Santiaco 1 - Ese Ejja New Testament

¹ Eya Santiago bajjani Eyacuiñajjijo, Emeshimesenei Jesosa Quitojo pea-ai chacochacopoquianitii. Miquianaya 12 huisome Israelja bacuaejjacuanaja osecuacuana poani queameshihuisohuasijje jjaba'echejjequi'yo ba'e. Eyaya jiquio esohui ebionei aña miquiana queabihui pojji.

Eyacuiñajjiya eseya ojaya esohuijo jjashahuabapajeameequi'yojjima acani

² Ecue dohuecuana jjo'icuana, queabihuinee oe jjabaquicue miquiana queacamajanee pomeejjicuana queahuiso poeajo.

³ Miquianajaya eba ese queacamajanee pomeejjicuana poeajo eseya oja esohuijo queaja'a jjashahuabaquiani bacaje cuaa. Majoya miquiana queaja'atii oja esohuijo jjashahuabaquipoquimajje queaca'atii ba'epoquije jamatii ese queacamajanee pomeejjicuana poeajo.

⁴ Majoya quiana oja esohuijo queaca'atii ba'epoquimajje queapame tiipoquije, ejjajja jahuani jama poaje. Eyacuiñajjiya quiana apoa popoquiani bacaje oja esohuijo queaca'atii eba'epoquijji. Cua miquiaaya saje queaja'a eba'epoquijji oja esohui jayojja ohuaya quiana quiacaje.

⁵ Becaja quianaja bajjima so'o ache queapame acajji, ache aca-ajja, jamajjeya oe Eyacuiñajjinijje mimipoquicue queaja'a ebajjijo achajja queapame ba'ecajji. Ohuaya quiana queaja'a jjashahuabaquimeesahuacaje. Miquianayanei pojjeama, joya onijje mimijecuana pea-ai ohuaya queaja'a jjashahuabameesahuapea-aiquicaje. Oja esohui nahuejjimaneiya ohuaya quiana queaja'a jjashahuabameequicaje queaja'a eba'epoquijjijo. Miquiana onijje mimimajamajajo queaja'a eba'epoquijjijo oya hueyahueya-ajjanei poaje miquianaja mimijo.

⁶ Ebionei oja esohuijo queaja'a jjashahuabaquianiya oya huohuiajjapoquiacue ojaya miquiana queaja'a eba'emeesahuajji. ¡A'a jamatii mimijeapoquijji onijje, ojaya quiana easahuajji pojjeama poso jjabaquiani! Bacue, joya jamatii onijje mimijeanicuana oja easahuajji pojjeama poso jjabaquijjicuana ca jiquio ecua beniya enashajo cuiayiyejeacani cua o poquijeyasijje jama pea-ai oya poani, jjashahuabaqui beca oya.

⁷ Jamajjeya ojjaña joya jama queaquehua jjashahuabaquime poanicuana Emeshimesenei Eyacuiñajjiya oja mimi shajja-ajjajjima acaje.

⁸ Comacuanaya beca jjashahuabaquime popoquianitii. Oe pojjajo queaja'a, pea pojjajo ca queaquehua jjashahuabaquiani oja esohuijo. Jama pomajje queaca'atii ba'epoquiajja poani cuana.

⁹ Jesosaja epeejji joya aema'pishana peajja jayojja acani cuaa. Comaya queabihui ba'ecapoquijji jamatii oepojji aquianajji Eyacuiñajjiya oya jjeya oja bacua poani bacanijjejojoya.

¹⁰ Jesosaja epeejji joya quea-aquianahuiso poanicuana queabihui pocajji oja aquianacuana queahuisojo ejjanahuemeequi'yojji pojjeama poaje oya jjabaquianijjejojo. Bacue, dejjacuana jamatii quea-aquianahuiso poani oya joya ecua siponeja shasha nequi jamaya poani, oya nequitiitiiajja.

¹¹ Eshequi jaasohuajo queaquiyonee poajo siponeja shasha quiyoshocana'yomajje oquequiani meshiyasijje. Majoya shashacuana queabametii nequiajja. Jama pea-aiya dejjacuana joya quea-aquianahuisonee posapojjicuana chacochacopoquianitii, mano'yomajje jja-aquianama'quije'yo. Oya quea-aquianahuiso poani bapajeacaje'yo cuaa.

Ese queacamajanee pomeejji poanicuanajo queaca'a se poaje

¹² E'e, queabihuinee pocajji joya queaca'atii ba'epoquianicuana o queacamajanee pomeejjicuana poeajo. Majoya o queacamajanee pomeejjicuana apoa poajo, jjayejjequiajo, ohuaya queaca'atii ba'epoquianiya jjeshecaje Eyacuiñajjija quia o ba'etiitii'yojji. Ojjaña joya e'ejojonei Eyacuiñajji queajea ajji poanicuaa oja quia ma ohua huohuicanaje huisotii jjeshecaje quijje mano'yomajje.

¹³ Beca quiana queacamajanee pomeecani jjabaquimajje queamimishi pea-ai posapoaje majoya. A'a jama jjashahuabaquime pojji ba'a: “Eyacuiñajjiya eya queamimishi pomeesa-acani.” ¡Chojja de! Eyacuiñajji queamimishi epojjijo jjashahuabaquiajjaneinei. Eyacuiñajji ese queamimishi jama pomeeajjaneinei pea-ai.

¹⁴ Eseya caca oe queamimishi posapoani esejayanei ejjashahuabaquijjijo. Peaa pojjeama se jama pomeecani. Eseja eyamineiya jamaya saneineicani ese queamimishi pojji.

¹⁵ Majoya quijjepishana ese queamimishi pojjijo jjashahuabatiiquimajje queamimishi se poaje. Majoya quijjenei queamimishitii ba'epoquimajje manoje'yo Eyacuiñajjima' jayojjatii ba'e.

¹⁶ Ecue dohuecuana jjo'icuana, ecuea quiana queajeanee poani. Jamajjeya quiana eyaya huohuiaña a'a onajo jjadasiameequijji.

¹⁷ Ojjaña ese queapamenee ba'epoquijjicuana joya queapamenee poaniya eseyaya jjesheaña eyajje poe Eyacuiñajjija quiacuana queapamenee. Jama queahuisocuana quiajji poaniya majametacuana, eshequi, ba'i pea-ai panacapoa eyatahuatahuajo ejijinequijji. Eyacuiñajji oyatii nequipoquiani, oe po'yoajjaneinei. Oya pea jjashahuabaquime po'yoajjaneinei. Oja nequia eshequi epojjajonei jijipoquiani, mecajje ca jijiajja. Eyacuiñajji ca jama pojjeama.

¹⁸ Eyacuiñajjiya eseya oya jama sapomajje oja bacua pomeecapoa eba'etiitii'yojji onijje quijje. Oja esohui e'ejojonei poani eseya shajja-ajjameecanaje. Jamajjeya ohuaya eseya babacacapoa ebionei oja panacuana nahue'yojji, eyacua epomee'yojji.

Queaja'a ba'ecapoquijji Eyacuiñajjija esohuijo

¹⁹ Ecue dohuecuana jjo'icuana, ecuea quiana queajeanee. Eyacuiñajjiya eseya eba'ejji eyacua quiacanaje, jamajjeya quiaa oe jiquio esohui shahuabapoquiacuetii. Eyacuiñajjija esohui ohua huohuicaje ebionei oya shajja-ajjaneicue. A'a jamatii mimicuajijji oja esohui shajja-ajjajeyojjimahuajo. Majoya beca quiana quenequeneani onijje mimicuajinanamajje.

²⁰ Bacue, joya mimijajijjicuana Eyacuiñajjija ejjashahuabaquijji a-ajjanei ba'yani. Ma Eyacuiñajjiya oya ameesa-acani oya a-ajja.

²¹ Jamajjeya quiaa oe miquianaja ejjashahuabaquijji queamimishi epojji cajaa acue, jeajeacuajicue. Ma queahuisocuaa acapoquiani mimishi ¡a'a apea-aijji! E'ejojonei Eyacuiñajjija esohui sapoaniya huanacue miquianaja sapajo queabihuineeya ma peaa miquiana queapame huohuicanaje esohuiya. Ma oja huohui esohui queaca'anee poani miquianaya majoya ejjanahuemeequi'yojji.

²² Bacue, Eyacuiñajjija esohui shajja-ajjajeaca-ajja jamatii. Oja esohui shajja-ajjamajje oya jayojja ba'ecapoquijji pea-ai. Oja esohui jamatii shajja-ajjajeamajje queapame quiana Eyacuiñajjiya bacani poso jjabaquije, jamatii miquianatii jjadasiaquiani.

²³ Joya dejja, epona pea-ai esohui shajja-ajjajeajji poani jamatii oja esohui jayojja ba'eajja joya ecua dejjacuana ecojjabajjijo jjacojjabaquiani jamaya.

²⁴ Oya maneitiiya queacojjajehue poani jjabaquiani. Majoya oya oja ecojja shacuajjimatii poqui'yani. Jama pea-aiya poanicuana joya Eyacuiñajjija esohui shajja-ajjajeajji poanicuana. E'e, comacuanaya oja esohuijo jjashajja-ajjaquisapo-ajjanei poani.

²⁵ Peacuana ca Eyacuiñajjija esohui shajja-ajjaneijji poani, yajja oya poani ebaneijji. Oja esohuiya eseya queaca'a pomeecani queamimishitii eba'epoqui poanijje. Eseja mimishi e-esemesetii pojjeama pomeeca'yani oja esohuiya. Jamajjeya joya Eyacuiñajjija esohui shajja-ajjaneijji poanicuana oja esohui jayojja eba'epoquijjijo jjashahuabaquiani. Comacuanaya queabihuinee poaje Eyacuiñajjiya oya queapame ba'emeesahuacani jjabaquimajje.

²⁶ Bacue, ojjaña joya Eyacuiñajjija esohui jayojja ba'epoquiani jjabaquijjicuana jamatii oja esohui ca'a-ajja queamiminaatii poani, comacuana ca e'ejojonei pojjeama poani oja esohuijo. Oyatii jjadasiaquipoquiani, Eyacuiñajjija esohui jama ba'eajja.

²⁷ Eyacuiñajji Echii-aiya eseya oja esohui jayojja queaja'a ba'epoquiani bacaje ese jama poajo ba'a: Echiimano'yocuana queacamaja poani bamajje eseyaya oya asahuaje. Eahuemano'yocuana queacamaja poani bamajje asahuapea-aije. Eseya jiquio meshijo ba'ecacuanaja mimishijo jjashahuabapea-aiquiajja poaje, oja mimishi a-ajja pea-ai poaje. Ese jama poajo e'ejojonei oja esohui jayojja ba'epoquiani Eyacuiñajjiya se bacaje.