Shomano 9 - Ese Ejja New Testament

Israelitacuana Eyacuiñajjija babaca poa

¹ Eyaya e'ejojonei esohui aña, siajje pojjeama, eya Quitoja epeejji poaniyajjejojoya. Ecuea ejjashahuabaquijji Edojjoshahuapameya queaja'a pomeecani, jamajjeya ecuea esohui siajje pojjeama eyaya aña.

² Enijjejaajji israelitacuanajo eya queayenoneetii poani macuanaya Quitoma'tii jayojja ba'epoquianijojoya.

³ Eya jjashahuabaquiani eyanei queaneeneetii nequipoqui'yome enijjejaajjicuana Eyacuiñajjija queaneeneetii pomee'yojjima eajjijo. Eya queaQuitohuesha ejjasejjaquitii nequipoqui'yomejje enijjejaajjicuana nahuejo. Jama saya eya poani jamatii Eyacuiñajji e jama pomeesapo-ajja.

⁴ Israelitacuana Eyacuiñajjija babaca poa. Ohuaya oja bacuacuana epojji jamaya acapoa. Eyacuiñajji jjabameequiapoa israelitacuanajo oya queaca'aneetii queasajajanee nequipoquiani oja ebajji. Ojaya ejjashahuabaquijjicuana ma quijje ohua oja babacacuana quiacaje Eyacuiñajjiya queaja'a bameecapoa. Ohuaya oja esohui etehue quiacoocapoa cuana ma ohua Moisés tehuemeecapoa esohuiya. Ohuaya israelitacuana huohuipea-aicapoa achajja bihuiame oya e'ejojonei acajji ojaya equi-aijo nequiya. Eyacuiñajjiya esohui queapame huohuipea-aicapoa ma quijje ohua ajeyocaje'yo esohuiya.

⁵ Israelitacuanaja etiiquiana, ma yahuajonei ba'yapoa dejjacuana Eyacuiñajjija babaca poa. Quito cuayapoa israelita dejja pea-ai epojji. Oya Eyacuiñajji pea-aiya poani eojjañaesemese. Jamajjeya ojjaña pojjajo oya cabihuiacapoquiahua ojjañacuaa. Jamaya capoquiahuatii cuaa.

⁶ Eyacuiñajjiya israelitacuana queapameneetii acapoquiani jamatii queahuisocuana jjashahuabaqui'yojjimatii ba'ecapoquiapoa ojo. Jamatii oma' jayojja ba'epoquiani ma ohua yahuajonei huohuicapoa esohuiya Eyacuiñajjiya pajeajjimatii acapoa quijje oya jayojja eajeyo'yojji. Bacue, ojjañanei israelitacuana Eyacuiñajjija babacanei pojjeama poani.

⁷ Ojjañatii Abrahamja osecuacuana Eyacuiñajjija bacua pea-ai pojjeama poani. Yahuajonei Eyacuiñajjiya jama acapoa ba'a: “Abraham, eyaya miquea osecuacuana Isaacjo queapamenee apoquiaje. Mahuisotiicuanaya miquea osecua epojji eyaya baje.”

⁸ Jiquio esohuijo eseyaya queaja'a baña ojjañatii Abrahamaja osecuacuana Eyacuiñajjija bacua pea-ai pojjeama poani. Bacue, Eyacuiñajjiya Abraham huohuicapoa oya ebacua quijje quiacaje. Ojjaña ma Eyacuiñajjija quiaja bacuacuana oja osecuacuana poani. Mahuisotiiya Abrahamja osecuanei poani Eyacuiñajjiya bacaje.

⁹ Yahuajonei Eyacuiñajjiya Abraham esohui jama huohuime acapoa ba'a: “Oe shequiaja pomajje aje mo poeje o'oya mi ba'yohua. Majoya Sara bacuaejjajji ani bahuaje'yo” jamaya acapoa.

¹⁰ Maya oja bacuaejja Isaac bajjani poa. Oya eseja etiiquianaja baba poa. Oya Rebeca bajjani eponajo jjahuanaquiapoa. Oja bacua becajaa cuayapoa dejjasho'i pea-ai.

^11-13 Oja bacuaejja becajaa cuayajjimahuajo, oja queapame ajjimahuajo, queamimishi pojjimahuajo pea-ai, Eyacuiñajjiya oja nae jama acapoa ba'a: “Jiquio mique ebionei cuayaje ebacua ca huoojeacapoquije joya quijje cuayajeya.” Pea esohui oya ebacuacuanajo Eyacuiñajji jama poa pea-ai ba'a: “Jacob ecuea queajeanee ecue babaca, Esaú ca cajaa anaje.” Jiquio esohuijo queaja'a bacajji achajja Eyacuiñajjiya babacacani cuana. Ojayanei ejjashahuabaquijjijo cua ohua babacasa-acaninei ohuaya babacacaje.

¹⁴ ¿Yajja esejaya acajji ohua jama babacacani cuana bamajje? ¿A'a Eyacuiñajjija ejjashahuabaquijjicuana queapame pojjeama? Chojja de, eseya jama jjashahuabaquica-ajja.

¹⁵ Bacue, Eyacuiñajjiya Moisés jama acapoa ba'a: “Cua dejja eyaya queapame asa-aña, comaya eyaya queapame aje ecueanei ejjashahuabaquijjijo. Cua eya queayeno ani baña o yenoama epomee'yojji, comaya eyaya queabihui pomeeje'yo ecueanei ejjashahuabaquijjijo.”

¹⁶ Jamajjeya eseyaya queaja'a baña cua dejja Eyacuiñajjiya queapame asa-acaje, comaya ohuaya jama acaje ojayanei ejjashahuabaquijjijo, dejjaa jama sacanijo pojjeama, dejja queaca'a poaniya Eyacuiñajji jama ameecanijo pojjeama. Eyacuiñajjiya queapamenee acani cuana oya jama posapomajjeya.

¹⁷ Oja esohuijo yahuajonei Eyacuiñajjiya Egipto emeshimese dejja jama huohuime acapoa ba'a: “Eyaya miya e-egiptomeshimese etii epojji nequimeenaje ojjañacuanaja eya queaca'aneetii poani ebajji. Eyaya miya queacamajanee pomeeje ojjañacuanaja eya e'ejojonei Eyacuiñajji nequiani queaja'a ebajji pea-ai” jamaya acapoa.

¹⁸ Jamajojoya aje eseyaya queaja'a baña cua dejjacuana Eyacuiñajjiya queapame asa-acaje comaya ohuaya jamaya acaje ojayanei ejjashahuabaquijjijo. Cua dejja ohua shajjama' jayojja pomeesa-acani ohuaya jama pea-aiya oya pomeecaje ojayanei ejjashahuabaquijjijo.

¹⁹ Becacuana pojja'a jama pome ba'a: “Eyacuiñajjiya dejja shajjama' jayojja jama pomeecanijojjemo, ¿a'a ohuaya dejja queaneenee pomee'yojjima acame oja mimishijo? Jamajojjemo ese queamimishi poajo Eyacuiñajjija queaneenee epomee'yojji pojjeama pome oja ejjashahuabaquijjijo eseya queamimishi poanijojoya” jamaya poso acachana cuaa.

²⁰ Esejaya jama aca-ajja. Eyacuiñajji niñebaca-ajja apiojji ohuaya jama acani cuana. Jiquio ecua meshimisiya o iñapejjajji epo dejja huohuica'yoajja jama ba'a: “¿Apiojji acuae eya miyaya jama iñapejjame anaje?” Jama pea-aiya esejaya Eyacuiñajji niñebaca-ajja.

²¹ Bacue, joya meshimisi iñapejjajji poani dejjaa cua ohua iñapejjasa-acani oja meshipasha iñapejjacaje. Ma meshipasha ohua becaneijji pea-ai meshimisi iñapejjasa-amajje ohuaya jamaya acaje. Oe ohuaya iñapejjacaje queapamenee ena nequijji, pea ca ohuaya acaje queapamepishana shabo iyajji esecuejo eanijji.

²² Jama pea-aiya Eyacuiñajjiya acani. Oya ojjañacuanajo jjabameequisapoa oya queaca'aneetii poani. Eyacuiñajji queaquenenee poani ma quijje queaneenee poaje'yo dejjacuana, eponacuana pea-ai queamimishi poaninijje. Jamatii ohuaya queaneenee pomeecuaji'yojjima acani so'o macuanaya.

²³ Eyacuiñajjiya ca eseya ojaya epeejji poani bacani ojaya queaneenee epomee'yojji pojjeama poaje. Jamajjeya Eyacuiñajji queaca'aneetii queasajajanee ojjañacuanaja ebajji ohuaya jamaya acapoa cuana. Yahuajoneinei ohuaya eseya babacacapoa ese queaca'anee queasajaja o jayojja eba'epoqui'yojjitii onijje.

²⁴ Eyacuiñajjiya eseya iyaacapoa ojaya'yo epojji. Ohuaya judionei oopana pojjeama iyacapoa ojaya epeejji epojji. Judío pojjeamacuana pea-ai Eyacuiñajjiya iyaapea-aicapoa.

²⁵ Yahuajonei esohuihuohuijji poa dejjaa Oseas bajjaniya tehuecapoa Eyacuiñajjiya peajaajjicuana pea-ai iyaacaje ojaya epopea-aijji. Jama huohuime acapoa Eyacuiñajjiya ba'a: “Peajaajjicuana joya ecuea epeejji pojjeamacuana eyaya huohuije ba'a: ‘Miquianaya pea-ai jjeya ecuea epeejji poaje.’ Jamajjeya ma onaja queajea ajjima'cuana eyaya jjeya huohuije ba'a: ‘Ecuea miquianaya pea-ai queajeanee poani’” jamaya poa Eyacuiñajji.

²⁶ Ma meshijotiiya Eyacuiñajjiya huohuicapoa cuana jama ba'a: Miquiana ecuea epeejji pojjeama poani. Majoya quijje majotiiya ohuaya huohuicaje macuanaya jama ba'a: “E'ejojonei Eyacuiñajji eshetiitii nequija bacua pea-aiya poani quiana.”

^27-28 Yahuajonei esohuihuohuijji poa Isaías bajjaniya jama acapoa israelitacuanajo ba'a: “Israelitacuana queahuisoneenee poani meshijajisiyosiyo huisoajjaya. Jamatii oepojji iyehuisocuana Eyacuiñajjiya nahuecaje'yo. Eyacuiñajjiya oja esohui jjeya ajeyocuajicaje'yo ma ohua huohuicapoa esohuiya. Jamajojoya aje ohuaya queaneenee pomeecaje'yo jiquio meshijo ba'eca dejjamimishicuana, eponacuana pea-ai.”

²⁹ Isaías jama pea-ai poa yahuajonei ba'a: “Peajaajjicuaa esenijjejaajji beshahuanei quecuajeyoca'yapoa. Eyacuiñajji queaca'aneeja esenijjejaajji oepojji ojaya nahuejjima poajojjemo chama'neinei esenijjejaajji po'yoquiae. Ma ecua Sodomacuiñajji, Gomorracuiñajjicuana chama'yo aca'yapoa jama pea-aiya eseya aca'yoquiae cuaa” jama tehuemeya acapoa Isaiasya.

³⁰ ¿Yajja esejaya acajji jiquio esohui shajja-ajjamajje? Bacue, jiquio esohui jama poanijje ba'a: Yahuajo judío pojjeamacuana jamatii ba'ecapoquiapoa jjashahuabaquijjima Eyacuiñajjija epeejji epojji. Jjeya ca Eyacuiñajjiya judío pojjeamacuana, ma oma' jayojja poanicuana oja mimishima'yo bacani oya Quitojo jjashahuabaqui'yanijojoya.

³¹ Eyacuiñajjija babaca israelitacuana ca oja esohui Moisesja tehuecuanajotii jjashahuabaquicapoquiapoa majo queapame'yo mimishima'yo epoaje poso. Jamatii macuana Eyacuiñajjiya oja mimishijjitii bacapoquiapoa.

³² ¿Yajjajo ohuaya jama bacapoquiapoa cuana? Bacue, israelitacuana Eyacuiñajjija esohuijo jjashahuabaqui'yosapo-ajjatii poa mimishima'yo o Eyacuiñajjija ebajjijo. Ojjañatii Moisesja tehuecuana jayojja ba'epoquiajoya Eyacuiñajjiya oja mimishima'yo bacani poso jjabaquicapoquiapoa cuana. Jamajjeya enijjejaajjicuana jiquio ecua dejja mei queaquemopishanajo jjaquecuate'aquiani jama pea-aiya poa cuana. Jesosa bataicapoa enijjejaajjicuaa.

³³ Eyacuiñajjija esohui jama poani Jesosajo oya jiquio ecua mei queaquemopishana ona jjaquecuate'aquijji jama pea-aiya poani. Jama tehueme acapoa ba'a: “Bacue, Sión meshijo eyaya majoya mei iyaje ona jjaquecuate'aquijji. Ma meijoya jjaquecuate'aquimajje jaabichaquije cuana joya Jesosajo jjashahuabaqui'yojjima ba'ecacuanaya. Ojjaña joya ojo jjashahuabaqui'yanicuana ca bichoama poani.”