Shomano 15 - Ese Ejja New Testament

Miquiananijje ba'ecacuana queapame apoquiacue

¹ Esejaya joya Eyacuiñajjijo queaca'a ba'epoquianija pea Jesosa epeejjicuana joya ca'a-amapishana poanicuana asahuacapoquijji seja o queaca'a ba'epea-aipoquijji. A'a esejanei eba'ejjijotii jjashahuabaquipoquijji, cua eseyayanei saje aquianajo pea-ai. Jamajjeya pea Jesosaja epeejjicuana oe ejja-asahuaqui ojaya queacamaja epojji poeajo o eseja queaca'a ba'emeesahuajji.

² Jesosaja epeejji esenijje ba'ecacuana queabihui ba'emeesahuacue o queapame ba'epoquijji, o Eyacuiñajjija esohuijo queaca'a etiipoquijji pea-ai.

³ Bacue, Quito ojayanei eba'ejjijo oya oenei queabihui epojji jjashahuabaquijjimanei poa. Ohuaya ca Eyacuiñajji queabihui pomeesa-acapoa. Eyacuiñajjija esohui etehue jaa Quitohua Eyacuiñajji jama acapoa ba'a: “Mi niñebajji poanicuaa eya pea-ai queayenonee pomeecanaje.”

⁴ Eyacuiñajjija esohui, ma yahuajonei ohua tehuemeecapoa esohuitiiya, esejaya jjeya pea-ai ebapoquiajji ejaa. Oja esohui bamajjeya se queaja'a ba'epoquije. Ojaya esohuijo queaja'a ba'epoquimajje Eyacuiñajjinijje jjapeequipajeasapo'yoajja poaje. Jamajjeya eseya queabihui jjaishoaquipoquiani Emeshimesenei Jesosa o poeo'oyajjijo.

⁵ Eya Eyacuiñajjinijje jiquio ese queaca'a, queabihui pea-ai ba'emeesahuapoquiajji poaninijje mimipoquiani miquianaya peacuananijje queabihui ojee ojaya eba'emeesahuajjijo. Ma ecua Jesosa Quito ba'epoquiapoa jiquio meshijo, jama jayojjaya miquianaya epojjijoya eya mimipea-aiani.

⁶ Majoya miquiaaya oya jayojja jjashahuabaquime poaniya Eyacuiñajji Emeshimesenei Jesosa Quitoja Chii bihuiapoquiaje ojee.

⁷ Jamajjeya miquiananijje ba'eca Jesosaja epeejjicuana queapame apoquiacue queabihuineeya. Ma ecua Quitohua quiana queapamenee acapoquiapoa jama pea-aiya oe apoquiacue quiaa peacuana. Miquianaya jama poani bamajje Eyacuiñajji bihuiacaje queahuisocuaa.

⁸ Eyaya quiana pea esohui huohuije. Jesosa Quito poeapoa judío oopanacuana ebionei asahuaa, oja esohui e'ejojonei huohuiya pea-ai. Ohuaya Eyacuiñajjija esohui ajeyojeyoca'yapoa ma Eyacuiñajjiya eseja etiiquianacuana huohuicapoa quijje ohua ajeyocaje'yo esohui huisotiiya. Oya majoya poeapoa.

⁹ Judío pojjeamacuanajo pea-ai Jesosa Quito poeapoa. Eyacuiñajji bihuiacaje cuaa ohua queapame queaneenee pomeecuaji'yojjima acani cuana bamajje. E'e, majoya jiquio Eyacuiñajjija esohui yahuajonei etehue jaa jama poani ba'a: “Jamajjeya eyaya miya bihuiapoquiaje judío pojjeamacuananijjeya ojee. Eya sohuicuayapoquije pea-ai miquea bajjanijo.”

¹⁰ Pea oja esohui etehue jaa jama poani pea-ai ba'a: “Miquianaya peajaajjicuana judío pojjeama queabihui pocue Eyacuiñajjija babacacoo israelitacuananijje ojee.”

¹¹ Pea oja esohui etehue jaa jama poani pea-ai ba'a: “Ojjaña peajaajjicuaa Eyacuiñajji cabihuiacapoquiahuatii judío pojjeamacuaaya.”

¹² Yahuajonei Isaiasya jama tehueme acapoa Eyacuiñajjija esohui ba'a: “Oe Isaija osecua queapame cuayaje. Ohuaya quijje ojjañajaajjicuana huoojeacapoquijetii. Macuiñajjicuanaya queabihui jjaishoaquipoquije ojo” jamaya etehue jaa.

¹³ Eyacuiñajji, jiquio queabihui jjaishoameequijji poaniya miquiana queabihuinee, queaquijijjijajinee pea-ai capomeecahua joya ojo jjashahuabaquipoquiani huisotiicuana. Majoya Edojjoshahuapame queaca'aneetiiya miquiana queabihuinee jjaishoameequicapoquije ma quijje Eyacuiñajjiya queahuisonee quiacajecuanajo.

¹⁴ Ecue dohuecuana jjo'icuana Jesosajo, ecuea ebanei miquiaaya peacuana queapamenee apoquiaña. Eyacuiñajjiya quiana oja esohui queaja'a bameesahuacani. Pea miquiananijje ba'eca Jesosaja epeejji queaja'a niñesheajji Eyacuiñajjiya pomeecani quiana pea-ai.

¹⁵ Jamatii eyaya jiquio esohui tehueaña miquianajaya Eyacuiñajjija esohui pajeajjima yajji. Jamajjeya queaja'a tehueme aje meteama Eyacuiñajjiya ojayanei ejjashahuabaquijjijo eya sohuihuohuiquinequijji epojji pomeecanajejojoya.

¹⁶ Jamajjeya eyaya judío pojjeamacuana Eyacuiñajjija esohui queapame huohuipoquiaña. Jamaya eya Jesosa Quitojo chacochacopoquiani. Eya ma ecua yahuajo Eyacuiñajjija equi-aijo chacochacopoquiapoa jama pea-aiya epojjiya ohuaya eya nequimeecanaje. Jamajjeya eyaya judío pojjeamacuana huohuipoquiaña oya Eyacuiñajji cojjaneijo oja nahue'yo poani quijje enequi'yojjijo. Judío pojjeamacuana ma ecua yahuajo israelitacuaa ehuone enaa jehui'yo Eyacuiñajji quiacapoquiapoa, jama pea-aiya o epojjijo eyaya esohui huohuipoquiaña cuana. Eyacuiñajjiya queapame bacaje cuana ojaya'yo Edojjoshahuapame yamijji poanijojoya.

¹⁷ Eya Jesosa Quitoja epeejji. E'ejojonei eya queapamenee chacochacopoquiani Eyacuiñajjijo jjabaquime.

¹⁸ Jamatii eyanei queapame ojo chacochacopoquiani jjabaquiajja. Quitohua ca eya oja echacojji queapame ameesahuacani judío pojjeamacuana sohuihuohuiquijji oya Eyacuiñajjija esohuijo ejjashajja-ajjaquijji. Eyaya e'ejojonei ja'anei esohui huohuipoquianaje cuana queapamenee nequipoquianiya.

¹⁹ Eyacuiñajjija Edojjoshahuapame queaca'aneetiiya eya queaca'a nequimeesahuacapoquinaje. Jamajjeya eyaya dejjaja ajjima'neineicuana apoquianaje. Eyaya queahuiso meshicuanahuasijje huohuimajamajaquinaje cuana ojjañatii esohui queapame Quitojo. Eyaya ebionei sohuihuohuicooquiapoa cuana Jerusalén meshijo ba'eca. Majoya peajaajjicuana queahueshanee ba'eca sohuihuohuipea-aiquinaje Ilíria meshiyasijjeyee.

²⁰ Jamajjeya eyaya Eyacuiñajjija esohui queapame dojosa-añatii ma Quitoja esohui shajja-ajjapojjima'neitii ba'ecahuasijje. Ma pea dejjacuaa Eyacuiñajjija esohui huohuiquicanaje meshiyasijje ca eya cuama poquisapo-ajja poanaje. E cuama epoqui poanajejjemo peaja echacojji jjeshe'yojji jayojja eya poquiae. ¡Jama pomajje queaquehua, de!

²¹ Oya jayojja pea-ai yahuajonei Eyacuiñajjija esohui etehue jaa jama poani ba'a: “Queaja'anee bacaje cuaa ma oja esohui bapojjima'nei ba'ecacuaa. Queaja'anee shajja-ajjacaje cuaa ma oja esohui shajja-ajjapojjima'nei ba'ecacuaa.”

Pablo poquisaneipoa Roma meshiyasijje

²² Eya peajaajjicuana sohuihuohuiquiya epoquiyajjejojo miquianaya baquijjima poanaje so'o. Eya queahuiso jjashahuabaquinequinaje miquianaque epoquijji nisho.

²³ Queashequiajahuiso eya cocuamaya poquisaponequinaje miquiana baa. Jjeya eyaya jiquio meshijo nequiya sohuihuohuijeyonaje cuana. Ecuea echacojji apoa ajeyonaje.

²⁴ Jamajjeya jjeya eya jjashahuabaquiani miquianaque epoquijji. Eya besapoquije bishe'aijo España meshiyasijje. Cuama besapoquijeya eya ebionei miquianaja meshiyasijje nequiñaquije so'o. Majotiiya eya miquiananijje queabihui anije so'o. Majoya miquianaja meshijo ani pojja'a miquiaaya eya asahuaje España meshiyasijje ebesapoquio'oyajji.

²⁵ Jjeyanei ca eya jiquiojo ani poquije so'o Jerusalén meshiyasijje Jesosaja epeejjicuanaja quia bejjo majo ba'eca Jesosaja epeejjicuanaja yajji quiaa.

²⁶ Bacue, Jesosaja epeejji Macedonia meshijo ba'ecacuaa, Acaya meshijo ba'eca pea-aiya oja bejjo chichacanaje Jerusalén meshijo ba'eca Jesosaja epeejji aema' poanicuana quiajji. Ojaya ejjashahuabaquijjijonei jamaya acanaje cuaa, peaja esohuijo pojjeama.

²⁷ Jamaya macuiñajjicuaa bejjo quiacanaje. Bacue, jiquio judío pojjeamacuaa pea meshijo ba'ecacuaa ojaya ejjashahuabaquijjijonei bejjo chichacanaje. Macuanaja judiocuana asahuacajji poanaje judiocuaa ebionei peajaajjicuana Eyacuiñajjija esohui huohuicooquicapoajojoya.

²⁸ Jamajjeya eya ebionei poquije so'o cuamaya ojjaña macuiñajjicuanaja chicha bejjo jeaquiya Jerusalencuiñajjicuanaja yajji. Majoya eya besapoquije España meshiyasijje. Eyaya cuama besapoquijeya ba'eñaquimajje miquiana bananaje so'o.

²⁹ Ecuea eba miquianaja meshijo ba'eñaquimajje esohui queapame Quitojo miquiana queabihuinee pomeejji eyaya huohuinanaje.

³⁰ Ecue dohuecuana jjo'icuana, eseya oya jayojja pea-ai jjashahuabaqui'yome poani Emeshimesenei Jesosa Quitojo. Oja Edojjoshahuapameya eseya pea esenijje ba'ecuana queajea ameesahuacani. Jamajjeya quiana oe eyaya huohuiajjaña ejo queahuiso emimipoquijji Eyacuiñajjinijje e oja queaca'a nequimeejjijo. Jamaya oe ojee emimipoqui.

³¹ Eyacuiñajjinijje mimipea-aicue oja e jaahuanapoquiajjijo dejja queamimishicuana Judea meshijo nequicajo. Eya queanee pomee'yosa-acani majo nequicacuaa. Eyacuiñajjinijje mimipea-aicue peajaajjija quia bejjo ecue dojo Jerusalencuiñajjicuanaja queapame jjeshejjequijjijo.

³² Majoya peajaajjija quia bejjo jeaquimajje eyaya queabihuinee quiana baquije so'o Eyacuiñajjiya eya jama asa-acanijo. Eya miquianaja meshijo ani jomishoca-anije so'o queabihui miquiananijje ojee.

³³ Eya Eyacuiñajjinijje jiquio ese queaquijijjijaji pomeejji poaninijje mimipoquianitii o miquiananijje enequipoquijjijotii. Mahuisoya apoa, amén.