapaja'anee pea sohuihuohuijji poani jama poanaje onijjejaajji Cretacuiñajjicuanajo ba'a: “Enijjejaajjicuana siajje poanitii, queamasenee nequipoquiani ebiocuiñajjicuana jayojja, jamatii oya jjacuiajeaquipoquiani chacochacoajja queahueyanee” jamaya oya poanaje.

¹³ Ohuaya esohui e'ejojonei acanaje macuiñajjicuana queamimishi ba'epoquianijo. Jamajjeya Jesosaja epeejjicuana ma meshijo ba'e janobajjima huohuineicue oja mimishijo o queaja'a ba'epoquijji Eyacuiñajjija esohui jayojja.

¹⁴ Majoya oya judío etiiquianaja esohuijo ejjashajja-ajjaquipoquijjitii pojjeama poaje'yo macuanaya. Joya judío etiiquianaja esohuihuohuijjitii poanicuaa Eyacuiñajjija esohui cajaa acani, onijje dejjaja esohuinei ohuaya huohuicapoquiani.

¹⁵ Bacue, joya queaja'a mimishiama jjashahuabaquipoquianicuana Eyacuiñajjija esohuijo ojjaña ojaya queapame poani eijjiajji. Joya esohuijo jjashahuabaqui'yoajjanei poanicuana ca bobi beca ijjiaca-ajjajo jjashahuabaquianitii. Chama'nei ojaya queapame eba'epoquijji. Ojjañatii oja sapadojjo ojaya ejjashahuabaquijjicuana pea-ai peajja, queajehue jayojjatii popoquiani.

¹⁶ Ma dejjacuanaya pa Eyacuiñajjija esohuijotii jjashahuabaquiani. Eyacuiñajjija poani poso jjabaquiani. Jamatii ojaya eba'ejjijo oya siajje poani, queamimishitii ba'epoquiani oma' jayojjatii. Eyacuiñajji ca oya jama ba'epoquiani sapo-ajjanei. Shajjama'nei jayojja poani ohuaya oya bacani. Jamajjeya macuanaya queapame jjapomeequiajja oja esohuijo.