Noca 8 - Ese Ejja New Testament

Eponacuaa Jesosa asahuacapoa

¹ Majoya aje quijje Jesosaa queahuiso meshiyasijje, pueblocuanahuasijje esohui queapame huohuicanequiapoa cuana Eyacuiñajjiya ojjañacuana huoojeacapoquianitiijo. Oja babaca ona sohuihuohuinequijji poani 12 huisome dejjacuana onijjetii poquinequiapoa.

² Eponacuana pea-ai ma Jesosaa jja-ajameequica'yonaje, ma eshahuamase yamijji poanaje Jesosaa shahuamase yamima'yo pomeecanaje pea-ai poquinequiapoa onijjetii pea-ai. Oe epona María bajjani poa. Oya Magdala meshijo ba'yapoa. Mariaja eyamijo siete huisome eshahuamase nequi huoojeacuayaca'yapoa Jesosaa.

³ Jesosanijje poquinequiapoa pea epona Susana bajjani, Juana pea-ai. Oya Cuzaja ehuanase poa. Cuza ca Herodes emeshimeseja equijo ani aquianajaahuanajji poa. Pea eponacuana pea-ai Jesosanijje poquinequiapoa Jesosa, o shajja-ajjajji poanicuana asahuaa.

Jesosaa huohuicapoa esohui ebameesahuajji eso'jeaajajji poani dejjajo

⁴ Queahuiso meshijo ba'eca Jesosaque jjachichaquicapoa o baa. Jamajjeya Jesosaa esohui ebameesahuajjijo huohuicapoa ma oque poecapoacuanaya.

⁵ Jama huohuime acapoa cuana ba'a: —Oe dejja eso'jeaajajji poani poquinaje oja queyasijje eso' jeaajaa. Ohua eso' jeaajacajje becacuana eso' oquequinaje ejeojjiyasijje. Jamajjeya eso' quishica'yonaje cuaa. Quijjepishana cuichojjicuaa anioquecuajimajje eso'cuana ijjiaca'yonaje pea-ai ejeojjiyasijje eoquequi ani.

⁶ Pea eso'cuana ca ohua jeaajacajje meicuana anicabiajje meshi oepojji aniyasijje oquequinaje. Majo anica eso' pohuacuajiajja'yonaje meshi oepojji meibiajje aniyasijje. Majoya meshi queajabojo yaa'yonaje.

⁷ Pea eso'cuana ca ohua jeaajacajje acuishatatasajjatejjee ani meshiyasijje oquequinaje. Majoya eso'cuana acuishatatatejjee ojee pohua'yajo acuishatataa oya beboca'yonaje, queyaca'yonaje. Jamajjeya oya tii'yoajja poanaje, jjajjajjima poanaje.

⁸ Pea eso'cuana ca ohua jeaajacajje meshi queapamenee aniyasijje oquequinaje. Jamajjeya majo nequi pohua'yomajje, queajjajjahuisoneenee poanaje tii'yomajje. Becacuana ecuijo ejjajja queaso'huisonee poanaje, 100 huisome eso' poanaje.— Jamaya esohui ebameesahuajji Jesosaa huohuicapoa cuana. Majoya Jesosaa huohuitiicapoa janobajjimanei jama ba'a: —¡Cua shajja-ajjasapoaniya quiaa oe jiquio esohui shajja-ajjaneineicue!—

Apiojji Jesosaa esohuicuana ebameesahuajji huohuicapoquiapoa cuana

⁹ Majoya aje o shajja-ajjajji poanicuaa Jesosa yajja poanijje ma esohui eso'jeaajajjijo huohuiajjacapoa.

¹⁰ Jesosaa saja-acapoa cuana jama ba'a: —Eyacuiñajjiya miquianayanei queaja'a bameesahuacani ojaya ejjashahuabaquijjicuana ma yahuajo huohuijjimanei poa esohui, ojjañaja bajjima esohui. Achajja poaje quijje ohua ojjañacuana huoojeacapoquianitii meshi Eyahuasijje bameepea-aicani quiana. Jiquio peacuanaja ca Eyacuiñajjija ejjashahuabaquijjicuana ebajjitii pojjeama poaje. Jamajjeya eyaya pea esohuicuana huohuiaña cuana ojaya queaquehuatii epojji. Comacuaaya oja ecojjaa ba-ajjacani jamatii bajjima acani. Oja eshajjaa shajja-ajjacani jamatii ojaya queaquehua poani yajja poanijje shai oja esohui.—

Jesosaa huohuicapoa yajja poanijje esohui eso'jeaajajji dejjajo

¹¹ Majoya aje Jesosaa huohuicapoa cuana jama ba'a: —Jama poanijje esohui eso'jeaajajji poani dejjajo. Eso'cuana caca Eyacuiñajjija esohui jayojja poani.

¹² Eyacuiñajjija esohui shajja-ajjacani cuaa, jamatii ojaya queaquehuatii poani yajja poanijje shai coma esohui. Becacuana jiquio ecua eso'cuana ejeojjiyasijje oquequiani majoya cuichojjicuaa ijjiaca'yani jama pea-aiya po'yani. Edosiquiaa esohui queapame oja sapadojjojo nequi eshajja-ajja, pajeameecuajica'yani, chama'yo pomeecani. Jamajjeya ma esohuijo jjashahuabaqui'yoajja cuana ejjanahuemeequi'yojji.

¹³ Ma pea eso'cuana mei anicabiajje meshi oepojji aniyasijje oquequinaje joya ecua dejjacuana, eponacuana Eyacuiñajjija esohui shajja-ajjamajje queabihuinee jjashahuabacuajiquiani jama. Majoya ohuaya Eyacuiñajjija esohui queapame oja sapadojjohuasijje nequimeejjimatii acani. Jiquio ecua meshi oepojjijo esajja nobiquijjima poani jama pea-aiya oya poani. Majoya quijje oya Eyacuiñajjija esohuijo peacuaa queanee acajje, queacamajanee acajje pea-ai ohuaya cajaa acuajica'yani.

¹⁴ Ma pea eso'cuana acuishatatasajjatejjee ani meshiyasijje oquequinaje joya ecua dejjacuana, eponacuana pea-ai Eyacuiñajjija esohui shajja-ajjamajje jjashahuabaqui'yani jama. Majoya quijje oya jiquio meshijo ani eba'epoquijji aquianajo, echacojjijo pea-ai jjashahuabamajamajaquipoquiani. Oya queabejjohuiso pomajje queabihui epoaje'yotii poso jjabaquiani macuanajoya. Jamajjeya Eyacuiñajjija esohui oja sapadojjojo nequi pajeaca'yani ohuaya, nequimeejjimatii acani. Jiquio ecua ebanacuana acuishatatatejjee pohua'yo jjajja-ajja poani, jama pea-aiya oya ba'epoquije.

¹⁵ Ma pea eso'cuana meshi queapameneeyasijje oquequinaje ca joya ecua dejjacuana, eponacuana pea-ai Eyacuiñajjija esohui shajja-ajjamajje e'ejojonei jjashahuabaneiqui'yani oja esohuijo. Oya Eyacuiñajjijo queaja'a ba'epoquiani jiquio ecua ecuicuana queaso'huisonee poani, jama pea-aiya oya ba'epoquiani.—

Pea esohui ebameesahuajji cuaquijijijo huohuipea-aicapoa Jesosaa

¹⁶ Majoya Jesosaa pea esohui huohuipea-aicapoa cuana jama ba'a: —¿A'a cuae quiaa cuaquijiji nequiame cajonquimejjejje, mi jaajjiquimejjejje pea-ai nequiame? ¡Chojja de! Cuaquijiji nequiacajji eyajo mesabiajje ojjaña joya equiyasijje nobiquijecuana jeaja'anequijji.

¹⁷ Jiquio ecua cuaquijijiya jeaja'acani dejjacuanaja queaja'a ebajji, jama pea-aiya Eyacuiñajjiya ojjañacuana acaje oja esohui queaja'a ebajji. Oja ejjashahuabaquijji ma peacuanaja queaquehua poani Eyacuiñajjiya queaja'a pomeecaje. Chama' queaquehuatii epojji poaje cuanaja.

¹⁸ —Jamajjeya quiaa ojjaña eya huohuiaña esohui shajja-ajjaneineicue. Ojjaña joya Eyacuiñajjija esohui shajja-ajjasapoanicuana Eyacuiñajjiya queaja'a bameesahuacapoquije. Joya oja esohui sapo-ajja poanicuanaja ca, queaquehuaneetii ojaya esohui popoquije'yo. Joya ecua aema'neija oepojji oja aquiana ani peaa jjesheca'yani, jama pea-ai Eyacuiñajjija esohui sapo-ajjacuana poaje, sohuima'nei poaje'yo— jamaya acapoa Jesosaa.

Jesosaja enaese, oja chahuacuana pea-ai oque poeapoa o baa

¹⁹ Jesosaja enaese, oja chahuacuana pea-ai poeapoa o baa, jamatii oque jjanequichipiquijjima poa queahuisocuana opejjejo nequicapoajojoya.

²⁰ Majoya aje oe dejjaa Jesosa huohuicapoa oja naejo jama ba'a: —Mique nae, mique chahuacuana poeyanaje, jiquia aje oya esecuejo nequi, mi basapoani.—

²¹ Jesosaa oya saja-acapoa jama ba'a: —Ojjaña joya Eyacuiñajjija esohuijo jjashajja-ajjaquijji poanicuana, comaya caca oe ecue nae jayojja, ecue chahuacuana jayojja, ecue jjo'icuana jayojja poani— jamaya poa Jesosa.

Jesosaa benitiitii, enashajoai pea-ai nequioquemeequicapoa

²² Majoya aje oe pojjajo Jesosaa o shajja-ajjajji poani dejjacuananijje bishe'aiyasijje nequisohuaquimajje huohuicapoa jama ba'a: —Cua'a ebesapoqui jocuama ojjemiji baeyasijje.—

²³ Majoya Jesosa, o shajja-ajjajji poanicuananijje bishe'aijo ba'e enabaeyejje besapoquianijo, oya cahuiapoa. Majoya aje beni queaquemonee poecuajiapoa. Enashajo queaquemohua bishe'ai jeasohuajeasohua acabesapoquiapoa, nanejeacabesapoquiapoa. Jamajjeya bishe'ai jaanobiajjaqui'yapoa enaa cuiocajje.

²⁴ Majoya Jesosa ecahui jaatii bamajje o shajja-ajjajji poanicuaa oya ishe'acapoa. Jama acapoa ba'a: —Esohuihuohuijji, esohuihuohuijji, ¡Coya aje pajjaja se jaanobiqui'ya de!— Jamajjeya Jesosaa ohua ishe'acajje, beni queaquemonee, enashajo queaquemo huohuicapoa o nequioquequijji. O jama mimime pojeahuajo beni queaquemonee, enashajo queaquemo nequioquenanaquiapoa, bae nashajoma' ponana'yapoa.

²⁵ Majoya aje Jesosaa o shajja-ajjajjicuana jama acapoa ba'a: —¿A'a quiana ejo jjashahuabaqui'yojjimatii poani?— Jamatii o shajja-ajjajjicuana ohua jama acaje bamajje queametenee poa, jjabaneineiquiapoa ojo. Majoya mimimimiapoa cuana oopana jama ba'a: —¿Ae dejja shai jiquio queasohuipojanee? Beni queaquemonee, enashajo queaquemo jjashajja-ajjaquiani oja esohuijo, nequioquenanaquinaje.—

Jesosaa dejja provincia Gerasa meshijo nequi shahuamase yamima'yo pomeecapoa

²⁶ Majoya aje quijjepishana Jesosa, o shajja-ajjajjicuananijjetii provincia Gerasa meshiyasijje ba'eñaquiapoa. Gerasa meshi Galilea provincia bae ojjemiji ani cojjanei aniapoa.

²⁷ Majoya Jesosa nequisohuaquiñaquiajo ma meshijo ani dejja eshahuamase yamijji poenanapoa Jesosaque. Oya queaba'ihuisonee daquima'nei jama pajipaji poaequinequiapoa emano'yo jaaca meijjanidojjojje, oya equijo ba'eajja poa.

²⁸ Jesosa bamajje ma dejja eshahuamase yamijji oja ecuioshajjajo anioqueñamajje taaa-aniapoa janobajjimanei jama ba'a: —¡A'a e nequiyasijje poejji Eyacuiñajji Eyajo queaca'aneetii nequija Bacuaejja! Eyaya miya huohuiajjaneineiaña, ¡a'a jjeya eya queaneenee pomee'yojji!—

²⁹ Eshahuamaseya ma dejja jama mimimeeme pomeecapoa Jesosaa eshahuamase oja yamijo nequi o cuayaqui'yojjijo huohuicanajejojoya. Eshahuamasecuaa ma dejja queamaseneenee pomeecapoquiapoa. Jamajjeya onijjejaajjicuaa baajjonohua oya me jeyoajjacapoa, jeojji jeyoajjacapoa. Jamatii ohuaya baajjono jjequisejjajeacapoa. Majoya eshahuamasecuaa oya dojoquehuacapoa se-ejjama' meshiyasijje.

³⁰ Majoya Jesosaa oya huohuiajjacapoa jama ba'a: —¿Ae bajjani miya?— Saja-acapoa ohuaya jama ba'a: —Ecuana ca Queahuisoneenee bajjani.— Jamaya saja-acapoa eshahuamaseya queahuisoneenee ojaya eyamijo nequinajeyajjejojo.

³¹ Ma eshahuamasecuaa queahuisoneeneeya huohuiajjaneicapoa Jesosa oja huoojeajjima yajji ma o queaneenee nequipoquije'yohuasijje.

³² Ma meshi emacojo nequi cuichicuana queahuiso ijjiaijjiaqui bamajje eshahuamasecuaa Jesosa huohuiajjacapoa o huoojeacuayajea'yojjijo cuichicuanaja eyamidojjohuasijje enobiquijji. Majoya Jesosaa eshahuamasecuanaja esohui jama acapoa.

³³ Jesosaa eshahuamasecuana dejjaja yamijo nequi huoojeacuayajeaca'yajje cuichicuanaja eyamiyasijje nobiquinanapoa. Majoya cuichicuana cuajicuajijaaoquequinanacapoa ecueihue quea-ao nequi baeyasijje. Ojjañatii hui'ijeaca'yapoa.

³⁴ Majoya aje cuichijaahuanajji poanicuana ojjaña cuichicuana hui'ijeaca'yonaje bamajje poquicuajiapoa ma meshijo ba'ecacuana huohuiya, ma Jesosaa acanaje huohuiya.

³⁵ Jamajjeya queahuiso ma meshijo ba'ecacuana poquicananapoa Jesosaa dejja eshahuamasecuana yamima'yo acanaje baa, cuichicuana hui'i'yonaje baa pea-ai. Macuiñajjicuaa Jesosa ani bañamajje, dejja eshahuamase yamijji poanaje Jesosa jeojji anipejjejo eanioque ani bacañapoa. Daquijji, queapame'yo ani bacañapoa cuaa. O jama ani'yo bamajje queametenee poa.

³⁶ Jesosaa eshahuamasecuana huoojeacuayajeaca'yonaje bajji poanajecuaa onijjejaajjicuana huohuicapoa achajja Jesosaa ma dejja eshahuamase yamijji poanaje shahuamasema' pomeeca'yonaje.

³⁷ Majoya Gerasacuiñajjicuaa huohuiajjaneineicapoa Jesosa pea meshiyasijje ebesapoquicuajijea'yojji queameteneenee poajjejojoya. Jamajjeya Jesosa bishe'aiyasijje anisohuaqui'yapoa ebesapoqui'yojji.

³⁸ Ma eshahuamase yamijji poanaje dejjaa Jesosa huohuiajjacapoa onijjetii enequipoqui'yojji nisho. Jesosaa ca oya huohuicapoa jama ba'a:

³⁹ —Miquea equiyasijje poqui'yocue. Mique huapa pojjeamacuana, minijje ba'ecacuana pea-ai huohuiñaqui'yocue ojjaña ma Eyacuiñajjiya mi acanaje huisotiijo.— Jamajjeya dejja eshahuamase yamijji poanajeya poqui'yomajje ojjaña onijjejaajjicuana huohuicañaqui'yapoa ma Jesosaa o acanaje huisotiijo.

Jesosaa Jairoja bacuase shequimeeca'yapoa, epona najjitii poani pea-ai na' huosameeca'yapoa

⁴⁰ Majoya aje Jesosa o shajja-ajjajji poanicuananijje huacuaya besajebeje'yo bamajje queahuisocuaa ejjachichaqui aniya Jesosa queabihuineeya ja'acajjequiapoa, oya ishoaca-aniapoajjejojoya.

⁴¹ Ona queahuisonee ejjachichaqui anicajo Jesosa bajji, oe dejja judiocuanaja equi-ai ejjachichaquijji etii poani Jairo bajjani, poepea-aiapoa Jesosa baa. Jesosa nequi bañamajje ohuaya oja ecuioshajjajo nequiya Jesosa oja equiyasijje epoquijjijo huohuiajjaneineicapoa.

⁴² Oja bacuapona oenei, 12 shequiajame huiso etii ani, beshahuanei manopoqui'yani huohuicahuapoa. Jamajjeya Jesosa Jairoja equiyasijje poquiajjapoa. Queahuisocuaa onijje poquijeya Jesosa cuiajeashiñacapoquiapoa.

⁴³ Ma Jesosanijje poquicapoa queahuisocuana oe epona queamanotii poani poquipea-aiapoa. Oya 12 shequiajame huiso, queamano anipoquiapoa, najjitii. Eshicuijjibajji poanicuaa oya shicuiajjacapoquiapoa. Ohuaya eponaa ojjaña oja aquianacuana quiacapoquiapoa o na' huosamee'yojji nisho sosejje. Jamatii oya queamanotii anipoquiapoa, najjitii.

⁴⁴ Jamajjeya oya Jesosa poquije quiijje jjanequichipiquiñaquiapoa ona ojeenijjetii poquije. Majoya eponaa Jesosaja daqui-aocuema napacapoa. Daqui-aocuema Jesosaja napacajeahuajo, oya na' huosanana'yapoa.

⁴⁵ Majoya aje Jesosaa huohuiajjacacuanapoa jama ba'a: —¿Aya ecuea daqui-ao napacanaje?— Ojjaña majo nequiya saja-acapoa jama ba'a: —Chojja, eyaya pojjeama. ¿Aya shai?— Jamajjeya Pedrohua Jesosa huohuicapoa jama ba'a: —Esohuihuohuijji, ojjañacuaa miya cuiape'ecani, cuiajeashiñacani pea-ai. Aya mique daqui-ao napacanaje miquea ebajji pojjeama.—

⁴⁶ Jamatii Jesosaa huohuicao'oyapoa cuana jama ba'a: —Ecuea eba ecuea daqui-ao napacanaje. Napacajo ma ecuea eyamijo queaca'a nequi o jja-ajameequi'yojji cuayaquinananaje eya jjabaquinaje— jamaya huohuicapoa Jesosaa.

⁴⁷ Majoya epona jjabaquiapoa oya Jesosajo jja-aniquehuaquica-ajja. Jamajjeya queameteneenee cacacacapoquiapoa Jesosaque. Oja ecuioshajjajo nequiñaquimajje Jesosaja ejeojjipejjejo aniya, ojjaña cojjaneijo eponaa huohuijeyoca'yapoa ma o jja-ajaquimee'yojjijo oya Jesosaja daqui-aocuema napamajje na' huosanana'yonaje.

⁴⁸ Jamajjeya Jesosaa oya jama acapoa ba'a: —E'e she, e'ejojonei miya ejo jjashahuabaqui'yanijojoya eyaya mi na' huosamee'yonaje. Queabihuinee poqui'yocue, jja-ajaqui'yonaje mi.—

⁴⁹ Jesosa eponanijje mimianijotii pea dejja Jairoja equijo ani huoojeacapoa cuaa judío equi-ai ejjachichaquijji dejja etii poanique oja bacuaponasho'ijo huohui'yohua. Jama huohuime oya acañapoa ba'a: —Mique bacuapona jje ca mano'yonaje, chama'yotii. ¿Apiojji miyaya jjeya Jesosa dojoje o baa? ¡Mano'yonaje coma!—

⁵⁰ Jesosaa onaja huoojea dejja Jaironijje mimije shajja-ajjamajje jamatii oya huohuicapoa jama ba'a: —¡A'a queamete pojji! Miya ejoneitii jjashahuabaqui'yocue. Majoya mique bacuapona eyaya shequimeeje'yo.—

⁵¹ Majoya oja equi bañaquimajje Jesosaa ma onijje poeyanajecuana nobiquimeejjima acapoa. Pedro, Santiago, Juan, eponasho'ija chii, oja nae pea-ai caca oe nobiquimeecapoa onijjetii, mahuisoneiya.

⁵² Ma equijotiiya queahuisocuaa iñapaca-ani eponasho'i emano'yo Jesosaa bacañaquiapoa. Jamajjeya ohuaya huohuicapoa cuana jama ba'a: —¡Papajeacue quiana oe! Eponasho'i ca emano'yo pojjeama jaa. Oya ecahui'yo jaa.—

⁵³ Jesosa jama poajo soadojocapoa cuaa ma eponasho'i emano'yo chama'yotii jaa ebajojoya.

⁵⁴ Majoya Jesosaa eponasho'i me iñamajje oya janobajjima jama acapoa ba'a: —Eponasho'i, anisohua'yocue.—

⁵⁵ Eponasho'i emano'yo jaa shequi'yomajje, anisohuanana'yapoa. Majoya Jesosaa huohuicapoa o bobia'yojjijo.

⁵⁶ Enaese, echiimese pea-ai Jesosaa oja bacuapona shequimeeca'yonaje bamajje jjabaneineiquiapoa ojo. Jamatii Jesosaa oya huohuineicapoa oja peacuana eponasho'i shequimeeca'yonaje huohuiqui'yojjima yajjijo.