Shomano 16 - Ese Ejja New Testament

Pablohua Roma meshijo ba'ecacuana esohui o queabihui pojji tehuecanaje

¹ Eseja jjo'i Jesosajo Febe bajjani queapame chacochacopoquianijo eya mimisapoani miquiananijje. Oya Cencrea meshijo ba'e Jesosaja epeejjicuana ba'emeesahuajji poani.

² Jamajjeya oya queapamenee ajjequicue quiaa Jesosaja bajjanijo. Jiquio ecua quiaa pea Jesosa epeejjicuana queapame aña jama pea-aiya oya acue. Cua oja chama' poaje aquianacuana quiacue o ba'emeesahuajji. Ohuaya peacuana queahuiso ba'emeesahuacanaje, eya cuanaya asahuacanaje.

³ Eseja jjo'i Jesosajo Prisca bajjani, eseja dohue Aquila bajjani pea-ai esohui o queabihui pojji acue ejo. Oya Jesosa Quitojo chacochacopoquiani pea-ai enijje.

⁴ Yahuajopishana oya beshahuanei quecuaca'yonaje cuaa e nahuejo. Jamajjeya eyaya oya queabihuiya shahuabapoquiañatii. Oya gracias acue. Eyanei pojjeama jama acue, ojjaña Jesosaja epeejji judío pojjeamacuana esohuijo jjachichaquipoquiani pea-ai, gracias oya acue.

⁵ Ojjaña Jesosaja epeejji ma Priscaja Aquilaja equijotii jjachichaquipoquianicuana esohui o queabihui pojji acue. Ecuea epeejjinei Epéneto bajjani pea-ai esohui o queabihui pojji acue. Oya ebionei Jesosaja epeejji pocooapoa Asia meshijo nequi.

⁶ María pea-ai esohui o queabihui pojji acue. Oya queahuiso chacochacopoquinaje miquianajo.

⁷ Enijjejaajji dejjacuana Andrónico, Junias pea-ai esohui o queabihui pojji acue. Oya ejjajeanobiaquijji equijo enijje jaapea-ainaje ejeanobia. Queahuisocuanaja ebanei oya Eyacuiñajjija esohui e'ejojonei huohuipoquiajji poani oja babaca. Oya ebionei Jesosaja epeejji poa e oja epeejji pojjimahua nequijo.

⁸ Pea ecuea epeejjinei Ampliato bajjani esohui o queabihui pojji apea-aicue.

⁹ Urbano bajjani pea-ai esohui o queabihui pojji acue. Oya Jesosa Quitojo chacochacopoquiani enijje pea-ai. Estaquis bajjani pea-ai esohui o queabihui pojji acue.

¹⁰ Pea ca Apeles bajjani esohui o queabihui pojji apea-aicue. Oya jamatii queacamajanee peacuaa acajji queaja'aneetii nequipoquiani Quitojo. Aristobuloja huapa pojjeamacuana pea-ai esohui o queabihui pojji acue.

¹¹ Enijjejaajji Herodión bajjani esohui o queabihui pojji apea-aicue. Narcisoja huapa pojjeama joya Emeshimeseneijo jjashahuabaqui'yanicuana esohui o queabihui pojji apea-aicue.

¹² Esohui o queabihui pojji apea-aicue eseja jjo'i Trifena bajjani, pea eseja jjo'i Trifosa bajjani pea-ai. Emeshimeseneija echacojji queapame apea-aicani. Eseja jjo'i ecuea epeejji Pérsida bajjani esohui o queabihui pojji apea-aicue. Ohuaya Emeshimeseneija echacojji amajamajacapoquiani hueya-amaneiya.

¹³ Rufo bajjani pea-ai esohui o queabihui pojji acue. Emeshimeseneija babaca poani oya. Oja nae pea-ai esohui o queabihui pojji acue. Oya ecue naenei jayojja pea-ai poanaje.

¹⁴ Esohui o queabihui pojji apea-aicue macuana ba'a: Asíncrito bajjani, Flegonte bajjani, Hermes bajjani, Patrobas bajjani, Hermas bajjani pea-ai. Ma pea Jesosaja epeejjicuana onijje ani pea-ai esohui o queabihui pojji acue.

¹⁵ Filólogo bajjani, Julia bajjani, Nereo bajjani, oja jjo'i pea-ai esohui o queabihui pojji acue. Olimpas bajjani, ojjaña Jesosaja epeejji joya oya jayojja pea-ai jjashahuabaqui'yome poani pea-ai esohui o queabihui pojji acue.

¹⁶ Jamajjeya ojjaña miquiananijje jjachichaquipoquiani Jesosaja epeejjicuana esohui o queabihui pojji acue. Shemo tojjocue queabihuiya. Ojjaña Jesosaja epeejji pea meshijo ba'eca jjachichaquipoquianicuaa esohui miquiana queabihui pojji huoojeacani.

Pablohua Jesosaja epeejjicuana huohuicanaje Eyacuiñajjija esohuijo

¹⁷ Ecue dohuecuana jjo'icuana, miquiananijjejaajji becacuana baneineicue. Ohuaya miquiana Eyacuiñajjija esohui pajeamee'yosa-acani. Oya jayojja jjashahuabaquime queaquehua pomee'yosa-acani quiana. Esohui jama epojjiya miquianajaya eya huohuije shajja-ajjajjima. Jamajjeya eyaya quiana huohuineiaña jjajaahuananeiquicue macuanajo. A'a oja esohuijo jjadasiameequijji. Quea-ohuesha nequicue, ejjasejjaqui.

¹⁸ Ma dejjacuana ca eseja Emeshimesenei Jesosa Quitojo echacochacojji pojjeama poani. Ojayanei ejjashahuabaquijji queatai eajjijo ca chacochacoani macuanaya. Esohui queapame jayojja acani cuaa jamatii peacuana dasiajji. Jamajjeya queahuisocuana siajje acani joya esohui baneineipojjima'cuana.

¹⁹ Queahuisojaajjicuaa miquianaya bacani shajjama' jayojja pojjeama ba'epoquiani. Majoya eya queabihuinee poani. Eyaya quiana sohuihuohuisa-aña miquianajaya Eyacuiñajjija esohui ebaneineijji. Majoya quianaja queaja'anee poaje. Ache queapame acajji, ache aca-ajja pea-ai quiaa baje queapame eba'epoquijji.

²⁰ Majoya aje quijjepishana Eyacuiñajjiya jiquio ese queaquijijjijajinee pomeejji poaniya edosiquiana, oya Satanás bajjani pea-ai, quishica'ajeacani jayojja oya acaje'yo. Emeshimesenei Jesosa Quitohua miquiana queapamenee ca-acapoquiahuatii ojayanei ejjashahuabaquijjijo.

²¹ Timoteohua, jiquio enijje chacochacopoquianiya esohui miquiana queabihui pojji acani. Enijjejaajjicuaa pea-ai Lucio, Jasón, Sosípatro bajjaniya pea-ai esohui miquiana queabihui pojji apea-aicani.

²² Eyaya pea-ai Tercio bajjaniya, jiquio esohui carta tehuejji poaniya, esohui miquiana queabihui pojji Emeshimeseneijo aña.

^23-24 Gayo pea-aiya esohui miquiana queabihui pojji acani. Eya ca jiquiojo ojaya equijo ani so'o. Jesosaja epeejjicuana jiquio oja equijotiiya jjachichaquipoquiani. Erasto pea-aiya, jiquiocuiñajjicuanaja bejjo jaahuanacapoquianiya, esohui miquiana queabihui pojji acani. Oya Cuartoja dohue poani.

Oe-ejjenei esohui Eyacuiñajji bihuiajji acanaje

²⁵ ¡Eyacuiñajji ejjabihuiatiiquipoqui! Ohuaya quiana queaca'a nequimeesahuacapoquijetii ojaya esohui queapame Jesosa Quitojo. Jiquio quiana eyaya esohui huohuineinaje. Jiquio esohui queapame Jesosa Quitojo, eyacua pojjeama. Yahuajoneinei eanitiiapoa jamatii cuanaja oya bajjimanei poa.

²⁶ Ma esohuitiiya yahuajonei Eyacuiñajjiya tehuemeecapoa. Jjeya oya esohui esejaya queaja'anee ebapoquiajji ejaa. Eyacuiñajjiya nequitiitiipoquianiya oja esohuihuohuijji epojji dejjacuana huoojeacanaje ojjaña meshicuanahuasijje oja esohui huohuiquiya epoquijji. Ma oja huoojea dejjacuaa oja esohui huohuicajje queahuisocuana jjashahuabaquicaje'yo. Oja esohuijo jjashajja-ajjaquicapoquije pea-ai.

²⁷ ¡Eyacuiñajji ejjabihuiatiiquipoqui! Chama'neinei pea poani oya jayojja. Ojaya oeneijaya ojjañatii ebajeyojeyo. Ohuaya Jesosa Quito huoojeacapoa esejo. Jamajjeya Jesosa Quitojo ojjañajaajjicuaa Eyacuiñajji cabihuiatiitiicapoquiahua. Jamaya ca-acapoquiahuatii.