Pinipese 2 - Ese Ejja New Testament

Quito Eyacuiñajjitiiya poani Dejjapojji poa yamijji ojjañacuana nahue'yojji

¹ Jjabaquicue oe, Quitohua miquiana queaca'a ba'emeecani, queajeanee acapoquianitii pea-ai miquiana ojaya'yo poanijojoya. Ohuaya ojaya Edojjoshahuapame miquianaja yamidojjojo nequimeecanaje. Edojjoshahuapameya miquiana queapame ba'emeecapoquiani miquiananijje ba'ecacuana asahuapoquiajji, o yenoama pomeesahuajji pea-ai.

² Jamajjeya quiana Quitohua jama pomeecani jjabaquimajje oya jjashahuabaquime pea-ai queaja'a ba'epoquicue. Miquiananijje ba'ecacuana queajea apoquiacue. Eyacuiñajjija ejjashahuabaquijji jayojjaya oe ba'epoquicue. Miquianaya jama poaje shajja-ajjamajje eya queabihuinee poaje.

³ A'a oe quiana jjabaquijji miquianayanei queapame poani peacuana ca peajja jayojja. A'a oe miquianayanei queapamenee poanijo jjabihuiaquijji. Jama ba'eca-ajja. Miquianaya queapamepishana, ca'a-ama poani jjabaquicue. Peacuana ca queapamenee poani bacue miquiana jama pea-ai pojjeama.

⁴ A'a mahuisoneicuanajo miquianayanei queabihui pojjijo jjashahuabaquipoquijji. Peacuana miquiananijje ba'eca queabihui pomeejjijo jjashahuabapea-aiquicue.

⁵ Bacue, ma ecua Jesosa Quito queaja'anee jjashahuabaquipoquiapoa jama pea-aiya quiana oe jjashahuabaquipoquicue o jayojjaya.

⁶ Jesosa Quito yahuajoneitii Eyacuiñajji jayojja pea-ai queaca'anee nequiapoa eojjañacuanamese. Jamatii oya Eyacuiñajji jayojja queaca'anee ojjañacuana huoojeapoquiajji epopoquijjitii pojjeama jjapomeequiapoa.

⁷ Ojayanei ejjashahuabaquijjijo Quito ojjañacuana huoojeapoquiajjitii epojji popajeapoa. Oya jama jjapomeequimajje jiquio meshiyasijje poeapoa, Dejjapojji epo cuayapoa. Pea onijje ba'ecacuana asahuapoquiajji epojji oya jjapomeequiapoa.

⁸ Oyaneitii jjaca'a-amaquiapoa dejja jama epojji. Ojjañatii oja Chiija Eyacuiñajjija esohuijo jjashajja-ajjaquipoquiapoa. Majoya oya quijje jjaquiaquiapoa dejjacuanajo ejjamanomeequi'yojji. Majoya oya queaneenee dejja queamimishinee jama mano'yapoa acui ecuiata'apeejo ba'e.

⁹ Oya jama jjapomeequiajo Eyacuiñajjiyanei oya queaca'aneetii epopoquijji nequimeeca'yapoa. Jamajjeya Jesosa Quitohua ojjañacuana huoojeacapoquianitii pea emeshimese dejjacuana jama pojjeama. Oja bajjani queapameneenee bacaje cuaa.

¹⁰ Jamaya Eyacuiñajjiya Jesosaja bajjani queapameneenee pomeecapoa ojjañacuanaja oya ebajji. Majoya ojjañacuaa oya ma eyajo nequicaa, jiquio meshijo ba'ecaa, jiquio meshidojjojo anicaa pea-ai oja ecuioshajjajo nequiya bihuiacapoquijetii oja bajjani queapameneenee shajja-ajjamajje.

¹¹ Majoya ojjañacuaa oja enabaa huohuicaje e'ejojonei Jesosa Quito Emeshimesenei popoquianitii eojjañacuanamese. Eyacuiñajji Echii-ai bihuiacaje ojjañacuaa esohui Jesosa Quitojo jama huohuime amajje.

Cuaquijiji queajeaja'a jama ba'ecapoquijji Jesosaja epeejjicuana

¹² Jesosaja epeejji queajea ecue dohuecuana jjo'icuana, yahuajo e miquiananijje anijo ecuea esohuicuanajo quiana jjashajja-ajjaquinaje queaja'a miquiana ba'epoquijjijo. Jjeya ca eya miquianaja meshijo chama', jamajjeya quiana oe ecuea esohuicuanajo jjashajja-ajjaneiquipoquicue jamatii e chamajo. Queaca'a quiana oe ba'epoquisapocue Eyacuiñajjija ejjashahuabaquijji jayojja eba'epoquijji. Ohuaya quiana nahueca'yonaje queaja'a eba'epoquijji ojo. Eyacuiñajji queaca'aneetii, emiquianamese poani, shajjama' jayojja poanicuana queanee pomeejji pea-ai shahuabapoquiacuetii quiaa oya.

¹³ Eyacuiñajjiya quiana jjashahuabameequicapoquianitii queaja'a ojo ba'esa epopoquijji oja esohui jayojja. Ohuaya quiana queaca'a nequimeecani oja ejjashahuabaquijji jayojja miquiana eba'epoquijji.

¹⁴ Miquianaja echacojjicuana queapame apoquiacue peanijje mimijajijjimaa. A'a miquiananijje ba'ecacuanajo esohui queatai jeacuayajji.

¹⁵ Jamaya oe queapame ba'epoquicue mimijajijjima peacuananijje miquiana queamimishi ba'e peaa eaca poanijje. Eyacuiñajjija bacua poanijje ca oe queaja'a ba'epoquicue. Bacue, jiquio meshijo dejja mimishicuana queahuiso nequica. Queamimishihuisotii o pojjijo jjashahuabaquipoquiani cuana, oja bacuacuana pea-ai. Jamatii queamimishihuiso ba'ejo queaja'a pocue jiquio ecua majametacuana mecajje jijinequianitii jama oe pocue esohui queapame ona huohuipoquiajji epojji.

¹⁶ Ma esohuiya miquiaaya huohuiaña cuana achajja queaja'a ba'ecapoquijji Quitojo. Miquianaya jama queaja'a ba'epoquiani shajja-ajjamajje eya queabihuinee poaje Jesosa Quito poeo'oyajo. Majoya eyaya quiana jamatii pojjeama sohuihuohuipoquianaje jjabaquije. Ecuea echaco miquianajo queapame bacaje Eyacuiñajjiya.

¹⁷ Miquianaya Eyacuiñajjija esohuijo jjashahuabaqui'yomajje queaja'a ba'epoquiani. Ma ecua Eyacuiñajjija equi-aijo chacochacopoquiani dejjacuaa ehuone enaa ejehui'yo Eyacuiñajji quiacanaje jamaya quiana poani. Jjeya eya queacamajanee pomeecani cuaa esohuijo. E'e pojja'a eya manomeecaje'yo cuaa majoya. Eya ma ecua uvajjajjana' caneco sho nequi oja quia enaa ejehui'yobiajje etiiya shojeacapoa jamaya. Eya jama acajje jamatii queabihui poaje miquiananijjeya Eyacuiñajjiya eseya oque equia jayojja bacanijojoya.

¹⁸ Jamajjeya quiana oe e jayojja queabihui popea-aicue majoya.

Timoteo Pablo chacosahuajji poa

¹⁹ Eseja Emeshimesenei Jesosa jama sapoanijo jjeyanei eyaya Timoteo huoojeaje miquiana ba'yohua. Quijje ohua esohui queapame miquianajo yeca'yajo eya queabihui poaje.

²⁰ Timoteo queahuiso jjashahuabaquianitii miquiana queaja'a ba'emeesahuajjijo jiquio ecua eya miquianajo queahuiso jjashahuabaquianitii jama pea-aiya oya poani. Chama'nei pea cuamaya epoquijji jama jjashahuabaquime poani miquianajo.

²¹ Peacuana ca ojayanei eba'ejjijo, aquianacuanajo pea-ai jjashahuabaquipoquianitii. Jesosa Quitojo echacochacojjijo ca jjashahuabaquiajja.

²² Miquianajaya eba Timoteo queapame esohuijo chacochacopoquiani. Joya ecua ebacuaejjaa oja chii chacosahuacani jama ohuaya eya Eyacuiñajjija esohui queapamenee Quitojo ehuohuiquijji asahuacapoquiani.

²³ Jamajjeya eya jjashahuabaquiani o miquianaque ehuoojeajjijo yajja shai eya acaje etiicuaa bamajje. A'a eya huoojeacuayameecaje'yo, a'a jiquiojotii animeecaje, ecuea ca bajjima so'o.

²⁴ Eya jjaishoaquipoquianitii Emeshimeseneijo e ojaya ehuoojeacuayameesahua'yojjijo. Majoya eyatii poquicuajije miquiana ba'yohua.

Epafrodito Pablo chacosahuajji pea-ai poa

²⁵ Eya jjashahuabapea-aiquinaje Jesosaja epeejji Epafrodito miquianaque ehuoojeajjijo. Oya Quitojo chacochacopea-aipoquiani enijje. Joya ecua soldado ejjaquecuaquijji poani jama oya nequiani enijje. Comaya yahuajo miquiaaya huoojeanaje eque e asahuajji epojji, oyaya huoojeaje o'oya.

²⁶ Oya queahuiso miquianajo jjashahuabaquiani miquiana basaneipo-o'oyani. Miquianaja eshajja-ajja oya queamanonee jaanaje. Miquiana queayenonee poani ojo shajja-ajjamajje oya pea-ai queayenonee poanaje majoya.

²⁷ E'ejojonei Epafrodito queamanonee jaanaje. Beshahuanei oya mano'yonaje. Eyacuiñajji queayenohua oya bamajje jja-ajameequica'yonaje. Ejo pea-ai Eyacuiñajji queayeno jjashahuabaquinaje, jamajjeya ohuaya oya mipoquijeyomeecanaje. Eya o epoquijeyojojjemo queayenonee poquiae.

²⁸ Jamajjeya eyaya oya huoojeacuajisa-aña miquianaque. O miquianaque poquije o'oya bamajje queabihui poaje quiana. Majoya eya miquianajo queayenotii enequijji popajeaje'yo.

²⁹ Oya miquianaja dohue Emeshimeseneijo, jamajjeya quiaa oe oya queapame ja'ajjequicue queabihuiya. Pea Jesosaja epeejjicuana oya jama pea-aiya poani queapame bapea-aicue.

³⁰ Bacue, Epafrodito Jesosa Quitojo chacochaconeineimajje beshahuanei mano'yonaje majoya. Oyanei jjanahuebaquijjima chacochaconeipoquinaje e asahuajo jiquiojo enijje ani miquianaya queacamajanee eque epoejji poanajejojoya e asahuajji epojji.