Shomano 8 - Ese Ejja New Testament

Eyacuiñajjija Edojjoshahuapameya eseya queaja'a ba'emeesahuacapoquiani

¹ Jamajjeya jjeya ojjaña joya Jesosa Quitoja po'yanicuana Cuaqui-aiyasijje epoqui'yojji pojjeamatii poaje.

² Edojjoshahuapameya queaca'aneeyajjejojoya eya e'ejojonei ba'emeesahuacapoquiani eya Jesosa Quitoja po'yanijojoya. Jamajjeya ohuaya eya ecuea mimishijo queaca'a pomeecanaje mimishi e-emesetii epopoqui poanijje, eya ecuea mimishijo emano'yo poanijje pea-ai.

³ Eyacuiñajjija esohui Moisesja tehueya ese mimishima'yo epojji pomeejjima acapoa eseyanei ca'a-ama poanijojoya oja tehuecuana jayojja jama eba'epoquijjitii. Jamajjeya Eyacuiñajjiya eseya mimishima'yo acanaje. Oja Bacuaejja oenei huoojeacapoa jiquio ecua dejja poani jama yamijji. Oya mimishima'neitii poa. Majoya oya jjaiñameequiapoa emano'yojji eseja mimishicuana cuijea'yojji. Jamaya Jesosaa acapoa mimishi eseja yamineijo nequi e-esemesetii epopoqui poanijje.

⁴ Eyacuiñajjiya oya jamaya ameecapoa eseya queapamenee eba'epoquijji'yo Moisesja tehuecuana jayojja oja nahue'yo epo ba'e. Jamajjeya ojjaña joya Edojjoshahuapameja ejjashahuabaquijji ajji poanicuana queapamenee ba'epoquije'yo. Ojayanei ejjashahuabaquijji queamimishi epojji jayojja ca eba'epoquijjitii pojjeama poaje'yo.

⁵ Ojjaña joya ojayanei ejjashahuabaquijjijo ba'epoquisatiipoanicuana queamimishitii ba'epoquije. Mahuisojotiiya queamimishi epojji ba'epoquije. Ojjaña joya Edojjoshahuapameja ejjashahuabaquijji ajji poanicuana caca ojaya ejjashahuabaquijji jayojja ba'epoquije'yo queaja'a.

⁶ Jamajjeya ojjaña joya ojayanei ejjashahuabaquijjijo queamimishitii posapojjicuana ejjasejjaqui'yotii nequije'yo Eyacuiñajjijo emano'yo jayojja. Ojjaña joya Edojjoshahuapameja ejjashahuabaquijji ajji poanicuana caca oe queaquijijjijajinee ba'epoquije. Eyacuiñajjiya oya ba'etiitiimeecaje'yo onijje.

⁷ Jamajjeya ojjaña joya ojayanei ejjashahuabaquijjijo queamimishi ba'epoquianicuana Eyacuiñajji sapo-ajjanei poani, Eyacuiñajjija esohui Moisesja tehuecuana basapo-ajja pea-ai poani. Oja esohui etehuejo oyatii jjashajja-ajjameequiajja oya queamimishica'a poanijjejojoya.

⁸ Jamajjeya ojjaña joya ojayanei ejjashahuabaquijjijo queamimishi ba'epoquianicuana Eyacuiñajji queabihui pomeeajja poani.

⁹ Miquianaya ca jjeya miquianajanei ejjashahuabaquijjijo ba'esapoqui'yoajja poani. Edojjoshahuapameja ejjashahuabaquijji ajji poani ca quiana ca jjeya e'ejojonei miquiana Edojjoshahuapame yamijji poanijjejojoya. Jamajjeya ojjaña joya Dojjoshahuapame yamima'tii ba'ecacuana Quitoja pojjeamatii poani.

¹⁰ Jjeya Quito miquianajaya eyamidojjojo nequi'yo. Jamajjeya oja Edojjoshahuapameya miquiana ba'etiitiimeecapoqui'yani jamatii miquianajaya eyaminei manopoquije'yo mimishijo. Jamaya quiana ba'epoquije'yotii Quitohua miquiana mimishima'yo pomeeca'yonajejjejojoya.

¹¹ Eyacuiñajjija Edojjoshahuapameya Jesosa emano'yo jaa shequimeeca'yapoa. Jama pea-aiya ohuaya miquianaya shequimeecaje'yo Edojjoshahuapame yamijji po'yonajejojoya. Jamajjeya Edojjoshahuapameya eseja eyamijo nequiya eseya mano'yajo shequimeecaje'yo.

¹² Ecue dohuecuana jjo'icuana, jjeya eseya queapame queaja'a ba'ecapoquijji, Edojjoshahuapameja ejjashahuabaquijji acapoquijjitii seja. Jamajjeya se esejayanei ejjashahuabaquijjijo queamimishitii ba'ecapoqui'yoajja.

¹³ Bacue, miquianajayanei ejjashahuabaquijjijo queamimishi ba'epoquimajje quiana manoje'yo. Miquianaya Edojjoshahuapameja ejjashahuabaquijji ajji poajo ca ohuaya miquianajayanei ejjashahuabaquijji queamimishi epojji esapadojjojo nequi pajeameesahuacaje. Majoya Eyacuiñajjiya quiana queapame ba'etiitiimeecaje'yo.

¹⁴ Jamajjeya ojjaña joya Edojjoshahuapameja ejjashahuabaquijji ajji poanicuana Eyacuiñajjija bacua e'ejojonei poani.

¹⁵ Eyacuiñajjija quia Edojjoshahuapameya jiquio eseja eyamidojjojo nequiya eseya queametenee eba'emeeo'oyajji pojjeama aca'yani. Bacue, ohuaya Edojjoshahuapameya eseya Eyacuiñajjija bacua epojji pomeeca'yonaje. Oya eseja yamidojjojo nequijojoya eseya jama mimime poani Eyacuiñajjinijje ba'a: “Eyacuiñajji, miya ecue Chiinei poani, Eyacuiñajjinei” jama mimimeya eseya e'ejojonei poani.

¹⁶ Eyacuiñajjija Edojjoshahuapame esejayanei edojjoshahuanijje mimiani ojee oya esohuiya eseya Eyacuiñajjija bacua e'ejojonei poanijojoya.

¹⁷ Jjeya eseya Eyacuiñajjija bacuacuana poani. Jamajjeya ma ohua queapamenee apoa acapoa Quito quiajji, eseya pea-ai jama quiame apea-aicaje quijje ese queabihui ba'epoqui'yojji Eyajo. Eseya ca jjeya queaneenee acaje cuaa jiquio meshijo ba'e oja esohuijo ma ecua Quito queaneenee acapoa cuaa jama pea-aiya. Majoya jama pomajje eseya queabihuinee ba'etiitiipoquije'yo onijje Eyajo quijje ojjañajaajjicuaa oya bihuiacajo.

Eseya queaca'anee nequimeecaje'yo quijje

¹⁸ Eseya jjeya jiquio meshijo ba'e queacamajanee poani so'o. Jamatii eseya queayenotii pojjeama ba'epoquiani esejaya ebajojoya ma quijje epojja oe-ejjenei apoa poajo Eyacuiñajjiya eseya queapamenee ba'etiitiimeecapoquije'yo jiquio ecua se jjeya ba'e jama pojjeama.

¹⁹ Ojjaña Eyacuiñajjija panacuana pea-ai jjaishoaquipoquianitii acheshono shai Eyacuiñajjiya bameecaje ache e'ejojonei oja bacuacuana poani ojjañaja queaja'a ebajji.

²⁰ Ebionei ojjaña oja panacuana queapamenee pocoocapoa. Majoya dejja queamimishi pocooajo Eyacuiñajjiya ojjañatiicuana queanee epopoquijji, queacamajanee pea-ai pomeecapoa oja mimishijo. Majoya ojjaña oja panacuana queatai, pameama ani bamajje Eyacuiñajji queabihui jjaishoaquipoquiapoa quijje ojjaña oja panacuana queapame epomee'yojjijo.

²¹ E'e, jjeya ojjaña oja panacuana manopoqui'yani, ihuipoqui'yani pea-ai. Majoya quijje ohuaya ojjaña eseya oja bacuacuana queapamenee acaje'yo, emanopoqui'yojjitii pojjeama se poaje'yo. Jama pea-aiya quijje oja panacuana apea-aicaje'yo Eyacuiñajjiya.

²² Esejaya eba yahuajonei, jjeyanei cuanaya ojjaña Eyacuiñajjija panacuana queaneetii poequi, manopoqui'yanitii. Jiquio ecua epona bacuaneemajje queaneenee poani jama pea-aiya oja panacuana popoquianitii.

²³ Oja pananei aquiana oopana pojjeama queaneetii popoquiani. Eseya pea-aiya Eyacuiñajjija Edojjoshahuapame yamijji poani queaneetii pea-ai popoquiani eseja eyamijo. Jamajjeya se jjaishoaquipoquianitii acheshono, ache pojjajo shai ohuaya eseya pea eyami eyacua quiacaje'yo. Eyacuiñajjiya oja Edojjoshahuapame eseja eyamidojjojo enequi'yojji quiacoocanaje. Majoya ohuaya quijje ojjaña quiacaje ese queabihuitii ba'epoqui'yojji.

²⁴ Eseya joya oja nahue'yo poanicuana queabihui jjaishoaquianitii acheshono ohuaya oja esohui ma ohua huohuicapoaya ajeyocaje'yo eseja eyami pea eyacua equia'yojjijo. Cua ese jjaishoaquiani apoa acanaje bamajje, ¿ajeo jjaishoaquicajjitii? Ajeopishana.

²⁵ Jjeya ca eseya jjaishoaquipoquianitii acheshono Eyacuiñajjiya oja esohuicuana ajeyocaje'yojo. Ma quijje ohua ese quiacaje esejaya jjeshejeyojjima so'o. Jamajjeya eseya jjaishoaquipoquianitii yenoama majoya.

²⁶ Eseyanei se ca ca'a-ama poani, jamajjeya Edojjoshahuapameya eseya asahuacapoquianitii. Esejaya bajjimanei ajeo Eyacuiñajjinijje emimijji. Edojjoshahuapame ca queaja'a mimipoquianitii onijje esejo. Eyacuiñajjija ejjashahuabaquijjijo oya mimipoquianitii onijje esejo. Jamatii esejaya queaja'a eshajja-ajjajji pojjeama poaje oya pea esohuijo onijje mimianijojoya.

²⁷ Eyacuiñajjiya bacanitii achajja jjashahuabaquime eseya poani eseja esapadojjojo. Ojaya eba pea-ai yajja mimime poaje Edojjoshahuapame esejo. Cua Eyacuiñajjiya ese ameesa-acanijo jamaya Edojjoshahuapame mimipoquiani onijje ese ojaya'yo poanicuanajo.

Chama'neinei ese Eyacuiñajjijo ejjasejjameequi'yojji epojji

²⁸ Esejaya ebanei ojjaña cua ese queabihui ba'epoquijjijo, cua ese queacamajanee pojjijo pea-ai Eyacuiñajjiya jamaya ameecani ese queaca'a ba'epoquijji. Jamaya ohuaya eseya ameecani ojjaña joya o queajea ajji poanicuana ma ohua babacacapoacuanaya ojayanei ejjashahuabaquijjijo.

²⁹ Yahuajoneinei Eyacuiñajjija ebatii poa ache huiso ojaya'yo oja nahue'yo epojji poaje. Oya yahuajoneitii jjashahuabaquianiapoa mahuisotiicuanajo oja Bacuaejja Jesosa jayojja pea-ai epomee'yojjijo. Oya ca Jesosa eseja ebionei edohuemese poani Eyacuiñajjijo. Oja chahuacuana, oja jjo'icuana pea-ai queahuisonee popoquiani.

³⁰ Jamajjeya Eyacuiñajji yahuajoneitii jjashahuabaquianiapoa ache oja bacua epojjijo. Mahuisotiiya ohuaya iyaacapoquiani. Mahuisotiicuanaya ohuaya mimishima'yo bacani. Majoya Eyacuiñajjiya ojjaña oja bacuacuana queabihuinee eba'etiitiipoqui'yojji acaje oja Bacuaejjanijje ojjañacuaa o bihuiacajo.

³¹ Eyacuiñajjiya eseya queapameneetii acapoquiani jjashahuabaquimajje, ¿ajeo queayenotii pocajji? ¿A'a dejjacuaa eseya ojaya epeejji popajeameecaje'yo? ¡Chojja de! Eyacuiñajji esenijje nequianitii, jamajjeya chama'nei pea ese oja epeejji popajeamee'yojji epojji.

³² Eyacuiñajjiya oja Bacuaejja oenei nahuejjima acapoa. Oya manomeeca'yapoa eseja mimishijo. Jamajjeya oja Bacuaejja jama ameeca'yapoa esejo jjabaquimajje, esejaya queaja'a bacajji Eyacuiñajjiya ojjaña ese queapame ba'epoquijji quiacapoquije pea-ai ojayanei ejjashahuabaquijjijo. Nahuejjimanei se quiame acaje.

³³ ¿Ache dejjaa shai huohuicaje'yo Eyacuiñajjija epeejjicuana oja babaca oja mimishijjitii nequi? Acheyapishana. Eyacuiñajjiya ojjaña oja epeejjicuana bacani oja mimishima'yotii poani.

³⁴ ¿Ache dejjaa shai eseya queanee pomeecaje'yo eseja mimishijo? Acheyapishana. Bacue, Jesosa Quito eseja mimishijo mano'yapoa. Mahuisotii pojjeama, oya shequi'yapoa pea-ai. Jjeya oya mimipoquianitii esejo Eyacuiñajjinijje oja ebañeimijijje ani'yo.

³⁵ Jamajjeya, ¿ache dejjaa shai Quitohua eseya queajea apajeameecaje'yo? ¿Ache dejjaa shai eseya quea-ohueshanee nequimeecaje'yo? Acheyapishana. ¿A'a eseya queaneenee poajo queajea apajeacaje'yo? ¿A'a se queacamajanee poajo, a'a queashoenee poajo, a'a se aema' daquima'nei poajo, a'a se quea-ajjajja poajo, a'a ese mano'yajo Quitohua eseya queajea apajeacaje'yo? Chojja, chama'neinei pea o ese queajea ameepajea'yojji epojji.

³⁶ Eyacuiñajjija esohui etehue jaa jama poani ba'a: “Ojjaña pojjajo ecuana quecua'yosa-acani cuaa mijo mi shajja-ajjajji poani bamajje. Jiquio ecua ovejacuana chichacani enaa jehui'yojji jama pea-aiya ecuana bacani cuaa equecuajea'yojji.” Jama tehuemeya esohuihuohuijjiya acapoa yahuajonei.

³⁷ Jamaya eseya ba'epoquijetii queacamajanee jamatii chama'nei pea ese oja epeejji epopajeamee'yojji epojji. Jiquio ese queajeaneetii apoquiajji poaniya eseya queaca'a ba'emeesahuacapoquianitii.

³⁸ Jamajjeya ecuea ebanei chama'neinei pea o ese queajeanee eapajeamee'yojji epojji. Ese mano'yajo, eseya eshetii nequi pea-ai Eyacuiñajjiya eseya queajeanee acapoquianitii. Angelcuanaja, eshahuacuanaja pea-ai Quito eseya queajea eapajeamee'yojji pojjeama. Cua eseya acani cuaa jjeya, ma quijje acaje pea-ai eseya queajea eapajeamee'yojji pojjeamatii poaje.

³⁹ Ojjaña Eyajo queaca'a nequicacuana, jiquio meshijo anicacuana pea-ai chama'neinei epana o ese queajea eapajeamee'yojji epojji. Esejaya Emeshimesenei Jesosa Quitojo eseya queajeanee acapoquianitii Eyacuiñajjiya.