Shomano 2 - Ese Ejja New Testament

Eyacuiñajjiya e'ejojonei ma ecua ojjañacuana ba'ecapoquinaje jamaya oja mimishi huohuicaje'yo

¹ Ecuea epeejjicuana miquianaya judiocuana, judío pojjeamacuana pea-ai jjashahuabaquiani pojja'a peacuanaja mimishi ehuohuijjijo. Jama quiana poani ba'a: “Eyacuiñajjiya oya queanee capomeecahua oja mimishijo.” Ojo jama pomajje miquianaya queaneenee pea-aiya poaje queamimishi pea-ai poanijjejojoya. Eyacuiñajjiya miquianaya queamimishi pea-ai poani bacaje jiquio ecua onaaya acani jama pea-aiya miquiaaya añajojoya.

² Ojjañaja esejaya eba Eyacuiñajjiya ojjaña joya jamaya queamimishitii ba'epoquianicuana oja mimishi huohuicaje'yo o queaneenee pomee'yojji. E'ejojonei ohuaya oja mimishi huohuicaje'yo cuana, ebatai-ajjajji pojjeamanei poaje.

³ E'e, ecuea epeejji miyaya peacuanaja mimishi huohuiañajo a'a Eyacuiñajjija miquea mimishi epajeacaje'yo poso ajji. A'a Eyacuiñajjiya miya queaneenee pomeecuaji'yojjima eacaje'yo poso jjabaquijji. Mi o jayojja pea-ai poanijojoya queaneenee pomeepea-aicaje'yo.

⁴ Bacue, Eyacuiñajjiya miya queaneenee pomeecuaji'yojjima acani mique mimishijo. Jamajjeya ohuaya miya queapameneetii acapoquiani jjabaquimajje queaquehua jjashahuabaquiani ojo. Ojaya miya queaneenee epomee'yojji pojjeama poso jjabaquiani miquea mimishijo. ¿A'a miquea bajjima Eyacuiñajjiya miya queaneenee pomeecuaji'yojjima acani? Bajjima pojja'a. Jamajjeya majoya ohuaya miya ishoacapoquiani pea jjashahuabaquime epo'yojji miquea mimishijo.

⁵ Jamatiiya caca oe miya queamimishica'anee poani pea jjashahuabaquime po'yoajja Eyacuiñajjijo. Jamajjeya miquea mimishi queahuisonee popoquiani aquiana eiyachicha queahuiso jama. Majoya ojjaña meshijo ba'eca dejjamimishicuana eponacuana queaneenee pomee'yojji epojja poeajo, miya queaneenee poaje'yotii miquea mimishicuana queahuisonee popoquinajejojoya. Ma pojjajotiiya Eyacuiñajjiya queaqueneneeya ojjaña joya oma' jayojja ba'epoquinajeja mimishicuana e'ejojonei huohuicaje'yo o queaneeneetii ponequi'yojji.

⁶ Eyacuiñajjiya quiacaje cua ojjañacuaa eshe ba'yahua acapoquinaje sosejje jiquio meshijo ba'yahua.

⁷ Ojjaña joya queaja'a ba'epoquiani cuana Eyacuiñajji queaca'aneetii queasajajanee ani meshi Eyahuasijje ba'etiitii'yosapoani. Ma Eyacuiñajjiya queapamenee quiacaje quijje jjeshe'yosa-acani macuaaya. Jamajjeya ojjaña joya jama jjashahuabaquime poanicuana Eyacuiñajjiya majotiiya ba'etiitiimeecaje'yo onijjetii.

⁸ Peacuana caca jama jjashahuabaquime pea-ai po'yoajjanei. Ojayanei ejjashahuabaquijjitii acapoquiani. Eyacuiñajjija esohui e'ejojonei cajaa acani cuaa queamimishitii eba'epoquijji. Jamajjeya ojjaña joya jama queamimishitii ba'epoquianicuana Eyacuiñajjiya queaneeneetii pomeecaje'yo quijje queaqueneneeya.

⁹ Eyacuiñajjiya ojjaña joya queamimishitii ba'epoquianicuana queayenoneetii queaneeneetii pea-ai pomeecaje'yo. Judiocuana, judío pojjeamacuana pea-ai ohuaya queaneeneetii pomeecaje'yo oja mimishijo.

¹⁰ Eyacuiñajjiya ojjaña joya queapame ba'epoquinajecuana ca queaca'aneetii queasajaja acaniyasijje ba'etiitiimeecaje'yo Eyahuasijje. Eyacuiñajjiya queaquijijjijajinee pomeecaje'yo macuanaya. Eyacuiñajjija esohui queapame mimipea-aije ojo ojjañacuanaja ebajji. Judiocuana, judío pojjeamacuana pea-ai Eyacuiñajjiya queapamenee jamaya acapoquije'yotii.

¹¹ Eyacuiñajjiya ojjaña meshijo ba'ecacuana oya jayojja pea-ai bacani. Jamajjeya ojjaña joya oma' jayojja poanajeja mimishicuana ohuaya huohuicaje'yo, che oema'ja Eyacuiñajjija huohui'yojjima eajji pojjeama.

Eyacuiñajjija esohui Moisesja tehuecuana

¹² Bacue, judío pojjeamacuana Eyacuiñajjija esohui Moisesja tehuecuana bapojjima'tii ba'epoquiani. Jamatii macuana queamimishi pomajje queaneenee pocaje'yo quijje mano'yomajje jamatii oja tehue bapojjima'tii ba'e. Oya jayojja pea-aiya judiocuana Eyacuiñajjija esohuijji Moisesja tehuecuana ba epo queamimishi pomajje queaneenee pea-aiya pocaje'yo. Oja esohui etehueya oya queamimishi poani huohuicani.

¹³ Bacue, Eyacuiñajjiya bacani cuana oja mimishima'yo pojjeama joya oja esohui Moisesja tehuecuana shajja-ajjajji epojo pojjeama. Joya ojjañatii oja esohui Moisesja tehuecuana jayojja ba'etiipoquijji poanicuana caca oe ohuaya oya bacame queapame mimishima'neitii.

¹⁴ Bacue, iyehuiso judío pojjeamacuana Moisesja tehuema' ba'e oja esohui etehue jayojja ba'epoquiani oja sapadojjojo oja esohui etehue ejaatiijojo. Jamajjeya ojaya eba ache queapame acajji, ache queapame pojjeama aca-ajja jamatii oja esohui etehue bapojjima'tii ba'e.

¹⁵ Jamaya iyehuiso judío pojjeamacuana ba'epoquiani Eyacuiñajjija esohui etehue ba epo jayojja oja esohui etehue oja sapadojjojo ejaatiijojoya. Jamajjeya oya jamatii oja esohui etehue bapojjima' ba'e oja sapadojjojoneitii queaja'a jjabaquiani oya queapame poani, oya queamimishi poani pea-ai jjabaquiani.

¹⁶ Eyacuiñajjija esohui queapamenee jiquio eya huohuiañaya jamaya poani. Ojjaña meshijo ba'ecacuana ja'anei huohui'yojji epojja poeajo, Jesosa Quitohua ojjañacuanaja ejjashahuabaquijji joya esapadojjojo ehuanaquehua jaa pea-ai bajeyocaje a'a queapame a'a queamimishi ehuohui'yojji. Jama epojjiya Eyacuiñajjiya oya huoojeacaje.

¹⁷ Miquianaya jjabaquipoquiani queapamenee poani poso judiocuana poanijjejojoya. Moisesya Eyacuiñajjija esohui miquiana quiacapoajo jjabaquimajje Eyacuiñajjijanei poani poso majoya.

¹⁸ Miquianaya jama poani ba'a: “Eyacuiñajjija ejjashahuabaquijji ecuanajaya eba cua ohua ecuana ameesa-acani huisotii. Jamajjeya ache ecuanajaya queapame acajji, ache ecuanajaya eajji pojjeama eba Eyacuiñajjija esohui Moisesya yahuajonei ecuana quiacapoajojoya” jamaya poani quiana.

¹⁹ Miquianaya jjabaquiani joya cojjama' jayojja poanicuana sohuihuohuijji epojji comacuana Eyacuiñajjija esohuima' ba'ejojoya. Joya quea-aapo jayojja ba'epoquianicuana jeaja'apoquiajji epojji miquianaya jjabaquiani pea-ai.

²⁰ Eyacuiñajjija esohui Moisesja tehuecuana miquianajaya ebanei e'ejojonei poani. Jamajjeya quiana esohui bapojjima'cuanahuohuijji epojji, sapadojjoma' jayojjacuana joya ecua esho'iquiana poani jama huohuijji epojji pea-ai jjabaquiani.

²¹ Jamaya miquianaya peacuana Moisesja tehuecuana sohuihuohuimajamajajji posapoani jamatiiya miquianaya coma esohui jayojja ba'eajja. Miquiaaya huohuiaña cuana ba'a: ¡a'a siipojji! Jamajjeya, ¿yajjajje quiana siipoani?

²² Miquiaaya jama huohuime aña pea-ai ba'a: ¡a'a peacojjojji pojji! Jamajjeya, ¿yajjajje quiana peacojjojji poani? Miquianajaya pa eyacuiñajjinisho dejjaja ne botiamanei. Jamajjeya, ¿apiojji shai miquianaya nobiquiani eyacuiñajjinisho anijji equiyasijje oja aquiana ene siiya?

²³ Miquianaya queabihuinee jjabaquiani Eyacuiñajjija esohui Moisesja tehuecuana papenijji ba'ejjejojo. Majoya miquianaya oja esohui jayojja ba'eajja poani bamajje Eyacuiñajji queapame pojjeama poso acani queahuisocuaa.

²⁴ Eyacuiñajjija esohui etehue jama poani miquianajo ba'a: “Judío pojjeamacuaa Eyacuiñajji peajja poso acani miquianaya judiocuana queamimishitii ba'epoquiani bamajje.”

²⁵ ¿A'a Eyacuiñajjiya judío dejjacuana joya ecuiishashajehuisejja nequi bacani queapame nequi? E'e, oya queapame nequi bacame oya ojjañatii Eyacuiñajjija esohui Moisesja tehuecuana jayojja ba'epoquianijjemo. Ojjaña oja esohui etehue jayojja miba'epoquiajo Eyacuiñajjija oya queapame nequiani ebajji pojjeama poaje jamatii ecuiishashajehuisejja nequi.

²⁶ Judío pojjeamacuana jjacuiishashajehuisejjameequijjima nequica. Comacuanaya ojjañatii Eyacuiñajjija esohui Moisesja tehuecuanajo jjashajja-ajjaneiquipoquiajo Eyacuiñajjiya oya ecuiishashajehuisejja jayojja queapame nequi bacaje.

²⁷ Miquianaya judío dejjacuana ca ecuiishashajehuisejjajeyo poani, Moisesja tehuecuana Eyacuiñajjija esohuijji poani pea-ai jamatii ojaya esohui etehuecuanajo jjashajja-ajjaquiajjanei poani quiana. Judío pojjeamacuana jamatii jjacuiishashajehuisejjaquijjima nequica Eyacuiñajjija esohui Moisesja tehuecuanajo jjashajja-ajjaneiquipoquiajo miquianaya judioneicuana queamimishi poani Eyacuiñajjiya huohuicaje'yo quijje.

²⁸ Jamajjeya Eyacuiñajjiya bacanicuana oja eyamiquipajje e'ejojonei oja bacua poani judionei jayojja epojji, ecuiishashajehuisejjajo pojjeama. Judioja bacuanei cuayanijo pojjeama pea-ai ohuaya bacani cuana oja bacua epojji, judionei jayojja epojji pea-ai. Miquianaya e'ejojonei judionei poani eyami oeneijotii pojjeama.

²⁹ Bacue, oja bacua e'ejojonei poanicuana joya Eyacuiñajjijo jjashahuabaqui'yanicuana oja eyamiquipajjetii, oja equijijjijo pea-ai. Oja bacua e'ejojonei poanicuana ca jjashahuabamajamajatiiquiajja oja eyami oeneijo ejjacuiishashajehuisejjaquijji. Eyacuiñajjija Edojjoshahuapameya esohui oja sapadojjojotii nequimeecapoquiani. Jamajjeya oya pea onijje dejjajo jjabihuiameequisapo-ajja poani oja o queajea eajjijo. Eyacuiñajjiya oya queapame ba'e bacani majotiiya oya jjabaquije, oja eyamineijo pojjeama.