Pinemo 1 - Ese Ejja New Testament

Esohui o queabihui pojji ebionei acapoa Pablohua

¹ Eya Pablo onaja jeanobia ani Jesosa Quitojo chacochacopoquianijojoya. Eyaya eseja dohue Timoteonijje aniya jiquio esohui tehueaña mique Filemón miquea ebajji. Miya ecuana jayojjaya esohuijo chacochacopoquiani ecuanaja queajea.

² Joya Jesosaja epeejjicuana miquea equijo jjachichaquipoquianicuanaja ebapea-aijji jiquio esohui tehueaña. Eseja jjo'i Jesosaja epeejji Apia bajjanija ebajji, Ariquipoja pea-ai ebajji jiquio esohui tehueaña. Oya pea-ai soldado jama apoa epo nequiani peacuana sohuihuohuiya epoquijji.

³ Eyacuiñajji eseja Chii-aiya, Emeshimesenei Jesosa Quitohua pea-ai miquianaya queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

Filemón queaja'a jjashahuabaquipoquiapoa esohuijo

^4-5 Filemón, miya queaja'a jjashahuabaquipoquianitii Eyacuiñajjija esohuijo. Emeshimesenei Jesosa miquea queajeanee poani shajja-ajjamajje eyaya onijje mimianiya Eyacuiñajji gracias amajamajaña mijo. Eyacuiñajjija'yo poanicuana miyaya queajeanee apoquiaña shajja-ajjapea-ainaje ecuaa queabihuiya.

⁶ Eya Eyacuiñajjinijje mimipoquiani mi pea Jesosaja epeejjicuananijje queapame ejjapeequipoquijjijo. Achepamenee Eyacuiñajjiya eseya acanaje Jesosa Quitojo miquea queaja'a ebajjijo eya mimipoquiani onijje. Majoya Jesosa Quito queapameneetii poani bacaje cuaa.

⁷ E'e, miyaya pea Jesosaja epeejjicuana queajeanee apoquiaña shajja-ajjamajje eya queabihui poanaje majoya. Jesosaja epeejjicuana comajo ba'e miyaya yenoama pomeesahua'yonaje oja esohuijo. Jamaya miya queapame poani.

Pablohua esohui Onésimo bajjani dejjajo tehuecapoa o asahuajjijo

⁸ Bacue, eya Quitoja huoojea ona sohuihuohuiquinequijji poaniyajjejojoya ecuea miya huohuicajji ae pocajji miya, ae chacocajji miquea. Jamajjeya ecuea esohuijo jjashajja-ajjaquicajji miya.

⁹ Chojja, eya mi jama pomeesapo-ajja. Ecuea miya queajeajojoya eyaya miya huohuiajjaña. Bacue, eya dejja tiipoquiani. Jjeya Jesosa Quitojo chacochacopoquianijojoya eya ejeanobia ani.

¹⁰ Jamajjeya eyaya miya huohuiajjaña Onésimo bajjani dejjajo miquea o queapame a'yojji. Oya jiquiojo enijje ani Jesosa Quitojo jjashahuabaqui'yo ecue huohuijo, ecue bacua jama eyaya oya baña.

¹¹ Yahuajo oya mijo echacochacopoquijjitii poanaje mique jjeshe. Jamatii queapame pojjeama oya chacochaconaje mijo ebionei. Jjeya ca oya queapame chacochacoani enijje, mijo pea-ai queapame chacochacopoquije o'oya.

¹² Eyaya oya huacuaya mique huoojeao'oyaña. Ecuea oya queajeanee. Jamajjeya oya queapame ja'ajjequi'yocue.

¹³ Eyaya oya enijjetii animeesa-aña ojaya e ejeanobia ani Eyacuiñajjija esohui queapame Quitojo easahuajji. Oya mique ejjocojo anicajji e asahuajji epojji.

¹⁴ Jamatii ecuea Onésimo e jiquiojo ani asahuajji eanimeejji pojjeama poaje oya mijo chacochacoanijojoya. Ecuea oya animeecajji poanaje enijje jamatii ecuea miya huohuiajjajjima. Chojja, ecuea miya jama eajji pojjeama.

¹⁵ E'e pojja'a queapame Onésimo jjasejjaquinaje so'o mijo. Oya ca quijje minijje anitiitiipoquije'yo.

¹⁶ Oya mijo echacochacopoquijjitii ejjeshe miquea oya jamaya baca-ajja. Mahuisojonei pojjeama miquea oya bacajji. Jjeya ca oya eseja dohue pea-ai poani Quitojo miquea oya jamaya bapea-aicajji. Ecuea oya queajeanee poani. Jamajjeya jjeya miquea oya queajeanee apea-aicajji oya mijo chacochacopoquije'yojojoya, oya miquea dohue Jesosajo poanijojoya.

¹⁷ Miya enijje ani jayojja chacochacopoquiani esohuijo eya jjashahuabaquiani. Jamajjeya queapame oya ja'ajjequi'yocue e jayojjaya.

¹⁸ Miquea echacojji ojaya chacojeyojjima enequijo, e'e pojja'a miquea aquiana ohua siicanajejo eyaya miya sosequiaje.

¹⁹ Miquea ebajji jiquio ecueanei esohui poani eyaya jiquio jeasiiaña ecueanei emeya. E'ejojonei eyaya miya jiquio oja sii cuenta sosequijeyoje. A'a pajea'yojji eyaya miya yahuajo sohuihuohuinaje Jesosajo ejjashahuabaqui'yojji. Jamajjeya miquea eya queapame acajji Onésimo ja'ajjequi'yojji.

²⁰ Miya ecue dohue poani Quitojo. Jamajje miya jama poani jjabaquimajje che eya queapame acue. Eya queabihui pomee'yocue Onésimo eja'ajjequi'yojji.

²¹ Eyaya miya jama tehueme aña ecuea miya ebajojoya ojjaña jiquio eya tehueaña huisotii miyaya ajeyoje. Ecuea eba miyaya oepojji pojjeama aje. Jiquio ecue tehuejjimacuana miyaya queapame apea-aije.

Pablohua esohui oe-ejjenei tehuecapoa

²² Jjeya pea-ai e cahuijji apoa acue miquea equi. Eyacuiñajjiya miquianaja mimi ejo shajja-ajjacani. Jamajjeya eya jjashahuabaquiani e jiquiojo onaja jeanobia ani ohuaya huoojeacuayameecaje'yo miquianaque ojee eanio'oyajji.

²³ Epafrasya jiquio enijje ejeanobia aniya Jesosa Quitojo chacochacoanijojoya esohui miquiana queabihui pojji huoojeacani.

²⁴ Marcosya, Aristarcohua, Demasya, Lucasya pea-ai ma enijje chacochacopoquinajeya esohui miquiana queabihui pojji huoojeapea-aicani.

²⁵ Eseja Emeshimesenei Jesosa Quitohua miquiana queapamenee ca-acapoquiahuatii ojayanei ejjashahuabaquijjijo.