Pinipese 3 - Ese Ejja New Testament

Eyacuiñajjiya eseya bacani eseja mimishima'yo Quitojo

¹ Jesosaja epeejji ecue dohuecuana jjo'icuana, queabihuinee pocue Emeshimeseneija'yo poani jjabaquimajje. Jiquio eya jjeya miquiana huohuije esohui oyaya ma yahuajo eya tehuenajeya. Oya esohui huohuitiitiije, majoya miquianaja epajeacuaji'yojji pojjeama poaje.

² Jamajjeya jjajaahuananeiquicue joya esohui queaquehuanee huohuijji poani dejjacuanajo. Oya queamimishinee poani iñahuehua queamase poani jama. Ojjañacuana jjacuiishashajehuisejjajeameequisa-acanitii coma dejjacuaaya Eyacuiñajjija oya majo queapame poani ebajji nisho.

³ Eseya ca joya e'ejojonei Quitojo jjashahuabaqui'yonajecuana Eyacuiñajjiya ecuiishashajehuisejjajea jayojja bacani. Eseyaya Eyacuiñajji e'ejojonei bihuiapoquiaña oja Edojjoshahuapameya eseya jama pomeecaniyajjejojoya, eseyayaneitii pojjeama. Eseyaya queabihuiya huohuipoquiaña cuana ma Jesosa Quitohua ajeyocapoa ese nahue'yojjijo. Eseya ca jjashahuabaqui'yoajja ese mimishima'yo epojji esejanei chacojo.

⁴ Jamaya queahuisocuana jjabaquiani majoya ojayanei echacojo Eyacuiñajjiya oya queapame poani ebacaje poso. Jamajojjemo eya pea-ai majo queapame poani jjabaquime ecuea echacojo. Chojja, jama posapea-aipo-ajja eya. Jamatii chama' pea dejja eya jama queapame epojji ojayanei chacojo.

⁵ Bacue, eya ca iña cuayapoa hebreo dejja epojji. Ocho cahuime huiso ecuaya jaa eya cuiishashajehuisejjajeacapoa eseja etiiquianaja esohui jama. Eya e'ejojonei israelita dejja poani Benjaminja osecua. Ecue chii, ecue nae pea-ai oya hebreo pea-aiya poa. Eyacuiñajjija esohui Moisesja tehuecuana jayojja eya ba'epoquiapoa, che oema' pajeajjima ecuea poa. Eya fariseo dejja pea-ai nequiapoa.

⁶ Jamajjeya eyaya hueya-amaneiya Jesosaja epeejjicuana queaneenee pomeepoquiapoa. Oja epeejjicuana chama'yo epomeejji nisho a-ajjapoa Eyacuiñajjija esohuijo siajje poani posojojoya. Ojjaña Moisesja tehue esohuicuanajo eya jjashajja-ajjaquipoquiapoa. Che oema'nei ecuea queaquehua ajjima' eya bacapoa cuaa, pea dejjacuana jama pojjeama.

⁷ Ma esohuicuanajo eya queapame epoaje poso jjabaquipoquiapoa eyanei ejjabihuiaquijji, Eyacuiñajjija eyanei queapame poani ebajji nisho pea-ai. Jjeya ca coma eyaya ba'yaña peajja jayojja, nahueama. Jesosa Quitojo queapame eyacua eba'epoqui'yojji jjeya ecuea queanahue'yo.

⁸ E'ejojonei ojjaña ma eya ba'epoquiapoa Moisesja tehuecuana jayojja eyanei queapame poani jjabaquijji, hebreo dejja epojji cuaya pea-ai ecuea nahueama'yo jjeya. Achepamenee Emeshimesenei Jesosa Quito poani jjeya eyaya ba'yaña queapamenee onijje ejjapeequipoquijji. Ecuea oya queanahuenee, pea esohuicuana ca ecuea nahueama'yo. Jamajjeya ojjaña ma ebionei ecuea ejjashahuabaquijjicuana eyanei queapamenee epoaje poso cajaa anaje Jesosa Quitojo queapame eyacua eba'epoqui'yojji. Ma yahuajo ecuea ejjashahuabaquijji poa ca eyaya jjeya ba'yaña peajja, shabo jayojja.

⁹ Jjeya eya Quitonijje enequipoqui'yojji ojee jjabaquiani ojaya'yo. Moisesja tehuecuana jayojja ba'epoquitiimajje queapame mimishima'yo epojji pojjeama eya jjabaqui'yani majoya. Jesosa Quitojo e'ejojonei jjashahuabaqui'yajo ca eya mimishima'yo bacani Eyacuiñajjiya. Jamaya Eyacuiñajjiya eya pomeeca'yapoa mimishima'yo ebajji Jesosa Quitojo.

¹⁰ E'ejojonei eya Quito basaneineipoani achajja oya nequiani onijje ejjapeequipoquijji. Eya queaca'a posapoani ma ecua Eyacuiñajjiya Quito shequimeeca'yapoa jama pea-aiya eba'epoqui'yojji eyacua. Ma ecua Quito queaneenee queacamaja acapoa cuaa jama pea-ai eya posapoani. Ma ecua Jesosa acui ecuiata'apeejo ba'e mano'yapoa jayojja eya mano'yonaje onijjetii jjabaquisapoani ecueanei ejjashahuabaquijji eatiipoquia poanijje.

¹¹ Majoya eya queabihui jjaishoaquipoquije ache pojjajo eya emano'yo jaa ohuaya shequimeecaje'yo onijje e ba'etiitiipoqui'yojji.

Pablohua huohuicapoa cuana Eyacuiñajjija ejeojjijo enequitiijjijo

¹² Bacue, eya ca jama po-ajja ba'a: “Eya queapameneetii nequipoquiani mimishima'nei.” Chojja, eya jama ba'epoquiajja, jamatii eya queapame ba'epoquisapoani Eyacuiñajjija esohui jayojja ojjaña pojjajo. Yahuajoneitii Jesosa Quito jjashahuabaquianiapoa ejo e nahue'yojji epojjijo, oja esohui jayojja e ba'emeepoquiajjijo.

¹³ Jesosaja epeejji ecue dohuecuana jjo'icuana, eya jjabaquiajja Eyacuiñajjija esohui jayojja ba'epoquianitii. Bacue, eya jjashahuabaquiani jama ba'a: Ma eya oja esohuijo chacochaconaje yahuajo a'a queapame, a'a queapame pojjeama eya majotii jjashahuabamajamajaquiajja, pajea'yonaje. Jjeya caca eya queaca'a nequipoquisaneipoani Eyacuiñajjija esohui jayojja eba'epoquijjitii.

¹⁴ Jiquio ecua dejja cuajicuajineineiani aquiana queapame ejjeshejjijo jamaya eya chacochacotiisapoani Eyacuiñajjijo. Majoya oja quia quijje jjesheje eya queapame chacochacopoquinaje sosejje. Eyacuiñajji yahuajoneitii jjashahuabaquianiapoa ese jama equiajjijo Jesosa Quitoja'yo poaje bamajje. Jesosa Quitohua eseya ba'etiitiimeecaje'yo onijje Eyahuasijje.

¹⁵ Ojjaña eseya cua queaca'a tiipoquiani ojaya esohuijo oya jjashahuabaquime queaja'a eseya ba'ecapoquijji jiquio eya huohuiaña jamaya. Miquianaya pea jjashahuabaquime poajo Eyacuiñajjiya quiana queaja'a bameecaje ache queapame acajji.

¹⁶ Jamajjeya jiquio ecua miquianaya Eyacuiñajjija esohui jayojja queaja'a ba'yani jama jayojjaya ba'ecapoquijjitii.

¹⁷ Ecue dohuecuana jjo'icuana bacue, ecuea eba'ejji jayojja pea-ai quiana oe ba'epoquicue. Shajja-ajjaneicue joya ecuana jayojja pea-ai ba'epoquianija esohui.

¹⁸ Eyaya queahuiso jama huohuime anaje quiana yahuajopishana. Jjeya oya esohui huohuije o'oya queayenohua cojjanajjiya. Queahuisocuana ba'epoquiani queamimishitii, Eyacuiñajjija esohui sapo-ajjanei. Jesosa acui ecuiata'apeejo mano'yapoa esohui shajja-ajjasapo-ajjanei cuana.

¹⁹ Coma dejjacuana, eponacuana pea-ai jiquio meshijotii ani aquianacuanajo jjashahuabaquipoquianitii. Cua ohua queamimishi asa-acani oja yamijo ojaya queabotineetii poani oja eyacuiñajji jama. Ma o queabicho pojji nisho oja mimishi oya majo bichobichoajja. Oya ca queabihui poani majoya. Jamajjeya ojjaña coma jama ba'eme popoquianicuana poquicaje'yo Cuaqui-aiyasijje.

²⁰ Eseya ca jama pojjeama, Eyahuasijje ca se ca poquije'yo queapame eba'etiitii'yojji majotiiya se eanitiitii'yojji poanijjejojoya. Jjeya eseya queabihui jjaishoaneiquipoquiani ache pojjajo ese nahue'yojji Emeshimesenei Jesosa Quito eyajje poeje o'oya eseya jiquiojo ba'e dojo'yohua.

²¹ Ma pojjajotii eseja eyami, jiquio ese mano'yojji poaje eyami, pea acaje'yo ohuaya ojaya jayojja queaca'anee queasajajanee epo'yojji. Oya queaca'aneetii ojjañacuana huoojeapoquiajji poanitiiyajjejojo eseja eyami eyacua acuajicaje'yo ohuaya.